| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග • Bhikkhunīvibhaṅga |
3. තතියපාරාජිකං
3. Tatiyapārājikaṃ
668. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන ථුල්‌ලනන්‌දා භික්‌ඛුනී සමග්‌ගෙන සඞ්‌ඝෙන උක්‌ඛිත්‌තං අරිට්‌ඨං භික්‌ඛුං ගද්‌ධබාධිපුබ්‌බං අනුවත්‌තති. යා තා භික්‌ඛුනියො අප්‌පිච්‌ඡා…පෙ.… තා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම අය්‍යා ථුල්‌ලනන්‌දා භික්‌ඛුනී සමග්‌ගෙන සඞ්‌ඝෙන උක්‌ඛිත්‌තං අරිට්‌ඨං භික්‌ඛුං ගද්‌ධබාධිපුබ්‌බං අනුවත්‌තිස්‌සතී’’ති…පෙ.… සච්‌චං කිර, භික්‌ඛවෙ, ථුල්‌ලනන්‌දා භික්‌ඛුනී සමග්‌ගෙන සඞ්‌ඝෙන උක්‌ඛිත්‌තං අරිට්‌ඨං භික්‌ඛුං ගද්‌ධබාධිපුබ්‌බං අනුවත්‌තතීති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම, භික්‌ඛවෙ, ථුල්‌ලනන්‌දා භික්‌ඛුනී සමග්‌ගෙන සඞ්‌ඝෙන උක්‌ඛිත්‌තං අරිට්‌ඨං භික්‌ඛුං ගද්‌ධබාධිපුබ්‌බං අනුවත්‌තිස්‌සති! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
668. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī samaggena saṅghena ukkhittaṃ ariṭṭhaṃ bhikkhuṃ gaddhabādhipubbaṃ anuvattati. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā bhikkhunī samaggena saṅghena ukkhittaṃ ariṭṭhaṃ bhikkhuṃ gaddhabādhipubbaṃ anuvattissatī’’ti…pe… saccaṃ kira, bhikkhave, thullanandā bhikkhunī samaggena saṅghena ukkhittaṃ ariṭṭhaṃ bhikkhuṃ gaddhabādhipubbaṃ anuvattatīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī samaggena saṅghena ukkhittaṃ ariṭṭhaṃ bhikkhuṃ gaddhabādhipubbaṃ anuvattissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
669. ‘‘යා පන භික්‌ඛුනී සමග්‌ගෙන සඞ්‌ඝෙන උක්‌ඛිත්‌තං භික්‌ඛුං ධම්‌මෙන විනයෙන සත්‌ථුසාසනෙන අනාදරං අප්‌පටිකාරං අකතසහායං තමනුවත්‌තෙය්‍ය, සා භික්‌ඛුනී භික්‌ඛුනීහි එවමස්‌ස වචනීයා – ‘එසො ඛො, අය්‍යෙ, භික්‌ඛු සමග්‌ගෙන සඞ්‌ඝෙන උක්‌ඛිත්‌තො ධම්‌මෙන විනයෙන සත්‌ථුසාසනෙන අනාදරො අප්‌පටිකාරො අකතසහායො, මාය්‍යෙ, එතං භික්‌ඛුං අනුවත්‌තී’ති. එවඤ්‌ච සා භික්‌ඛුනී භික්‌ඛුනීහි වුච්‌චමානා තථෙව පග්‌ගණ්‌හෙය්‍ය, සා භික්‌ඛුනී භික්‌ඛුනීහි යාවතතියං සමනුභාසිතබ්‌බා තස්‌ස පටිනිස්‌සග්‌ගාය. යාවතතියං චෙ සමනුභාසියමානා තං පටිනිස්‌සජ්‌ජෙය්‍ය, ඉච්‌චෙතං කුසලං. නො චෙ පටිනිස්‌සජ්‌ජෙය්‍ය, අයම්‌පි පාරාජිකා හොති අසංවාසා උක්‌ඛිත්‌තානුවත්‌තිකා’’ති.
