| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၃. သံယောဇနသုတ္တံ
3. Saṃyojanasuttaṃ
၅၃. သာဝတ္ထိယံ ဝိဟရတိ ။ပေ.။ ‘‘သံယောဇနိယေသု, ဘိက္ခဝေ, ဓမ္မေသု အသ္သာဒာနုပသ္သိနော ဝိဟရတော တဏ္ဟာ ပဝဍ္ဎတိ။ တဏ္ဟာပစ္စယာ ဥပာဒာနံ; ဥပာဒာနပစ္စယာ ဘဝော; ဘဝပစ္စယာ ဇာတိ; ဇာတိပစ္စယာ ဇရာမရဏံ သောကပရိဒေဝဒုက္ခဒောမနသ္သုပာယာသာ သမ္ဘဝန္တိ။ ဧဝမေတသ္သ ကေဝလသ္သ ဒုက္ခက္ခန္ဓသ္သ သမုဒယော ဟောတိ’’။
53. Sāvatthiyaṃ viharati …pe… ‘‘saṃyojaniyesu, bhikkhave, dhammesu assādānupassino viharato taṇhā pavaḍḍhati. Taṇhāpaccayā upādānaṃ; upādānapaccayā bhavo; bhavapaccayā jāti; jātipaccayā jarāmaraṇaṃ sokaparidevadukkhadomanassupāyāsā sambhavanti. Evametassa kevalassa dukkhakkhandhassa samudayo hoti’’.
‘‘သေယ္ယထာပိ , ဘိက္ခဝေ, တေလဉ္စ ပဋိစ္စ ဝဋ္ဋိဉ္စ ပဋိစ္စ တေလပ္ပဒီပော ဈာယေယ္ယ။ တတ္ရ ပုရိသော ကာလေန ကာလံ တေလံ အာသိဉ္စေယ္ယ ဝဋ္ဋိံ ဥပသံဟရေယ္ယ။ ဧဝဉ္ဟိ သော, ဘိက္ခဝေ, တေလပ္ပဒီပော တဒာဟာရော တဒုပာဒာနော စိရံ ဒီဃမဒ္ဓာနံ ဇလေယ္ယ။ ဧဝမေဝ ခော, ဘိက္ခဝေ, သံယောဇနိယေသု ဓမ္မေသု အသ္သာဒာနုပသ္သိနော ဝိဟရတော တဏ္ဟာ ပဝဍ္ဎတိ။ တဏ္ဟာပစ္စယာ ဥပာဒာနံ; ဥပာဒာနပစ္စယာ ဘဝော; ဘဝပစ္စယာ ဇာတိ ; ဇာတိပစ္စယာ ဇရာမရဏံ သောကပရိဒေဝဒုက္ခဒောမနသ္သုပာယာသာ သမ္ဘဝန္တိ။ ဧဝမေတသ္သ ကေဝလသ္သ ဒုက္ခက္ခန္ဓသ္သ သမုဒယော ဟောတိ။
‘‘Seyyathāpi , bhikkhave, telañca paṭicca vaṭṭiñca paṭicca telappadīpo jhāyeyya. Tatra puriso kālena kālaṃ telaṃ āsiñceyya vaṭṭiṃ upasaṃhareyya. Evañhi so, bhikkhave, telappadīpo tadāhāro tadupādāno ciraṃ dīghamaddhānaṃ jaleyya. Evameva kho, bhikkhave, saṃyojaniyesu dhammesu assādānupassino viharato taṇhā pavaḍḍhati. Taṇhāpaccayā upādānaṃ; upādānapaccayā bhavo; bhavapaccayā jāti ; jātipaccayā jarāmaraṇaṃ sokaparidevadukkhadomanassupāyāsā sambhavanti. Evametassa kevalassa dukkhakkhandhassa samudayo hoti.
‘‘သံယောဇနိယေသု, ဘိက္ခဝေ, ဓမ္မေသု အာဒီနဝာနုပသ္သိနော ဝိဟရတော တဏ္ဟာ နိရုဇ္ဈတိ။ တဏ္ဟာနိရောဓာ ဥပာဒာနနိရောဓော; ဥပာဒာနနိရောဓာ ဘဝနိရောဓော; ဘဝနိရောဓာ ဇာတိနိရောဓော; ဇာတိနိရောဓာ ဇရာမရဏံ သောကပရိဒေဝဒုက္ခဒောမနသ္သုပာယာသာ နိရုဇ္ဈန္တိ။ ဧဝမေတသ္သ ကေဝလသ္သ ဒုက္ခက္ခန္ဓသ္သ နိရောဓော ဟောတိ။
‘‘Saṃyojaniyesu, bhikkhave, dhammesu ādīnavānupassino viharato taṇhā nirujjhati. Taṇhānirodhā upādānanirodho; upādānanirodhā bhavanirodho; bhavanirodhā jātinirodho; jātinirodhā jarāmaraṇaṃ sokaparidevadukkhadomanassupāyāsā nirujjhanti. Evametassa kevalassa dukkhakkhandhassa nirodho hoti.
‘‘သေယ္ယထာပိ, ဘိက္ခဝေ, တေလဉ္စ ပဋိစ္စ ဝဋ္ဋိဉ္စ ပဋိစ္စ တေလပ္ပဒီပော ဈာယေယ္ယ။ တတ္ရ ပုရိသော န ကာလေန ကာလံ တေလံ အာသိဉ္စေယ္ယ န ဝဋ္ဋိံ ဥပသံဟရေယ္ယ။ ဧဝဉ္ဟိ သော, ဘိက္ခဝေ, တေလပ္ပဒီပော ပုရိမသ္သ စ ဥပာဒာနသ္သ ပရိယာဒာနာ အညသ္သ စ အနုပဟာရာ အနာဟာရော နိဗ္ဗာယေယ္ယ။ ဧဝမေဝ ခော, ဘိက္ခဝေ, သံယောဇနိယေသု ဓမ္မေသု အာဒီနဝာနုပသ္သိနော ဝိဟရတော တဏ္ဟာ နိရုဇ္ဈတိ။ တဏ္ဟာနိရောဓာ ဥပာဒာနနိရောဓော။ပေ.။ ဧဝမေတသ္သ ကေဝလသ္သ ဒုက္ခက္ခန္ဓသ္သ နိရောဓော ဟောတီ’’တိ။ တတိယံ။
‘‘Seyyathāpi, bhikkhave, telañca paṭicca vaṭṭiñca paṭicca telappadīpo jhāyeyya. Tatra puriso na kālena kālaṃ telaṃ āsiñceyya na vaṭṭiṃ upasaṃhareyya. Evañhi so, bhikkhave, telappadīpo purimassa ca upādānassa pariyādānā aññassa ca anupahārā anāhāro nibbāyeyya. Evameva kho, bhikkhave, saṃyojaniyesu dhammesu ādīnavānupassino viharato taṇhā nirujjhati. Taṇhānirodhā upādānanirodho…pe… evametassa kevalassa dukkhakkhandhassa nirodho hotī’’ti. Tatiyaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၃. သံယောဇနသုတ္တဝဏ္ဏနာ • 3. Saṃyojanasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၃-၄. သံယောဇနသုတ္တဒ္ဝယဝဏ္ဏနာ • 3-4. Saṃyojanasuttadvayavaṇṇanā
