Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya

    ၄. သရဘသုတ္တံ

    4. Sarabhasuttaṃ

    ၆၅. ဧဝံ မေ သုတံ – ဧကံ သမယံ ဘဂဝာ ရာဇဂဟေ ဝိဟရတိ ဂိဇ္ဈကူဋေ ပဗ္ဗတေ။ တေန ခော ပန သမယေန သရဘော နာမ ပရိဗ္ဗာဇကော အစိရပက္ကန္တော ဟောတိ ဣမသ္မာ ဓမ္မဝိနယာ။ သော ရာဇဂဟေ ပရိသတိ 1 ဧဝံ ဝာစံ ဘာသတိ – ‘‘အညာတော မယာ သမဏာနံ သက္ယပုတ္တိကာနံ ဓမ္မော။ အညာယ စ ပနာဟံ သမဏာနံ သက္ယပုတ္တိကာနံ ဓမ္မံ ဧဝာဟံ တသ္မာ ဓမ္မဝိနယာ အပက္ကန္တော’’တိ။ အထ ခော သမ္ဗဟုလာ ဘိက္ခူ ပုဗ္ဗဏ္ဟသမယံ နိဝာသေတ္ဝာ ပတ္တစီဝရမာဒာယ ရာဇဂဟံ ပိဏ္ဍာယ ပဝိသိံသု။ အသ္သောသုံ ခော တေ ဘိက္ခူ သရဘသ္သ ပရိဗ္ဗာဇကသ္သ ရာဇဂဟေ ပရိသတိ ဧဝံ ဝာစံ ဘာသမာနသ္သ – ‘‘အညာတော မယာ သမဏာနံ သက္ယပုတ္တိကာနံ ဓမ္မော။ အညာယ စ ပနာဟံ သမဏာနံ သက္ယပုတ္တိကာနံ ဓမ္မံ ဧဝာဟံ တသ္မာ ဓမ္မဝိနယာ အပက္ကန္တော’’တိ။

    65. Evaṃ me sutaṃ – ekaṃ samayaṃ bhagavā rājagahe viharati gijjhakūṭe pabbate. Tena kho pana samayena sarabho nāma paribbājako acirapakkanto hoti imasmā dhammavinayā. So rājagahe parisati 2 evaṃ vācaṃ bhāsati – ‘‘aññāto mayā samaṇānaṃ sakyaputtikānaṃ dhammo. Aññāya ca panāhaṃ samaṇānaṃ sakyaputtikānaṃ dhammaṃ evāhaṃ tasmā dhammavinayā apakkanto’’ti. Atha kho sambahulā bhikkhū pubbaṇhasamayaṃ nivāsetvā pattacīvaramādāya rājagahaṃ piṇḍāya pavisiṃsu. Assosuṃ kho te bhikkhū sarabhassa paribbājakassa rājagahe parisati evaṃ vācaṃ bhāsamānassa – ‘‘aññāto mayā samaṇānaṃ sakyaputtikānaṃ dhammo. Aññāya ca panāhaṃ samaṇānaṃ sakyaputtikānaṃ dhammaṃ evāhaṃ tasmā dhammavinayā apakkanto’’ti.

    အထ ခော တေ ဘိက္ခူ ရာဇဂဟေ ပိဏ္ဍာယ စရိတ္ဝာ ပစ္ဆာဘတ္တံ ပိဏ္ဍပာတပဋိက္ကန္တာ ယေန ဘဂဝာ တေနုပသင္ကမိံသု; ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ နိသီဒိံသု။ ဧကမန္တံ နိသိန္နာ ခော တေ ဘိက္ခူ ဘဂဝန္တံ ဧတဒဝောစုံ – ‘‘သရဘော နာမ, ဘန္တေ, ပရိဗ္ဗာဇကော အစိရပက္ကန္တော ဣမသ္မာ ဓမ္မဝိနယာ။ သော ရာဇဂဟေ ပရိသတိ ဧဝံ ဝာစံ ဘာသတိ – ‘အညာတော မယာ သမဏာနံ သက္ယပုတ္တိကာနံ ဓမ္မော။ အညာယ စ ပနာဟံ သမဏာနံ သက္ယပုတ္တိကာနံ ဓမ္မံ ဧဝာဟံ တသ္မာ ဓမ္မဝိနယာ အပက္ကန္တော’တိ။ သာဓု ဘန္တေ, ဘဂဝာ ယေန သိပ္ပိနိကာတီရံ 3 ပရိဗ္ဗာဇကာရာမော ယေန သရဘော ပရိဗ္ဗာဇကော တေနုပသင္ကမတု အနုကမ္ပံ ဥပာဒာယာ’’တိ။ အဓိဝာသေသိ ဘဂဝာ တုဏ္ဟီဘာဝေန။

    Atha kho te bhikkhū rājagahe piṇḍāya caritvā pacchābhattaṃ piṇḍapātapaṭikkantā yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘sarabho nāma, bhante, paribbājako acirapakkanto imasmā dhammavinayā. So rājagahe parisati evaṃ vācaṃ bhāsati – ‘aññāto mayā samaṇānaṃ sakyaputtikānaṃ dhammo. Aññāya ca panāhaṃ samaṇānaṃ sakyaputtikānaṃ dhammaṃ evāhaṃ tasmā dhammavinayā apakkanto’ti. Sādhu bhante, bhagavā yena sippinikātīraṃ 4 paribbājakārāmo yena sarabho paribbājako tenupasaṅkamatu anukampaṃ upādāyā’’ti. Adhivāsesi bhagavā tuṇhībhāvena.

    အထ ခော ဘဂဝာ သာယန္ဟသမယံ ပဋိသလ္လာနာ ဝုဋ္ဌိတော ယေန သိပ္ပိနိကာတီရံ ပရိဗ္ဗာဇကာရာမော ယေန သရဘော ပရိဗ္ဗာဇကော တေနုပသင္ကမိ; ဥပသင္ကမိတ္ဝာ ပညတ္တေ အာသနေ နိသီဒိ ။ နိသဇ္ဇ ခော ဘဂဝာ သရဘံ ပရိဗ္ဗာဇကံ ဧတဒဝောစ – ‘‘သစ္စံ ကိရ တ္ဝံ, သရဘ, ဧဝံ ဝဒေသိ – ‘အညာတော မယာ သမဏာနံ သက္ယပုတ္တိကာနံ ဓမ္မော။ အညာယ စ ပနာဟံ သမဏာနံ သက္ယပုတ္တိကာနံ ဓမ္မံ ဧဝာဟံ တသ္မာ ဓမ္မဝိနယာ အပက္ကန္တော’’’တိ? ဧဝံ ဝုတ္တေ သရဘော ပရိဗ္ဗာဇကော တုဏ္ဟီ အဟောသိ။

    Atha kho bhagavā sāyanhasamayaṃ paṭisallānā vuṭṭhito yena sippinikātīraṃ paribbājakārāmo yena sarabho paribbājako tenupasaṅkami; upasaṅkamitvā paññatte āsane nisīdi . Nisajja kho bhagavā sarabhaṃ paribbājakaṃ etadavoca – ‘‘saccaṃ kira tvaṃ, sarabha, evaṃ vadesi – ‘aññāto mayā samaṇānaṃ sakyaputtikānaṃ dhammo. Aññāya ca panāhaṃ samaṇānaṃ sakyaputtikānaṃ dhammaṃ evāhaṃ tasmā dhammavinayā apakkanto’’’ti? Evaṃ vutte sarabho paribbājako tuṇhī ahosi.

