| Library / Tipiṭaka / තිපිටක • Tipiṭaka / ඉතිවුත්‌තකපාළි • Itivuttakapāḷi |
5. සුක්‌කධම්‌මසුත්‌තං
5. Sukkadhammasuttaṃ
42. වුත්‌තඤ්‌හෙතං භගවතා, වුත්‌තමරහතාති මෙ සුතං –
42. Vuttañhetaṃ bhagavatā, vuttamarahatāti me sutaṃ –
‘‘ද්‌වෙමෙ, භික්‌ඛවෙ, සුක්‌කා ධම්‌මා ලොකං පාලෙන්‌ති. කතමෙ ද්‌වෙ? හිරී 1 ච, ඔත්‌තප්‌පඤ්‌ච. ඉමෙ චෙ, භික්‌ඛවෙ, ද්‌වෙ සුක්‌කා ධම්‌මා ලොකං න පාලෙය්‍යුං, නයිධ පඤ්‌ඤායෙථ මාතාති වා මාතුච්‌ඡාති වා මාතුලානීති වා ආචරියභරියාති වා ගරූනං දාරාති වා. සම්‌භෙදං ලොකො අගමිස්‌ස යථා අජෙළකා කුක්‌කුටසූකරා සොණසිඞ්‌ගාලා 2. යස්‌මා ච ඛො, භික්‌ඛවෙ, ඉමෙ ද්‌වෙ සුක්‌කා ධම්‌මා ලොකං පාලෙන්‌ති තස්‌මා පඤ්‌ඤායති මාතාති වා මාතුච්‌ඡාති වා මාතුලානීති වා ආචරියභරියාති වා ගරූනං දාරාති වා’’ති. එතමත්‌ථං භගවා අවොච. තත්‌ථෙතං ඉති වුච්‌චති –
‘‘Dveme, bhikkhave, sukkā dhammā lokaṃ pālenti. Katame dve? Hirī 3 ca, ottappañca. Ime ce, bhikkhave, dve sukkā dhammā lokaṃ na pāleyyuṃ, nayidha paññāyetha mātāti vā mātucchāti vā mātulānīti vā ācariyabhariyāti vā garūnaṃ dārāti vā. Sambhedaṃ loko agamissa yathā ajeḷakā kukkuṭasūkarā soṇasiṅgālā 4. Yasmā ca kho, bhikkhave, ime dve sukkā dhammā lokaṃ pālenti tasmā paññāyati mātāti vā mātucchāti vā mātulānīti vā ācariyabhariyāti vā garūnaṃ dārāti vā’’ti. Etamatthaṃ bhagavā avoca. Tatthetaṃ iti vuccati –
‘‘යෙසං චෙ හිරිඔත්‌තප්‌පං, සබ්‌බදා ච න විජ්‌ජති;
‘‘Yesaṃ ce hiriottappaṃ, sabbadā ca na vijjati;
වොක්‌කන්‌තා සුක්‌කමූලා තෙ, ජාතිමරණගාමිනො.
Vokkantā sukkamūlā te, jātimaraṇagāmino.
‘‘යෙසඤ්‌ච හිරිඔත්‌තප්‌පං, සදා සම්‌මා උපට්‌ඨිතා;
‘‘Yesañca hiriottappaṃ, sadā sammā upaṭṭhitā;
විරූළ්‌හබ්‍රහ්‌මචරියා තෙ, සන්‌තො ඛීණපුනබ්‌භවා’’ති.
Virūḷhabrahmacariyā te, santo khīṇapunabbhavā’’ti.
අයම්‌පි අත්‌ථො වුත්‌තො භගවතා, ඉති මෙ සුතන්‌ති. පඤ්‌චමං.
Ayampi attho vutto bhagavatā, iti me sutanti. Pañcamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / ඉතිවුත්‌තක-අට්‌ඨකථා • Itivuttaka-aṭṭhakathā / 5. සුක්‌කධම්‌මසුත්‌තවණ්‌ණනා • 5. Sukkadhammasuttavaṇṇanā
