| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
(၂၀) ၅. ဗ္ရာဟ္မဏဝဂ္ဂော
(20) 5. Brāhmaṇavaggo
၁. သောဏသုတ္တံ
1. Soṇasuttaṃ
၁၉၁. ‘‘ပဉ္စိမေ , ဘိက္ခဝေ, ပောရာဏာ ဗ္ရာဟ္မဏဓမ္မာ ဧတရဟိ သုနခေသု သန္ဒိသ္သန္တိ, နော ဗ္ရာဟ္မဏေသု။ ကတမေ ပဉ္စ? ပုဗ္ဗေ သုဒံ 1, ဘိက္ခဝေ, ဗ္ရာဟ္မဏာ ဗ္ရာဟ္မဏိံယေဝ ဂစ္ဆန္တိ, နော အဗ္ရာဟ္မဏိံ။ ဧတရဟိ, ဘိက္ခဝေ, ဗ္ရာဟ္မဏာ ဗ္ရာဟ္မဏိမ္ပိ ဂစ္ဆန္တိ, အဗ္ရာဟ္မဏိမ္ပိ ဂစ္ဆန္တိ။ ဧတရဟိ, ဘိက္ခဝေ, သုနခာ သုနခိံယေဝ ဂစ္ဆန္တိ, နော အသုနခိံ။ အယံ, ဘိက္ခဝေ, ပဌမော ပောရာဏော ဗ္ရာဟ္မဏဓမ္မော ဧတရဟိ သုနခေသု သန္ဒိသ္သတိ, နော ဗ္ရာဟ္မဏေသု။
191. ‘‘Pañcime , bhikkhave, porāṇā brāhmaṇadhammā etarahi sunakhesu sandissanti, no brāhmaṇesu. Katame pañca? Pubbe sudaṃ 2, bhikkhave, brāhmaṇā brāhmaṇiṃyeva gacchanti, no abrāhmaṇiṃ. Etarahi, bhikkhave, brāhmaṇā brāhmaṇimpi gacchanti, abrāhmaṇimpi gacchanti. Etarahi, bhikkhave, sunakhā sunakhiṃyeva gacchanti, no asunakhiṃ. Ayaṃ, bhikkhave, paṭhamo porāṇo brāhmaṇadhammo etarahi sunakhesu sandissati, no brāhmaṇesu.
‘‘ပုဗ္ဗေ သုဒံ, ဘိက္ခဝေ, ဗ္ရာဟ္မဏာ ဗ္ရာဟ္မဏိံ ဥတုနိံယေဝ ဂစ္ဆန္တိ, နော အနုတုနိံ။ ဧတရဟိ, ဘိက္ခဝေ, ဗ္ရာဟ္မဏာ ဗ္ရာဟ္မဏိံ ဥတုနိမ္ပိ ဂစ္ဆန္တိ, အနုတုနိမ္ပိ ဂစ္ဆန္တိ ။ ဧတရဟိ, ဘိက္ခဝေ, သုနခာ သုနခိံ ဥတုနိံယေဝ ဂစ္ဆန္တိ, နော အနုတုနိံ။ အယံ, ဘိက္ခဝေ, ဒုတိယော ပောရာဏော ဗ္ရာဟ္မဏဓမ္မော ဧတရဟိ သုနခေသု သန္ဒိသ္သတိ, နော ဗ္ရာဟ္မဏေသု။
‘‘Pubbe sudaṃ, bhikkhave, brāhmaṇā brāhmaṇiṃ utuniṃyeva gacchanti, no anutuniṃ. Etarahi, bhikkhave, brāhmaṇā brāhmaṇiṃ utunimpi gacchanti, anutunimpi gacchanti . Etarahi, bhikkhave, sunakhā sunakhiṃ utuniṃyeva gacchanti, no anutuniṃ. Ayaṃ, bhikkhave, dutiyo porāṇo brāhmaṇadhammo etarahi sunakhesu sandissati, no brāhmaṇesu.
‘‘ပုဗ္ဗေ သုဒံ, ဘိက္ခဝေ, ဗ္ရာဟ္မဏာ ဗ္ရာဟ္မဏိံ နေဝ ကိဏန္တိ နော ဝိက္ကိဏန္တိ, သမ္ပိယေနေဝ သံဝာသံ သံဗန္ဓာယ 3 သံပဝတ္တေန္တိ။ ဧတရဟိ, ဘိက္ခဝေ, ဗ္ရာဟ္မဏာ ဗ္ရာဟ္မဏိံ ကိဏန္တိပိ ဝိက္ကိဏန္တိပိ, သမ္ပိယေနပိ သံဝာသံ သံဗန္ဓာယ သံပဝတ္တေန္တိ။ ဧတရဟိ, ဘိက္ခဝေ, သုနခာ သုနခိံ နေဝ ကိဏန္တိ နော ဝိက္ကိဏန္တိ, သမ္ပိယေနေဝ သံဝာသံ သံဗန္ဓာယ သံပဝတ္တေန္တိ။ အယံ, ဘိက္ခဝေ, တတိယော ပောရာဏော ဗ္ရာဟ္မဏဓမ္မော ဧတရဟိ သုနခေသု သန္ဒိသ္သတိ, နော ဗ္ရာဟ္မဏေသု။
‘‘Pubbe sudaṃ, bhikkhave, brāhmaṇā brāhmaṇiṃ neva kiṇanti no vikkiṇanti, sampiyeneva saṃvāsaṃ saṃbandhāya 4 saṃpavattenti. Etarahi, bhikkhave, brāhmaṇā brāhmaṇiṃ kiṇantipi vikkiṇantipi, sampiyenapi saṃvāsaṃ saṃbandhāya saṃpavattenti. Etarahi, bhikkhave, sunakhā sunakhiṃ neva kiṇanti no vikkiṇanti, sampiyeneva saṃvāsaṃ saṃbandhāya saṃpavattenti. Ayaṃ, bhikkhave, tatiyo porāṇo brāhmaṇadhammo etarahi sunakhesu sandissati, no brāhmaṇesu.
‘‘ပုဗ္ဗေ သုဒံ, ဘိက္ခဝေ, ဗ္ရာဟ္မဏာ န သန္နိဓိံ ကရောန္တိ ဓနသ္သပိ ဓညသ္သပိ ရဇတသ္သပိ ဇာတရူပသ္သပိ။ ဧတရဟိ, ဘိက္ခဝေ, ဗ္ရာဟ္မဏာ သန္နိဓိံ ကရောန္တိ ဓနသ္သပိ ဓညသ္သပိ ရဇတသ္သပိ ဇာတရူပသ္သပိ။ ဧတရဟိ, ဘိက္ခဝေ, သုနခာ န သန္နိဓိံ ကရောန္တိ ဓနသ္သပိ ဓညသ္သပိ ရဇတသ္သပိ ဇာတရူပသ္သပိ။ အယံ, ဘိက္ခဝေ, စတုတ္ထော ပောရာဏော ဗ္ရာဟ္မဏဓမ္မော ဧတရဟိ သုနခေသု သန္ဒိသ္သတိ, နော ဗ္ရာဟ္မဏေသု။
‘‘Pubbe sudaṃ, bhikkhave, brāhmaṇā na sannidhiṃ karonti dhanassapi dhaññassapi rajatassapi jātarūpassapi. Etarahi, bhikkhave, brāhmaṇā sannidhiṃ karonti dhanassapi dhaññassapi rajatassapi jātarūpassapi. Etarahi, bhikkhave, sunakhā na sannidhiṃ karonti dhanassapi dhaññassapi rajatassapi jātarūpassapi. Ayaṃ, bhikkhave, catuttho porāṇo brāhmaṇadhammo etarahi sunakhesu sandissati, no brāhmaṇesu.
‘‘ပုဗ္ဗေ သုဒံ, ဘိက္ခဝေ, ဗ္ရာဟ္မဏာ သာယံ သာယမာသာယ ပာတော ပာတရာသာယ ဘိက္ခံ ပရိယေသန္တိ။ ဧတရဟိ, ဘိက္ခဝေ, ဗ္ရာဟ္မဏာ ယာဝဒတ္ထံ ဥဒရာဝဒေဟကံ ဘုဉ္ဇိတ္ဝာ အဝသေသံ အာဒာယ ပက္ကမန္တိ။ ဧတရဟိ, ဘိက္ခဝေ, သုနခာ သာယံ သာယမာသာယ ပာတော ပာတရာသာယ ဘိက္ခံ ပရိယေသန္တိ။ အယံ, ဘိက္ခဝေ, ပဉ္စမော ပောရာဏော ဗ္ရာဟ္မဏဓမ္မော ဧတရဟိ သုနခေသု သန္ဒိသ္သတိ, နော ဗ္ရာဟ္မဏေသု။ ဣမေ ခော, ဘိက္ခဝေ, ပဉ္စ ပောရာဏာ ဗ္ရာဟ္မဏဓမ္မာ ဧတရဟိ သုနခေသု သန္ဒိသ္သန္တိ, နော ဗ္ရာဟ္မဏေသူ’’တိ။ ပဌမံ။
‘‘Pubbe sudaṃ, bhikkhave, brāhmaṇā sāyaṃ sāyamāsāya pāto pātarāsāya bhikkhaṃ pariyesanti. Etarahi, bhikkhave, brāhmaṇā yāvadatthaṃ udarāvadehakaṃ bhuñjitvā avasesaṃ ādāya pakkamanti. Etarahi, bhikkhave, sunakhā sāyaṃ sāyamāsāya pāto pātarāsāya bhikkhaṃ pariyesanti. Ayaṃ, bhikkhave, pañcamo porāṇo brāhmaṇadhammo etarahi sunakhesu sandissati, no brāhmaṇesu. Ime kho, bhikkhave, pañca porāṇā brāhmaṇadhammā etarahi sunakhesu sandissanti, no brāhmaṇesū’’ti. Paṭhamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁. သောဏသုတ္တဝဏ္ဏနာ • 1. Soṇasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁. သောဏသုတ္တဝဏ္ဏနာ • 1. Soṇasuttavaṇṇanā
