| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
(7) 2. සුඛවග්‌ගවණ්‌ණනා
(7) 2. Sukhavaggavaṇṇanā
65. දුතියස්‌ස පඨමෙ සබ්‌බකාමනිප්‌ඵත්‌තිමූලකං සුඛන්‌ති අනවසෙසඋපභොගපරිභොගවත්‌ථුනිප්‌ඵත්‌තිහෙතුකං කාමසුඛං. පබ්‌බජ්‌ජාමූලකං සුඛන්‌ති පබ්‌බජ්‌ජාහෙතුකං පවිවෙකසුඛං.
65. Dutiyassa paṭhame sabbakāmanipphattimūlakaṃ sukhanti anavasesaupabhogaparibhogavatthunipphattihetukaṃ kāmasukhaṃ. Pabbajjāmūlakaṃ sukhanti pabbajjāhetukaṃ pavivekasukhaṃ.
66. දුතියෙ කාමෙති පඤ්‌ච කාමගුණෙ, සබ්‌බෙපි වා තෙභූමකෙ ධම්‌මෙ. වුත්‌තඤ්‌හෙතං ‘‘සබ්‌බෙපි තෙභූමකා ධම්‌මා කමනීයට්‌ඨෙන කාමා’’ති (මහානි. 1). නෙක්‌ඛම්‌මං වුච්‌චති පබ්‌බජ්‌ජා ඝරබන්‌ධනතො නික්‌ඛන්‌තත්‌තා. නිබ්‌බානමෙව වා –
66. Dutiye kāmeti pañca kāmaguṇe, sabbepi vā tebhūmake dhamme. Vuttañhetaṃ ‘‘sabbepi tebhūmakā dhammā kamanīyaṭṭhena kāmā’’ti (mahāni. 1). Nekkhammaṃ vuccati pabbajjā gharabandhanato nikkhantattā. Nibbānameva vā –
‘‘පබ්‌බජ්‌ජා පඨමං ඣානං, නිබ්‌බානඤ්‌ච විපස්‌සනා;
‘‘Pabbajjā paṭhamaṃ jhānaṃ, nibbānañca vipassanā;
සබ්‌බෙපි කුසලා ධම්‌මා, නෙක්‌ඛම්‌මන්‌ති පවුච්‌චරෙ’’ති. (ඉතිවු. අට්‌ඨ. 109) –
Sabbepi kusalā dhammā, nekkhammanti pavuccare’’ti. (itivu. aṭṭha. 109) –
හි වුත්‌තං.
Hi vuttaṃ.
67. තතියෙ උපධී වුච්‌චන්‌ති පඤ්‌චුපාදානක්‌ඛන්‌ධා, තන්‌නිස්‌සිතං සුඛං උපධිසුඛං. තප්‌පටිපක්‌ඛතො නිරුපධිසුඛං ලොකුත්‌තරසුඛං.
67. Tatiye upadhī vuccanti pañcupādānakkhandhā, tannissitaṃ sukhaṃ upadhisukhaṃ. Tappaṭipakkhato nirupadhisukhaṃ lokuttarasukhaṃ.
68. චතුත්‌ථෙ වට්‌ටපරියාපන්‌නං සුඛං වට්‌ටසුඛං. නිබ්‌බානාරම්‌මණං සුඛං විවට්‌ටසුඛං.
68. Catutthe vaṭṭapariyāpannaṃ sukhaṃ vaṭṭasukhaṃ. Nibbānārammaṇaṃ sukhaṃ vivaṭṭasukhaṃ.
69. පඤ්‌චමෙ සංකිලෙසන්‌ති සංකිලිට්‌ඨං. තෙනාහ ‘‘වට්‌ටගාමිසුඛ’’න්‌ති. විවට්‌ටසුඛන්‌ති මග්‌ගඵලසහගතං සුඛං.
69. Pañcame saṃkilesanti saṃkiliṭṭhaṃ. Tenāha ‘‘vaṭṭagāmisukha’’nti. Vivaṭṭasukhanti maggaphalasahagataṃ sukhaṃ.
70. ඡට්‌ඨෙ අරියානමෙව සුඛං අරියසුඛං, අරියඤ්‌ච තං සුඛඤ්‌චාතිපි අරියසුඛං. අනරියානමෙව සුඛං අනරියසුඛං. අනරියඤ්‌ච තං සුඛඤ්‌චාතිපි අනරියසුඛං.
70. Chaṭṭhe ariyānameva sukhaṃ ariyasukhaṃ, ariyañca taṃ sukhañcātipi ariyasukhaṃ. Anariyānameva sukhaṃ anariyasukhaṃ. Anariyañca taṃ sukhañcātipi anariyasukhaṃ.
71. සත්‌තමෙ තන්‌ති චෙතසිකසුඛං.
71. Sattame tanti cetasikasukhaṃ.
72. අට්‌ඨමෙ සහ පීතියා වත්‌තතීති සප්‌පීතිකං, පීතිසහගතං සුඛං. සභාවතො විරාගතො ච නත්‌ථි එතස්‌ස පීතීති නිප්‌පීතිකං සුඛං. අට්‌ඨකථායං පනෙත්‌ථ ඣානසුඛමෙව උද්‌ධටං, තථා ච ‘‘ලොකියසප්‌පීතිකසුඛතො ලොකියනිප්‌පීතිකසුඛං අග්‌ග’’න්‌ති වුත්‌තං. ලොකියනිප්‌පීතිකම්‌පි හි අග්‌ගං ලබ්‌භතෙවාති භූමන්‌තරං භින්‌දිත්‌වා අග්‌ගභාවො වෙදිතබ්‌බො.
72. Aṭṭhame saha pītiyā vattatīti sappītikaṃ, pītisahagataṃ sukhaṃ. Sabhāvato virāgato ca natthi etassa pītīti nippītikaṃ sukhaṃ. Aṭṭhakathāyaṃ panettha jhānasukhameva uddhaṭaṃ, tathā ca ‘‘lokiyasappītikasukhato lokiyanippītikasukhaṃ agga’’nti vuttaṃ. Lokiyanippītikampi hi aggaṃ labbhatevāti bhūmantaraṃ bhinditvā aggabhāvo veditabbo.
73. නවමෙ සාතසභාවමෙව සුඛං සාතසුඛං, න උපෙක්‌ඛාසුඛං විය අසාතසභාවං. කාමඤ්‌චෙත්‌ථ කායවිඤ්‌ඤාණසහගතම්‌පි සාතසුඛමෙව, අට්‌ඨකථායං පන ‘‘තීසු ඣානෙසු සුඛ’’න්‌තෙව වුත්‌තං.
73. Navame sātasabhāvameva sukhaṃ sātasukhaṃ, na upekkhāsukhaṃ viya asātasabhāvaṃ. Kāmañcettha kāyaviññāṇasahagatampi sātasukhameva, aṭṭhakathāyaṃ pana ‘‘tīsu jhānesu sukha’’nteva vuttaṃ.
74. දසමෙ සමාධිසම්‌පයුත්‌තං සුඛං සමාධිසුඛං. න සමාධිසම්‌පයුත්‌තං සුඛං අසමාධිසුඛං.
74. Dasame samādhisampayuttaṃ sukhaṃ samādhisukhaṃ. Na samādhisampayuttaṃ sukhaṃ asamādhisukhaṃ.
75. එකාදසමෙ සුත්‌තන්‌තකථා එසාති ‘‘සප්‌පීතිකං ඣානද්‌වය’’න්‌ති වුත්‌තං.
75. Ekādasame suttantakathā esāti ‘‘sappītikaṃ jhānadvaya’’nti vuttaṃ.
77. තෙරසමෙ රූපජ්‌ඣානං රූපං උත්‌තරපදලොපෙන, තං ආරම්‌මණං එතස්‌සාති රූපාරම්‌මණං. චතුත්‌ථජ්‌ඣානග්‌ගහණං පන යදස්‌ස පටියොගී, තෙන සමානයොගක්‌ඛමදස්‌සනපරං. යං කිඤ්‌චි රූපන්‌ති යං කිඤ්‌චි රුප්‌පනලක්‌ඛණං රූපං. තප්‌පටික්‌ඛෙපෙන අරූපං වෙදිතබ්‌බං.
77. Terasame rūpajjhānaṃ rūpaṃ uttarapadalopena, taṃ ārammaṇaṃ etassāti rūpārammaṇaṃ. Catutthajjhānaggahaṇaṃ pana yadassa paṭiyogī, tena samānayogakkhamadassanaparaṃ. Yaṃ kiñci rūpanti yaṃ kiñci ruppanalakkhaṇaṃ rūpaṃ. Tappaṭikkhepena arūpaṃ veditabbaṃ.
සුඛවග්‌ගවණ්‌ණනා නිට්‌ඨිතා.
Sukhavaggavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / (7) 2. සුඛවග්‌ගො • (7) 2. Sukhavaggo
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / (7) 2. සුඛවග්‌ගවණ්‌ණනා • (7) 2. Sukhavaggavaṇṇanā
