Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၇. သန္တုဋ္ဌိသုတ္တံ
7. Santuṭṭhisuttaṃ
၂၇. ‘‘စတ္တာရိမာနိ , ဘိက္ခဝေ, အပ္ပာနိ စ 1 သုလဘာနိ စ, တာနိ စ အနဝဇ္ဇာနိ။ ကတမာနိ စတ္တာရိ? ပံသုကူလံ, ဘိက္ခဝေ, စီဝရာနံ အပ္ပဉ္စ သုလဘဉ္စ , တဉ္စ အနဝဇ္ဇံ။ ပိဏ္ဍိယာလောပော, ဘိက္ခဝေ, ဘောဇနာနံ အပ္ပဉ္စ သုလဘဉ္စ, တဉ္စ အနဝဇ္ဇံ။ ရုက္ခမူလံ, ဘိက္ခဝေ, သေနာသနာနံ အပ္ပဉ္စ သုလဘဉ္စ, တဉ္စ အနဝဇ္ဇံ။ ပူတိမုတ္တံ, ဘိက္ခဝေ, ဘေသဇ္ဇာနံ အပ္ပဉ္စ သုလဘဉ္စ, တဉ္စ အနဝဇ္ဇံ။ ဣမာနိ ခော, ဘိက္ခဝေ, စတ္တာရိ အပ္ပာနိ စ သုလဘာနိ စ, တာနိ စ အနဝဇ္ဇာနိ။ ယတော ခော, ဘိက္ခဝေ, ဘိက္ခု အပ္ပေန စ တုဋ္ဌော ဟောတိ သုလဘေန စ, ဣဒမသ္သာဟံ အညတရံ သာမညင္ဂန္တိ 2 ဝဒာမီ’’တိ။
27. ‘‘Cattārimāni , bhikkhave, appāni ca 3 sulabhāni ca, tāni ca anavajjāni. Katamāni cattāri? Paṃsukūlaṃ, bhikkhave, cīvarānaṃ appañca sulabhañca , tañca anavajjaṃ. Piṇḍiyālopo, bhikkhave, bhojanānaṃ appañca sulabhañca, tañca anavajjaṃ. Rukkhamūlaṃ, bhikkhave, senāsanānaṃ appañca sulabhañca, tañca anavajjaṃ. Pūtimuttaṃ, bhikkhave, bhesajjānaṃ appañca sulabhañca, tañca anavajjaṃ. Imāni kho, bhikkhave, cattāri appāni ca sulabhāni ca, tāni ca anavajjāni. Yato kho, bhikkhave, bhikkhu appena ca tuṭṭho hoti sulabhena ca, idamassāhaṃ aññataraṃ sāmaññaṅganti 4 vadāmī’’ti.
‘‘အနဝဇ္ဇေန တုဋ္ဌသ္သ၊ အပ္ပေန သုလဘေန စ။
‘‘Anavajjena tuṭṭhassa, appena sulabhena ca;
န သေနာသနမာရဗ္ဘ၊ စီဝရံ ပာနဘောဇနံ။
Na senāsanamārabbha, cīvaraṃ pānabhojanaṃ;
ဝိဃာတော ဟောတိ စိတ္တသ္သ၊ ဒိသာ နပ္ပဋိဟညတိ။
Vighāto hoti cittassa, disā nappaṭihaññati.
‘‘ယေ စသ္သ ဓမ္မာ အက္ခာတာ၊ သာမညသ္သာနုလောမိကာ။
‘‘Ye cassa dhammā akkhātā, sāmaññassānulomikā;
အဓိဂ္ဂဟိတာ တုဋ္ဌသ္သ၊ အပ္ပမတ္တသ္သ သိက္ခတော’’တိ။ သတ္တမံ။
Adhiggahitā tuṭṭhassa, appamattassa sikkhato’’ti. sattamaṃ;
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၇. သန္တုဋ္ဌိသုတ္တဝဏ္ဏနာ • 7. Santuṭṭhisuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၇. သန္တုဋ္ဌိသုတ္တဝဏ္ဏနာ • 7. Santuṭṭhisuttavaṇṇanā