| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
(၂၀) ၅. မဟာဝဂ္ဂော
(20) 5. Mahāvaggo
၁. သောတာနုဂတသုတ္တံ
1. Sotānugatasuttaṃ
၁၉၁. ‘‘သောတာနုဂတာနံ , ဘိက္ခဝေ, ဓမ္မာနံ, ဝစသာ ပရိစိတာနံ, မနသာနုပေက္ခိတာနံ, ဒိဋ္ဌိယာ သုပ္ပဋိဝိဒ္ဓာနံ စတ္တာရော အာနိသံသာ ပာဋိကင္ခာ။ ကတမေ စတ္တာရော? ဣဓ, ဘိက္ခဝေ, ဘိက္ခု ဓမ္မံ ပရိယာပုဏာတိ – သုတ္တံ, ဂေယ္ယံ, ဝေယ္ယာကရဏံ, ဂာထံ, ဥဒာနံ, ဣတိဝုတ္တကံ, ဇာတကံ, အဗ္ဘုတဓမ္မံ, ဝေဒလ္လံ။ တသ္သ တေ ဓမ္မာ သောတာနုဂတာ ဟောန္တိ, ဝစသာ ပရိစိတာ, မနသာနုပေက္ခိတာ, ဒိဋ္ဌိယာ သုပ္ပဋိဝိဒ္ဓာ။ သော မုဋ္ဌသ္သတိ 1 ကာလံ ကုရုမာနော အညတရံ ဒေဝနိကာယံ ဥပပဇ္ဇတိ။ တသ္သ တတ္ထ သုခိနော ဓမ္မပဒာ ပ္လဝန္တိ 2။ ဒန္ဓော, ဘိက္ခဝေ, သတုပ္ပာဒော; အထ သော သတ္တော ခိပ္ပံယေဝ ဝိသေသဂာမီ ဟောတိ။ သောတာနုဂတာနံ, ဘိက္ခဝေ, ဓမ္မာနံ, ဝစသာ ပရိစိတာနံ, မနသာနုပေက္ခိတာနံ, ဒိဋ္ဌိယာ သုပ္ပဋိဝိဒ္ဓာနံ အယံ ပဌမော အာနိသံသော ပာဋိကင္ခော။
191. ‘‘Sotānugatānaṃ , bhikkhave, dhammānaṃ, vacasā paricitānaṃ, manasānupekkhitānaṃ, diṭṭhiyā suppaṭividdhānaṃ cattāro ānisaṃsā pāṭikaṅkhā. Katame cattāro? Idha, bhikkhave, bhikkhu dhammaṃ pariyāpuṇāti – suttaṃ, geyyaṃ, veyyākaraṇaṃ, gāthaṃ, udānaṃ, itivuttakaṃ, jātakaṃ, abbhutadhammaṃ, vedallaṃ. Tassa te dhammā sotānugatā honti, vacasā paricitā, manasānupekkhitā, diṭṭhiyā suppaṭividdhā. So muṭṭhassati 3 kālaṃ kurumāno aññataraṃ devanikāyaṃ upapajjati. Tassa tattha sukhino dhammapadā plavanti 4. Dandho, bhikkhave, satuppādo; atha so satto khippaṃyeva visesagāmī hoti. Sotānugatānaṃ, bhikkhave, dhammānaṃ, vacasā paricitānaṃ, manasānupekkhitānaṃ, diṭṭhiyā suppaṭividdhānaṃ ayaṃ paṭhamo ānisaṃso pāṭikaṅkho.