    ဒုတိယမ္ပိ ခော, ဘဂဝာ သရဘံ ပရိဗ္ဗာဇကံ ဧတဒဝောစ – ‘‘ဝဒေဟိ, သရဘ, ကိန္တိ တေ အညာတော သမဏာနံ သက္ယပုတ္တိကာနံ ဓမ္မော? သစေ တေ အပရိပူရံ ဘဝိသ္သတိ, အဟံ ပရိပူရေသ္သာမိ။ သစေ ပန တေ ပရိပူရံ ဘဝိသ္သတိ, အဟံ အနုမောဒိသ္သာမီ’’တိ။ ဒုတိယမ္ပိ ခော သရဘော ပရိဗ္ဗာဇကော တုဏ္ဟီ အဟောသိ။

    Dutiyampi kho, bhagavā sarabhaṃ paribbājakaṃ etadavoca – ‘‘vadehi, sarabha, kinti te aññāto samaṇānaṃ sakyaputtikānaṃ dhammo? Sace te aparipūraṃ bhavissati, ahaṃ paripūressāmi. Sace pana te paripūraṃ bhavissati, ahaṃ anumodissāmī’’ti. Dutiyampi kho sarabho paribbājako tuṇhī ahosi.

    တတိယမ္ပိ ခော ဘဂဝာ သရဘံ ပရိဗ္ဗာဇကံ ဧတဒဝောစ – (‘‘ယော 5 ခော သရဘ ပညာယတိ သမဏာနံ သက္ယပုတ္တိကာနံ ဓမ္မော) 6 ‘‘ဝဒေဟိ, သရဘ, ကိန္တိ တေ အညာတော သမဏာနံ သက္ယပုတ္တိကာနံ ဓမ္မော? သစေ တေ အပရိပူရံ ဘဝိသ္သတိ, အဟံ ပရိပူရေသ္သာမိ။ သစေ ပန တေ ပရိပူရံ ဘဝိသ္သတိ, အဟံ အနုမောဒိသ္သာမီ’’တိ။ တတိယမ္ပိ ခော သရဘော ပရိဗ္ဗာဇကော တုဏ္ဟီ အဟောသိ။

    Tatiyampi kho bhagavā sarabhaṃ paribbājakaṃ etadavoca – (‘‘yo 7 kho sarabha paññāyati samaṇānaṃ sakyaputtikānaṃ dhammo) 8 ‘‘vadehi, sarabha, kinti te aññāto samaṇānaṃ sakyaputtikānaṃ dhammo? Sace te aparipūraṃ bhavissati, ahaṃ paripūressāmi. Sace pana te paripūraṃ bhavissati, ahaṃ anumodissāmī’’ti. Tatiyampi kho sarabho paribbājako tuṇhī ahosi.

    အထ ခော တေ ပရိဗ္ဗာဇကာ သရဘံ ပရိဗ္ဗာဇကံ ဧတဒဝောစုံ – ‘‘ယဒေဝ ခော တ္ဝံ, အာဝုသော သရဘ, သမဏံ ဂောတမံ ယာစေယ္ယာသိ တဒေဝ တေ သမဏော ဂောတမော ပဝာရေတိ။ ဝဒေဟာဝုသော သရဘ, ကိန္တိ တေ အညာတော သမဏာနံ သက္ယပုတ္တိကာနံ ဓမ္မော? သစေ တေ အပရိပူရံ ဘဝိသ္သတိ, သမဏော ဂောတမော ပရိပူရေသ္သတိ။ သစေ ပန တေ ပရိပူရံ ဘဝိသ္သတိ, သမဏော ဂောတမော အနုမောဒိသ္သတီ’’တိ။ ဧဝံ ဝုတ္တေ သရဘော ပရိဗ္ဗာဇကော တုဏ္ဟီဘူတော မင္ကုဘူတော ပတ္တက္ခန္ဓော အဓောမုခော ပဇ္ဈာယန္တော အပ္ပဋိဘာနော နိသီဒိ။

    Atha kho te paribbājakā sarabhaṃ paribbājakaṃ etadavocuṃ – ‘‘yadeva kho tvaṃ, āvuso sarabha, samaṇaṃ gotamaṃ yāceyyāsi tadeva te samaṇo gotamo pavāreti. Vadehāvuso sarabha, kinti te aññāto samaṇānaṃ sakyaputtikānaṃ dhammo? Sace te aparipūraṃ bhavissati, samaṇo gotamo paripūressati. Sace pana te paripūraṃ bhavissati, samaṇo gotamo anumodissatī’’ti. Evaṃ vutte sarabho paribbājako tuṇhībhūto maṅkubhūto pattakkhandho adhomukho pajjhāyanto appaṭibhāno nisīdi.

    အထ ခော ဘဂဝာ သရဘံ ပရိဗ္ဗာဇကံ တုဏ္ဟီဘူတံ မင္ကုဘူတံ ပတ္တက္ခန္ဓံ အဓောမုခံ ပဇ္ဈာယန္တံ အပ္ပဋိဘာနံ ဝိဒိတ္ဝာ တေ ပရိဗ္ဗာဇကေ ဧတဒဝောစ –

    Atha kho bhagavā sarabhaṃ paribbājakaṃ tuṇhībhūtaṃ maṅkubhūtaṃ pattakkhandhaṃ adhomukhaṃ pajjhāyantaṃ appaṭibhānaṃ viditvā te paribbājake etadavoca –

    ‘‘ယော ခော မံ, ပရိဗ္ဗာဇကာ 9, ဧဝံ ဝဒေယ္ယ – ‘သမ္မာသမ္ဗုဒ္ဓသ္သ တေ ပဋိဇာနတော ဣမေ ဓမ္မာ အနဘိသမ္ဗုဒ္ဓာ’တိ, တမဟံ တတ္ထ သာဓုကံ သမနုယုဉ္ဇေယ္ယံ သမနုဂာဟေယ္ယံ သမနုဘာသေယ္ယံ။ သော ဝတ မယာ သာဓုကံ သမနုယုဉ္ဇိယမာနော သမနုဂာဟိယမာနော သမနုဘာသိယမာနော အဋ္ဌာနမေတံ အနဝကာသော ယံ သော တိဏ္ဏံ ဌာနာနံ နာညတရံ 10 ဌာနံ နိဂစ္ဆေယ္ယ, အညေန ဝာ အညံ ပဋိစရိသ္သတိ, ဗဟိဒ္ဓာ ကထံ အပနာမေသ္သတိ, ကောပဉ္စ ဒောသဉ္စ အပ္ပစ္စယဉ္စ ပာတုကရိသ္သတိ, တုဏ္ဟီဘူတော မင္ကုဘူတော 11 ပတ္တက္ခန္ဓော အဓောမုခော ပဇ္ဈာယန္တော အပ္ပဋိဘာနော နိသီဒိသ္သတိ, သေယ္ယထာပိ သရဘော ပရိဗ္ဗာဇကော။

    ‘‘Yo kho maṃ, paribbājakā 12, evaṃ vadeyya – ‘sammāsambuddhassa te paṭijānato ime dhammā anabhisambuddhā’ti, tamahaṃ tattha sādhukaṃ samanuyuñjeyyaṃ samanugāheyyaṃ samanubhāseyyaṃ. So vata mayā sādhukaṃ samanuyuñjiyamāno samanugāhiyamāno samanubhāsiyamāno aṭṭhānametaṃ anavakāso yaṃ so tiṇṇaṃ ṭhānānaṃ nāññataraṃ 13 ṭhānaṃ nigaccheyya, aññena vā aññaṃ paṭicarissati, bahiddhā kathaṃ apanāmessati, kopañca dosañca appaccayañca pātukarissati, tuṇhībhūto maṅkubhūto 14 pattakkhandho adhomukho pajjhāyanto appaṭibhāno nisīdissati, seyyathāpi sarabho paribbājako.

