| Library / Tipiṭaka / තිපිටක • Tipiṭaka / මහාවිභඞ්‌ග-අට්‌ඨකථා • Mahāvibhaṅga-aṭṭhakathā |
7. සප්‌පාණකවග්‌ගො
7. Sappāṇakavaggo
1. සඤ්‌චිච්‌චපාණසික්‌ඛාපදවණ්‌ණනා
1. Sañciccapāṇasikkhāpadavaṇṇanā
382. සප්‌පාණකවග්‌ගස්‌ස පඨමසික්‌ඛාපදෙ – ඉස්‌සාසො හොතීති ගිහිකාලෙ ධනුග්‌ගහාචරියො හොති. ජීවිතා වොරොපිතාති ජීවිතා වියොජිතා.
382. Sappāṇakavaggassa paṭhamasikkhāpade – issāso hotīti gihikāle dhanuggahācariyo hoti. Jīvitā voropitāti jīvitā viyojitā.
සික්‌ඛාපදෙපි වොරොපෙය්‍යාති වියොජෙය්‍ය. යස්‌මා පන වොහාරමත්‌තමෙවෙතං; න හෙත්‌ථ කිඤ්‌චි වියොජිතෙ සීසාලඞ්‌කාරෙ සීසං විය ජීවිතා වොරොපිතෙ පාණෙපි ජීවිතං නාම විසුං තිට්‌ඨති, අඤ්‌ඤදත්‌ථු අන්‌තරධානමෙව ගච්‌ඡති, තස්‌මා තමත්‌ථං දස්‌සෙතුං පදභාජනෙ ‘‘ජීවිතින්‌ද්‍රියං උපච්‌ඡින්‌දතී’’තිආදි වුත්‌තං. ඉමස්‌මිඤ්‌ච සික්‌ඛාපදෙ තිරච්‌ඡානගතොයෙව ‘‘පාණො’’ති වෙදිතබ්‌බො. තං ඛුද්‌දකම්‌පි මහන්‌තම්‌පි මාරෙන්‌තස්‌ස ආපත්‌තිනානාකරණං නත්‌ථි. මහන්‌තෙ පන උපක්‌කමමහන්‌තත්‌තා අකුසලමහත්‌තං හොති. පාණෙ පාණසඤ්‌ඤීති අන්‌තමසො මඤ්‌චපීඨං සොධෙන්‌තො මඞ්‌ගුලබීජකෙපි පාණසඤ්‌ඤී නික්‌කාරුණිකතාය තං භින්‌දන්‌තො අපනෙති, පාචිත්‌තියං. තස්‌මා එවරූපෙසු ඨානෙසු කාරුඤ්‌ඤං උපට්‌ඨපෙත්‌වා අප්‌පමත්‌තෙන වත්‌තං කාතබ්‌බං. සෙසං මනුස්‌සවිග්‌ගහෙ වුත්‌තනයෙනෙව වෙදිතබ්‌බං සද්‌ධිං සමුට්‌ඨානාදීහීති.
Sikkhāpadepi voropeyyāti viyojeyya. Yasmā pana vohāramattamevetaṃ; na hettha kiñci viyojite sīsālaṅkāre sīsaṃ viya jīvitā voropite pāṇepi jīvitaṃ nāma visuṃ tiṭṭhati, aññadatthu antaradhānameva gacchati, tasmā tamatthaṃ dassetuṃ padabhājane ‘‘jīvitindriyaṃ upacchindatī’’tiādi vuttaṃ. Imasmiñca sikkhāpade tiracchānagatoyeva ‘‘pāṇo’’ti veditabbo. Taṃ khuddakampi mahantampi mārentassa āpattinānākaraṇaṃ natthi. Mahante pana upakkamamahantattā akusalamahattaṃ hoti. Pāṇe pāṇasaññīti antamaso mañcapīṭhaṃ sodhento maṅgulabījakepi pāṇasaññī nikkāruṇikatāya taṃ bhindanto apaneti, pācittiyaṃ. Tasmā evarūpesu ṭhānesu kāruññaṃ upaṭṭhapetvā appamattena vattaṃ kātabbaṃ. Sesaṃ manussaviggahe vuttanayeneva veditabbaṃ saddhiṃ samuṭṭhānādīhīti.
සඤ්‌චිච්‌චපාණසික්‌ඛාපදං පඨමං.
Sañciccapāṇasikkhāpadaṃ paṭhamaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 7. සප්‌පාණකවග්‌ගො • 7. Sappāṇakavaggo
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 1. සඤ්‌චිච්‌චසික්‌ඛාපදවණ්‌ණනා • 1. Sañciccasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 1. සඤ්‌චිච්‌චපාණසික්‌ඛාපදවණ්‌ණනා • 1. Sañciccapāṇasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 1. සඤ්‌චිච්‌චපාණසික්‌ඛාපදවණ්‌ණනා • 1. Sañciccapāṇasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 1. සඤ්‌චිච්‌චපාණසික්‌ඛාපද-අත්‌ථයොජනා • 1. Sañciccapāṇasikkhāpada-atthayojanā