‘‘ပုန စပရံ, ဘိက္ခဝေ, ဘိက္ခု ဓမ္မံ ပရိယာပုဏာတိ – သုတ္တံ, ဂေယ္ယံ, ဝေယ္ယာကရဏံ, ဂာထံ, ဥဒာနံ, ဣတိဝုတ္တကံ, ဇာတကံ, အဗ္ဘုတဓမ္မံ, ဝေဒလ္လံ။ တသ္သ တေ ဓမ္မာ သောတာနုဂတာ ဟောန္တိ, ဝစသာ ပရိစိတာ, မနသာနုပေက္ခိတာ, ဒိဋ္ဌိယာ သုပ္ပဋိဝိဒ္ဓာ။ သော မုဋ္ဌသ္သတိ ကာလံ ကုရုမာနော အညတရံ ဒေဝနိကာယံ ဥပပဇ္ဇတိ။ တသ္သ တတ္ထ န ဟေဝ ခော သုခိနော ဓမ္မပဒာ ပ္လဝန္တိ; အပိ စ ခော ဘိက္ခု ဣဒ္ဓိမာ စေတောဝသိပ္ပတ္တော ဒေဝပရိသာယံ ဓမ္မံ ဒေသေတိ။ တသ္သ ဧဝံ ဟောတိ – ‘အယံ ဝာ သော ဓမ္မဝိနယော, ယတ္ထာဟံ ပုဗ္ဗေ ဗ္ရဟ္မစရိယံ အစရိ’န္တိ။ ဒန္ဓော, ဘိက္ခဝေ, သတုပ္ပာဒော; အထ သော သတ္တော ခိပ္ပမေဝ ဝိသေသဂာမီ ဟောတိ။ သေယ္ယထာပိ, ဘိက္ခဝေ, ပုရိသော ကုသလော ဘေရိသဒ္ဒသ္သ။ သော အဒ္ဓာနမဂ္ဂပ္ပဋိပန္နော ဘေရိသဒ္ဒံ သုဏေယ္ယ။ တသ္သ န ဟေဝ ခော အသ္သ ကင္ခာ ဝာ ဝိမတိ ဝာ – ‘ဘေရိသဒ္ဒော နု ခော, န နု ခော ဘေရိသဒ္ဒော’တိ! အထ ခော ဘေရိသဒ္ဒောတ္ဝေဝ နိဋ္ဌံ ဂစ္ဆေယ္ယ။ ဧဝမေဝံ ခော, ဘိက္ခဝေ, ဘိက္ခု ဓမ္မံ ပရိယာပုဏာတိ – သုတ္တံ, ဂေယ္ယံ, ဝေယ္ယာကရဏံ, ဂာထံ, ဥဒာနံ, ဣတိဝုတ္တကံ, ဇာတကံ, အဗ္ဘုတဓမ္မံ, ဝေဒလ္လံ။ တသ္သ တေ ဓမ္မာ သောတာနုဂတာ ဟောန္တိ, ဝစသာ ပရိစိတာ, မနသာနုပေက္ခိတာ, ဒိဋ္ဌိယာ သုပ္ပဋိဝိဒ္ဓာ။ သော မုဋ္ဌသ္သတိ ကာလံ ကုရုမာနော အညတရံ ဒေဝနိကာယံ ဥပပဇ္ဇတိ။ တသ္သ တတ္ထ န ဟေဝ ခော သုခိနော ဓမ္မပဒာ ပ္လဝန္တိ; အပိ စ ခော ဘိက္ခု ဣဒ္ဓိမာ စေတောဝသိပ္ပတ္တော ဒေဝပရိသာယံ ဓမ္မံ ဒေသေတိ။ တသ္သ ဧဝံ ဟောတိ – ‘အယံ ဝာ သော ဓမ္မဝိနယော, ယတ္ထာဟံ ပုဗ္ဗေ ဗ္ရဟ္မစရိယံ အစရိ’န္တိ။ ဒန္ဓော, ဘိက္ခဝေ, သတုပ္ပာဒော; အထ သော သတ္တော ခိပ္ပံယေဝ ဝိသေသဂာမီ ဟောတိ။ သောတာနုဂတာနံ, ဘိက္ခဝေ, ဓမ္မာနံ , ဝစသာ ပရိစိတာနံ, မနသာနုပေက္ခိတာနံ, ဒိဋ္ဌိယာ သုပ္ပဋိဝိဒ္ဓာနံ အယံ ဒုတိယော အာနိသံသော ပာဋိကင္ခော။
