| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၈. သီလသုတ္တံ
8. Sīlasuttaṃ
၁၆၈. တတ္ရ ခော အာယသ္မာ သာရိပုတ္တော ဘိက္ခူ အာမန္တေသိ – ‘‘ဒုသ္သီလသ္သ, အာဝုသော, သီလဝိပန္နသ္သ ဟတူပနိသော ဟောတိ သမ္မာသမာဓိ; သမ္မာသမာဓိမ္ဟိ အသတိ သမ္မာသမာဓိဝိပန္နသ္သ ဟတူပနိသံ ဟောတိ ယထာဘူတဉာဏဒသ္သနံ; ယထာဘူတဉာဏဒသ္သနေ အသတိ ယထာဘူတဉာဏဒသ္သနဝိပန္နသ္သ ဟတူပနိသော ဟောတိ နိဗ္ဗိဒာဝိရာဂော; နိဗ္ဗိဒာဝိရာဂေ အသတိ နိဗ္ဗိဒာဝိရာဂဝိပန္နသ္သ ဟတူပနိသံ ဟောတိ ဝိမုတ္တိဉာဏဒသ္သနံ။ သေယ္ယထာပိ, အာဝုသော, ရုက္ခော သာခာပလာသဝိပန္နော။ တသ္သ ပပဋိကာပိ န ပာရိပူရိံ ဂစ္ဆတိ, တစောပိ ။ပေ.။ ဖေဂ္ဂုပိ။ သာရောပိ န ပာရိပူရိံ ဂစ္ဆတိ။ ဧဝမေဝံ ခော, အာဝုသော, ဒုသ္သီလသ္သ သီလဝိပန္နသ္သ ဟတူပနိသော ဟောတိ သမ္မာသမာဓိ; သမ္မာသမာဓိမ္ဟိ အသတိ သမ္မာသမာဓိဝိပန္နသ္သ ဟတူပနိသံ ဟောတိ ယထာဘူတဉာဏဒသ္သနံ; ယထာဘူတဉာဏဒသ္သနေ အသတိ ယထာဘူတဉာဏဒသ္သနဝိပန္နသ္သ ဟတူပနိသော ဟောတိ နိဗ္ဗိဒာဝိရာဂော; နိဗ္ဗိဒာဝိရာဂေ အသတိ နိဗ္ဗိဒာဝိရာဂဝိပန္နသ္သ ဟတူပနိသံ ဟောတိ ဝိမုတ္တိဉာဏဒသ္သနံ။
168. Tatra kho āyasmā sāriputto bhikkhū āmantesi – ‘‘dussīlassa, āvuso, sīlavipannassa hatūpaniso hoti sammāsamādhi; sammāsamādhimhi asati sammāsamādhivipannassa hatūpanisaṃ hoti yathābhūtañāṇadassanaṃ; yathābhūtañāṇadassane asati yathābhūtañāṇadassanavipannassa hatūpaniso hoti nibbidāvirāgo; nibbidāvirāge asati nibbidāvirāgavipannassa hatūpanisaṃ hoti vimuttiñāṇadassanaṃ. Seyyathāpi, āvuso, rukkho sākhāpalāsavipanno. Tassa papaṭikāpi na pāripūriṃ gacchati, tacopi …pe… pheggupi… sāropi na pāripūriṃ gacchati. Evamevaṃ kho, āvuso, dussīlassa sīlavipannassa hatūpaniso hoti sammāsamādhi; sammāsamādhimhi asati sammāsamādhivipannassa hatūpanisaṃ hoti yathābhūtañāṇadassanaṃ; yathābhūtañāṇadassane asati yathābhūtañāṇadassanavipannassa hatūpaniso hoti nibbidāvirāgo; nibbidāvirāge asati nibbidāvirāgavipannassa hatūpanisaṃ hoti vimuttiñāṇadassanaṃ.
‘‘သီလဝတော, အာဝုသော, သီလသမ္ပန္နသ္သ ဥပနိသသမ္ပန္နော ဟောတိ သမ္မာသမာဓိ; သမ္မာသမာဓိမ္ဟိ သတိ သမ္မာသမာဓိသမ္ပန္နသ္သ ဥပနိသသမ္ပန္နံ ဟောတိ ယထာဘူတဉာဏဒသ္သနံ; ယထာဘူတဉာဏဒသ္သနေ သတိ ယထာဘူတဉာဏဒသ္သနသမ္ပန္နသ္သ ဥပနိသသမ္ပန္နော ဟောတိ နိဗ္ဗိဒာဝိရာဂော; နိဗ္ဗိဒာဝိရာဂေ သတိ နိဗ္ဗိဒာဝိရာဂသမ္ပန္နသ္သ ဥပနိသသမ္ပန္နံ ဟောတိ ဝိမုတ္တိဉာဏဒသ္သနံ။ သေယ္ယထာပိ, အာဝုသော, ရုက္ခော, သာခာပလာသသမ္ပန္နော။ တသ္သ ပပဋိကာပိ ပာရိပူရိံ ဂစ္ဆတိ, တစောပိ။ပေ.။ ဖေဂ္ဂုပိ။ သာရောပိ ပာရိပူရိံ ဂစ္ဆတိ။ ဧဝမေဝံ ခော, အာဝုသော, သီလဝတော သီလသမ္ပန္နသ္သ ဥပနိသသမ္ပန္နော ဟောတိ သမ္မာသမာဓိ; သမ္မာသမာဓိမ္ဟိ သတိ သမ္မာသမာဓိသမ္ပန္နသ္သ ဥပနိသသမ္ပန္နံ ဟောတိ ယထာဘူတဉာဏဒသ္သနံ; ယထာဘူတဉာဏဒသ္သနေ သတိ ယထာဘူတဉာဏဒသ္သနသမ္ပန္နသ္သ ဥပနိသသမ္ပန္နော ဟောတိ နိဗ္ဗိဒာဝိရာဂော; နိဗ္ဗိဒာဝိရာဂေ သတိ နိဗ္ဗိဒာဝိရာဂသမ္ပန္နသ္သ ဥပနိသသမ္ပန္နံ ဟောတိ ဝိမုတ္တိဉာဏဒသ္သန’’န္တိ 1။ အဋ္ဌမံ။
‘‘Sīlavato, āvuso, sīlasampannassa upanisasampanno hoti sammāsamādhi; sammāsamādhimhi sati sammāsamādhisampannassa upanisasampannaṃ hoti yathābhūtañāṇadassanaṃ; yathābhūtañāṇadassane sati yathābhūtañāṇadassanasampannassa upanisasampanno hoti nibbidāvirāgo; nibbidāvirāge sati nibbidāvirāgasampannassa upanisasampannaṃ hoti vimuttiñāṇadassanaṃ. Seyyathāpi, āvuso, rukkho, sākhāpalāsasampanno. Tassa papaṭikāpi pāripūriṃ gacchati, tacopi…pe… pheggupi… sāropi pāripūriṃ gacchati. Evamevaṃ kho, āvuso, sīlavato sīlasampannassa upanisasampanno hoti sammāsamādhi; sammāsamādhimhi sati sammāsamādhisampannassa upanisasampannaṃ hoti yathābhūtañāṇadassanaṃ; yathābhūtañāṇadassane sati yathābhūtañāṇadassanasampannassa upanisasampanno hoti nibbidāvirāgo; nibbidāvirāge sati nibbidāvirāgasampannassa upanisasampannaṃ hoti vimuttiñāṇadassana’’nti 2. Aṭṭhamaṃ.
Footnotes:
Related texts:
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၇-၉. စောဒနာသုတ္တာဒိဝဏ္ဏနာ • 7-9. Codanāsuttādivaṇṇanā
