| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
10. සඞ්‌ඝවන්‌දනාසුත්‌තවණ්‌ණනා
10. Saṅghavandanāsuttavaṇṇanā
266. පූතිම්‌හි දෙහෙ මාතු සරීරෙ සයනතො, අත්‌තනො එව වා පූතිදෙහං සරීරං තස්‌මිං ඨිතතාය අවත්‌ථරිත්‌වා සයනතො පූතිදෙහසයාති යොජනා. කුණපම්‌හෙතෙති එතෙ මනුස්‌සා අසුචිදුග්‌ගන්‌ධජෙගුච්‌ඡපටික්‌කූලෙ මාතුකුච්‌ඡිසඞ්‌ඛාතෙ කුණපස්‌මිං දස මාසෙ නිමුග්‌ගා. තෙසං කින්‌නාම ත්‌වං පිහයසීති යොජනා. එතෙසං එතං විහයාමීති එතෙසං ඉසීනං එතං සම්‌මාපටිපත්‌තිං විහයාමි. ඉදානි තං පටිපත්‌තිං දස්‌සෙතුං ‘‘න තෙ සං කොට්‌ඨෙ ඔපෙන්‌තී’’ති වුත්‌තං. ධඤ්‌ඤං කොට්‌ඨෙ න පක්‌ඛිපන්‌ති පක්‌ඛිපිතබ්‌බස්‌ස ච අභාවතො. තෙනාහ ‘‘න හි එතෙසං ධඤ්‌ඤ’’න්‌ති. පරෙසං නිට්‌ඨිතන්‌ති පරෙසං ගහිතං සන්‌තකං තෙසං පාකාය නිට්‌ඨිතං. භික්‌ඛාචාරවත්‌තෙනාති පිණ්‌ඩාචරියාය. එසමානා පරියෙසන්‌තා. එවං පරියිට්‌ඨෙන. යාපෙන්‌ති, න එසන්‌ති අනෙසනං. සුසමාදින්‌නසුන්‌දරවතාති සුට්‌ඨු සමාදින්‌නසොභනවතා.
266.Pūtimhi dehe mātu sarīre sayanato, attano eva vā pūtidehaṃ sarīraṃ tasmiṃ ṭhitatāya avattharitvā sayanato pūtidehasayāti yojanā. Kuṇapamheteti ete manussā asuciduggandhajegucchapaṭikkūle mātukucchisaṅkhāte kuṇapasmiṃ dasa māse nimuggā. Tesaṃ kinnāma tvaṃ pihayasīti yojanā. Etesaṃ etaṃ vihayāmīti etesaṃ isīnaṃ etaṃ sammāpaṭipattiṃ vihayāmi. Idāni taṃ paṭipattiṃ dassetuṃ ‘‘na te saṃ koṭṭhe opentī’’ti vuttaṃ. Dhaññaṃ koṭṭhe na pakkhipanti pakkhipitabbassa ca abhāvato. Tenāha ‘‘na hi etesaṃ dhañña’’nti. Paresaṃ niṭṭhitanti paresaṃ gahitaṃ santakaṃ tesaṃ pākāya niṭṭhitaṃ. Bhikkhācāravattenāti piṇḍācariyāya. Esamānā pariyesantā. Evaṃ pariyiṭṭhena. Yāpenti, na esanti anesanaṃ. Susamādinnasundaravatāti suṭṭhu samādinnasobhanavatā.
එවං සුභාසිතභාසිනොති ගන්‌ථධුරවිපස්‌සනාධුරානං වසෙන ගුණපරිමාණසුභාසිතස්‌සෙව භාසනසීලා . අරියෙන තුණ්‌හීභූතෙන තුණ්‌හීභූතා. තතො එව මනස්‌ස සාතිසයං සමඤ්‌චරා. ගහිතදණ්‌ඩෙසු පරාමාසාදිපයුත්‌තෙසු දණ්‌ඩාදානාදිහෙතු උප්‌පජ්‌ජනකකිලෙසපරිළාහාභාවතො නිබ්‌බුතා. තෙනාහ ‘‘විස්‌සට්‌ඨදණ්‌ඩා’’ති. සාදානෙසූති සභවාදානෙසු. අනාදානාති තබ්‌බිරහිතා. තෙනාහ ‘‘භවයොනී’’තිආදි.
Evaṃ subhāsitabhāsinoti ganthadhuravipassanādhurānaṃ vasena guṇaparimāṇasubhāsitasseva bhāsanasīlā . Ariyena tuṇhībhūtena tuṇhībhūtā. Tato eva manassa sātisayaṃ samañcarā. Gahitadaṇḍesu parāmāsādipayuttesu daṇḍādānādihetu uppajjanakakilesapariḷāhābhāvato nibbutā. Tenāha ‘‘vissaṭṭhadaṇḍā’’ti. Sādānesūti sabhavādānesu. Anādānāti tabbirahitā. Tenāha ‘‘bhavayonī’’tiādi.
සඞ්‌ඝවන්‌දනාසුත්‌තවණ්‌ණනා නිට්‌ඨිතා.
Saṅghavandanāsuttavaṇṇanā niṭṭhitā.
දුතියවග්‌ගවණ්‌ණනා නිට්‌ඨිතා.
Dutiyavaggavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 10. සඞ්‌ඝවන්‌දනාසුත්‌තං • 10. Saṅghavandanāsuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 10. සඞ්‌ඝවන්‌දනාසුත්‌තවණ්‌ණනා • 10. Saṅghavandanāsuttavaṇṇanā
