Library / Tipiṭaka / တိပိဋက • Tipiṭaka / ဝိနယဝိနိစ္ဆယ-ဥတ္တရဝိနိစ္ဆယ • Vinayavinicchaya-uttaravinicchaya |
သေဒမောစနကထာ
Sedamocanakathā
က.
Ka.
သောဠသပရိဝာရသ္သ ၊ ပရိဝာရသ္သ သာဒရာ။
Soḷasaparivārassa , parivārassa sādarā;
သုဏာထ နိပုဏေ ပဉ္ဟေ၊ ဂူဠ္ဟတ္ထေ ဘဏတော မမ။
Suṇātha nipuṇe pañhe, gūḷhatthe bhaṇato mama.
ခ.
Kha.
ဒိဝာပဇ္ဇတိ နော ရတ္တိံ၊ ရတ္တိံယေဝ စ နော ဒိဝာ။
Divāpajjati no rattiṃ, rattiṃyeva ca no divā;
ကထဉ္စ ပဋိဂ္ဂဏ္ဟန္တော၊ န ဂဏ္ဟန္တော ကထံ ပန။
Kathañca paṭiggaṇhanto, na gaṇhanto kathaṃ pana.
ဂ.
Ga.
ဆိန္ဒန္တသ္သ သိယာပတ္တိ၊ တထေဝာဆိန္ဒတောပိ စ။
Chindantassa siyāpatti, tathevāchindatopi ca;
ဆာဒေန္တသ္သ တထာပတ္တိ-န ဆာဒေန္တသ္သ ဘိက္ခုနော။
Chādentassa tathāpatti-na chādentassa bhikkhuno.
ဃ.
Gha.
ကာ စာပတ္တိ သမာပတ္တိ-လာဘိနောယေဝ ဘိက္ခုနော။
Kā cāpatti samāpatti-lābhinoyeva bhikkhuno;
အသမာပတ္တိလာဘိသ္သ၊ ကာ စ နာမသ္သ သာ ဘဝေ။
Asamāpattilābhissa, kā ca nāmassa sā bhave.
င.
Ṅa.
ဂရုကံ ဘဏတော သစ္စံ၊ အလိကံ ဘဏတော သိယုံ။
Garukaṃ bhaṇato saccaṃ, alikaṃ bhaṇato siyuṃ;
လဟုံ သစ္စံ ဘဏန္တသ္သ၊ မုသာ စ ဘဏတော ဂရုံ။
Lahuṃ saccaṃ bhaṇantassa, musā ca bhaṇato garuṃ.
စ.
Ca.
ပဝိသန္တော စ အာရာမံ၊ အာပဇ္ဇတိ န နိက္ခမံ။
Pavisanto ca ārāmaṃ, āpajjati na nikkhamaṃ;
နိက္ခမန္တောဝ အာပတ္တိ၊ န စေဝ ပဝိသံ ပန။
Nikkhamantova āpatti, na ceva pavisaṃ pana;
ဆ.
Cha.
သမာဒိယန္တော အသမာဒိယန္တော။
Samādiyanto asamādiyanto;
အနာဒိယန္တောပိ စ အာဒိယန္တော။
Anādiyantopi ca ādiyanto;
ဒေန္တော အဒေန္တောပိ သိယာ သဒောသော။
Dento adentopi siyā sadoso;
တထာ ကရောန္တောပိ စ နော ကရောန္တော။
Tathā karontopi ca no karonto.
ဇ.
Ja.
အာပဇ္ဇတိ စ ဓာရေန္တော၊ အဓာရေန္တော တထေဝ စ။
Āpajjati ca dhārento, adhārento tatheva ca;
ဒ္ဝိန္နံ မာတာ ပိတာ သာဝ၊ ကထံ ဟောတိ? ဘဏာဟိ မေ။
Dvinnaṃ mātā pitā sāva, kathaṃ hoti? Bhaṇāhi me.
ဈ.
Jha.
