| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၈. တတိယဩဝာဒသုတ္တံ
8. Tatiyaovādasuttaṃ
၁၅၁. ရာဇဂဟေ ကလန္ဒကနိဝာပေ 1။ အထ ခော အာယသ္မာ မဟာကသ္သပော ယေန ဘဂဝာ တေနုပသင္ကမိ ; ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ နိသီဒိ။ ဧကမန္တံ နိသိန္နံ ခော အာယသ္မန္တံ မဟာကသ္သပံ ဘဂဝာ ဧတဒဝောစ – ‘‘ဩဝဒ, ကသ္သပ, ဘိက္ခူ; ကရောဟိ, ကသ္သပ, ဘိက္ခူနံ ဓမ္မိံ ကထံ။ အဟံ ဝာ, ကသ္သပ, ဘိက္ခူနံ ဩဝဒေယ္ယံ တ္ဝံ ဝာ; အဟံ ဝာ ဘိက္ခူနံ ဓမ္မိံ ကထံ ကရေယ္ယံ တ္ဝံ ဝာ’’တိ။
151. Rājagahe kalandakanivāpe 2. Atha kho āyasmā mahākassapo yena bhagavā tenupasaṅkami ; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ mahākassapaṃ bhagavā etadavoca – ‘‘ovada, kassapa, bhikkhū; karohi, kassapa, bhikkhūnaṃ dhammiṃ kathaṃ. Ahaṃ vā, kassapa, bhikkhūnaṃ ovadeyyaṃ tvaṃ vā; ahaṃ vā bhikkhūnaṃ dhammiṃ kathaṃ kareyyaṃ tvaṃ vā’’ti.
‘‘ဒုဗ္ဗစာ ခော, ဘန္တေ, ဧတရဟိ ဘိက္ခူ, ဒောဝစသ္သကရဏေဟိ ဓမ္မေဟိ သမန္နာဂတာ, အက္ခမာ, အပ္ပဒက္ခိဏဂ္ဂာဟိနော အနုသာသနီ’’န္တိ။ ‘‘တထာ ဟိ ပန, ကသ္သပ, ပုဗ္ဗေ ထေရာ ဘိက္ခူ အာရညိကာ စေဝ အဟေသုံ အာရညိကတ္တသ္သ စ ဝဏ္ဏဝာဒိနော, ပိဏ္ဍပာတိကာ စေဝ အဟေသုံ ပိဏ္ဍပာတိကတ္တသ္သ စ ဝဏ္ဏဝာဒိနော , ပံသုကူလိကာ စေဝ အဟေသုံ ပံသုကူလိကတ္တသ္သ စ ဝဏ္ဏဝာဒိနော, တေစီဝရိကာ စေဝ အဟေသုံ တေစီဝရိကတ္တသ္သ စ ဝဏ္ဏဝာဒိနော, အပ္ပိစ္ဆာ စေဝ အဟေသုံ အပ္ပိစ္ဆတာယ စ ဝဏ္ဏဝာဒိနော, သန္တုဋ္ဌာ စေဝ အဟေသုံ သန္တုဋ္ဌိယာ စ ဝဏ္ဏဝာဒိနော, ပဝိဝိတ္တာ စေဝ အဟေသုံ ပဝိဝေကသ္သ စ ဝဏ္ဏဝာဒိနော, အသံသဋ္ဌာ စေဝ အဟေသုံ အသံသဂ္ဂသ္သ စ ဝဏ္ဏဝာဒိနော, အာရဒ္ဓဝီရိယာ စေဝ အဟေသုံ ဝီရိယာရမ္ဘသ္သ စ ဝဏ္ဏဝာဒိနော။
‘‘Dubbacā kho, bhante, etarahi bhikkhū, dovacassakaraṇehi dhammehi samannāgatā, akkhamā, appadakkhiṇaggāhino anusāsanī’’nti. ‘‘Tathā hi pana, kassapa, pubbe therā bhikkhū āraññikā ceva ahesuṃ āraññikattassa ca vaṇṇavādino, piṇḍapātikā ceva ahesuṃ piṇḍapātikattassa ca vaṇṇavādino , paṃsukūlikā ceva ahesuṃ paṃsukūlikattassa ca vaṇṇavādino, tecīvarikā ceva ahesuṃ tecīvarikattassa ca vaṇṇavādino, appicchā ceva ahesuṃ appicchatāya ca vaṇṇavādino, santuṭṭhā ceva ahesuṃ santuṭṭhiyā ca vaṇṇavādino, pavivittā ceva ahesuṃ pavivekassa ca vaṇṇavādino, asaṃsaṭṭhā ceva ahesuṃ asaṃsaggassa ca vaṇṇavādino, āraddhavīriyā ceva ahesuṃ vīriyārambhassa ca vaṇṇavādino.
‘‘တတ္ရ ယော ဟောတိ ဘိက္ခု အာရညိကော စေဝ အာရညိကတ္တသ္သ စ ဝဏ္ဏဝာဒီ, ပိဏ္ဍပာတိကော စေဝ ပိဏ္ဍပာတိကတ္တသ္သ စ ဝဏ္ဏဝာဒီ, ပံသုကူလိကော စေဝ ပံသုကူလိကတ္တသ္သ စ ဝဏ္ဏဝာဒီ, တေစီဝရိကော စေဝ တေစီဝရိကတ္တသ္သ စ ဝဏ္ဏဝာဒီ, အပ္ပိစ္ဆော စေဝ အပ္ပိစ္ဆတာယ စ ဝဏ္ဏဝာဒီ, သန္တုဋ္ဌော စေဝ သန္တုဋ္ဌိယာ စ ဝဏ္ဏဝာဒီ, ပဝိဝိတ္တော စေဝ ပဝိဝေကသ္သ စ ဝဏ္ဏဝာဒီ, အသံသဋ္ဌော စေဝ အသံသဂ္ဂသ္သ စ ဝဏ္ဏဝာဒီ, အာရဒ္ဓဝီရိယော စေဝ ဝီရိယာရမ္ဘသ္သ စ ဝဏ္ဏဝာဒီ, တံ ထေရာ ဘိက္ခူ အာသနေန နိမန္တေန္တိ – ‘ဧဟိ, ဘိက္ခု, ကော နာမာယံ ဘိက္ခု, ဘဒ္ဒကော ဝတာယံ ဘိက္ခု, သိက္ခာကာမော ဝတာယံ ဘိက္ခု; ဧဟိ, ဘိက္ခု, ဣဒံ အာသနံ နိသီဒာဟီ’’’တိ။
‘‘Tatra yo hoti bhikkhu āraññiko ceva āraññikattassa ca vaṇṇavādī, piṇḍapātiko ceva piṇḍapātikattassa ca vaṇṇavādī, paṃsukūliko ceva paṃsukūlikattassa ca vaṇṇavādī, tecīvariko ceva tecīvarikattassa ca vaṇṇavādī, appiccho ceva appicchatāya ca vaṇṇavādī, santuṭṭho ceva santuṭṭhiyā ca vaṇṇavādī, pavivitto ceva pavivekassa ca vaṇṇavādī, asaṃsaṭṭho ceva asaṃsaggassa ca vaṇṇavādī, āraddhavīriyo ceva vīriyārambhassa ca vaṇṇavādī, taṃ therā bhikkhū āsanena nimantenti – ‘ehi, bhikkhu, ko nāmāyaṃ bhikkhu, bhaddako vatāyaṃ bhikkhu, sikkhākāmo vatāyaṃ bhikkhu; ehi, bhikkhu, idaṃ āsanaṃ nisīdāhī’’’ti.
‘‘တတ္ရ, ကသ္သပ, နဝာနံ ဘိက္ခူနံ ဧဝံ ဟောတိ – ‘ယော ကိရ သော ဟောတိ ဘိက္ခု အာရညိကော စေဝ အာရညိကတ္တသ္သ စ ဝဏ္ဏဝာဒီ, ပိဏ္ဍပာတိကော စေဝ။ပေ.။ ပံသုကူလိကော စေဝ။ တေစီဝရိကော စေဝ။ အပ္ပိစ္ဆော စေဝ။ သန္တုဋ္ဌော စေဝ။ ပဝိဝိတ္တော စေဝ။ အသံသဋ္ဌော စေဝ။ အာရဒ္ဓဝီရိယော စေဝ ဝီရိယာရမ္ဘသ္သ စ ဝဏ္ဏဝာဒီ, တံ ထေရာ ဘိက္ခူ အာသနေန နိမန္တေန္တိ – ဧဟိ, ဘိက္ခု, ကော နာမာယံ ဘိက္ခု, ဘဒ္ဒကော ဝတာယံ ဘိက္ခု, သိက္ခာကာမော ဝတာယံ ဘိက္ခု; ဧဟိ, ဘိက္ခု, ဣဒံ အာသနံ နိသီဒာဟီ’တိ။ တေ တထတ္တာယ ပဋိပဇ္ဇန္တိ; တေသံ တံ ဟောတိ ဒီဃရတ္တံ ဟိတာယ သုခာယ။
‘‘Tatra, kassapa, navānaṃ bhikkhūnaṃ evaṃ hoti – ‘yo kira so hoti bhikkhu āraññiko ceva āraññikattassa ca vaṇṇavādī, piṇḍapātiko ceva…pe… paṃsukūliko ceva… tecīvariko ceva… appiccho ceva… santuṭṭho ceva… pavivitto ceva… asaṃsaṭṭho ceva… āraddhavīriyo ceva vīriyārambhassa ca vaṇṇavādī, taṃ therā bhikkhū āsanena nimantenti – ehi, bhikkhu, ko nāmāyaṃ bhikkhu, bhaddako vatāyaṃ bhikkhu, sikkhākāmo vatāyaṃ bhikkhu; ehi, bhikkhu, idaṃ āsanaṃ nisīdāhī’ti. Te tathattāya paṭipajjanti; tesaṃ taṃ hoti dīgharattaṃ hitāya sukhāya.
‘‘ဧတရဟိ ပန, ကသ္သပ, ထေရာ ဘိက္ခူ န စေဝ အာရညိကာ န စ အာရညိကတ္တသ္သ ဝဏ္ဏဝာဒိနော, န စေဝ ပိဏ္ဍပာတိကာ န စ ပိဏ္ဍပာတိကတ္တသ္သ ဝဏ္ဏဝာဒိနော, န စေဝ ပံသုကူလိကာ န စ ပံသုကူလိကတ္တသ္သ ဝဏ္ဏဝာဒိနော, န စေဝ တေစီဝရိကာ န စ တေစီဝရိကတ္တသ္သ ဝဏ္ဏဝာဒိနော, န စေဝ အပ္ပိစ္ဆာ န စ အပ္ပိစ္ဆတာယ ဝဏ္ဏဝာဒိနော, န စေဝ သန္တုဋ္ဌာ န စ သန္တုဋ္ဌိယာ ဝဏ္ဏဝာဒိနော, န စေဝ ပဝိဝိတ္တာ န စ ပဝိဝေကသ္သ ဝဏ္ဏဝာဒိနော, န စေဝ အသံသဋ္ဌာ န စ အသံသဂ္ဂသ္သ ဝဏ္ဏဝာဒိနော , န စေဝ အာရဒ္ဓဝီရိယာ န စ ဝီရိယာရမ္ဘသ္သ ဝဏ္ဏဝာဒိနော။
‘‘Etarahi pana, kassapa, therā bhikkhū na ceva āraññikā na ca āraññikattassa vaṇṇavādino, na ceva piṇḍapātikā na ca piṇḍapātikattassa vaṇṇavādino, na ceva paṃsukūlikā na ca paṃsukūlikattassa vaṇṇavādino, na ceva tecīvarikā na ca tecīvarikattassa vaṇṇavādino, na ceva appicchā na ca appicchatāya vaṇṇavādino, na ceva santuṭṭhā na ca santuṭṭhiyā vaṇṇavādino, na ceva pavivittā na ca pavivekassa vaṇṇavādino, na ceva asaṃsaṭṭhā na ca asaṃsaggassa vaṇṇavādino , na ceva āraddhavīriyā na ca vīriyārambhassa vaṇṇavādino.
‘‘တတ္ရ ယော ဟောတိ ဘိက္ခု ဉာတော ယသသ္သီ လာဘီ စီဝရ-ပိဏ္ဍပာတ-သေနာသနဂိလာနပ္ပစ္စယဘေသဇ္ဇပရိက္ခာရာနံ တံ ထေရာ ဘိက္ခူ အာသနေန နိမန္တေန္တိ – ‘ဧဟိ, ဘိက္ခု, ကော နာမာယံ ဘိက္ခု, ဘဒ္ဒကော ဝတာယံ ဘိက္ခု, သဗ္ရဟ္မစာရိကာမော ဝတာယံ ဘိက္ခု; ဧဟိ, ဘိက္ခု, ဣဒံ အာသနံ နိသီဒာဟီ’’’တိ။
‘‘Tatra yo hoti bhikkhu ñāto yasassī lābhī cīvara-piṇḍapāta-senāsanagilānappaccayabhesajjaparikkhārānaṃ taṃ therā bhikkhū āsanena nimantenti – ‘ehi, bhikkhu, ko nāmāyaṃ bhikkhu, bhaddako vatāyaṃ bhikkhu, sabrahmacārikāmo vatāyaṃ bhikkhu; ehi, bhikkhu, idaṃ āsanaṃ nisīdāhī’’’ti.
‘‘တတ္ရ, ကသ္သပ, နဝာနံ ဘိက္ခူနံ ဧဝံ ဟောတိ – ‘ယော ကိရ သော ဟောတိ ဘိက္ခု ဉာတော ယသသ္သီ လာဘီ စီဝရ-ပိဏ္ဍပာတ-သေနာသန-ဂိလာနပ္ပစ္စယဘေသဇ္ဇပရိက္ခာရာနံ တံ ထေရာ ဘိက္ခူ အာသနေန နိမန္တေန္တိ – ဧဟိ, ဘိက္ခု, ကော နာမာယံ ဘိက္ခု, ဘဒ္ဒကော ဝတာယံ ဘိက္ခု, သဗ္ရဟ္မစာရိကာမော ဝတာယံ ဘိက္ခု; ဧဟိ, ဘိက္ခု, ဣဒံ အာသနံ နိသီဒာဟီ’တိ။ တေ တထတ္တာယ ပဋိပဇ္ဇန္တိ။ တေသံ တံ ဟောတိ ဒီဃရတ္တံ အဟိတာယ ဒုက္ခာယ။ ယဉ္ဟိ တံ, ကသ္သပ, သမ္မာ ဝဒမာနော ဝဒေယ္ယ – ‘ဥပဒ္ဒုတာ ဗ္ရဟ္မစာရီ ဗ္ရဟ္မစာရူပဒ္ဒဝေန အဘိပတ္ထနာ 3 ဗ္ရဟ္မစာရီ ဗ္ရဟ္မစာရိအဘိပတ္ထနေနာ’တိ 4, ဧတရဟိ တံ, ကသ္သပ, သမ္မာ ဝဒမာနော ဝဒေယ္ယ – ‘ဥပဒ္ဒုတာ ဗ္ရဟ္မစာရီ ဗ္ရဟ္မစာရူပဒ္ဒဝေန အဘိပတ္ထနာ ဗ္ရဟ္မစာရီ ဗ္ရဟ္မစာရိအဘိပတ္ထနေနာ’’’တိ။ အဋ္ဌမံ။
‘‘Tatra, kassapa, navānaṃ bhikkhūnaṃ evaṃ hoti – ‘yo kira so hoti bhikkhu ñāto yasassī lābhī cīvara-piṇḍapāta-senāsana-gilānappaccayabhesajjaparikkhārānaṃ taṃ therā bhikkhū āsanena nimantenti – ehi, bhikkhu, ko nāmāyaṃ bhikkhu, bhaddako vatāyaṃ bhikkhu, sabrahmacārikāmo vatāyaṃ bhikkhu; ehi, bhikkhu, idaṃ āsanaṃ nisīdāhī’ti. Te tathattāya paṭipajjanti. Tesaṃ taṃ hoti dīgharattaṃ ahitāya dukkhāya. Yañhi taṃ, kassapa, sammā vadamāno vadeyya – ‘upaddutā brahmacārī brahmacārūpaddavena abhipatthanā 5 brahmacārī brahmacāriabhipatthanenā’ti 6, etarahi taṃ, kassapa, sammā vadamāno vadeyya – ‘upaddutā brahmacārī brahmacārūpaddavena abhipatthanā brahmacārī brahmacāriabhipatthanenā’’’ti. Aṭṭhamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၈. တတိယဩဝာဒသုတ္တဝဏ္ဏနာ • 8. Tatiyaovādasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၈. တတိယဩဝာဒသုတ္တဝဏ္ဏနာ • 8. Tatiyaovādasuttavaṇṇanā
