Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၁၀. သင္ဃဝန္ဒနာသုတ္တံ
10. Saṅghavandanāsuttaṃ
၂၆၆. သာဝတ္ထိယံ ဇေတဝနေ။ တတ္ရ ခော။ပေ.။ ဧတဒဝောစ – ‘‘ဘူတပုဗ္ဗံ, ဘိက္ခဝေ, သက္ကော ဒေဝာနမိန္ဒော မာတလိံ သင္ဂာဟကံ အာမန္တေသိ – ‘ယောဇေဟိ, သမ္မ မာတလိ, သဟသ္သယုတ္တံ အာဇညရထံ , ဥယ္ယာနဘူမိံ ဂစ္ဆာမ သုဘူမိံ ဒသ္သနာယာ’တိ။ ‘ဧဝံ ဘဒ္ဒန္တဝာ’တိ ခော, ဘိက္ခဝေ, မာတလိ သင္ဂာဟကော သက္ကသ္သ ဒေဝာနမိန္ဒသ္သ ပဋိသ္သုတ္ဝာ, သဟသ္သယုတ္တံ အာဇညရထံ ယောဇေတ္ဝာ သက္ကသ္သ ဒေဝာနမိန္ဒသ္သ ပဋိဝေဒေသိ – ‘ယုတ္တော ခော တေ, မာရိသ, သဟသ္သယုတ္တော အာဇညရထော, ယသ္သ ဒာနိ ကာလံ မညသီ’’’တိ။ အထ ခော, ဘိက္ခဝေ , သက္ကော ဒေဝာနမိန္ဒော ဝေဇယန္တပာသာဒာ ဩရောဟန္တော အဉ္ဇလိံ ကတ္ဝာ သုဒံ ဘိက္ခုသင္ဃံ နမသ္သတိ။ အထ ခော, ဘိက္ခဝေ, မာတလိ သင္ဂာဟကော သက္ကံ ဒေဝာနမိန္ဒံ ဂာထာယ အဇ္ဈဘာသိ –
266. Sāvatthiyaṃ jetavane. Tatra kho…pe… etadavoca – ‘‘bhūtapubbaṃ, bhikkhave, sakko devānamindo mātaliṃ saṅgāhakaṃ āmantesi – ‘yojehi, samma mātali, sahassayuttaṃ ājaññarathaṃ , uyyānabhūmiṃ gacchāma subhūmiṃ dassanāyā’ti. ‘Evaṃ bhaddantavā’ti kho, bhikkhave, mātali saṅgāhako sakkassa devānamindassa paṭissutvā, sahassayuttaṃ ājaññarathaṃ yojetvā sakkassa devānamindassa paṭivedesi – ‘yutto kho te, mārisa, sahassayutto ājaññaratho, yassa dāni kālaṃ maññasī’’’ti. Atha kho, bhikkhave , sakko devānamindo vejayantapāsādā orohanto añjaliṃ katvā sudaṃ bhikkhusaṅghaṃ namassati. Atha kho, bhikkhave, mātali saṅgāhako sakkaṃ devānamindaṃ gāthāya ajjhabhāsi –
‘‘တဉ္ဟိ ဧတေ နမသ္သေယ္ယုံ၊ ပူတိဒေဟသယာ နရာ။
‘‘Tañhi ete namasseyyuṃ, pūtidehasayā narā;
နိမုဂ္ဂာ ကုဏပမ္ဟေတေ၊ ခုပ္ပိပာသသမပ္ပိတာ။
Nimuggā kuṇapamhete, khuppipāsasamappitā.
‘‘ကိံ နု တေသံ ပိဟယသိ၊ အနာဂာရာန ဝာသဝ။
‘‘Kiṃ nu tesaṃ pihayasi, anāgārāna vāsava;
အာစာရံ ဣသိနံ ဗ္ရူဟိ၊ တံ သုဏောမ ဝစော တဝာ’’တိ။
Ācāraṃ isinaṃ brūhi, taṃ suṇoma vaco tavā’’ti.
‘‘ဧတံ တေသံ ပိဟယာမိ၊ အနာဂာရာန မာတလိ။
‘‘Etaṃ tesaṃ pihayāmi, anāgārāna mātali;
ယမ္ဟာ ဂာမာ ပက္ကမန္တိ၊ အနပေက္ခာ ဝဇန္တိ တေ။
Yamhā gāmā pakkamanti, anapekkhā vajanti te.
‘‘သုမန္တမန္တိနော ဓီရာ၊ တုဏ္ဟီဘူတာ သမဉ္စရာ။
‘‘Sumantamantino dhīrā, tuṇhībhūtā samañcarā;
ဒေဝာ ဝိရုဒ္ဓာ အသုရေဟိ၊ ပုထု မစ္စာ စ မာတလိ။
Devā viruddhā asurehi, puthu maccā ca mātali.
‘‘အဝိရုဒ္ဓာ ဝိရုဒ္ဓေသု၊ အတ္တဒဏ္ဍေသု နိဗ္ဗုတာ။
‘‘Aviruddhā viruddhesu, attadaṇḍesu nibbutā;
သာဒာနေသု အနာဒာနာ၊ တေ နမသ္သာမိ မာတလီ’’တိ။
Sādānesu anādānā, te namassāmi mātalī’’ti.
‘‘သေဋ္ဌာ ဟိ ကိရ လောကသ္မိံ၊ ယေ တ္ဝံ သက္က နမသ္သသိ။
‘‘Seṭṭhā hi kira lokasmiṃ, ye tvaṃ sakka namassasi;
အဟမ္ပိ တေ နမသ္သာမိ၊ ယေ နမသ္သသိ ဝာသဝာ’’တိ။
Ahampi te namassāmi, ye namassasi vāsavā’’ti.
‘‘ဣဒံ ဝတ္ဝာန မဃဝာ၊ ဒေဝရာဇာ သုဇမ္ပတိ။
‘‘Idaṃ vatvāna maghavā, devarājā sujampati;
ဘိက္ခုသင္ဃံ နမသ္သိတ္ဝာ၊ ပမုခော ရထမာရုဟီ’’တိ။
Bhikkhusaṅghaṃ namassitvā, pamukho rathamāruhī’’ti.
ဒုတိယော ဝဂ္ဂော။
Dutiyo vaggo.
တသ္သုဒ္ဒာနံ –
Tassuddānaṃ –
ယဇမာနဉ္စ ဝန္ဒနာ၊ တယော သက္ကနမသ္သနာတိ။
Yajamānañca vandanā, tayo sakkanamassanāti.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁၀. သင္ဃဝန္ဒနာသုတ္တဝဏ္ဏနာ • 10. Saṅghavandanāsuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁၀. သင္ဃဝန္ဒနာသုတ္တဝဏ္ဏနာ • 10. Saṅghavandanāsuttavaṇṇanā