| Library / Tipiṭaka / තිපිටක • Tipiṭaka / කඞ්‌ඛාවිතරණී-අභිනව-ටීකා • Kaṅkhāvitaraṇī-abhinava-ṭīkā |
3-4. සුප්‌පටිච්‌ඡන්‌නසික්‌ඛාපදවණ්‌ණනා
3-4. Suppaṭicchannasikkhāpadavaṇṇanā
සුට්‌ඨු පටිච්‌ඡන්‌නොති ජත්‌තුම්‌පි උරම්‌පි අවිවරිත්‌වා පටිච්‌ඡාදෙතබ්‌බට්‌ඨානෙ පටිච්‌ඡාදනෙන පටිච්‌ඡන්‌නො, න සීසපාරුතො. තෙනාහ ‘‘ගණ්‌ඨිකං පටිමුඤ්‌චිත්‌වා’’තිආදි. තත්‌ථ ගණ්‌ඨිකං පටිමුඤ්‌චිත්‌වාති ගණ්‌ඨිකං පාසකෙ පටිමුඤ්‌චිත්‌වා. අන්‌තරඝරෙ වාති ගොචරගාමෙ. එකදිවසම්‌පි වාසූපගතස්‌ස සන්‌තිකං යථාසුඛං ගන්‌තුං වට්‌ටති, කො පන වාදො චතුප්‌පඤ්‌චාහං වාසමධිට්‌ඨාය වසිතභික්‌ඛූනං සන්‌තිකන්‌ති ගණ්‌ඨිපදෙ ලිඛිතං.
Suṭṭhu paṭicchannoti jattumpi urampi avivaritvā paṭicchādetabbaṭṭhāne paṭicchādanena paṭicchanno, na sīsapāruto. Tenāha ‘‘gaṇṭhikaṃ paṭimuñcitvā’’tiādi. Tattha gaṇṭhikaṃ paṭimuñcitvāti gaṇṭhikaṃ pāsake paṭimuñcitvā. Antaraghare vāti gocaragāme. Ekadivasampi vāsūpagatassa santikaṃ yathāsukhaṃ gantuṃ vaṭṭati, ko pana vādo catuppañcāhaṃ vāsamadhiṭṭhāya vasitabhikkhūnaṃ santikanti gaṇṭhipade likhitaṃ.
වාසූපගතස්‌සාති රත්‌තිවාසත්‌ථාය උපගතස්‌ස රත්‌තිභාගෙ වා දිවසභාගෙ වා කායං විවරිත්‌වා නිසීදතො අනාපත්‌ති.
Vāsūpagatassāti rattivāsatthāya upagatassa rattibhāge vā divasabhāge vā kāyaṃ vivaritvā nisīdato anāpatti.
සුප්‌පටිච්‌ඡන්‌නසික්‌ඛාපදවණ්‌ණනා නිට්‌ඨිතා.
Suppaṭicchannasikkhāpadavaṇṇanā niṭṭhitā.
