| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၈. သပ္ပုရိသဒာနသုတ္တံ
8. Sappurisadānasuttaṃ
၁၄၈. ‘‘ပဉ္စိမာနိ , ဘိက္ခဝေ, သပ္ပုရိသဒာနာနိ။ ကတမာနိ ပဉ္စ? သဒ္ဓာယ ဒာနံ ဒေတိ, သက္ကစ္စံ ဒာနံ ဒေတိ, ကာလေန ဒာနံ ဒေတိ, အနုဂ္ဂဟိတစိတ္တော 1 ဒာနံ ဒေတိ, အတ္တာနဉ္စ ပရဉ္စ အနုပဟစ္စ ဒာနံ ဒေတိ။
148. ‘‘Pañcimāni , bhikkhave, sappurisadānāni. Katamāni pañca? Saddhāya dānaṃ deti, sakkaccaṃ dānaṃ deti, kālena dānaṃ deti, anuggahitacitto 2 dānaṃ deti, attānañca parañca anupahacca dānaṃ deti.
‘‘သဒ္ဓာယ ခော ပန, ဘိက္ခဝေ, ဒာနံ ဒတ္ဝာ ယတ္ထ ယတ္ထ တသ္သ ဒာနသ္သ ဝိပာကော နိဗ္ဗတ္တတိ, အဍ္ဎော စ ဟောတိ မဟဒ္ဓနော မဟာဘောဂော, အဘိရူပော စ ဟောတိ ဒသ္သနီယော ပာသာဒိကော ပရမာယ ဝဏ္ဏပောက္ခရတာယ သမန္နာဂတော။
‘‘Saddhāya kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo, abhirūpo ca hoti dassanīyo pāsādiko paramāya vaṇṇapokkharatāya samannāgato.
‘‘သက္ကစ္စံ ခော ပန, ဘိက္ခဝေ, ဒာနံ ဒတ္ဝာ ယတ္ထ ယတ္ထ တသ္သ ဒာနသ္သ ဝိပာကော နိဗ္ဗတ္တတိ, အဍ္ဎော စ ဟောတိ မဟဒ္ဓနော မဟာဘောဂော။ ယေပိသ္သ တေ ဟောန္တိ ပုတ္တာတိ ဝာ ဒာရာတိ ဝာ ဒာသာတိ ဝာ ပေသ္သာတိ ဝာ ကမ္မကရာတိ 3 ဝာ, တေပိ သုသ္သူသန္တိ သောတံ ဩဒဟန္တိ အညာ စိတ္တံ ဥပဋ္ဌပေန္တိ။
‘‘Sakkaccaṃ kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo. Yepissa te honti puttāti vā dārāti vā dāsāti vā pessāti vā kammakarāti 4 vā, tepi sussūsanti sotaṃ odahanti aññā cittaṃ upaṭṭhapenti.
‘‘ကာလေန ခော ပန, ဘိက္ခဝေ, ဒာနံ ဒတ္ဝာ ယတ္ထ ယတ္ထ တသ္သ ဒာနသ္သ ဝိပာကော နိဗ္ဗတ္တတိ, အဍ္ဎော စ ဟောတိ မဟဒ္ဓနော မဟာဘောဂော; ကာလာဂတာ စသ္သ အတ္ထာ ပစုရာ ဟောန္တိ။
‘‘Kālena kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo; kālāgatā cassa atthā pacurā honti.
‘‘အနုဂ္ဂဟိတစိတ္တော ခော ပန, ဘိက္ခဝေ, ဒာနံ ဒတ္ဝာ ယတ္ထ ယတ္ထ တသ္သ ဒာနသ္သ ဝိပာကော နိဗ္ဗတ္တတိ, အဍ္ဎော စ ဟောတိ မဟဒ္ဓနော မဟာဘောဂော; ဥဠာရေသု စ ပဉ္စသု ကာမဂုဏေသု ဘောဂာယ စိတ္တံ နမတိ။
‘‘Anuggahitacitto kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo; uḷāresu ca pañcasu kāmaguṇesu bhogāya cittaṃ namati.
‘‘အတ္တာနဉ္စ ပရဉ္စ အနုပဟစ္စ ခော ပန, ဘိက္ခဝေ, ဒာနံ ဒတ္ဝာ ယတ္ထ ယတ္ထ တသ္သ ဒာနသ္သ ဝိပာကော နိဗ္ဗတ္တတိ, အဍ္ဎော စ ဟောတိ မဟဒ္ဓနော မဟာဘောဂော; န စသ္သ ကုတောစိ ဘောဂာနံ ဥပဃာတော အာဂစ္ဆတိ အဂ္ဂိတော ဝာ ဥဒကတော ဝာ ရာဇတော ဝာ စောရတော ဝာ အပ္ပိယတော ဝာ ဒာယာဒတော ဝာ 5။ ဣမာနိ ခော, ဘိက္ခဝေ, ပဉ္စ သပ္ပုရိသဒာနာနီ’’တိ။ အဋ္ဌမံ။
‘‘Attānañca parañca anupahacca kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo; na cassa kutoci bhogānaṃ upaghāto āgacchati aggito vā udakato vā rājato vā corato vā appiyato vā dāyādato vā 6. Imāni kho, bhikkhave, pañca sappurisadānānī’’ti. Aṭṭhamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၈. သပ္ပုရိသဒာနသုတ္တဝဏ္ဏနာ • 8. Sappurisadānasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၇-၁၀. အသပ္ပုရိသဒာနသုတ္တာဒိဝဏ္ဏနာ • 7-10. Asappurisadānasuttādivaṇṇanā