‘‘Puna caparaṃ, bhikkhave, bhikkhu dhammaṃ pariyāpuṇāti – suttaṃ, geyyaṃ, veyyākaraṇaṃ, gāthaṃ, udānaṃ, itivuttakaṃ, jātakaṃ, abbhutadhammaṃ, vedallaṃ. Tassa te dhammā sotānugatā honti, vacasā paricitā, manasānupekkhitā, diṭṭhiyā suppaṭividdhā. So muṭṭhassati kālaṃ kurumāno aññataraṃ devanikāyaṃ upapajjati. Tassa tattha na heva kho sukhino dhammapadā plavanti; api ca kho bhikkhu iddhimā cetovasippatto devaparisāyaṃ dhammaṃ deseti. Tassa evaṃ hoti – ‘ayaṃ vā so dhammavinayo, yatthāhaṃ pubbe brahmacariyaṃ acari’nti. Dandho, bhikkhave, satuppādo; atha so satto khippameva visesagāmī hoti. Seyyathāpi, bhikkhave, puriso kusalo bherisaddassa. So addhānamaggappaṭipanno bherisaddaṃ suṇeyya. Tassa na heva kho assa kaṅkhā vā vimati vā – ‘bherisaddo nu kho, na nu kho bherisaddo’ti! Atha kho bherisaddotveva niṭṭhaṃ gaccheyya. Evamevaṃ kho, bhikkhave, bhikkhu dhammaṃ pariyāpuṇāti – suttaṃ, geyyaṃ, veyyākaraṇaṃ, gāthaṃ, udānaṃ, itivuttakaṃ, jātakaṃ, abbhutadhammaṃ, vedallaṃ. Tassa te dhammā sotānugatā honti, vacasā paricitā, manasānupekkhitā, diṭṭhiyā suppaṭividdhā. So muṭṭhassati kālaṃ kurumāno aññataraṃ devanikāyaṃ upapajjati. Tassa tattha na heva kho sukhino dhammapadā plavanti; api ca kho bhikkhu iddhimā cetovasippatto devaparisāyaṃ dhammaṃ deseti. Tassa evaṃ hoti – ‘ayaṃ vā so dhammavinayo, yatthāhaṃ pubbe brahmacariyaṃ acari’nti. Dandho, bhikkhave, satuppādo; atha so satto khippaṃyeva visesagāmī hoti. Sotānugatānaṃ, bhikkhave, dhammānaṃ , vacasā paricitānaṃ, manasānupekkhitānaṃ, diṭṭhiyā suppaṭividdhānaṃ ayaṃ dutiyo ānisaṃso pāṭikaṅkho.
