| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၃. သိက္ခာနိသံသသုတ္တံ
3. Sikkhānisaṃsasuttaṃ
၂၄၅. ‘‘သိက္ခာနိသံသမိဒံ, ဘိက္ခဝေ, ဗ္ရဟ္မစရိယံ ဝုသ္သတိ ပညုတ္တရံ ဝိမုတ္တိသာရံ သတာဓိပတေယ္ယံ။ ကထဉ္စ, ဘိက္ခဝေ, သိက္ခာနိသံသံ ဟောတိ? ဣဓ, ဘိက္ခဝေ, မယာ သာဝကာနံ အာဘိသမာစာရိကာ သိက္ခာ ပညတ္တာ အပ္ပသန္နာနံ ပသာဒာယ ပသန္နာနံ ဘိယ္ယောဘာဝာယ။ ယထာ ယထာ, ဘိက္ခဝေ, မယာ သာဝကာနံ အာဘိသမာစာရိကာ သိက္ခာ ပညတ္တာ အပ္ပသန္နာနံ ပသာဒာယ ပသန္နာနံ ဘိယ္ယောဘာဝာယ တထာ တထာ သော တသ္သာ သိက္ခာယ အခဏ္ဍကာရီ ဟောတိ အစ္ဆိဒ္ဒကာရီ အသဗလကာရီ အကမ္မာသကာရီ, သမာဒာယ သိက္ခတိ သိက္ခာပဒေသု။
245. ‘‘Sikkhānisaṃsamidaṃ, bhikkhave, brahmacariyaṃ vussati paññuttaraṃ vimuttisāraṃ satādhipateyyaṃ. Kathañca, bhikkhave, sikkhānisaṃsaṃ hoti? Idha, bhikkhave, mayā sāvakānaṃ ābhisamācārikā sikkhā paññattā appasannānaṃ pasādāya pasannānaṃ bhiyyobhāvāya. Yathā yathā, bhikkhave, mayā sāvakānaṃ ābhisamācārikā sikkhā paññattā appasannānaṃ pasādāya pasannānaṃ bhiyyobhāvāya tathā tathā so tassā sikkhāya akhaṇḍakārī hoti acchiddakārī asabalakārī akammāsakārī, samādāya sikkhati sikkhāpadesu.
‘‘ပုန စပရံ, ဘိက္ခဝေ, မယာ သာဝကာနံ အာဒိဗ္ရဟ္မစရိယိကာ သိက္ခာ ပညတ္တာ သဗ္ဗသော သမ္မာ ဒုက္ခက္ခယာယ။ ယထာ ယထာ, ဘိက္ခဝေ, မယာ သာဝကာနံ အာဒိဗ္ရဟ္မစရိယိကာ သိက္ခာ ပညတ္တာ သဗ္ဗသော သမ္မာ ဒုက္ခက္ခယာယ တထာ တထာ သော တသ္သာ သိက္ခာယ အခဏ္ဍကာရီ ဟောတိ အစ္ဆိဒ္ဒကာရီ အသဗလကာရီ အကမ္မာသကာရီ, သမာဒာယ သိက္ခတိ သိက္ခာပဒေသု။ ဧဝံ ခော, ဘိက္ခဝေ, သိက္ခာနိသံသံ ဟောတိ။
‘‘Puna caparaṃ, bhikkhave, mayā sāvakānaṃ ādibrahmacariyikā sikkhā paññattā sabbaso sammā dukkhakkhayāya. Yathā yathā, bhikkhave, mayā sāvakānaṃ ādibrahmacariyikā sikkhā paññattā sabbaso sammā dukkhakkhayāya tathā tathā so tassā sikkhāya akhaṇḍakārī hoti acchiddakārī asabalakārī akammāsakārī, samādāya sikkhati sikkhāpadesu. Evaṃ kho, bhikkhave, sikkhānisaṃsaṃ hoti.
‘‘ကထဉ္စ, ဘိက္ခဝေ, ပညုတ္တရံ ဟောတိ? ဣဓ, ဘိက္ခဝေ, မယာ သာဝကာနံ ဓမ္မာ ဒေသိတာ သဗ္ဗသော သမ္မာ ဒုက္ခက္ခယာယ။ ယထာ ယထာ, ဘိက္ခဝေ, မယာ သာဝကာနံ ဓမ္မာ ဒေသိတာ သဗ္ဗသော သမ္မာ ဒုက္ခက္ခယာယ တထာ တထာသ္သ တေ ဓမ္မာ ပညာယ သမဝေက္ခိတာ ဟောန္တိ။ ဧဝံ ခော, ဘိက္ခဝေ, ပညုတ္တရံ ဟောတိ။
‘‘Kathañca, bhikkhave, paññuttaraṃ hoti? Idha, bhikkhave, mayā sāvakānaṃ dhammā desitā sabbaso sammā dukkhakkhayāya. Yathā yathā, bhikkhave, mayā sāvakānaṃ dhammā desitā sabbaso sammā dukkhakkhayāya tathā tathāssa te dhammā paññāya samavekkhitā honti. Evaṃ kho, bhikkhave, paññuttaraṃ hoti.
‘‘ကထဉ္စ , ဘိက္ခဝေ, ဝိမုတ္တိသာရံ ဟောတိ? ဣဓ, ဘိက္ခဝေ, မယာ သာဝကာနံ ဓမ္မာ ဒေသိတာ သဗ္ဗသော သမ္မာ ဒုက္ခက္ခယာယ။ ယထာ ယထာ, ဘိက္ခဝေ, မယာ သာဝကာနံ ဓမ္မာ ဒေသိတာ သဗ္ဗသော သမ္မာ ဒုက္ခက္ခယာယ တထာ တထာသ္သ တေ ဓမ္မာ ဝိမုတ္တိယာ ဖုသိတာ ဟောန္တိ။ ဧဝံ ခော, ဘိက္ခဝေ, ဝိမုတ္တိသာရံ ဟောတိ။
‘‘Kathañca , bhikkhave, vimuttisāraṃ hoti? Idha, bhikkhave, mayā sāvakānaṃ dhammā desitā sabbaso sammā dukkhakkhayāya. Yathā yathā, bhikkhave, mayā sāvakānaṃ dhammā desitā sabbaso sammā dukkhakkhayāya tathā tathāssa te dhammā vimuttiyā phusitā honti. Evaṃ kho, bhikkhave, vimuttisāraṃ hoti.
‘‘ကထဉ္စ, ဘိက္ခဝေ, သတာဓိပတေယ္ယံ ဟောတိ? ‘ဣတိ အပရိပူရံ ဝာ အာဘိသမာစာရိကံ သိက္ခံ ပရိပူရေသ္သာမိ, ပရိပူရံ ဝာ အာဘိသမာစာရိကံ သိက္ခံ တတ္ထ တတ္ထ ပညာယ အနုဂ္ဂဟေသ္သာမီ’တိ – အဇ္ဈတ္တံယေဝ သတိ သူပဋ္ဌိတာ ဟောတိ။ ‘ဣတိ အပရိပူရံ ဝာ အာဒိဗ္ရဟ္မစရိယိကံ သိက္ခံ ပရိပူရေသ္သာမိ, ပရိပူရံ ဝာ အာဒိဗ္ရဟ္မစရိယိကံ သိက္ခံ တတ္ထ တတ္ထ ပညာယ အနုဂ္ဂဟေသ္သာမီ’တိ – အဇ္ဈတ္တံယေဝ သတိ သူပဋ္ဌိတာ ဟောတိ။ ‘ဣတိ အသမဝေက္ခိတံ ဝာ ဓမ္မံ ပညာယ သမဝေက္ခိသ္သာမိ, သမဝေက္ခိတံ ဝာ ဓမ္မံ တတ္ထ တတ္ထ ပညာယ အနုဂ္ဂဟေသ္သာမီ’တိ – အဇ္ဈတ္တံယေဝ သတိ သူပဋ္ဌိတာ ဟောတိ။ ‘ဣတိ အဖုသိတံ ဝာ ဓမ္မံ ဝိမုတ္တိယာ ဖုသိသ္သာမိ, ဖုသိတံ ဝာ ဓမ္မံ တတ္ထ တတ္ထ ပညာယ အနုဂ္ဂဟေသ္သာမီ’တိ – အဇ္ဈတ္တံယေဝ သတိ သူပဋ္ဌိတာ ဟောတိ။ ဧဝံ ခော, ဘိက္ခဝေ, သတာဓိပတေယ္ယံ ဟောတိ။ ‘သိက္ခာနိသံသမိဒံ, ဘိက္ခဝေ, ဗ္ရဟ္မစရိယံ ဝုသ္သတိ ပညုတ္တရံ ဝိမုတ္တိသာရံ သတာဓိပတေယ္ယ’န္တိ, ဣတိ ယံ တံ ဝုတ္တံ ဣဒမေတံ ပဋိစ္စ ဝုတ္တ’’န္တိ။ တတိယံ။
‘‘Kathañca, bhikkhave, satādhipateyyaṃ hoti? ‘Iti aparipūraṃ vā ābhisamācārikaṃ sikkhaṃ paripūressāmi, paripūraṃ vā ābhisamācārikaṃ sikkhaṃ tattha tattha paññāya anuggahessāmī’ti – ajjhattaṃyeva sati sūpaṭṭhitā hoti. ‘Iti aparipūraṃ vā ādibrahmacariyikaṃ sikkhaṃ paripūressāmi, paripūraṃ vā ādibrahmacariyikaṃ sikkhaṃ tattha tattha paññāya anuggahessāmī’ti – ajjhattaṃyeva sati sūpaṭṭhitā hoti. ‘Iti asamavekkhitaṃ vā dhammaṃ paññāya samavekkhissāmi, samavekkhitaṃ vā dhammaṃ tattha tattha paññāya anuggahessāmī’ti – ajjhattaṃyeva sati sūpaṭṭhitā hoti. ‘Iti aphusitaṃ vā dhammaṃ vimuttiyā phusissāmi, phusitaṃ vā dhammaṃ tattha tattha paññāya anuggahessāmī’ti – ajjhattaṃyeva sati sūpaṭṭhitā hoti. Evaṃ kho, bhikkhave, satādhipateyyaṃ hoti. ‘Sikkhānisaṃsamidaṃ, bhikkhave, brahmacariyaṃ vussati paññuttaraṃ vimuttisāraṃ satādhipateyya’nti, iti yaṃ taṃ vuttaṃ idametaṃ paṭicca vutta’’nti. Tatiyaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၃. သိက္ခာနိသံသသုတ္တဝဏ္ဏနာ • 3. Sikkhānisaṃsasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၂-၃. အာပတ္တိဘယသုတ္တာဒိဝဏ္ဏနာ • 2-3. Āpattibhayasuttādivaṇṇanā
