Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi

    ၄. သတ္တဗောဓိသတ္တဝာရော

    4. Sattabodhisattavāro

    ၃၃. ‘‘‘သမုဒယော သမုဒယော’တိ ခော, ဘိက္ခဝေ, ဝိပသ္သိသ္သ ဗောဓိသတ္တသ္သ ပုဗ္ဗေ အနနုသ္သုတေသု ဓမ္မေသု စက္ခုံ ဥဒပာဒိ။ပေ.။ အာလောကော ဥဒပာဒိ။ ‘နိရောဓော နိရောဓော’တိ ခော, ဘိက္ခဝေ, ဝိပသ္သိသ္သ ဗောဓိသတ္တသ္သ ပုဗ္ဗေ အနနုသ္သုတေသု ဓမ္မေသု စက္ခုံ ဥဒပာဒိ။ပေ.။ အာလောကော ဥဒပာဒိ’’။ ဝိပသ္သိသ္သ ဗောဓိသတ္တသ္သ ဝေယ္ယာကရဏေ ဒသ ဓမ္မာ, ဒသ အတ္ထာ, ဝီသတိ နိရုတ္တိယော, စတ္တာလီသံ 1 ဉာဏာနိ။

    33. ‘‘‘Samudayo samudayo’ti kho, bhikkhave, vipassissa bodhisattassa pubbe ananussutesu dhammesu cakkhuṃ udapādi…pe… āloko udapādi. ‘Nirodho nirodho’ti kho, bhikkhave, vipassissa bodhisattassa pubbe ananussutesu dhammesu cakkhuṃ udapādi…pe… āloko udapādi’’. Vipassissa bodhisattassa veyyākaraṇe dasa dhammā, dasa atthā, vīsati niruttiyo, cattālīsaṃ 2 ñāṇāni.

    ‘‘‘သမုဒယော သမုဒယော’တိ ခော, ဘိက္ခဝေ, သိခိသ္သ ဗောဓိသတ္တသ္သ။ပေ.။ ဝေသ္သဘုသ္သ ဗောဓိသတ္တသ္သ။ပေ.။ ကကုသန္ဓသ္သ ဗောဓိသတ္တသ္သ။ပေ.။ ကောဏာဂမနသ္သ ဗောဓိသတ္တသ္သ။ပေ.။ ကသ္သပသ္သ ဗောဓိသတ္တသ္သ ပုဗ္ဗေ အနနုသ္သုတေသု ဓမ္မေသု စက္ခုံ ဥဒပာဒိ။ပေ.။ အာလောကော ဥဒပာဒိ။ ‘နိရောဓော နိရောဓော’တိ ခော, ဘိက္ခဝေ, ကသ္သပသ္သ ဗောဓိသတ္တသ္သ ပုဗ္ဗေ အနနုသ္သုတေသု ဓမ္မေသု စက္ခုံ ဥဒပာဒိ။ပေ.။ အာလောကော ဥဒပာဒိ’’။ ကသ္သပသ္သ ဗောဓိသတ္တသ္သ ဝေယ္ယာကရဏေ ဒသ ဓမ္မာ, ဒသ အတ္ထာ, ဝီသတိ နိရုတ္တိယော, စတ္တာလီသ ဉာဏာနိ။

    ‘‘‘Samudayo samudayo’ti kho, bhikkhave, sikhissa bodhisattassa…pe… vessabhussa bodhisattassa…pe… kakusandhassa bodhisattassa…pe… koṇāgamanassa bodhisattassa…pe… kassapassa bodhisattassa pubbe ananussutesu dhammesu cakkhuṃ udapādi…pe… āloko udapādi. ‘Nirodho nirodho’ti kho, bhikkhave, kassapassa bodhisattassa pubbe ananussutesu dhammesu cakkhuṃ udapādi…pe… āloko udapādi’’. Kassapassa bodhisattassa veyyākaraṇe dasa dhammā, dasa atthā, vīsati niruttiyo, cattālīsa ñāṇāni.

    ‘‘‘သမုဒယော သမုဒယော’တိ ခော, ဘိက္ခဝေ, ဂောတမသ္သ ဗောဓိသတ္တသ္သ ပုဗ္ဗေ အနနုသ္သုတေသု ဓမ္မေသု စက္ခုံ ဥဒပာဒိ။ပေ.။ အာလောကော ဥဒပာဒိ။ ‘နိရောဓော နိရောဓော’တိ ခော, ဘိက္ခဝေ, ဂောတမသ္သ ဗောဓိသတ္တသ္သ ပုဗ္ဗေ အနနုသ္သုတေသု ဓမ္မေသု စက္ခုံ ဥဒပာဒိ။ပေ.။ အာလောကော ဥဒပာဒိ’’။ ဂောတမသ္သ ဗောဓိသတ္တသ္သ ဝေယ္ယာကရဏေ ဒသ ဓမ္မာ, ဒသ အတ္ထာ, ဝီသတိ နိရုတ္တိယော, စတ္တာလီသ ဉာဏာနိ။

    ‘‘‘Samudayo samudayo’ti kho, bhikkhave, gotamassa bodhisattassa pubbe ananussutesu dhammesu cakkhuṃ udapādi…pe… āloko udapādi. ‘Nirodho nirodho’ti kho, bhikkhave, gotamassa bodhisattassa pubbe ananussutesu dhammesu cakkhuṃ udapādi…pe… āloko udapādi’’. Gotamassa bodhisattassa veyyākaraṇe dasa dhammā, dasa atthā, vīsati niruttiyo, cattālīsa ñāṇāni.

    သတ္တန္နံ ဗောဓိသတ္တာနံ သတ္တသု ဝေယ္ယာကရဏေသု သတ္တတိ ဓမ္မာ, သတ္တတိ အတ္ထာ, စတ္တာလီသသတံ 3 နိရုတ္တိယော, အသီတိ စ ဒ္ဝေ စ ဉာဏသတာနိ။

    Sattannaṃ bodhisattānaṃ sattasu veyyākaraṇesu sattati dhammā, sattati atthā, cattālīsasataṃ 4 niruttiyo, asīti ca dve ca ñāṇasatāni.




    Next: ၅. အဘိညာဒိဝာရော • 5. Abhiññādivāro




    Footnotes:
    1. စတ္တာလီသ (က.)
    2. cattālīsa (ka.)
    3. စတ္တာရီသသတာ (သ္ယာ.)
    4. cattārīsasatā (syā.)



    Related texts:



    အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၄-၈. သတ္တဗောဓိသတ္တဝာရာဒိဝဏ္ဏနာ • 4-8. Sattabodhisattavārādivaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact