| Library / Tipiṭaka / තිපිටක • Tipiṭaka / ඉතිවුත්‌තකපාළි • Itivuttakapāḷi |
9. සික්‌ඛානිසංසසුත්‌තං
9. Sikkhānisaṃsasuttaṃ
46. වුත්‌තඤ්‌හෙතං භගවතා, වුත්‌තමරහතාති මෙ සුතං –
46. Vuttañhetaṃ bhagavatā, vuttamarahatāti me sutaṃ –
‘‘සික්‌ඛානිසංසා , භික්‌ඛවෙ, විහරථ පඤ්‌ඤුත්‌තරා විමුත්‌තිසාරා සතාධිපතෙය්‍යා. සික්‌ඛානිසංසානං, භික්‌ඛවෙ, විහරතං පඤ්‌ඤුත්‌තරානං විමුත්‌තිසාරානං සතාධිපතෙය්‍යානං ද්‌වින්‌නං ඵලානං අඤ්‌ඤතරං ඵලං පාටිකඞ්‌ඛං – දිට්‌ඨෙව ධම්‌මෙ අඤ්‌ඤා, සති වා උපාදිසෙසෙ අනාගාමිතා’’ති. එතමත්‌ථං භගවා අවොච. තත්‌ථෙතං ඉති වුච්‌චති –
‘‘Sikkhānisaṃsā , bhikkhave, viharatha paññuttarā vimuttisārā satādhipateyyā. Sikkhānisaṃsānaṃ, bhikkhave, viharataṃ paññuttarānaṃ vimuttisārānaṃ satādhipateyyānaṃ dvinnaṃ phalānaṃ aññataraṃ phalaṃ pāṭikaṅkhaṃ – diṭṭheva dhamme aññā, sati vā upādisese anāgāmitā’’ti. Etamatthaṃ bhagavā avoca. Tatthetaṃ iti vuccati –
‘‘පරිපුණ්‌ණසික්‌ඛං 1 අපහානධම්‌මං, පඤ්‌ඤුත්‌තරං ජාතිඛයන්‌තදස්‌සිං;
‘‘Paripuṇṇasikkhaṃ 2 apahānadhammaṃ, paññuttaraṃ jātikhayantadassiṃ;
තං වෙ මුනිං අන්‌තිමදෙහධාරිං, මාරඤ්‌ජහං බ්‍රූමි ජරාය පාරගුං.
Taṃ ve muniṃ antimadehadhāriṃ, mārañjahaṃ brūmi jarāya pāraguṃ.
‘‘තස්‌මා සදා ඣානරතා සමාහිතා, ආතාපිනො ජාතිඛයන්‌තදස්‌සිනො;
‘‘Tasmā sadā jhānaratā samāhitā, ātāpino jātikhayantadassino;
මාරං සසෙනං අභිභුය්‍ය භික්‌ඛවො, භවථ ජාතිමරණස්‌ස පාරගා’’ති.
Māraṃ sasenaṃ abhibhuyya bhikkhavo, bhavatha jātimaraṇassa pāragā’’ti.
අයම්‌පි අත්‌ථො වුත්‌තො භගවතා, ඉති මෙ සුතන්‌ති. නවමං.
Ayampi attho vutto bhagavatā, iti me sutanti. Navamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / ඉතිවුත්‌තක-අට්‌ඨකථා • Itivuttaka-aṭṭhakathā / 9. සික්‌ඛානිසංසසුත්‌තවණ්‌ණනා • 9. Sikkhānisaṃsasuttavaṇṇanā
