| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
11. සක්‌කසංයුත්‌තං
11. Sakkasaṃyuttaṃ
1. පඨමවග්‌ගො
1. Paṭhamavaggo
1. සුවීරසුත්‌තවණ්‌ණනා
1. Suvīrasuttavaṇṇanā
247. අභියංසූති යුද්‌ධසජ්‌ජාභිමුඛා හුත්‌වා ගච්‌ඡිංසු. තත්‍රාති තස්‌මිං අසුරානං අභියානෙ අයං දානි වුච්‌චමානා අනුපුබ්‌බතො කථා. තෙත්‌තිංස පුරිසෙ ගහෙත්‌වාති තෙත්‌තිංස පුරිසෙ පුඤ්‌ඤකිරියාය සහායභූතෙ ගහෙත්‌වා. ‘‘යාවජීවං මාතාපිතුභරො අස්‌ස’’න්‌තිආදිනා සමාදින්‌නානි සත්‌ත වතපදානි පූරෙත්‌වා. අධිගණ්‌හන්‌තං අභිභවන්‌තං. පුත්‌තහතායාති හතපුත්‌තාය. සා සුරා න හොති, න සුරං පිවිම්‌හාති අධිප්‌පායො. තතො පට්‌ඨායාති ‘‘න සුරා’’ති වුත්‌තකාලතො පට්‌ඨාය. ‘‘න සුරන්‌ති න දිබ්‌බන්‌තීති අසුරා’’ති කෙචි. හෙට්‌ඨිමතලෙ අන්‌තොභූමියං ආයාමතො දසයොජනසහස්‌සං.
247.Abhiyaṃsūti yuddhasajjābhimukhā hutvā gacchiṃsu. Tatrāti tasmiṃ asurānaṃ abhiyāne ayaṃ dāni vuccamānā anupubbato kathā. Tettiṃsa purise gahetvāti tettiṃsa purise puññakiriyāya sahāyabhūte gahetvā. ‘‘Yāvajīvaṃ mātāpitubharo assa’’ntiādinā samādinnāni satta vatapadāni pūretvā. Adhigaṇhantaṃ abhibhavantaṃ. Puttahatāyāti hataputtāya. Sā surā na hoti, na suraṃ pivimhāti adhippāyo. Tato paṭṭhāyāti ‘‘na surā’’ti vuttakālato paṭṭhāya. ‘‘Na suranti na dibbantīti asurā’’ti keci. Heṭṭhimatale antobhūmiyaṃ āyāmato dasayojanasahassaṃ.
උරගාදිසහචරිතානි ඨානානි උරගාදීනීති ආහ ‘‘උරගාදීසු පඤ්‌චසු ඨානෙසූ’’ති. පඨමාලින්‌දෙති පඨමෙ පරිභණ්‌ඩෙ. පඤ්‌චයොජනසහස්‌සවිත්‌ථාරපුථුබහලාහි සිනෙරුස්‌ස චතූසුපි පස්‌සෙසු චත්‌තාරො පරිභණ්‌ඩා. සිනෙරුස්‌ස හි තස්‌මිං තස්‌මිං පස්‌සෙ යුගන්‌ධරාදීසු පඤ්‌චසතපරිත්‌තදීපපරිවාරෙ මහාදීපෙ ච ලභිතබ්‌බස්‌ස මහතො අත්‌ථස්‌ස වසෙන මහත්‌ථා. කුපිතාවිලචිත්‌තාති කුපිතෙන කොපෙන ආකුලචිත්‌තා. යුද්‌ධෙසීති යුද්‌ධෙසිනො. සෙසෙසූති සෙසෙසු පරිභණ්‌ඩෙසු. සෙසාති සුපණ්‌ණාදයො.
Uragādisahacaritāni ṭhānāni uragādīnīti āha ‘‘uragādīsu pañcasu ṭhānesū’’ti. Paṭhamālindeti paṭhame paribhaṇḍe. Pañcayojanasahassavitthāraputhubahalāhi sinerussa catūsupi passesu cattāro paribhaṇḍā. Sinerussa hi tasmiṃ tasmiṃ passe yugandharādīsu pañcasataparittadīpaparivāre mahādīpe ca labhitabbassa mahato atthassa vasena mahatthā. Kupitāvilacittāti kupitena kopena ākulacittā. Yuddhesīti yuddhesino. Sesesūti sesesu paribhaṇḍesu. Sesāti supaṇṇādayo.
වම්‌මිකමක්‌ඛිකාති සපක්‌ඛිකඋපචිකා. ඔසක්‌කිත්‌වාති පිට්‌ඨිභාගෙන නිවත්‌තිත්‌වා.
Vammikamakkhikāti sapakkhikaupacikā. Osakkitvāti piṭṭhibhāgena nivattitvā.
පමාදං ආපාදෙසීති සක්‌කස්‌ස ආණාය පමාදං ආපජ්‌ජි. සට්‌ඨියොජනං විත්‌ථාරෙන. සුවණ්‌ණමහාවීථින්‌ති සුවණ්‌ණමයභූමිජගතිවීථිං.
Pamādaṃ āpādesīti sakkassa āṇāya pamādaṃ āpajji. Saṭṭhiyojanaṃ vitthārena. Suvaṇṇamahāvīthinti suvaṇṇamayabhūmijagativīthiṃ.
අනුට්‌ඨහන්‌තොති උට්‌ඨානං කායිකවීරියං අකරොන්‌තො. අවායමන්‌තොති වායාමං චෙතසිකවීරියං අකරොන්‌තො. කිඤ්‌චි කිච්‌චන්‌ති කසිවාණිජ්‌ජාදිභෙදං අඤ්‌ඤතරං කිච්‌චං කත්‌තබ්‌බකම්‌මං. වරන්‌ති පවරං. තෙනාහ ‘‘උත්‌තම’’න්‌ති. තඤ්‌ච ඛො කසිතබ්‌බට්‌ඨානං අධිප්‌පෙතන්‌ති ආහ ‘‘ඔකාස’’න්‌ති. කම්‌මං අකත්‌වාති කිඤ්‌චිපි ජීවිතහෙතුභූතං කම්‌මං අකත්‌වා. ජීවිතට්‌ඨානං නාමාති තස්‌ස ජීවිතස්‌ස හෙතු නාම. නිබ්‌බානස්‌ස මග්‌ගොති නිබ්‌බානස්‌ස අධිගමුපායභූතො මග්‌ගො.
Anuṭṭhahantoti uṭṭhānaṃ kāyikavīriyaṃ akaronto. Avāyamantoti vāyāmaṃ cetasikavīriyaṃ akaronto. Kiñci kiccanti kasivāṇijjādibhedaṃ aññataraṃ kiccaṃ kattabbakammaṃ. Varanti pavaraṃ. Tenāha ‘‘uttama’’nti. Tañca kho kasitabbaṭṭhānaṃ adhippetanti āha ‘‘okāsa’’nti. Kammaṃ akatvāti kiñcipi jīvitahetubhūtaṃ kammaṃ akatvā. Jīvitaṭṭhānaṃ nāmāti tassa jīvitassa hetu nāma. Nibbānassa maggoti nibbānassa adhigamupāyabhūto maggo.
සුවීරසුත්‌තවණ්‌ණනා නිට්‌ඨිතා.
Suvīrasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 1. සුවීරසුත්‌තං • 1. Suvīrasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1. සුවීරසුත්‌තවණ්‌ණනා • 1. Suvīrasuttavaṇṇanā