ဥဘတောဗ္ယဉ္ဇနာ ဣတ္ထီ၊ ဂဗ္ဘံ ဂဏ္ဟာတိ အတ္တနာ။
Ubhatobyañjanā itthī, gabbhaṃ gaṇhāti attanā;
ဂဏ္ဟာပေတိ ပရံ ဂဗ္ဘံ၊ တသ္မာ မာတာပိတာ စ သာ။
Gaṇhāpeti paraṃ gabbhaṃ, tasmā mātāpitā ca sā.
ဉ.
Ña.
ဂာမေ ဝာ ယဒိ ဝာရညေ၊ ယံ ပရေသံ မမာယိတံ။
Gāme vā yadi vāraññe, yaṃ paresaṃ mamāyitaṃ;
န ဟရန္တောဝ တံ ထေယ္ယာ၊ ကထံ ပာရာဇိကော ဘဝေ။
Na harantova taṃ theyyā, kathaṃ pārājiko bhave;
ဋ.
Ṭa.
ထေယ္ယသံဝာသကော ဧသော၊ လိင္ဂသံဝာသထေနကော။
Theyyasaṃvāsako eso, liṅgasaṃvāsathenako;
ပရဘဏ္ဍံ အဂဏ္ဟန္တော၊ တေန ဟောတိ ပရာဇိတော။
Parabhaṇḍaṃ agaṇhanto, tena hoti parājito.
ဌ.
Ṭha.
နာရိံ ရူပဝတိံ ဘိက္ခု၊ ရတ္တစိတ္တော အသညတော။
Nāriṃ rūpavatiṃ bhikkhu, rattacitto asaññato;
မေထုနံ တာယ ကတ္ဝာပိ၊ န သော ပာရာဇိကော ကထံ။
Methunaṃ tāya katvāpi, na so pārājiko kathaṃ;
ဍ.
Ḍa.
အစ္ဆရာသဒိသံ နာရိံ၊ သုပိနန္တေန ပသ္သတိ။
Accharāsadisaṃ nāriṃ, supinantena passati;
တာယ မေထုနသံယောဂေ၊ ကတေပိ န ဘဝိသ္သတိ။
Tāya methunasaṃyoge, katepi na bhavissati.
ဎ.
Ḍha.
ဗဟိဒ္ဓာ ဂေဟတော ဘိက္ခု၊ ဣတ္ထီ ဂဗ္ဘန္တရံ ဂတာ။
Bahiddhā gehato bhikkhu, itthī gabbhantaraṃ gatā;
ဆိဒ္ဒံ ဂေဟသ္သ နေဝတ္ထိ၊ ကထံ မေထုနတော စုတော။
Chiddaṃ gehassa nevatthi, kathaṃ methunato cuto;
ဏ.
Ṇa.
အန္တောဒုသ္သကုဋိဋ္ဌေန၊ မာတုဂာမေန မေထုနံ။
Antodussakuṭiṭṭhena, mātugāmena methunaṃ;
သန္ထတာဒိဝသေနေဝ၊ ကတ္ဝာ ဟောတိ ပရာဇိတော။
Santhatādivaseneva, katvā hoti parājito.
တ.
Ta.
သုတ္တေ စ ဝိနယေယေဝ၊ ခန္ဓကေ သာနုလောမိကေ။
Sutte ca vinayeyeva, khandhake sānulomike;
သဗ္ဗတ္ထ နိပုဏာ ဓီရာ၊ ဣမေ ပဉ္ဟေ ဘဏန္တိ တေ။
Sabbattha nipuṇā dhīrā, ime pañhe bhaṇanti te.
ထ.
Tha.
ခန္ဓကေ ပရိဝာရေ စ၊ ဝိနယေ သာနုလောမိကေ။
Khandhake parivāre ca, vinaye sānulomike;
အာဒရော ကရဏီယောဝ၊ ပဋုဘာဝံ ပနိစ္ဆိတာ။
Ādaro karaṇīyova, paṭubhāvaṃ panicchitā.
သေဒမောစနကထာ။
Sedamocanakathā.