    ‘‘ယော ခော မံ, ပရိဗ္ဗာဇကာ, ဧဝံ ဝဒေယ္ယ – ‘ခီဏာသဝသ္သ တေ ပဋိဇာနတော ဣမေ အာသဝာ အပရိက္ခီဏာ’တိ, တမဟံ တတ္ထ သာဓုကံ သမနုယုဉ္ဇေယ္ယံ သမနုဂာဟေယ္ယံ သမနုဘာသေယ္ယံ။ သော ဝတ မယာ သာဓုကံ သမနုယုဉ္ဇိယမာနော သမနုဂာဟိယမာနော သမနုဘာသိယမာနော အဋ္ဌာနမေတံ အနဝကာသော ယံ သော တိဏ္ဏံ ဌာနာနံ နာညတရံ ဌာနံ နိဂစ္ဆေယ္ယ, အညေန ဝာ အညံ ပဋိစရိသ္သတိ, ဗဟိဒ္ဓာ ကထံ အပနာမေသ္သတိ, ကောပဉ္စ ဒောသဉ္စ အပ္ပစ္စယဉ္စ ပာတုကရိသ္သတိ, တုဏ္ဟီဘူတော မင္ကုဘူတော ပတ္တက္ခန္ဓော အဓောမုခော ပဇ္ဈာယန္တော အပ္ပဋိဘာနော နိသီဒိသ္သတိ, သေယ္ယထာပိ သရဘော ပရိဗ္ဗာဇကော။

    ‘‘Yo kho maṃ, paribbājakā, evaṃ vadeyya – ‘khīṇāsavassa te paṭijānato ime āsavā aparikkhīṇā’ti, tamahaṃ tattha sādhukaṃ samanuyuñjeyyaṃ samanugāheyyaṃ samanubhāseyyaṃ. So vata mayā sādhukaṃ samanuyuñjiyamāno samanugāhiyamāno samanubhāsiyamāno aṭṭhānametaṃ anavakāso yaṃ so tiṇṇaṃ ṭhānānaṃ nāññataraṃ ṭhānaṃ nigaccheyya, aññena vā aññaṃ paṭicarissati, bahiddhā kathaṃ apanāmessati, kopañca dosañca appaccayañca pātukarissati, tuṇhībhūto maṅkubhūto pattakkhandho adhomukho pajjhāyanto appaṭibhāno nisīdissati, seyyathāpi sarabho paribbājako.

    ‘‘ယော ခော မံ, ပရိဗ္ဗာဇကာ, ဧဝံ ဝဒေယ္ယ – ‘ယသ္သ ခော ပန တေ အတ္ထာယ ဓမ္မော ဒေသိတော, သော န နိယ္ယာတိ တက္ကရသ္သ သမ္မာ ဒုက္ခက္ခယာယာ’တိ, တမဟံ တတ္ထ သာဓုကံ သမနုယုဉ္ဇေယ္ယံ သမနုဂာဟေယ္ယံ သမနုဘာသေယ္ယံ။ သော ဝတ မယာ သာဓုကံ သမနုယုဉ္ဇိယမာနော သမနုဂာဟိယမာနော သမနုဘာသိယမာနော အဋ္ဌာနမေတံ အနဝကာသော ယံ သော တိဏ္ဏံ ဌာနာနံ နာညတရံ ဌာနံ နိဂစ္ဆေယ္ယ, အညေန ဝာ အညံ ပဋိစရိသ္သတိ, ဗဟိဒ္ဓာ ကထံ အပနာမေသ္သတိ, ကောပဉ္စ ဒောသဉ္စ အပ္ပစ္စယဉ္စ ပာတုကရိသ္သတိ, တုဏ္ဟီဘူတော မင္ကုဘူတော ပတ္တက္ခန္ဓော အဓောမုခော ပဇ္ဈာယန္တော အပ္ပဋိဘာနော နိသီဒိသ္သတိ, သေယ္ယထာပိ သရဘော ပရိဗ္ဗာဇကော’’တိ။ အထ ခော ဘဂဝာ သိပ္ပိနိကာတီရေ ပရိဗ္ဗာဇကာရာမေ တိက္ခတ္တုံ သီဟနာဒံ နဒိတ္ဝာ ဝေဟာသံ ပက္ကာမိ။

    ‘‘Yo kho maṃ, paribbājakā, evaṃ vadeyya – ‘yassa kho pana te atthāya dhammo desito, so na niyyāti takkarassa sammā dukkhakkhayāyā’ti, tamahaṃ tattha sādhukaṃ samanuyuñjeyyaṃ samanugāheyyaṃ samanubhāseyyaṃ. So vata mayā sādhukaṃ samanuyuñjiyamāno samanugāhiyamāno samanubhāsiyamāno aṭṭhānametaṃ anavakāso yaṃ so tiṇṇaṃ ṭhānānaṃ nāññataraṃ ṭhānaṃ nigaccheyya, aññena vā aññaṃ paṭicarissati, bahiddhā kathaṃ apanāmessati, kopañca dosañca appaccayañca pātukarissati, tuṇhībhūto maṅkubhūto pattakkhandho adhomukho pajjhāyanto appaṭibhāno nisīdissati, seyyathāpi sarabho paribbājako’’ti. Atha kho bhagavā sippinikātīre paribbājakārāme tikkhattuṃ sīhanādaṃ naditvā vehāsaṃ pakkāmi.

    အထ ခော တေ ပရိဗ္ဗာဇကာ အစိရပက္ကန္တသ္သ ဘဂဝတော သရဘံ ပရိဗ္ဗာဇကံ သမန္တတော ဝာစာယသန္နိတောဒကေန 15 သဉ္ဇမ္ဘရိမကံသု 16 – ‘‘သေယ္ယထာပိ, အာဝုသော သရဘ, ဗ္ရဟာရညေ ဇရသိင္ဂာလော ‘သီဟနာဒံ နဒိသ္သာမီ’တိ သိင္ဂာလကံယေဝ 17 နဒတိ, ဘေရဏ္ဍကံယေဝ နဒတိ 18; ဧဝမေဝံ ခော တ္ဝံ, အာဝုသော သရဘ, အညတ္ရေဝ သမဏေန ဂောတမေန ‘သီဟနာဒံ နဒိသ္သာမီ’တိ သိင္ဂာလကံယေဝ နဒသိ ဘေရဏ္ဍကံယေဝ နဒသိ။ သေယ္ယထာပိ, အာဝုသော သရဘ, အမ္ဗုကသဉ္စရီ 19 ‘ပုရိသကရဝိတံ 20 ရဝိသ္သာမီ’တိ အမ္ဗုကသဉ္စရိရဝိတံယေဝ ရဝတိ; ဧဝမေဝံ ခော တ္ဝံ, အာဝုသော သရဘ, အညတ္ရေဝ သမဏေန ဂောတမေန ‘ပုရိသကရဝိတံ ရဝိသ္သာမီ’တိ, အမ္ဗုကသဉ္စရိရဝိတံယေဝ ရဝသိ။ သေယ္ယထာပိ, အာဝုသော သရဘ, ဥသဘော သုညာယ ဂောသာလာယ ဂမ္ဘီရံ နဒိတဗ္ဗံ မညတိ; ဧဝမေဝံ ခော တ္ဝံ, အာဝုသော သရဘ, အညတ္ရေဝ သမဏေန ဂောတမေန ဂမ္ဘီရံ နဒိတဗ္ဗံ မညသီ’’တိ။ အထ ခော တေ ပရိဗ္ဗာဇကာ သရဘံ ပရိဗ္ဗာဇကံ သမန္တတော ဝာစာယသန္နိတောဒကေန သဉ္ဇမ္ဘရိမကံသူတိ။ စတုတ္ထံ။

