| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
4. සත්‌තවස්‌සානුබන්‌ධසුත්‌තවණ්‌ණනා
4. Sattavassānubandhasuttavaṇṇanā
160. යස්‌මා කපිලවත්‌ථුතො නික්‌ඛන්‌තකාලතො පට්‌ඨාය මාරො ඔතාරාපෙක්‌ඛො ලොකනාථං අනුබන්‌ධිතුං ආරද්‌ධො, තස්‌මා වුත්‌තං ‘‘පුරෙ බොධියා ඡබ්‌බස්‌සානී’’ති. අතිගහෙත්‌වාති අනුගන්‌ත්‌වා තස්‌ස යථාරුචි පටිපත්‌තිං අනුවත්‌තො විය හුත්‌වා.
160. Yasmā kapilavatthuto nikkhantakālato paṭṭhāya māro otārāpekkho lokanāthaṃ anubandhituṃ āraddho, tasmā vuttaṃ ‘‘pure bodhiyā chabbassānī’’ti. Atigahetvāti anugantvā tassa yathāruci paṭipattiṃ anuvatto viya hutvā.
අවජ්‌ඣායන්‌තොති පජ්‌ඣායන්‌තො. ජිතො විත්‌තපරාජිතො අසි නු. පමාණාතික්‌කන්‌තන්‌ති ගරුතරං.
Avajjhāyantoti pajjhāyanto. Jito vittaparājito asi nu. Pamāṇātikkantanti garutaraṃ.
ඛනිත්‌වා උම්‌මූලෙත්‌වා. කාමාසවාදීනි පජහන්‌තො අනාසවො.
Khanitvā ummūletvā. Kāmāsavādīni pajahanto anāsavo.
පෙහීති අපෙහි. පාරගාමිනොති පාරඞ්‌ගමනසීලා. තෙකාලිකො අයං ගාමි-සද්‌දොති ආහ ‘‘යෙපී’’තිආදි.
Pehīti apehi. Pāragāminoti pāraṅgamanasīlā. Tekāliko ayaṃ gāmi-saddoti āha ‘‘yepī’’tiādi.
මාරවිසූකානීති මාරකණ්‌ටකානි කණ්‌ටකසදිසානි මාරස්‌ස දුරාචාරානි. විරුද්‌ධසෙවිතානි විරොධවසෙන තාසංයෙව වෙවචනානි. තානි සරූපතො දස්‌සෙතුං ‘‘අප්‌පමායූ’’තිආදි වුත්‌තං. නිබ්‌බෙජනීයාති නිබ්‌බෙදදායිකා. උක්‌කණ්‌ඨනීයාති උක්‌කණ්‌ඨවහා.
Māravisūkānīti mārakaṇṭakāni kaṇṭakasadisāni mārassa durācārāni. Viruddhasevitāni virodhavasena tāsaṃyeva vevacanāni. Tāni sarūpato dassetuṃ ‘‘appamāyū’’tiādi vuttaṃ. Nibbejanīyāti nibbedadāyikā. Ukkaṇṭhanīyāti ukkaṇṭhavahā.
විකප්‌පවසෙන වෙදිතබ්‌බො ඔපම්‌මපරිකප්‌පවිසයත්‌තා තස්‌ස කිරියාපදස්‌ස. තෙනාහ ‘‘අනුපරිගච්‌ඡෙය්‍යා’’ති. එත්‌ථාති එතස්‌මිං මෙදවණ්‌ණවත්‌ථුස්‌මිං. මුදුන්‌ති මුදුමධුරසං වින්‌දෙය්‍යාම පටිලභෙය්‍යාම. අස්‌සාදොති අස්‌සාදෙතබ්‌බො.
Vikappavasenaveditabbo opammaparikappavisayattā tassa kiriyāpadassa. Tenāha ‘‘anuparigaccheyyā’’ti. Etthāti etasmiṃ medavaṇṇavatthusmiṃ. Mudunti mudumadhurasaṃ vindeyyāma paṭilabheyyāma. Assādoti assādetabbo.
සත්‌තවස්‌සානුබන්‌ධසුත්‌තවණ්‌ණනා නිට්‌ඨිතා.
Sattavassānubandhasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 4. සත්‌තවස්‌සානුබන්‌ධසුත්‌තං • 4. Sattavassānubandhasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 4. සත්‌තවස්‌සානුබන්‌ධසුත්‌තවණ්‌ණනා • 4. Sattavassānubandhasuttavaṇṇanā
