Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၆. သပ္ပသုတ္တံ
6. Sappasuttaṃ
၁၄၂. ဧဝံ မေ သုတံ – ဧကံ သမယံ ဘဂဝာ ရာဇဂဟေ ဝိဟရတိ ဝေဠုဝနေ ကလန္ဒကနိဝာပေ။ တေန ခော ပန သမယေန ဘဂဝာ ရတ္တန္ဓကာရတိမိသာယံ အဗ္ဘောကာသေ နိသိန္နော ဟောတိ, ဒေဝော စ ဧကမေကံ ဖုသာယတိ။
142. Evaṃ me sutaṃ – ekaṃ samayaṃ bhagavā rājagahe viharati veḷuvane kalandakanivāpe. Tena kho pana samayena bhagavā rattandhakāratimisāyaṃ abbhokāse nisinno hoti, devo ca ekamekaṃ phusāyati.
အထ ခော မာရော ပာပိမာ ဘဂဝတော ဘယံ ဆမ္ဘိတတ္တံ လောမဟံသံ ဥပ္ပာဒေတုကာမော မဟန္တံ သပ္ပရာဇဝဏ္ဏံ အဘိနိမ္မိနိတ္ဝာ ယေန ဘဂဝာ တေနုပသင္ကမိ။ သေယ္ယထာပိ နာမ မဟတီ ဧကရုက္ခိကာ နာဝာ, ဧဝမသ္သ ကာယော ဟောတိ။ သေယ္ယထာပိ နာမ မဟန္တံ သောဏ္ဍိကာကိဠဉ္ဇံ, ဧဝမသ္သ ဖဏော ဟောတိ။ သေယ္ယထာပိ နာမ မဟတီ ကောသလိကာ ကံသပာတိ, ဧဝမသ္သ အက္ခီနိ ဘဝန္တိ။ သေယ္ယထာပိ နာမ ဒေဝေ ဂဠဂဠာယန္တေ ဝိဇ္ဇုလ္လတာ နိစ္ဆရန္တိ, ဧဝမသ္သ မုခတော ဇိဝ္ဟာ နိစ္ဆရတိ။ သေယ္ယထာပိ နာမ ကမ္မာရဂဂ္ဂရိယာ ဓမမာနာယ သဒ္ဒော ဟောတိ, ဧဝမသ္သ အသ္သာသပသ္သာသာနံ သဒ္ဒော ဟောတိ။
Atha kho māro pāpimā bhagavato bhayaṃ chambhitattaṃ lomahaṃsaṃ uppādetukāmo mahantaṃ sapparājavaṇṇaṃ abhinimminitvā yena bhagavā tenupasaṅkami. Seyyathāpi nāma mahatī ekarukkhikā nāvā, evamassa kāyo hoti. Seyyathāpi nāma mahantaṃ soṇḍikākiḷañjaṃ, evamassa phaṇo hoti. Seyyathāpi nāma mahatī kosalikā kaṃsapāti, evamassa akkhīni bhavanti. Seyyathāpi nāma deve gaḷagaḷāyante vijjullatā niccharanti, evamassa mukhato jivhā niccharati. Seyyathāpi nāma kammāragaggariyā dhamamānāya saddo hoti, evamassa assāsapassāsānaṃ saddo hoti.
အထ ခော ဘဂဝာ ‘‘မာရော အယံ ပာပိမာ’’ ဣတိ ဝိဒိတ္ဝာ မာရံ ပာပိမန္တံ ဂာထာဟိ အဇ္ဈဘာသိ –
Atha kho bhagavā ‘‘māro ayaṃ pāpimā’’ iti viditvā māraṃ pāpimantaṃ gāthāhi ajjhabhāsi –
‘‘ယော သုညဂေဟာနိ သေဝတိ၊
‘‘Yo suññagehāni sevati,
သေယ္ယော သော မုနိ အတ္တသညတော။
Seyyo so muni attasaññato;
ဝောသ္သဇ္ဇ စရေယ္ယ တတ္ထ သော၊
Vossajja careyya tattha so,
ပတိရူပဉ္ဟိ တထာဝိဓသ္သ တံ။
Patirūpañhi tathāvidhassa taṃ.
‘‘စရကာ ဗဟူ ဘေရဝာ ဗဟူ၊
‘‘Carakā bahū bheravā bahū,
လောမမ္ပိ န တတ္ထ ဣဉ္ဇယေ၊
Lomampi na tattha iñjaye,
သုညာဂာရဂတော မဟာမုနိ။
Suññāgāragato mahāmuni.
‘‘နဘံ ဖလေယ္ယ ပထဝီ စလေယ္ယ၊
‘‘Nabhaṃ phaleyya pathavī caleyya,
သဗ္ဗေပိ ပာဏာ ဥဒ သန္တသေယ္ယုံ။
Sabbepi pāṇā uda santaseyyuṃ;
သလ္လမ္ပိ စေ ဥရသိ ပကပ္ပယေယ္ယုံ၊
Sallampi ce urasi pakappayeyyuṃ,
ဥပဓီသု တာဏံ န ကရောန္တိ ဗုဒ္ဓာ’’တိ။
Upadhīsu tāṇaṃ na karonti buddhā’’ti.
အထ ခော မာရော ပာပိမာ ‘‘ဇာနာတိ မံ ဘဂဝာ, ဇာနာတိ မံ သုဂတော’’တိ ဒုက္ခီ ဒုမ္မနော တတ္ထေဝန္တရဓာယီတိ။
Atha kho māro pāpimā ‘‘jānāti maṃ bhagavā, jānāti maṃ sugato’’ti dukkhī dummano tatthevantaradhāyīti.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၆. သပ္ပသုတ္တဝဏ္ဏနာ • 6. Sappasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၆. သပ္ပသုတ္တဝဏ္ဏနာ • 6. Sappasuttavaṇṇanā