    Atha kho te paribbājakā acirapakkantassa bhagavato sarabhaṃ paribbājakaṃ samantato vācāyasannitodakena 21 sañjambharimakaṃsu 22 – ‘‘seyyathāpi, āvuso sarabha, brahāraññe jarasiṅgālo ‘sīhanādaṃ nadissāmī’ti siṅgālakaṃyeva 23 nadati, bheraṇḍakaṃyeva nadati 24; evamevaṃ kho tvaṃ, āvuso sarabha, aññatreva samaṇena gotamena ‘sīhanādaṃ nadissāmī’ti siṅgālakaṃyeva nadasi bheraṇḍakaṃyeva nadasi. Seyyathāpi, āvuso sarabha, ambukasañcarī 25 ‘purisakaravitaṃ 26 ravissāmī’ti ambukasañcariravitaṃyeva ravati; evamevaṃ kho tvaṃ, āvuso sarabha, aññatreva samaṇena gotamena ‘purisakaravitaṃ ravissāmī’ti, ambukasañcariravitaṃyeva ravasi. Seyyathāpi, āvuso sarabha, usabho suññāya gosālāya gambhīraṃ naditabbaṃ maññati; evamevaṃ kho tvaṃ, āvuso sarabha, aññatreva samaṇena gotamena gambhīraṃ naditabbaṃ maññasī’’ti. Atha kho te paribbājakā sarabhaṃ paribbājakaṃ samantato vācāyasannitodakena sañjambharimakaṃsūti. Catutthaṃ.




    Next: ၅. ကေသမုတ္တိသုတ္တံ • 5. Kesamuttisuttaṃ




    Footnotes:
    1. ပရိသတိံ (သီ. ပီ.)
    2. parisatiṃ (sī. pī.)
    3. သပ္ပိနိကာတီရံ (သီ. ပီ.), သပ္ပိနိယာ တီရံ (သ္ယာ. ကံ.)
    4. sappinikātīraṃ (sī. pī.), sappiniyā tīraṃ (syā. kaṃ.)
    5. မယာ (သ္ယာ. ကံ. ပီ.)
    6. ( ) သီ. ပောတ္ထကေ နတ္ထိ
    7. mayā (syā. kaṃ. pī.)
    8. ( ) sī. potthake natthi
    9. ပရိဗ္ဗာဇကော (ပီ. က.)
    10. အညတရံ (က.)
    11. တုဏ္ဟီဘူတော ဝာ မင္ကုဘူတော (သီ. သ္ယာ. ကံ.), တုဏ္ဟီဘူတော ဝာ မင္ကုဘူတော ဝာ (ပီ.)
    12. paribbājako (pī. ka.)
    13. aññataraṃ (ka.)
    14. tuṇhībhūto vā maṅkubhūto (sī. syā. kaṃ.), tuṇhībhūto vā maṅkubhūto vā (pī.)
    15. ဝာစာသတ္တိတောဒကေန (သီ.)
    16. သဉ္စုမ္ဘရိမကံသု (ပီ., ဒီ. နိ. ၁.၄၂၁) သံ. နိ. ၂.၂၄၃ ဥပရိပာဌော ဝိယ
    17. သေဂာလကံယေဝ (သီ. သ္ယာ. ကံ. ပီ.)
    18. ဘေဒဏ္ဍကံ (က.)
    19. အမ္ဗကမဒ္ဒရီ (သီ.)
    20. ဖုသ္သကရဝိတံ (သီ.), ပုသ္သကရဝိတံ (သ္ယာ. ကံ. ပီ.)
    21. vācāsattitodakena (sī.)
    22. sañcumbharimakaṃsu (pī., dī. ni. 1.421) saṃ. ni. 2.243 uparipāṭho viya
    23. segālakaṃyeva (sī. syā. kaṃ. pī.)
    24. bhedaṇḍakaṃ (ka.)
    25. ambakamaddarī (sī.)
    26. phussakaravitaṃ (sī.), pussakaravitaṃ (syā. kaṃ. pī.)



    Related texts:



    အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၄. သရဘသုတ္တဝဏ္ဏနာ • 4. Sarabhasuttavaṇṇanā

    ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၄. သရဘသုတ္တဝဏ္ဏနာ • 4. Sarabhasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact