| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
7. සුපතිසුත්‌තවණ්‌ණනා
7. Supatisuttavaṇṇanā
143. සත්‌තමෙ පාදෙ පක්‌ඛාලෙත්‌වාති උතුගාහාපනත්‌ථං ධොවිත්‌වා. බුද්‌ධානං පන සරීරෙ රජොජල්‌ලං න උපලිම්‌පති, උදකම්‌පි පොක්‌ඛරපත්‌තෙ පක්‌ඛිත්‌තං විය විවට්‌ටිත්‌වා ගච්‌ඡති. අපිච ඛො ධොතපාදකෙ ගෙහෙ පාදෙ ධොවිත්‌වා පවිසනං පබ්‌බජිතානං වත්‌තං. තත්‌ථ බුද්‌ධානං වත්‌තභෙදො නාම නත්‌ථි, වත්‌තසීසෙ පන ඨත්‌වා ධොවන්‌ති. සචෙ හි තථාගතො නෙව න්‌හායෙය්‍ය, න පාදෙ ධොවෙය්‍ය, ‘‘නායං මනුස්‌සො’’ති වදෙය්‍යුං. තස්‌මා මනුස්‌සකිරියං අමුඤ්‌චන්‌තො ධොවති. සතො සම්‌පජානොති සොප්‌පපරිග්‌ගාහකෙන සතිසම්‌පජඤ්‌ඤෙන සමන්‌නාගතො. උපසඞ්‌කමීති සමණො ගොතමො සබ්‌බරත්‌තිං අබ්‌භොකාසෙ චඞ්‌කමිත්‌වා ගන්‌ධකුටිං පවිසිත්‌වා නිද්‌දායති, අතිවිය සුඛසයිතො භවිස්‌සති, ඝට්‌ටයිස්‌සාමි නන්‌ති චින්‌තෙත්‌වා උපසඞ්‌කමි.
143. Sattame pāde pakkhāletvāti utugāhāpanatthaṃ dhovitvā. Buddhānaṃ pana sarīre rajojallaṃ na upalimpati, udakampi pokkharapatte pakkhittaṃ viya vivaṭṭitvā gacchati. Apica kho dhotapādake gehe pāde dhovitvā pavisanaṃ pabbajitānaṃ vattaṃ. Tattha buddhānaṃ vattabhedo nāma natthi, vattasīse pana ṭhatvā dhovanti. Sace hi tathāgato neva nhāyeyya, na pāde dhoveyya, ‘‘nāyaṃ manusso’’ti vadeyyuṃ. Tasmā manussakiriyaṃ amuñcanto dhovati. Sato sampajānoti soppapariggāhakena satisampajaññena samannāgato. Upasaṅkamīti samaṇo gotamo sabbarattiṃ abbhokāse caṅkamitvā gandhakuṭiṃ pavisitvā niddāyati, ativiya sukhasayito bhavissati, ghaṭṭayissāmi nanti cintetvā upasaṅkami.
කිං සොප්‌පසීති කිං සුපසි, කිං සොප්‌පං නාමිදං තවාති වදති. කිං නු සොප්‌පසීති කස්‌මා නු සුපසි? දුබ්‌භගො වියාති මතො විය, විසඤ්‌ඤී විය ච. සුඤ්‌ඤමගාරන්‌ති සුඤ්‌ඤං මෙ ඝරං ලද්‌ධන්‌ති සොප්‌පසීති වදති. සූරියෙ උග්‌ගතෙති සූරියම්‌හි උට්‌ඨිතෙ. ඉදානි හි අඤ්‌ඤෙ භික්‌ඛූ සම්‌මජ්‌ජන්‌ති , පානීයං උපට්‌ඨපෙන්‌ති, භික්‌ඛාචාරගමනසජ්‌ජා භවන්‌ති, ත්‌වං කස්‌මා සොප්‌පසියෙව.
Kiṃ soppasīti kiṃ supasi, kiṃ soppaṃ nāmidaṃ tavāti vadati. Kiṃ nu soppasīti kasmā nu supasi? Dubbhago viyāti mato viya, visaññī viya ca. Suññamagāranti suññaṃ me gharaṃ laddhanti soppasīti vadati. Sūriye uggateti sūriyamhi uṭṭhite. Idāni hi aññe bhikkhū sammajjanti , pānīyaṃ upaṭṭhapenti, bhikkhācāragamanasajjā bhavanti, tvaṃ kasmā soppasiyeva.
ජාලිනීති තයො භවෙ අජ්‌ඣොත්‌ථරිත්‌වා ඨිතෙන ‘‘අජ්‌ඣත්‌තිකස්‌සුපාදාය අට්‌ඨාරසතණ්‌හාවිචරිතානී’’තිආදිනා (විභ. 842) තෙන තෙන අත්‌තනො කොට්‌ඨාසභූතෙන ජාලෙන ජාලිනී. විසත්‌තිකාති රූපාදීසු තත්‌ථ තත්‌ථ විසත්‌තතාය විසමූලතාය විසපරිභොගතාය ච විසත්‌තිකා. කුහිඤ්‌චි නෙතවෙති කත්‌ථචි නෙතුං. සබ්‌බූපධි පරික්‌ඛයාති සබ්‌බෙසං ඛන්‌ධකිලෙසාභිසඞ්‌ඛාරකාමගුණභෙදානං උපධීනං පරික්‌ඛයා. කිං තවෙත්‌ථ, මාරාති, මාර, තුය්‌හං කිං එත්‌ථ? කස්‌මා ත්‌වං උණ්‌හයාගුයං නිලීයිතුං අසක්‌කොන්‌තී ඛුද්‌දකමක්‌ඛිකා විය අන්‌තන්‌තෙනෙව උජ්‌ඣායන්‌තො ආහිණ්‌ඩසීති. සත්‌තමං.
Jālinīti tayo bhave ajjhottharitvā ṭhitena ‘‘ajjhattikassupādāya aṭṭhārasataṇhāvicaritānī’’tiādinā (vibha. 842) tena tena attano koṭṭhāsabhūtena jālena jālinī. Visattikāti rūpādīsu tattha tattha visattatāya visamūlatāya visaparibhogatāya ca visattikā. Kuhiñci netaveti katthaci netuṃ. Sabbūpadhi parikkhayāti sabbesaṃ khandhakilesābhisaṅkhārakāmaguṇabhedānaṃ upadhīnaṃ parikkhayā. Kiṃ tavettha, mārāti, māra, tuyhaṃ kiṃ ettha? Kasmā tvaṃ uṇhayāguyaṃ nilīyituṃ asakkontī khuddakamakkhikā viya antanteneva ujjhāyanto āhiṇḍasīti. Sattamaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 7. සුපතිසුත්‌තං • 7. Supatisuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 7. සුපතිසුත්‌තවණ්‌ණනා • 7. Supatisuttavaṇṇanā
