| Library / Tipiṭaka / တိပိဋက • Tipiṭaka / ဝိဘင္ဂပာဠိ • Vibhaṅgapāḷi |
၁၄. သိက္ခာပဒဝိဘင္ဂော
14. Sikkhāpadavibhaṅgo
၁. အဘိဓမ္မဘာဇနီယံ
1. Abhidhammabhājanīyaṃ
၇၀၃ . ပဉ္စ သိက္ခာပဒာနိ – ပာဏာတိပာတာ ဝေရမဏီ သိက္ခာပဒံ, အဒိန္နာဒာနာ ဝေရမဏီ သိက္ခာပဒံ, ကာမေသုမိစ္ဆာစာရာ ဝေရမဏီ သိက္ခာပဒံ, မုသာဝာဒာ ဝေရမဏီ သိက္ခာပဒံ, သုရာမေရယမဇ္ဇပမာဒဋ္ဌာနာ ဝေရမဏီ သိက္ခာပဒံ။
703. Pañca sikkhāpadāni – pāṇātipātā veramaṇī sikkhāpadaṃ, adinnādānā veramaṇī sikkhāpadaṃ, kāmesumicchācārā veramaṇī sikkhāpadaṃ, musāvādā veramaṇī sikkhāpadaṃ, surāmerayamajjapamādaṭṭhānā veramaṇī sikkhāpadaṃ.
၇၀၄. တတ္ထ ကတမံ ပာဏာတိပာတာ ဝေရမဏီ သိက္ခာပဒံ? ယသ္မိံ သမယေ ကာမာဝစရံ ကုသလံ စိတ္တံ ဥပ္ပန္နံ ဟောတိ သောမနသ္သသဟဂတံ ဉာဏသမ္ပယုတ္တံ ပာဏာတိပာတာ ဝိရမန္တသ္သ, ယာ တသ္မိံ သမယေ ပာဏာတိပာတာ အာရတိ ဝိရတိ ပဋိဝိရတိ ဝေရမဏီ အကိရိယာ အကရဏံ အနဇ္ဈာပတ္တိ ဝေလာအနတိက္ကမော သေတုဃာတော – ဣဒံ ဝုစ္စတိ ‘‘ပာဏာတိပာတာ ဝေရမဏီ သိက္ခာပဒံ’’။ အဝသေသာ ဓမ္မာ ဝေရမဏိယာ သမ္ပယုတ္တာ။
704. Tattha katamaṃ pāṇātipātā veramaṇī sikkhāpadaṃ? Yasmiṃ samaye kāmāvacaraṃ kusalaṃ cittaṃ uppannaṃ hoti somanassasahagataṃ ñāṇasampayuttaṃ pāṇātipātā viramantassa, yā tasmiṃ samaye pāṇātipātā ārati virati paṭivirati veramaṇī akiriyā akaraṇaṃ anajjhāpatti velāanatikkamo setughāto – idaṃ vuccati ‘‘pāṇātipātā veramaṇī sikkhāpadaṃ’’. Avasesā dhammā veramaṇiyā sampayuttā.
တတ္ထ ကတမံ ပာဏာတိပာတာ ဝေရမဏီ သိက္ခာပဒံ? ယသ္မိံ သမယေ ကာမာဝစရံ ကုသလံ စိတ္တံ ဥပ္ပန္နံ ဟောတိ သောမနသ္သသဟဂတံ ဉာဏသမ္ပယုတ္တံ ပာဏာတိပာတာ ဝိရမန္တသ္သ, ယာ တသ္မိံ သမယေ စေတနာ သဉ္စေတနာ သဉ္စေတယိတတ္တံ – ဣဒံ ဝုစ္စတိ ‘‘ပာဏာတိပာတာ ဝေရမဏီ သိက္ခာပဒံ’’။ အဝသေသာ ဓမ္မာ စေတနာယ သမ္ပယုတ္တာ။
Tattha katamaṃ pāṇātipātā veramaṇī sikkhāpadaṃ? Yasmiṃ samaye kāmāvacaraṃ kusalaṃ cittaṃ uppannaṃ hoti somanassasahagataṃ ñāṇasampayuttaṃ pāṇātipātā viramantassa, yā tasmiṃ samaye cetanā sañcetanā sañcetayitattaṃ – idaṃ vuccati ‘‘pāṇātipātā veramaṇī sikkhāpadaṃ’’. Avasesā dhammā cetanāya sampayuttā.
တတ္ထ ကတမံ ပာဏာတိပာတာ ဝေရမဏီ သိက္ခာပဒံ? ယသ္မိံ သမယေ ကာမာဝစရံ ကုသလံ စိတ္တံ ဥပ္ပန္နံ ဟောတိ သောမနသ္သသဟဂတံ ဉာဏသမ္ပယုတ္တံ ပာဏာတိပာတာ ဝိရမန္တသ္သ, ယော တသ္မိံ သမယေ ဖသ္သော။ပေ.။ ပဂ္ဂာဟော အဝိက္ခေပော – ဣဒံ ဝုစ္စတိ ‘‘ပာဏာတိပာတာ ဝေရမဏီ သိက္ခာပဒံ’’ ။
Tattha katamaṃ pāṇātipātā veramaṇī sikkhāpadaṃ? Yasmiṃ samaye kāmāvacaraṃ kusalaṃ cittaṃ uppannaṃ hoti somanassasahagataṃ ñāṇasampayuttaṃ pāṇātipātā viramantassa, yo tasmiṃ samaye phasso…pe… paggāho avikkhepo – idaṃ vuccati ‘‘pāṇātipātā veramaṇī sikkhāpadaṃ’’ .
တတ္ထ ကတမံ ပာဏာတိပာတာ ဝေရမဏီ သိက္ခာပဒံ? ယသ္မိံ သမယေ ကာမာဝစရံ ကုသလံ စိတ္တံ ဥပ္ပန္နံ ဟောတိ သောမနသ္သသဟဂတံ ဉာဏသမ္ပယုတ္တံ သသင္ခာရေန။ပေ.။ သောမနသ္သသဟဂတံ ဉာဏဝိပ္ပယုတ္တံ။ပေ.။ သောမနသ္သသဟဂတံ ဉာဏဝိပ္ပယုတ္တံ သသင္ခာရေန။ပေ.။ ဥပေက္ခာသဟဂတံ ဉာဏသမ္ပယုတ္တံ။ပေ.။ ဥပေက္ခာသဟဂတံ ဉာဏသမ္ပယုတ္တံ သသင္ခာရေန။ပေ.။ ဥပေက္ခာသဟဂတံ ဉာဏဝိပ္ပယုတ္တံ။ပေ.။ ဥပေက္ခာသဟဂတံ ဉာဏဝိပ္ပယုတ္တံ သသင္ခာရေန ပာဏာတိပာတာ ဝိရမန္တသ္သ, ယာ တသ္မိံ သမယေ ပာဏာတိပာတာ အာရတိ ဝိရတိ ပဋိဝိရတိ ဝေရမဏီ အကိရိယာ အကရဏံ အနဇ္ဈာပတ္တိ ဝေလာအနတိက္ကမော သေတုဃာတော – ဣဒံ ဝုစ္စတိ ‘‘ပာဏာတိပာတာ ဝေရမဏီ သိက္ခာပဒံ’’။ အဝသေသာ ဓမ္မာ ဝေရမဏိယာ သမ္ပယုတ္တာ။
Tattha katamaṃ pāṇātipātā veramaṇī sikkhāpadaṃ? Yasmiṃ samaye kāmāvacaraṃ kusalaṃ cittaṃ uppannaṃ hoti somanassasahagataṃ ñāṇasampayuttaṃ sasaṅkhārena…pe… somanassasahagataṃ ñāṇavippayuttaṃ…pe… somanassasahagataṃ ñāṇavippayuttaṃ sasaṅkhārena…pe… upekkhāsahagataṃ ñāṇasampayuttaṃ…pe… upekkhāsahagataṃ ñāṇasampayuttaṃ sasaṅkhārena…pe… upekkhāsahagataṃ ñāṇavippayuttaṃ…pe… upekkhāsahagataṃ ñāṇavippayuttaṃ sasaṅkhārena pāṇātipātā viramantassa, yā tasmiṃ samaye pāṇātipātā ārati virati paṭivirati veramaṇī akiriyā akaraṇaṃ anajjhāpatti velāanatikkamo setughāto – idaṃ vuccati ‘‘pāṇātipātā veramaṇī sikkhāpadaṃ’’. Avasesā dhammā veramaṇiyā sampayuttā.