‘‘ပုန စပရံ, ဘိက္ခဝေ, ဘိက္ခု ဓမ္မံ ပရိယာပုဏာတိ – သုတ္တံ, ဂေယ္ယံ, ဝေယ္ယာကရဏံ, ဂာထံ, ဥဒာနံ, ဣတိဝုတ္တကံ, ဇာတကံ, အဗ္ဘုတဓမ္မံ, ဝေဒလ္လံ။ တသ္သ တေ ဓမ္မာ သောတာနုဂတာ ဟောန္တိ, ဝစသာ ပရိစိတာ, မနသာနုပေက္ခိတာ, ဒိဋ္ဌိယာ သုပ္ပဋိဝိဒ္ဓာ။ သော မုဋ္ဌသ္သတိ ကာလံ ကုရုမာနော အညတရံ ဒေဝနိကာယံ ဥပပဇ္ဇတိ။ တသ္သ တတ္ထ န ဟေဝ ခော သုခိနော ဓမ္မပဒာ ပ္လဝန္တိ, နပိ ဘိက္ခု ဣဒ္ဓိမာ စေတောဝသိပ္ပတ္တော ဒေဝပရိသာယံ ဓမ္မံ ဒေသေတိ; အပိ စ ခော ဒေဝပုတ္တော ဒေဝပရိသာယံ ဓမ္မံ ဒေသေတိ။ တသ္သ ဧဝံ ဟောတိ – ‘အယံ ဝာ သော ဓမ္မဝိနယော, ယတ္ထာဟံ ပုဗ္ဗေ ဗ္ရဟ္မစရိယံ အစရိ’န္တိ။ ဒန္ဓော, ဘိက္ခဝေ, သတုပ္ပာဒော; အထ သော သတ္တော ခိပ္ပံယေဝ ဝိသေသဂာမီ ဟောတိ။ သေယ္ယထာပိ, ဘိက္ခဝေ, ပုရိသော ကုသလော သင္ခသဒ္ဒသ္သ။ သော အဒ္ဓာနမဂ္ဂပ္ပဋိပန္နော သင္ခသဒ္ဒံ သုဏေယ္ယ။ တသ္သ န ဟေဝ ခော အသ္သ ကင္ခာ ဝာ ဝိမတိ ဝာ – ‘သင္ခသဒ္ဒော နု ခော, န နု ခော သင္ခသဒ္ဒော’တိ! အထ ခော သင္ခသဒ္ဒောတ္ဝေဝ နိဋ္ဌံ ဂစ္ဆေယ္ယ။ ဧဝမေဝံ ခော, ဘိက္ခဝေ, ဘိက္ခု ဓမ္မံ ပရိယာပုဏာတိ – သုတ္တံ, ဂေယ္ယံ, ဝေယ္ယာကရဏံ, ဂာထံ, ဥဒာနံ, ဣတိဝုတ္တကံ, ဇာတကံ, အဗ္ဘုတဓမ္မံ, ဝေဒလ္လံ။ တသ္သ တေ ဓမ္မာ သောတာနုဂတာ ဟောန္တိ, ဝစသာ ပရိစိတာ, မနသာနုပေက္ခိတာ, ဒိဋ္ဌိယာ သုပ္ပဋိဝိဒ္ဓာ။ သော မုဋ္ဌသ္သတိ ကာလံ ကုရုမာနော အညတရံ ဒေဝနိကာယံ ဥပပဇ္ဇတိ။ တသ္သ တတ္ထ န ဟေဝ ခော သုခိနော ဓမ္မပဒာ ပ္လဝန္တိ, နပိ ဘိက္ခု ဣဒ္ဓိမာ စေတောဝသိပ္ပတ္တော ဒေဝပရိသာယံ ဓမ္မံ ဒေသေတိ; အပိ စ ခော ဒေဝပုတ္တော ဒေဝပရိသာယံ ဓမ္မံ ဒေသေတိ။ တသ္သ ဧဝံ ဟောတိ – ‘အယံ ဝာ သော ဓမ္မဝိနယော, ယတ္ထာဟံ ပုဗ္ဗေ ဗ္ရဟ္မစရိယံ အစရိ’န္တိ။ ဒန္ဓော, ဘိက္ခဝေ, သတုပ္ပာဒော; အထ သော သတ္တော ခိပ္ပံယေဝ ဝိသေသဂာမီ ဟောတိ။ သောတာနုဂတာနံ, ဘိက္ခဝေ, ဓမ္မာနံ, ဝစသာ ပရိစိတာနံ, မနသာနုပေက္ခိတာနံ, ဒိဋ္ဌိယာ သုပ္ပဋိဝိဒ္ဓာနံ အယံ တတိယော အာနိသံသော ပာဋိကင္ခော။
‘‘Puna caparaṃ, bhikkhave, bhikkhu dhammaṃ pariyāpuṇāti – suttaṃ, geyyaṃ, veyyākaraṇaṃ, gāthaṃ, udānaṃ, itivuttakaṃ, jātakaṃ, abbhutadhammaṃ, vedallaṃ. Tassa te dhammā sotānugatā honti, vacasā paricitā, manasānupekkhitā, diṭṭhiyā suppaṭividdhā. So muṭṭhassati kālaṃ kurumāno aññataraṃ devanikāyaṃ upapajjati. Tassa tattha na heva kho sukhino dhammapadā plavanti, napi bhikkhu iddhimā cetovasippatto devaparisāyaṃ dhammaṃ deseti; api ca kho devaputto devaparisāyaṃ dhammaṃ deseti. Tassa evaṃ hoti – ‘ayaṃ vā so dhammavinayo, yatthāhaṃ pubbe brahmacariyaṃ acari’nti. Dandho, bhikkhave, satuppādo; atha so satto khippaṃyeva visesagāmī hoti. Seyyathāpi, bhikkhave, puriso kusalo saṅkhasaddassa. So addhānamaggappaṭipanno saṅkhasaddaṃ suṇeyya. Tassa na heva kho assa kaṅkhā vā vimati vā – ‘saṅkhasaddo nu kho, na nu kho saṅkhasaddo’ti! Atha kho saṅkhasaddotveva niṭṭhaṃ gaccheyya. Evamevaṃ kho, bhikkhave, bhikkhu dhammaṃ pariyāpuṇāti – suttaṃ, geyyaṃ, veyyākaraṇaṃ, gāthaṃ, udānaṃ, itivuttakaṃ, jātakaṃ, abbhutadhammaṃ, vedallaṃ. Tassa te dhammā sotānugatā honti, vacasā paricitā, manasānupekkhitā, diṭṭhiyā suppaṭividdhā. So muṭṭhassati kālaṃ kurumāno aññataraṃ devanikāyaṃ upapajjati. Tassa tattha na heva kho sukhino dhammapadā plavanti, napi bhikkhu iddhimā cetovasippatto devaparisāyaṃ dhammaṃ deseti; api ca kho devaputto devaparisāyaṃ dhammaṃ deseti. Tassa evaṃ hoti – ‘ayaṃ vā so dhammavinayo, yatthāhaṃ pubbe brahmacariyaṃ acari’nti. Dandho, bhikkhave, satuppādo; atha so satto khippaṃyeva visesagāmī hoti. Sotānugatānaṃ, bhikkhave, dhammānaṃ, vacasā paricitānaṃ, manasānupekkhitānaṃ, diṭṭhiyā suppaṭividdhānaṃ ayaṃ tatiyo ānisaṃso pāṭikaṅkho.
‘‘ပုန စပရံ, ဘိက္ခဝေ, ဘိက္ခု ဓမ္မံ ပရိယာပုဏာတိ – သုတ္တံ, ဂေယ္ယံ, ဝေယ္ယာကရဏံ, ဂာထံ, ဥဒာနံ, ဣတိဝုတ္တကံ, ဇာတကံ, အဗ္ဘုတဓမ္မံ, ဝေဒလ္လံ။ တသ္သ တေ ဓမ္မာ သောတာနုဂတာ ဟောန္တိ, ဝစသာ ပရိစိတာ, မနသာနုပေက္ခိတာ, ဒိဋ္ဌိယာ သုပ္ပဋိဝိဒ္ဓာ။ သော မုဋ္ဌသ္သတိ ကာလံ ကုရုမာနော အညတရံ ဒေဝနိကာယံ ဥပပဇ္ဇတိ။ တသ္သ တတ္ထ န ဟေဝ ခော သုခိနော ဓမ္မပဒာ ပ္လဝန္တိ, နပိ ဘိက္ခု ဣဒ္ဓိမာ စေတောဝသိပ္ပတ္တော ဒေဝပရိသာယံ ဓမ္မံ ဒေသေတိ, နပိ ဒေဝပုတ္တော ဒေဝပရိသာယံ ဓမ္မံ ဒေသေတိ; အပိ စ ခော ဩပပာတိကော ဩပပာတိကံ သာရေတိ – ‘သရသိ တ္ဝံ, မာရိသ, သရသိ တ္ဝံ , မာရိသ, ယတ္ထ မယံ ပုဗ္ဗေ ဗ္ရဟ္မစရိယံ အစရိမ္ဟာ’တိ။ သော ဧဝမာဟ – ‘သရာမိ, မာရိသ, သရာမိ, မာရိသာ’တိ။ ဒန္ဓော, ဘိက္ခဝေ, သတုပ္ပာဒော; အထ သော သတ္တော ခိပ္ပံယေဝ ဝိသေသဂာမီ ဟောတိ။ သေယ္ယထာပိ, ဘိက္ခဝေ, ဒ္ဝေ သဟာယကာ သဟပံသုကီဠိကာ 5။ တေ ကဒာစိ ကရဟစိ အညမညံ သမာဂစ္ဆေယ္ယုံ။ အညော ပန 6 သဟာယကော သဟာယကံ ဧဝံ ဝဒေယ္ယ – ‘ဣဒမ္ပိ, သမ္မ, သရသိ, ဣဒမ္ပိ, သမ္မ, သရသီ’တိ။ သော ဧဝံ ဝဒေယ္ယ – ‘သရာမိ , သမ္မ, သရာမိ, သမ္မာ’တိ။ ဧဝမေဝံ ခော, ဘိက္ခဝေ, ဘိက္ခု ဓမ္မံ ပရိယာပုဏာတိ – သုတ္တံ, ဂေယ္ယံ, ဝေယ္ယာကရဏံ, ဂာထံ, ဥဒာနံ, ဣတိဝုတ္တကံ, ဇာတကံ, အဗ္ဘုတဓမ္မံ, ဝေဒလ္လံ။ တသ္သ တေ ဓမ္မာ သောတာနုဂတာ ဟောန္တိ, ဝစသာ ပရိစိတာ, မနသာနုပေက္ခိတာ, ဒိဋ္ဌိယာ သုပ္ပဋိဝိဒ္ဓာ။ သော မုဋ္ဌသ္သတိ ကာလံ ကုရုမာနော အညတရံ ဒေဝနိကာယံ ဥပပဇ္ဇတိ။ တသ္သ တတ္ထ န ဟေဝ ခော သုခိနော ဓမ္မပဒာ ပ္လဝန္တိ, နပိ ဘိက္ခု ဣဒ္ဓိမာ စေတောဝသိပ္ပတ္တော ဒေဝပရိသာယံ ဓမ္မံ ဒေသေတိ, နပိ ဒေဝပုတ္တော ဒေဝပရိသာယံ ဓမ္မံ ဒေသေတိ; အပိ စ ခော ဩပပာတိကော ဩပပာတိကံ သာရေတိ – ‘သရသိ တ္ဝံ, မာရိသ, သရသိ တ္ဝံ, မာရိသ, ယတ္ထ မယံ ပုဗ္ဗေ ဗ္ရဟ္မစရိယံ အစရိမ္ဟာ’တိ။ သော ဧဝမာဟ – ‘သရာမိ, မာရိသ, သရာမိ, မာရိသာ’တိ။ ဒန္ဓော, ဘိက္ခဝေ, သတုပ္ပာဒော; အထ ခော သော သတ္တော ခိပ္ပံယေဝ ဝိသေသဂာမီ ဟောတိ။ သောတာနုဂတာနံ, ဘိက္ခဝေ, ဓမ္မာနံ, ဝစသာ ပရိစိတာနံ, မနသာနုပေက္ခိတာနံ, ဒိဋ္ဌိယာ သုပ္ပဋိဝိဒ္ဓာနံ အယံ စတုတ္ထော အာနိသံသော ပာဋိကင္ခော။ သောတာနုဂတာနံ, ဘိက္ခဝေ, ဓမ္မာနံ, ဝစသာ ပရိစိတာနံ, မနသာနုပေက္ခိတာနံ ဒိဋ္ဌိယာ သုပ္ပဋိဝိဒ္ဓာနံ ဣမေ စတ္တာရော အာနိသံသာ ပာဋိကင္ခာ’’တိ။ ပဌမံ။
‘‘Puna caparaṃ, bhikkhave, bhikkhu dhammaṃ pariyāpuṇāti – suttaṃ, geyyaṃ, veyyākaraṇaṃ, gāthaṃ, udānaṃ, itivuttakaṃ, jātakaṃ, abbhutadhammaṃ, vedallaṃ. Tassa te dhammā sotānugatā honti, vacasā paricitā, manasānupekkhitā, diṭṭhiyā suppaṭividdhā. So muṭṭhassati kālaṃ kurumāno aññataraṃ devanikāyaṃ upapajjati. Tassa tattha na heva kho sukhino dhammapadā plavanti, napi bhikkhu iddhimā cetovasippatto devaparisāyaṃ dhammaṃ deseti, napi devaputto devaparisāyaṃ dhammaṃ deseti; api ca kho opapātiko opapātikaṃ sāreti – ‘sarasi tvaṃ, mārisa, sarasi tvaṃ , mārisa, yattha mayaṃ pubbe brahmacariyaṃ acarimhā’ti. So evamāha – ‘sarāmi, mārisa, sarāmi, mārisā’ti. Dandho, bhikkhave, satuppādo; atha so satto khippaṃyeva visesagāmī hoti. Seyyathāpi, bhikkhave, dve sahāyakā sahapaṃsukīḷikā 7. Te kadāci karahaci aññamaññaṃ samāgaccheyyuṃ. Añño pana 8 sahāyako sahāyakaṃ evaṃ vadeyya – ‘idampi, samma, sarasi, idampi, samma, sarasī’ti. So evaṃ vadeyya – ‘sarāmi , samma, sarāmi, sammā’ti. Evamevaṃ kho, bhikkhave, bhikkhu dhammaṃ pariyāpuṇāti – suttaṃ, geyyaṃ, veyyākaraṇaṃ, gāthaṃ, udānaṃ, itivuttakaṃ, jātakaṃ, abbhutadhammaṃ, vedallaṃ. Tassa te dhammā sotānugatā honti, vacasā paricitā, manasānupekkhitā, diṭṭhiyā suppaṭividdhā. So muṭṭhassati kālaṃ kurumāno aññataraṃ devanikāyaṃ upapajjati. Tassa tattha na heva kho sukhino dhammapadā plavanti, napi bhikkhu iddhimā cetovasippatto devaparisāyaṃ dhammaṃ deseti, napi devaputto devaparisāyaṃ dhammaṃ deseti; api ca kho opapātiko opapātikaṃ sāreti – ‘sarasi tvaṃ, mārisa, sarasi tvaṃ, mārisa, yattha mayaṃ pubbe brahmacariyaṃ acarimhā’ti. So evamāha – ‘sarāmi, mārisa, sarāmi, mārisā’ti. Dandho, bhikkhave, satuppādo; atha kho so satto khippaṃyeva visesagāmī hoti. Sotānugatānaṃ, bhikkhave, dhammānaṃ, vacasā paricitānaṃ, manasānupekkhitānaṃ, diṭṭhiyā suppaṭividdhānaṃ ayaṃ catuttho ānisaṃso pāṭikaṅkho. Sotānugatānaṃ, bhikkhave, dhammānaṃ, vacasā paricitānaṃ, manasānupekkhitānaṃ diṭṭhiyā suppaṭividdhānaṃ ime cattāro ānisaṃsā pāṭikaṅkhā’’ti. Paṭhamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁. သောတာနုဂတသုတ္တဝဏ္ဏနာ • 1. Sotānugatasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁. သောတာနုဂတသုတ္တဝဏ္ဏနာ • 1. Sotānugatasuttavaṇṇanā