၇၀၅. တတ္ထ ကတမံ ပာဏာတိပာတာ ဝေရမဏီ သိက္ခာပဒံ? ယသ္မိံ သမယေ ကာမာဝစရံ ကုသလံ စိတ္တံ ဥပ္ပန္နံ ဟောတိ ဥပေက္ခာသဟဂတံ ဉာဏဝိပ္ပယုတ္တံ သသင္ခာရေန ပာဏာတိပာတာ ဝိရမန္တသ္သ, ယာ တသ္မိံ သမယေ စေတနာ သဉ္စေတနာ သဉ္စေတယိတတ္တံ – ဣဒံ ဝုစ္စတိ ‘‘ပာဏာတိပာတာ ဝေရမဏီ သိက္ခာပဒံ’’။ အဝသေသာ ဓမ္မာ စေတနာယ သမ္ပယုတ္တာ။
705. Tattha katamaṃ pāṇātipātā veramaṇī sikkhāpadaṃ? Yasmiṃ samaye kāmāvacaraṃ kusalaṃ cittaṃ uppannaṃ hoti upekkhāsahagataṃ ñāṇavippayuttaṃ sasaṅkhārena pāṇātipātā viramantassa, yā tasmiṃ samaye cetanā sañcetanā sañcetayitattaṃ – idaṃ vuccati ‘‘pāṇātipātā veramaṇī sikkhāpadaṃ’’. Avasesā dhammā cetanāya sampayuttā.
တတ္ထ ကတမံ ပာဏာတိပာတာ ဝေရမဏီ သိက္ခာပဒံ? ယသ္မိံ သမယေ ကာမာဝစရံ ကုသလံ စိတ္တံ ဥပ္ပန္နံ ဟောတိ ဥပေက္ခာသဟဂတံ ဉာဏဝိပ္ပယုတ္တံ သသင္ခာရေန ပာဏာတိပာတာ ဝိရမန္တသ္သ ဖသ္သော။ပေ.။ ပဂ္ဂာဟော အဝိက္ခေပော – ဣဒံ ဝုစ္စတိ ‘‘ပာဏာတိပာတာ ဝေရမဏီ သိက္ခာပဒံ’’။
Tattha katamaṃ pāṇātipātā veramaṇī sikkhāpadaṃ? Yasmiṃ samaye kāmāvacaraṃ kusalaṃ cittaṃ uppannaṃ hoti upekkhāsahagataṃ ñāṇavippayuttaṃ sasaṅkhārena pāṇātipātā viramantassa phasso…pe… paggāho avikkhepo – idaṃ vuccati ‘‘pāṇātipātā veramaṇī sikkhāpadaṃ’’.
၇၀၆. တတ္ထ ကတမံ အဒိန္နာဒာနာ ဝေရမဏီ သိက္ခာပဒံ။ပေ.။ ကာမေသုမိစ္ဆာစာရာ ဝေရမဏီ သိက္ခာပဒံ။ပေ.။ မုသာဝာဒာ ဝေရမဏီ သိက္ခာပဒံ။ပေ.။ သုရာမေရယမဇ္ဇပမာဒဋ္ဌာနာ ဝေရမဏီ သိက္ခာပဒံ? ယသ္မိံ သမယေ ကာမာဝစရံ ကုသလံ စိတ္တံ ဥပ္ပန္နံ ဟောတိ သောမနသ္သသဟဂတံ ဉာဏသမ္ပယုတ္တံ သုရာမေရယမဇ္ဇပမာဒဋ္ဌာနာ ဝိရမန္တသ္သ, ယာ တသ္မိံ သမယေ သုရာမေရယမဇ္ဇပမာဒဋ္ဌာနာ အာရတိ ဝိရတိ ပဋိဝိရတိ ဝေရမဏီ အကိရိယာ အကရဏံ အနဇ္ဈာပတ္တိ ဝေလာအနတိက္ကမော သေတုဃာတော – ဣဒံ ဝုစ္စတိ ‘‘သုရာမေရယမဇ္ဇပမာဒဋ္ဌာနာ ဝေရမဏီ သိက္ခာပဒံ’’။ အဝသေသာ ဓမ္မာ ဝေရမဏိယာ သမ္ပယုတ္တာ။
706. Tattha katamaṃ adinnādānā veramaṇī sikkhāpadaṃ…pe… kāmesumicchācārā veramaṇī sikkhāpadaṃ…pe… musāvādā veramaṇī sikkhāpadaṃ…pe… surāmerayamajjapamādaṭṭhānā veramaṇī sikkhāpadaṃ? Yasmiṃ samaye kāmāvacaraṃ kusalaṃ cittaṃ uppannaṃ hoti somanassasahagataṃ ñāṇasampayuttaṃ surāmerayamajjapamādaṭṭhānā viramantassa, yā tasmiṃ samaye surāmerayamajjapamādaṭṭhānā ārati virati paṭivirati veramaṇī akiriyā akaraṇaṃ anajjhāpatti velāanatikkamo setughāto – idaṃ vuccati ‘‘surāmerayamajjapamādaṭṭhānā veramaṇī sikkhāpadaṃ’’. Avasesā dhammā veramaṇiyā sampayuttā.
တတ္ထ ကတမံ သုရာမေရယမဇ္ဇပမာဒဋ္ဌာနာ ဝေရမဏီ သိက္ခာပဒံ, ယသ္မိံ သမယေ ကာမာဝစရံ ကုသလံ စိတ္တံ ဥပ္ပန္နံ ဟောတိ သောမနသ္သသဟဂတံ ဉာဏသမ္ပယုတ္တံ သုရာမေရယမဇ္ဇပမာဒဋ္ဌာနာ ဝိရမန္တသ္သ, ယာ တသ္မိံ သမယေ စေတနာ သဉ္စေတနာ သဉ္စေတယိတတ္တံ – ဣဒံ ဝုစ္စတိ ‘‘သုရာမေရယမဇ္ဇပမာဒဋ္ဌာနာ ဝေရမဏီ သိက္ခာပဒံ’’။ အဝသေသာ ဓမ္မာ စေတနာယ သမ္ပယုတ္တာ။
Tattha katamaṃ surāmerayamajjapamādaṭṭhānā veramaṇī sikkhāpadaṃ, yasmiṃ samaye kāmāvacaraṃ kusalaṃ cittaṃ uppannaṃ hoti somanassasahagataṃ ñāṇasampayuttaṃ surāmerayamajjapamādaṭṭhānā viramantassa, yā tasmiṃ samaye cetanā sañcetanā sañcetayitattaṃ – idaṃ vuccati ‘‘surāmerayamajjapamādaṭṭhānā veramaṇī sikkhāpadaṃ’’. Avasesā dhammā cetanāya sampayuttā.
တတ္ထ ကတမံ သုရာမေရယမဇ္ဇပမာဒဋ္ဌာနာ ဝေရမဏီ သိက္ခာပဒံ? ယသ္မိံ သမယေ ကာမာဝစရံ ကုသလံ စိတ္တံ ဥပ္ပန္နံ ဟောတိ သောမနသ္သသဟဂတံ ဉာဏသမ္ပယုတ္တံ သုရာမေရယမဇ္ဇပမာဒဋ္ဌာနာ ဝိရမန္တသ္သ, ယော တသ္မိံ သမယေ ဖသ္သော။ပေ.။ ပဂ္ဂာဟော အဝိက္ခေပော – ဣဒံ ဝုစ္စတိ ‘‘သုရာမေရယမဇ္ဇပမာဒဋ္ဌာနာ ဝေရမဏီ သိက္ခာပဒံ’’။
Tattha katamaṃ surāmerayamajjapamādaṭṭhānā veramaṇī sikkhāpadaṃ? Yasmiṃ samaye kāmāvacaraṃ kusalaṃ cittaṃ uppannaṃ hoti somanassasahagataṃ ñāṇasampayuttaṃ surāmerayamajjapamādaṭṭhānā viramantassa, yo tasmiṃ samaye phasso…pe… paggāho avikkhepo – idaṃ vuccati ‘‘surāmerayamajjapamādaṭṭhānā veramaṇī sikkhāpadaṃ’’.
တတ္ထ ကတမံ သုရာမေရယမဇ္ဇပမာဒဋ္ဌာနာ ဝေရမဏီ သိက္ခာပဒံ? ယသ္မိံ သမယေ ကာမာဝစရံ ကုသလံ စိတ္တံ ဥပ္ပန္နံ ဟောတိ သောမနသ္သသဟဂတံ ဉာဏသမ္ပယုတ္တံ သသင္ခာရေန။ပေ.။ သောမနသ္သသဟဂတံ ဉာဏဝိပ္ပယုတ္တံ။ပေ.။ သောမနသ္သသဟဂတံ ဉာဏဝိပ္ပယုတ္တံ သသင္ခာရေန။ပေ.။ ဥပေက္ခာသဟဂတံ ဉာဏသမ္ပယုတ္တံ။ပေ.။ ဥပေက္ခာသဟဂတံ ဉာဏသမ္ပယုတ္တံ သသင္ခာရေန။ပေ.။ ဥပေက္ခာသဟဂတံ ဉာဏဝိပ္ပယုတ္တံ။ပေ.။ ဥပေက္ခာသဟဂတံ ဉာဏဝိပ္ပယုတ္တံ သသင္ခာရေန သုရာမေရယမဇ္ဇပမာဒဋ္ဌာနာ ဝိရမန္တသ္သ, ယာ တသ္မိံ သမယေ သုရာမေရယမဇ္ဇပမာဒဋ္ဌာနာ အာရတိ ဝိရတိ ပဋိဝိရတိ ဝေရမဏီ အကိရိယာ အကရဏံ အနဇ္ဈာပတ္တိ ဝေလာအနတိက္ကမော သေတုဃာတော – ဣဒံ ဝုစ္စတိ ‘‘သုရာမေရယမဇ္ဇပမာဒဋ္ဌာနာ ဝေရမဏီ သိက္ခာပဒံ’’။ အဝသေသာ ဓမ္မာ ဝေရမဏိယာ သမ္ပယုတ္တာ။
Tattha katamaṃ surāmerayamajjapamādaṭṭhānā veramaṇī sikkhāpadaṃ? Yasmiṃ samaye kāmāvacaraṃ kusalaṃ cittaṃ uppannaṃ hoti somanassasahagataṃ ñāṇasampayuttaṃ sasaṅkhārena…pe… somanassasahagataṃ ñāṇavippayuttaṃ…pe… somanassasahagataṃ ñāṇavippayuttaṃ sasaṅkhārena…pe… upekkhāsahagataṃ ñāṇasampayuttaṃ…pe… upekkhāsahagataṃ ñāṇasampayuttaṃ sasaṅkhārena…pe… upekkhāsahagataṃ ñāṇavippayuttaṃ…pe… upekkhāsahagataṃ ñāṇavippayuttaṃ sasaṅkhārena surāmerayamajjapamādaṭṭhānā viramantassa, yā tasmiṃ samaye surāmerayamajjapamādaṭṭhānā ārati virati paṭivirati veramaṇī akiriyā akaraṇaṃ anajjhāpatti velāanatikkamo setughāto – idaṃ vuccati ‘‘surāmerayamajjapamādaṭṭhānā veramaṇī sikkhāpadaṃ’’. Avasesā dhammā veramaṇiyā sampayuttā.
၇၀၇. တတ္ထ ကတမံ သုရာမေရယမဇ္ဇပမာဒဋ္ဌာနာ ဝေရမဏီ သိက္ခာပဒံ? ယသ္မိံ သမယေ ကာမာဝစရံ ကုသလံ စိတ္တံ ဥပ္ပန္နံ ဟောတိ ဥပေက္ခာသဟဂတံ ဉာဏဝိပ္ပယုတ္တံ သသင္ခာရေန သုရာမေရယမဇ္ဇပမာဒဋ္ဌာနာ ဝိရမန္တသ္သ, ယာ တသ္မိံ သမယေ စေတနာ သဉ္စေတနာ သဉ္စေတယိတတ္တံ – ဣဒံ ဝုစ္စတိ ‘‘သုရာမေရယမဇ္ဇပမာဒဋ္ဌာနာ ဝေရမဏီ သိက္ခာပဒံ’’။ အဝသေသာ ဓမ္မာ စေတနာယ သမ္ပယုတ္တာ။
707. Tattha katamaṃ surāmerayamajjapamādaṭṭhānā veramaṇī sikkhāpadaṃ? Yasmiṃ samaye kāmāvacaraṃ kusalaṃ cittaṃ uppannaṃ hoti upekkhāsahagataṃ ñāṇavippayuttaṃ sasaṅkhārena surāmerayamajjapamādaṭṭhānā viramantassa, yā tasmiṃ samaye cetanā sañcetanā sañcetayitattaṃ – idaṃ vuccati ‘‘surāmerayamajjapamādaṭṭhānā veramaṇī sikkhāpadaṃ’’. Avasesā dhammā cetanāya sampayuttā.
တတ္ထ ကတမံ သုရာမေရယမဇ္ဇပမာဒဋ္ဌာနာ ဝေရမဏီ သိက္ခာပဒံ? ယသ္မိံ သမယေ ကာမာဝစရံ ကုသလံ စိတ္တံ ဥပ္ပန္နံ ဟောတိ ဥပေက္ခာသဟဂတံ ဉာဏဝိပ္ပယုတ္တံ သသင္ခာရေန သုရာမေရယမဇ္ဇပမာဒဋ္ဌာနာ ဝိရမန္တသ္သ , ယော တသ္မိံ သမယေ ဖသ္သော။ပေ.။ ပဂ္ဂာဟော အဝိက္ခေပော – ဣဒံ ဝုစ္စတိ ‘‘သုရာမေရယမဇ္ဇပမာဒဋ္ဌာနာ ဝေရမဏီ သိက္ခာပဒံ’’။
Tattha katamaṃ surāmerayamajjapamādaṭṭhānā veramaṇī sikkhāpadaṃ? Yasmiṃ samaye kāmāvacaraṃ kusalaṃ cittaṃ uppannaṃ hoti upekkhāsahagataṃ ñāṇavippayuttaṃ sasaṅkhārena surāmerayamajjapamādaṭṭhānā viramantassa , yo tasmiṃ samaye phasso…pe… paggāho avikkhepo – idaṃ vuccati ‘‘surāmerayamajjapamādaṭṭhānā veramaṇī sikkhāpadaṃ’’.
၇၀၈. ပဉ္စ သိက္ခာပဒာနိ – ပာဏာတိပာတာ ဝေရမဏီ သိက္ခာပဒံ, အဒိန္နာဒာနာ ဝေရမဏီ သိက္ခာပဒံ, ကာမေသုမိစ္ဆာစာရာ ဝေရမဏီ သိက္ခာပဒံ , မုသာဝာဒာ ဝေရမဏီ သိက္ခာပဒံ, သုရာမေရယမဇ္ဇပမာဒဋ္ဌာနာ ဝေရမဏီ သိက္ခာပဒံ။
708. Pañca sikkhāpadāni – pāṇātipātā veramaṇī sikkhāpadaṃ, adinnādānā veramaṇī sikkhāpadaṃ, kāmesumicchācārā veramaṇī sikkhāpadaṃ , musāvādā veramaṇī sikkhāpadaṃ, surāmerayamajjapamādaṭṭhānā veramaṇī sikkhāpadaṃ.
၇၀၉. တတ္ထ ကတမံ ပာဏာတိပာတာ ဝေရမဏီ သိက္ခာပဒံ? ယသ္မိံ သမယေ ကာမာဝစရံ ကုသလံ စိတ္တံ ဥပ္ပန္နံ ဟောတိ သောမနသ္သသဟဂတံ ဉာဏသမ္ပယုတ္တံ ဟီနံ။ မဇ္ဈိမံ။ ပဏီတံ။ ဆန္ဒာဓိပတေယ္ယံ။ ဝီရိယာဓိပတေယ္ယံ။ စိတ္တာဓိပတေယ္ယံ။ ဝီမံသာဓိပတေယ္ယံ။ ဆန္ဒာဓိပတေယ္ယံ ဟီနံ။ မဇ္ဈိမံ။ ပဏီတံ။ ဝီရိယာဓိပတေယ္ယံ ဟီနံ။ မဇ္ဈိမံ။ ပဏီတံ။ စိတ္တာဓိပတေယ္ယံ ဟီနံ။ မဇ္ဈိမံ။ ပဏီတံ။ ဝီမံသာဓိပတေယ္ယံ ဟီနံ။ မဇ္ဈိမံ။ ပဏီတံ ပာဏာတိပာတာ ဝိရမန္တသ္သ, ယာ တသ္မိံ သမယေ ပာဏာတိပာတာ အာရတိ ဝိရတိ ပဋိဝိရတိ ဝေရမဏီ အကိရိယာ အကရဏံ အနဇ္ဈာပတ္တိ ဝေလာအနတိက္ကမော သေတုဃာတော – ဣဒံ ဝုစ္စတိ ‘‘ပာဏာတိပာတာ ဝေရမဏီ သိက္ခာပဒံ’’။ အဝသေသာ ဓမ္မာ ဝေရမဏိယာ သမ္ပယုတ္တာ။
709. Tattha katamaṃ pāṇātipātā veramaṇī sikkhāpadaṃ? Yasmiṃ samaye kāmāvacaraṃ kusalaṃ cittaṃ uppannaṃ hoti somanassasahagataṃ ñāṇasampayuttaṃ hīnaṃ… majjhimaṃ… paṇītaṃ… chandādhipateyyaṃ… vīriyādhipateyyaṃ… cittādhipateyyaṃ… vīmaṃsādhipateyyaṃ… chandādhipateyyaṃ hīnaṃ… majjhimaṃ… paṇītaṃ… vīriyādhipateyyaṃ hīnaṃ… majjhimaṃ… paṇītaṃ… cittādhipateyyaṃ hīnaṃ… majjhimaṃ… paṇītaṃ… vīmaṃsādhipateyyaṃ hīnaṃ… majjhimaṃ… paṇītaṃ pāṇātipātā viramantassa, yā tasmiṃ samaye pāṇātipātā ārati virati paṭivirati veramaṇī akiriyā akaraṇaṃ anajjhāpatti velāanatikkamo setughāto – idaṃ vuccati ‘‘pāṇātipātā veramaṇī sikkhāpadaṃ’’. Avasesā dhammā veramaṇiyā sampayuttā.
တတ္ထ ကတမံ ပာဏာတိပာတာ ဝေရမဏီ သိက္ခာပဒံ? ယသ္မိံ သမယေ ကာမာဝစရံ ကုသလံ စိတ္တံ ဥပ္ပန္နံ ဟောတိ သောမနသ္သသဟဂတံ ဉာဏသမ္ပယုတ္တံ ဟီနံ။ မဇ္ဈိမံ။ ပဏီတံ။ ဆန္ဒာဓိပတေယ္ယံ။ ဝီရိယာဓိပတေယ္ယံ။ စိတ္တာဓိပတေယ္ယံ။ ဝီမံသာဓိပတေယ္ယံ။ ဆန္ဒာဓိပတေယ္ယံ ဟီနံ။ မဇ္ဈိမံ။ ပဏီတံ။ ဝီရိယာဓိပတေယ္ယံ ဟီနံ။ မဇ္ဈိမံ။ ပဏီတံ။ စိတ္တာဓိပတေယ္ယံ ဟီနံ။ မဇ္ဈိမံ။ ပဏီတံ။ ဝီမံသာဓိပတေယ္ယံ ဟီနံ။ မဇ္ဈိမံ။ ပဏီတံ ပာဏာတိပာတာ ဝိရမန္တသ္သ, ယာ တသ္မိံ သမယေ စေတနာ သဉ္စေတနာ သဉ္စေတယိတတ္တံ – ဣဒံ ဝုစ္စတိ ‘‘ပာဏာတိပာတာ ဝေရမဏီ သိက္ခာပဒံ’’။ အဝသေသာ ဓမ္မာ စေတနာယ သမ္ပယုတ္တာ။
Tattha katamaṃ pāṇātipātā veramaṇī sikkhāpadaṃ? Yasmiṃ samaye kāmāvacaraṃ kusalaṃ cittaṃ uppannaṃ hoti somanassasahagataṃ ñāṇasampayuttaṃ hīnaṃ… majjhimaṃ… paṇītaṃ… chandādhipateyyaṃ… vīriyādhipateyyaṃ… cittādhipateyyaṃ… vīmaṃsādhipateyyaṃ… chandādhipateyyaṃ hīnaṃ… majjhimaṃ… paṇītaṃ… vīriyādhipateyyaṃ hīnaṃ… majjhimaṃ… paṇītaṃ… cittādhipateyyaṃ hīnaṃ… majjhimaṃ… paṇītaṃ… vīmaṃsādhipateyyaṃ hīnaṃ… majjhimaṃ… paṇītaṃ pāṇātipātā viramantassa, yā tasmiṃ samaye cetanā sañcetanā sañcetayitattaṃ – idaṃ vuccati ‘‘pāṇātipātā veramaṇī sikkhāpadaṃ’’. Avasesā dhammā cetanāya sampayuttā.
တတ္ထ ကတမံ ပာဏာတိပာတာ ဝေရမဏီ သိက္ခာပဒံ? ယသ္မိံ သမယေ ကာမာဝစရံ ကုသလံ စိတ္တံ ဥပ္ပန္နံ ဟောတိ သောမနသ္သသဟဂတံ ဉာဏသမ္ပယုတ္တံ ဟီနံ။ မဇ္ဈိမံ။ ပဏီတံ။ ဆန္ဒာဓိပတေယ္ယံ။ ဝီရိယာဓိပတေယ္ယံ။ စိတ္တာဓိပတေယ္ယံ။ ဝီမံသာဓိပတေယ္ယံ။ ဆန္ဒာဓိပတေယ္ယံ ဟီနံ။ မဇ္ဈိမံ။ ပဏီတံ။ ဝီရိယာဓိပတေယ္ယံ ဟီနံ။ မဇ္ဈိမံ။ ပဏီတံ။ စိတ္တာဓိပတေယ္ယံ ဟီနံ။ မဇ္ဈိမံ။ ပဏီတံ။ ဝီမံသာဓိပတေယ္ယံ ဟီနံ။ မဇ္ဈိမံ ။ ပဏီတံ ပာဏာတိပာတာ ဝိရမန္တသ္သ, ယော တသ္မိံ သမယေ ဖသ္သော။ပေ.။ ပဂ္ဂာဟော အဝိက္ခေပော – ဣဒံ ဝုစ္စတိ ‘‘ပာဏာတိပာတာ ဝေရမဏီ သိက္ခာပဒံ’’။
Tattha katamaṃ pāṇātipātā veramaṇī sikkhāpadaṃ? Yasmiṃ samaye kāmāvacaraṃ kusalaṃ cittaṃ uppannaṃ hoti somanassasahagataṃ ñāṇasampayuttaṃ hīnaṃ… majjhimaṃ… paṇītaṃ… chandādhipateyyaṃ… vīriyādhipateyyaṃ… cittādhipateyyaṃ… vīmaṃsādhipateyyaṃ… chandādhipateyyaṃ hīnaṃ… majjhimaṃ… paṇītaṃ… vīriyādhipateyyaṃ hīnaṃ… majjhimaṃ… paṇītaṃ… cittādhipateyyaṃ hīnaṃ… majjhimaṃ… paṇītaṃ… vīmaṃsādhipateyyaṃ hīnaṃ… majjhimaṃ … paṇītaṃ pāṇātipātā viramantassa, yo tasmiṃ samaye phasso…pe… paggāho avikkhepo – idaṃ vuccati ‘‘pāṇātipātā veramaṇī sikkhāpadaṃ’’.
တတ္ထ ကတမံ ပာဏာတိပာတာ ဝေရမဏီ သိက္ခာပဒံ? ယသ္မိံ သမယေ ကာမာဝစရံ ကုသလံ စိတ္တံ ဥပ္ပန္နံ ဟောတိ သောမနသ္သသဟဂတံ ဉာဏသမ္ပယုတ္တံ သသင္ခာရေန။ပေ.။ သောမနသ္သသဟဂတံ ဉာဏဝိပ္ပယုတ္တံ။ပေ.။ သောမနသ္သသဟဂတံ ဉာဏဝိပ္ပယုတ္တံ သသင္ခာရေန။ပေ.။ ဥပေက္ခာသဟဂတံ ဉာဏသမ္ပယုတ္တံ။ပေ.။ ဥပေက္ခာသဟဂတံ ဉာဏသမ္ပယုတ္တံ သသင္ခာရေန။ပေ.။ ဥပေက္ခာသဟဂတံ ဉာဏဝိပ္ပယုတ္တံ။ပေ.။ ဥပေက္ခာသဟဂတံ ဉာဏဝိပ္ပယုတ္တံ သသင္ခာရေန ဟီနံ။ မဇ္ဈိမံ။ ပဏီတံ။ ဆန္ဒာဓိပတေယ္ယံ။ ဝီရိယာဓိပတေယ္ယံ။ စိတ္တာဓိပတေယ္ယံ။ ဆန္ဒာဓိပတေယ္ယံ ဟီနံ။ မဇ္ဈိမံ။ ပဏီတံ။ ဝီရိယာဓိပတေယ္ယံ ဟီနံ။ မဇ္ဈိမံ။ ပဏီတံ။ စိတ္တာဓိပတေယ္ယံ ဟီနံ။ မဇ္ဈိမံ။ ပဏီတံ ပာဏာတိပာတာ ဝိရမန္တသ္သ, ယာ တသ္မိံ သမယေ ပာဏာတိပာတာ အာရတိ ဝိရတိ ပဋိဝိရတိ ဝေရမဏီ အကိရိယာ အကရဏံ အနဇ္ဈာပတ္တိ ဝေလာအနတိက္ကမော သေတုဃာတော – ဣဒံ ဝုစ္စတိ ‘‘ပာဏာတိပာတာ ဝေရမဏီ သိက္ခာပဒံ’’။ အဝသေသာ ဓမ္မာ ဝေရမဏိယာ သမ္ပယုတ္တာ။ပေ.။ အဝသေသာ ဓမ္မာ စေတနာယ သမ္ပယုတ္တာ။ပေ.။ ဖသ္သော။ပေ.။ ပဂ္ဂာဟော အဝိက္ခေပော – ဣဒံ ဝုစ္စတိ ‘‘ပာဏာတိပာတာ ဝေရမဏီ သိက္ခာပဒံ’’။
Tattha katamaṃ pāṇātipātā veramaṇī sikkhāpadaṃ? Yasmiṃ samaye kāmāvacaraṃ kusalaṃ cittaṃ uppannaṃ hoti somanassasahagataṃ ñāṇasampayuttaṃ sasaṅkhārena…pe… somanassasahagataṃ ñāṇavippayuttaṃ…pe… somanassasahagataṃ ñāṇavippayuttaṃ sasaṅkhārena…pe… upekkhāsahagataṃ ñāṇasampayuttaṃ…pe… upekkhāsahagataṃ ñāṇasampayuttaṃ sasaṅkhārena…pe… upekkhāsahagataṃ ñāṇavippayuttaṃ…pe… upekkhāsahagataṃ ñāṇavippayuttaṃ sasaṅkhārena hīnaṃ… majjhimaṃ… paṇītaṃ… chandādhipateyyaṃ… vīriyādhipateyyaṃ… cittādhipateyyaṃ… chandādhipateyyaṃ hīnaṃ… majjhimaṃ… paṇītaṃ… vīriyādhipateyyaṃ hīnaṃ… majjhimaṃ… paṇītaṃ… cittādhipateyyaṃ hīnaṃ… majjhimaṃ… paṇītaṃ pāṇātipātā viramantassa, yā tasmiṃ samaye pāṇātipātā ārati virati paṭivirati veramaṇī akiriyā akaraṇaṃ anajjhāpatti velāanatikkamo setughāto – idaṃ vuccati ‘‘pāṇātipātā veramaṇī sikkhāpadaṃ’’. Avasesā dhammā veramaṇiyā sampayuttā…pe… avasesā dhammā cetanāya sampayuttā…pe… phasso…pe… paggāho avikkhepo – idaṃ vuccati ‘‘pāṇātipātā veramaṇī sikkhāpadaṃ’’.
၇၁၀. တတ္ထ ကတမံ အဒိန္နာဒာနာ ဝေရမဏီ သိက္ခာပဒံ။ပေ.။ ကာမေသုမိစ္ဆာစာရာ ဝေရမဏီ သိက္ခာပဒံ။ပေ.။ မုသာဝာဒာ ဝေရမဏီ သိက္ခာပဒံ။ပေ.။ သုရာမေရယမဇ္ဇပမာဒဋ္ဌာနာ ဝေရမဏီ သိက္ခာပဒံ? ယသ္မိံ သမယေ ကာမာဝစရံ ကုသလံ စိတ္တံ ဥပ္ပန္နံ ဟောတိ သောမနသ္သသဟဂတံ ဉာဏသမ္ပယုတ္တံ ဟီနံ။ မဇ္ဈိမံ။ ပဏီတံ။ ဆန္ဒာဓိပတေယ္ယံ။ ဝီရိယာဓိပတေယ္ယံ ။ စိတ္တာဓိပတေယ္ယံ။ ဝီမံသာဓိပတေယ္ယံ။ ဆန္ဒာဓိပတေယ္ယံ ဟီနံ။ မဇ္ဈိမံ။ ပဏီတံ။ ဝီရိယာဓိပတေယ္ယံ ဟီနံ။ မဇ္ဈိမံ။ ပဏီတံ။ စိတ္တာဓိပတေယ္ယံ ဟီနံ။ မဇ္ဈိမံ။ ပဏီတံ။ ဝီမံသာဓိပတေယ္ယံ ဟီနံ။ မဇ္ဈိမံ။ ပဏီတံ သုရာမေရယမဇ္ဇပမာဒဋ္ဌာနာ ဝိရမန္တသ္သ, ယာ တသ္မိံ သမယေ သုရာမေရယမဇ္ဇပမာဒဋ္ဌာနာ အာရတိ ဝိရတိ ပဋိဝိရတိ ဝေရမဏီ အကိရိယာ အကရဏံ အနဇ္ဈာပတ္တိ ဝေလာအနတိက္ကမော သေတုဃာတော – ဣဒံ ဝုစ္စတိ ‘‘သုရာမေရယမဇ္ဇပမာဒဋ္ဌာနာ ဝေရမဏီ သိက္ခာပဒံ’’။ အဝသေသာ ဓမ္မာ ဝေရမဏိယာ သမ္ပယုတ္တာ ။ပေ.။ အဝသေသာ ဓမ္မာ စေတနာယ သမ္ပယုတ္တာ။ပေ.။ ဖသ္သော။ပေ.။ ပဂ္ဂာဟော အဝိက္ခေပော – ဣဒံ ဝုစ္စတိ ‘‘သုရာမေရယမဇ္ဇပမာဒဋ္ဌာနာ ဝေရမဏီ သိက္ခာပဒံ’’။
710. Tattha katamaṃ adinnādānā veramaṇī sikkhāpadaṃ…pe… kāmesumicchācārā veramaṇī sikkhāpadaṃ…pe… musāvādā veramaṇī sikkhāpadaṃ…pe… surāmerayamajjapamādaṭṭhānā veramaṇī sikkhāpadaṃ? Yasmiṃ samaye kāmāvacaraṃ kusalaṃ cittaṃ uppannaṃ hoti somanassasahagataṃ ñāṇasampayuttaṃ hīnaṃ… majjhimaṃ… paṇītaṃ… chandādhipateyyaṃ… vīriyādhipateyyaṃ … cittādhipateyyaṃ… vīmaṃsādhipateyyaṃ… chandādhipateyyaṃ hīnaṃ… majjhimaṃ… paṇītaṃ… vīriyādhipateyyaṃ hīnaṃ… majjhimaṃ… paṇītaṃ… cittādhipateyyaṃ hīnaṃ… majjhimaṃ… paṇītaṃ… vīmaṃsādhipateyyaṃ hīnaṃ… majjhimaṃ… paṇītaṃ surāmerayamajjapamādaṭṭhānā viramantassa, yā tasmiṃ samaye surāmerayamajjapamādaṭṭhānā ārati virati paṭivirati veramaṇī akiriyā akaraṇaṃ anajjhāpatti velāanatikkamo setughāto – idaṃ vuccati ‘‘surāmerayamajjapamādaṭṭhānā veramaṇī sikkhāpadaṃ’’. Avasesā dhammā veramaṇiyā sampayuttā …pe… avasesā dhammā cetanāya sampayuttā…pe… phasso…pe… paggāho avikkhepo – idaṃ vuccati ‘‘surāmerayamajjapamādaṭṭhānā veramaṇī sikkhāpadaṃ’’.
၇၁၁. တတ္ထ ကတမံ သုရာမေရယမဇ္ဇပမာဒဋ္ဌာနာ ဝေရမဏီ သိက္ခာပဒံ? ယသ္မိံ သမယေ ကာမာဝစရေ ကုသလံ စိတ္တံ ဥပ္ပန္နံ ဟောတိ သောမနသ္သသဟဂတံ ဉာဏသမ္ပယုတ္တံ သသင္ခာရေန။ပေ.။ သောမနသ္သသဟဂတံ ဉာဏဝိပ္ပယုတ္တံ။ပေ.။ သောမနသ္သသဟဂတံ ဉာဏဝိပ္ပယုတ္တံ သသင္ခာရေန။ပေ.။ ဥပေက္ခာသဟဂတံ ဉာဏသမ္ပယုတ္တံ။ပေ.။ ဥပေက္ခာသဟဂတံ ဉာဏသမ္ပယုတ္တံ သသင္ခာရေန။ပေ.။ ဥပေက္ခာသဟဂတံ ဉာဏဝိပ္ပယုတ္တံ။ပေ.။ ဥပေက္ခာသဟဂတံ ဉာဏဝိပ္ပယုတ္တံ သသင္ခာရေန ဟီနံ။ မဇ္ဈိမံ။ ပဏီတံ။ ဆန္ဒာဓိပတေယ္ယံ။ ဝီရိယာဓိပတေယ္ယံ။ စိတ္တာဓိပတေယ္ယံ။ ဆန္ဒာဓိပတေယ္ယံ ဟီနံ။ မဇ္ဈိမံ။ ပဏီတံ။ ဝီရိယာဓိပတေယ္ယံ ဟီနံ။ မဇ္ဈိမံ။ ပဏီတံ။ စိတ္တာဓိပတေယ္ယံ ဟီနံ။ မဇ္ဈိမံ ပဏီတံ သုရာမေရယမဇ္ဇပမာဒဋ္ဌာနာ ဝိရမန္တသ္သ, ယာ တသ္မိံ သမယေ သုရာမေရယမဇ္ဇပမာဒဋ္ဌာနာ အာရတိ ဝိရတိ ပဋိဝိရတိ ဝေရမဏီ အကိရိယာ အကရဏံ အနဇ္ဈာပတ္တိ ဝေလာအနတိက္ကမော သေတုဃာတော – ဣဒံ ဝုစ္စတိ ‘‘သုရာမေရယမဇ္ဇပမာဒဋ္ဌာနာ ဝေရမဏီ သိက္ခာပဒံ’’။ အဝသေသာ ဓမ္မာ ဝေရမဏိယာ သမ္ပယုတ္တာ။ပေ.။ အဝသေသာ ဓမ္မာ စေတနာယ သမ္ပယုတ္တာ။ပေ.။ ဖသ္သော။ပေ.။ ပဂ္ဂာဟော အဝိက္ခေပော – ဣဒံ ဝုစ္စတိ ‘‘သုရာမေရယမဇ္ဇပမာဒဋ္ဌာနာ ဝေရမဏီ သိက္ခာပဒံ’’။
711. Tattha katamaṃ surāmerayamajjapamādaṭṭhānā veramaṇī sikkhāpadaṃ? Yasmiṃ samaye kāmāvacare kusalaṃ cittaṃ uppannaṃ hoti somanassasahagataṃ ñāṇasampayuttaṃ sasaṅkhārena…pe… somanassasahagataṃ ñāṇavippayuttaṃ…pe… somanassasahagataṃ ñāṇavippayuttaṃ sasaṅkhārena…pe… upekkhāsahagataṃ ñāṇasampayuttaṃ…pe… upekkhāsahagataṃ ñāṇasampayuttaṃ sasaṅkhārena…pe… upekkhāsahagataṃ ñāṇavippayuttaṃ…pe… upekkhāsahagataṃ ñāṇavippayuttaṃ sasaṅkhārena hīnaṃ… majjhimaṃ… paṇītaṃ… chandādhipateyyaṃ… vīriyādhipateyyaṃ… cittādhipateyyaṃ… chandādhipateyyaṃ hīnaṃ… majjhimaṃ… paṇītaṃ… vīriyādhipateyyaṃ hīnaṃ… majjhimaṃ… paṇītaṃ… cittādhipateyyaṃ hīnaṃ… majjhimaṃ paṇītaṃ surāmerayamajjapamādaṭṭhānā viramantassa, yā tasmiṃ samaye surāmerayamajjapamādaṭṭhānā ārati virati paṭivirati veramaṇī akiriyā akaraṇaṃ anajjhāpatti velāanatikkamo setughāto – idaṃ vuccati ‘‘surāmerayamajjapamādaṭṭhānā veramaṇī sikkhāpadaṃ’’. Avasesā dhammā veramaṇiyā sampayuttā…pe… avasesā dhammā cetanāya sampayuttā…pe… phasso…pe… paggāho avikkhepo – idaṃ vuccati ‘‘surāmerayamajjapamādaṭṭhānā veramaṇī sikkhāpadaṃ’’.
၇၁၂. ကတမေ ဓမ္မာ သိက္ခာ? ယသ္မိံ သမယေ ကာမာဝစရံ ကုသလံ စိတ္တံ ဥပ္ပန္နံ ဟောတိ သောမနသ္သသဟဂတံ ဉာဏသမ္ပယုတ္တံ ရူပာရမ္မဏံ ဝာ။ပေ.။ ဓမ္မာရမ္မဏံ ဝာ ယံ ယံ ဝာ ပနာရဗ္ဘ, တသ္မိံ သမယေ ဖသ္သော ဟောတိ။ပေ.။ အဝိက္ခေပော ဟောတိ။ ဣမေ ဓမ္မာ သိက္ခာ။
712. Katame dhammā sikkhā? Yasmiṃ samaye kāmāvacaraṃ kusalaṃ cittaṃ uppannaṃ hoti somanassasahagataṃ ñāṇasampayuttaṃ rūpārammaṇaṃ vā…pe… dhammārammaṇaṃ vā yaṃ yaṃ vā panārabbha, tasmiṃ samaye phasso hoti…pe… avikkhepo hoti. Ime dhammā sikkhā.
ကတမေ ဓမ္မာ သိက္ခာ? ယသ္မိံ သမယေ ကာမာဝစရံ ကုသလံ စိတ္တံ ဥပ္ပန္နံ ဟောတိ သောမနသ္သသဟဂတံ ဉာဏသမ္ပယုတ္တံ သသင္ခာရေန။ပေ.။ သောမနသ္သသဟဂတံ ဉာဏဝိပ္ပယုတ္တံ။ပေ.။ သောမနသ္သသဟဂတံ ဉာဏဝိပ္ပယုတ္တံ သသင္ခာရေန။ပေ.။ ဥပေက္ခာသဟဂတံ ဉာဏသမ္ပယုတ္တံ။ပေ.။ ဥပေက္ခာသဟဂတံ ဉာဏသမ္ပယုတ္တံ သသင္ခာရေန။ပေ.။ ဥပေက္ခာသဟဂတံ ဉာဏဝိပ္ပယုတ္တံ။ပေ.။ ဥပေက္ခာသဟဂတံ ဉာဏဝိပ္ပယုတ္တံ သသင္ခာရေန ရူပာရမ္မဏံ ဝာ။ပေ.။ ဓမ္မာရမ္မဏံ ဝာ ယံ ယံ ဝာ ပနာရဗ္ဘ, တသ္မိံ သမယေ ဖသ္သော ဟောတိ။ပေ.။ အဝိက္ခေပော ဟောတိ။ ဣမေ ဓမ္မာ သိက္ခာ။
Katame dhammā sikkhā? Yasmiṃ samaye kāmāvacaraṃ kusalaṃ cittaṃ uppannaṃ hoti somanassasahagataṃ ñāṇasampayuttaṃ sasaṅkhārena…pe… somanassasahagataṃ ñāṇavippayuttaṃ…pe… somanassasahagataṃ ñāṇavippayuttaṃ sasaṅkhārena…pe… upekkhāsahagataṃ ñāṇasampayuttaṃ…pe… upekkhāsahagataṃ ñāṇasampayuttaṃ sasaṅkhārena…pe… upekkhāsahagataṃ ñāṇavippayuttaṃ…pe… upekkhāsahagataṃ ñāṇavippayuttaṃ sasaṅkhārena rūpārammaṇaṃ vā…pe… dhammārammaṇaṃ vā yaṃ yaṃ vā panārabbha, tasmiṃ samaye phasso hoti…pe… avikkhepo hoti. Ime dhammā sikkhā.
၇၁၃. ကတမေ ဓမ္မာ သိက္ခာ? ယသ္မိံ သမယေ ရူပူပပတ္တိယာ မဂ္ဂံ ဘာဝေတိ။ပေ.။ အရူပူပပတ္တိယာ မဂ္ဂံ ဘာဝေတိ။ပေ.။ လောကုတ္တရံ ဈာနံ ဘာဝေတိ နိယ္ယာနိကံ အပစယဂာမိံ ဒိဋ္ဌိဂတာနံ ပဟာနာယ ပဌမာယ ဘူမိယာ ပတ္တိယာ ဝိဝိစ္စေဝ ကာမေဟိ။ပေ.။ ပဌမံ ဈာနံ ဥပသမ္ပဇ္ဇ ဝိဟရတိ ဒုက္ခပဋိပဒံ ဒန္ဓာဘိညံ, တသ္မိံ သမယေ ဖသ္သော ဟောတိ။ပေ.။ အဝိက္ခေပော ဟောတိ။ ဣမေ ဓမ္မာ သိက္ခာ။
713. Katame dhammā sikkhā? Yasmiṃ samaye rūpūpapattiyā maggaṃ bhāveti…pe… arūpūpapattiyā maggaṃ bhāveti…pe… lokuttaraṃ jhānaṃ bhāveti niyyānikaṃ apacayagāmiṃ diṭṭhigatānaṃ pahānāya paṭhamāya bhūmiyā pattiyā vivicceva kāmehi…pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ, tasmiṃ samaye phasso hoti…pe… avikkhepo hoti. Ime dhammā sikkhā.
အဘိဓမ္မဘာဇနီယံ။
Abhidhammabhājanīyaṃ.
၂. ပဉ္ဟာပုစ္ဆကံ
2. Pañhāpucchakaṃ
၇၁၄. ပဉ္စ သိက္ခာပဒာနိ – ပာဏာတိပာတာ ဝေရမဏီ သိက္ခာပဒံ, အဒိန္နာဒာနာ ဝေရမဏီ သိက္ခာပဒံ, ကာမေသုမိစ္ဆာစာရာ ဝေရမဏီ သိက္ခာပဒံ, မုသာဝာဒာ ဝေရမဏီ သိက္ခာပဒံ, သုရာမေရယမဇ္ဇပမာဒဋ္ဌာနာ ဝေရမဏီ သိက္ခာပဒံ။
714. Pañca sikkhāpadāni – pāṇātipātā veramaṇī sikkhāpadaṃ, adinnādānā veramaṇī sikkhāpadaṃ, kāmesumicchācārā veramaṇī sikkhāpadaṃ, musāvādā veramaṇī sikkhāpadaṃ, surāmerayamajjapamādaṭṭhānā veramaṇī sikkhāpadaṃ.
၇၁၅. ပဉ္စန္နံ သိက္ခာပဒာနံ ကတိ ကုသလာ, ကတိ အကုသလာ, ကတိ အဗ္ယာကတာ။ပေ.။ ကတိ သရဏာ, ကတိ အရဏာ?
715. Pañcannaṃ sikkhāpadānaṃ kati kusalā, kati akusalā, kati abyākatā…pe… kati saraṇā, kati araṇā?
၁. တိကံ
1. Tikaṃ
၇၁၆. ကုသလာယေဝ။ သိယာ သုခာယ ဝေဒနာယ သမ္ပယုတ္တာ, သိယာ အဒုက္ခမသုခာယ ဝေဒနာယ သမ္ပယုတ္တာ, ဝိပာကဓမ္မဓမ္မာ, အနုပာဒိန္နုပာဒာနိယာ, အသံကိလိဋ္ဌသံကိလေသိကာ, သဝိတက္ကသဝိစာရာ, သိယာ ပီတိသဟဂတာ, သိယာ သုခသဟဂတာ, သိယာ ဥပေက္ခာသဟဂတာ။
716. Kusalāyeva. Siyā sukhāya vedanāya sampayuttā, siyā adukkhamasukhāya vedanāya sampayuttā, vipākadhammadhammā, anupādinnupādāniyā, asaṃkiliṭṭhasaṃkilesikā, savitakkasavicārā, siyā pītisahagatā, siyā sukhasahagatā, siyā upekkhāsahagatā.
နေဝ ဒသ္သနေန န ဘာဝနာယ ပဟာတဗ္ဗာ, နေဝ ဒသ္သနေန န ဘာဝနာယ ပဟာတဗ္ဗဟေတုကာ, အာစယဂာမိနော , နေဝသေက္ခနာသေက္ခာ, ပရိတ္တာ, ပရိတ္တာရမ္မဏာ, မဇ္ဈိမာ, အနိယတာ, န ဝတ္တဗ္ဗာ မဂ္ဂာရမ္မဏာတိပိ, မဂ္ဂဟေတုကာတိပိ, မဂ္ဂာဓိပတိနောတိပိ။ သိယာ ဥပ္ပန္နာ, သိယာ အနုပ္ပန္နာ , န ဝတ္တဗ္ဗာ ဥပ္ပာဒိနောတိ, သိယာ အတီတာ, သိယာ အနာဂတာ, သိယာ ပစ္စုပ္ပန္နာ, ပစ္စုပ္ပန္နာရမ္မဏာ, သိယာ အဇ္ဈတ္တာ, သိယာ ဗဟိဒ္ဓာ, သိယာ အဇ္ဈတ္တဗဟိဒ္ဓာ, ဗဟိဒ္ဓာရမ္မဏာ, အနိဒသ္သနအပ္ပဋိဃာ။
Neva dassanena na bhāvanāya pahātabbā, neva dassanena na bhāvanāya pahātabbahetukā, ācayagāmino , nevasekkhanāsekkhā, parittā, parittārammaṇā, majjhimā, aniyatā, na vattabbā maggārammaṇātipi, maggahetukātipi, maggādhipatinotipi. Siyā uppannā, siyā anuppannā , na vattabbā uppādinoti, siyā atītā, siyā anāgatā, siyā paccuppannā, paccuppannārammaṇā, siyā ajjhattā, siyā bahiddhā, siyā ajjhattabahiddhā, bahiddhārammaṇā, anidassanaappaṭighā.
၂. ဒုကံ
2. Dukaṃ
၇၁၇. န ဟေတူ သဟေတုကာ, ဟေတုသမ္ပယုတ္တာ။ န ဝတ္တဗ္ဗာ ‘‘ဟေတူ စေဝ သဟေတုကာ စာ’’တိ, သဟေတုကာ စေဝ န စ ဟေတူ, န ဝတ္တဗ္ဗာ ‘‘ဟေတူ စေဝ ဟေတုသမ္ပယုတ္တာ စာ’’တိ, ဟေတုသမ္ပယုတ္တာ စေဝ န စ ဟေတူ, န ဟေတု သဟေတူကာ, သပ္ပစ္စယာ, သင္ခတာ, အနိဒသ္သနာ, အပ္ပဋိဃာ, အရူပာ, လောကိယာ, ကေနစိ ဝိညေယ္ယာ, ကေနစိ န ဝိညေယ္ယာ။
717. Na hetū sahetukā, hetusampayuttā. Na vattabbā ‘‘hetū ceva sahetukā cā’’ti, sahetukā ceva na ca hetū, na vattabbā ‘‘hetū ceva hetusampayuttā cā’’ti, hetusampayuttā ceva na ca hetū, na hetu sahetūkā, sappaccayā, saṅkhatā, anidassanā, appaṭighā, arūpā, lokiyā, kenaci viññeyyā, kenaci na viññeyyā.
နော အာသဝာ, သာသဝာ, အာသဝဝိပ္ပယုတ္တာ, န ဝတ္တဗ္ဗာ ‘‘အာသဝာ စေဝ သာသဝာ စာ’’တိ, သာသဝာ စေဝ နော စ အာသဝာ, န ဝတ္တဗ္ဗာ ‘‘အာသဝာ စေဝ အာသဝသမ္ပယုတ္တာ စာ’’တိပိ, ‘‘အာသဝသမ္ပယုတ္တာ စေဝ နော စ အာသဝာ’’တိပိ။ အာသဝဝိပ္ပယုတ္တာ သာသဝာ, နော သံယောဇနာ။ပေ.။ နော ဂန္ထာ။ပေ.။ နော ဩဃာ။ပေ.။ နော ယောဂာ။ပေ.။ နော နီဝရဏာ။ပေ.။ နော ပရာမာသာ။ပေ.။ သာရမ္မဏာ, နော စိတ္တာ, စေတသိကာ, စိတ္တသမ္ပယုတ္တာ, စိတ္တသံသဋ္ဌာ , စိတ္တသမုဋ္ဌာနာ, စိတ္တသဟဘုနော, စိတ္တာနုပရိဝတ္တိနော, စိတ္တသံသဋ္ဌသမုဋ္ဌာနာ, စိတ္တသံသဋ္ဌသမုဋ္ဌာနသဟဘုနော, စိတ္တသံသဋ္ဌသမုဋ္ဌာနာနုပရိဝတ္တိနော , ဗာဟိရာ, နော ဥပာဒာ, အနုပာဒိန္နာ, နော ဥပာဒာနာ။ပေ.။ နော ကိလေသာ။
No āsavā, sāsavā, āsavavippayuttā, na vattabbā ‘‘āsavā ceva sāsavā cā’’ti, sāsavā ceva no ca āsavā, na vattabbā ‘‘āsavā ceva āsavasampayuttā cā’’tipi, ‘‘āsavasampayuttā ceva no ca āsavā’’tipi. Āsavavippayuttā sāsavā, no saṃyojanā…pe… no ganthā…pe… no oghā…pe… no yogā…pe… no nīvaraṇā…pe… no parāmāsā…pe… sārammaṇā, no cittā, cetasikā, cittasampayuttā, cittasaṃsaṭṭhā , cittasamuṭṭhānā, cittasahabhuno, cittānuparivattino, cittasaṃsaṭṭhasamuṭṭhānā, cittasaṃsaṭṭhasamuṭṭhānasahabhuno, cittasaṃsaṭṭhasamuṭṭhānānuparivattino , bāhirā, no upādā, anupādinnā, no upādānā…pe… no kilesā.
န ဒသ္သနေန ပဟာတဗ္ဗာ, န ဘာဝနာယပဟာတဗ္ဗာ, န ဒသ္သနေန ပဟာတဗ္ဗဟေတုကာ, န ဘာဝနာယ ပဟာတဗ္ဗဟေတုကာ, သဝိတက္ကာ, သဝိစာရာ, သိယာ သပ္ပီတိကာ, သိယာ အပ္ပီတိကာ, သိယာ ပီတိသဟဂတာ, သိယာ န ပီတိသဟဂတာ, သိယာ သုခသဟဂတာ, သိယာ န သုခသဟဂတာ, သိယာ ဥပေက္ခာသဟဂတာ, သိယာ န ဥပေက္ခာသဟဂတာ, ကာမာဝစရာ, န ရူပာဝစရာ, န အရူပာဝစရာ, ပရိယာပန္နာ, အနိယ္ယာနိကာ, အနိယတာ, သဥတ္တရာ, အရဏာတိ။
Na dassanena pahātabbā, na bhāvanāyapahātabbā, na dassanena pahātabbahetukā, na bhāvanāya pahātabbahetukā, savitakkā, savicārā, siyā sappītikā, siyā appītikā, siyā pītisahagatā, siyā na pītisahagatā, siyā sukhasahagatā, siyā na sukhasahagatā, siyā upekkhāsahagatā, siyā na upekkhāsahagatā, kāmāvacarā, na rūpāvacarā, na arūpāvacarā, pariyāpannā, aniyyānikā, aniyatā, sauttarā, araṇāti.
ပဉ္ဟာပုစ္ဆကံ။
Pañhāpucchakaṃ.
သိက္ခာပဒဝိဘင္ဂော နိဋ္ဌိတော။
Sikkhāpadavibhaṅgo niṭṭhito.
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / သမ္မောဟဝိနောဒနီ-အဋ္ဌကထာ • Sammohavinodanī-aṭṭhakathā
၁. အဘိဓမ္မဘာဇနီယဝဏ္ဏနာ • 1. Abhidhammabhājanīyavaṇṇanā
၃. ပဉ္ဟာပုစ္ဆကဝဏ္ဏနာ • 3. Pañhāpucchakavaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ဝိဘင္ဂ-မူလဋီကာ • Vibhaṅga-mūlaṭīkā / ၁၄. သိက္ခာပဒဝိဘင္ဂော • 14. Sikkhāpadavibhaṅgo
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ဝိဘင္ဂ-အနုဋီကာ • Vibhaṅga-anuṭīkā / ၁၄. သိက္ခာပဒဝိဘင္ဂော • 14. Sikkhāpadavibhaṅgo