669.‘‘Yā pana bhikkhunī samaggena saṅghena ukkhittaṃ bhikkhuṃ dhammena vinayena satthusāsanena anādaraṃ appaṭikāraṃ akatasahāyaṃ tamanuvatteyya, sā bhikkhunī bhikkhunīhi evamassa vacanīyā – ‘eso kho, ayye, bhikkhu samaggena saṅghena ukkhitto dhammena vinayena satthusāsanena anādaro appaṭikāro akatasahāyo, māyye, etaṃ bhikkhuṃ anuvattī’ti. Evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṃ samanubhāsitabbā tassa paṭinissaggāya. Yāvatatiyaṃ ce samanubhāsiyamānā taṃ paṭinissajjeyya, iccetaṃ kusalaṃ. No ce paṭinissajjeyya, ayampi pārājikā hoti asaṃvāsā ukkhittānuvattikā’’ti.
670. යා පනාති යා යාදිසා…පෙ.… භික්‌ඛුනීති…පෙ.… අයං ඉමස්‌මිං අත්‌ථෙ අධිප්‌පෙතා භික්‌ඛුනීති.
670.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
සමග්‌ගො නාම සඞ්‌ඝො සමානසංවාසකො සමානසීමායං ඨිතො.
Samaggo nāma saṅgho samānasaṃvāsako samānasīmāyaṃ ṭhito.
උක්‌ඛිත්‌තො නාම ආපත්‌තියා අදස්‌සනෙ වා අප්‌පටිකම්‌මෙ වා අප්‌පටිනිස්‌සග්‌ගෙ වා 1 උක්‌ඛිත්‌තො.
Ukkhitto nāma āpattiyā adassane vā appaṭikamme vā appaṭinissagge vā 2 ukkhitto.
ධම්‌මෙන විනයෙනාති යෙන ධම්‌මෙන යෙන විනයෙන.
Dhammena vinayenāti yena dhammena yena vinayena.
සත්‌ථුසාසනෙනාති ජිනසාසනෙන බුද්‌ධසාසනෙන.
Satthusāsanenāti jinasāsanena buddhasāsanena.
අනාදරො නාම සඞ්‌ඝං වා ගණං වා පුග්‌ගලං වා කම්‌මං වා නාදියති.
Anādaro nāma saṅghaṃ vā gaṇaṃ vā puggalaṃ vā kammaṃ vā nādiyati.
අප්‌පටිකාරො නාම උක්‌ඛිත්‌තො අනොසාරිතො.
Appaṭikāro nāma ukkhitto anosārito.
අකතසහායො නාම සමානසංවාසකා භික්‌ඛූ වුච්‌චන්‌ති සහායා. සො තෙහි සද්‌ධිං නත්‌ථි, තෙන වුච්‌චති අකතසහායොති.
Akatasahāyo nāma samānasaṃvāsakā bhikkhū vuccanti sahāyā. So tehi saddhiṃ natthi, tena vuccati akatasahāyoti.
තමනුවත්‌තෙය්‍යාති යංදිට්‌ඨිකො සො හොති යංඛන්‌තිකො යංරුචිකො, සාපි තංදිට්‌ඨිකා හොති තංඛන්‌තිකා තංරුචිකා.
Tamanuvatteyyāti yaṃdiṭṭhiko so hoti yaṃkhantiko yaṃruciko, sāpi taṃdiṭṭhikā hoti taṃkhantikā taṃrucikā.
සා භික්‌ඛුනීති යා සා උක්‌ඛිත්‌තානුවත්‌තිකා භික්‌ඛුනී.
Sā bhikkhunīti yā sā ukkhittānuvattikā bhikkhunī.
භික්‌ඛුනීහීති අඤ්‌ඤාහි භික්‌ඛුනීහි. යා පස්‌සන්‌ති යා සුණන්‌ති තාහි වත්‌තබ්‌බා – ‘‘එසො ඛො, අය්‍යෙ, භික්‌ඛු සමග්‌ගෙන සඞ්‌ඝෙන උක්‌ඛිත්‌තො ධම්‌මෙන විනයෙන සත්‌ථුසාසනෙන අනාදරො අප්‌පටිකාරො අකතසහායො. මාය්‍යෙ, එතං භික්‌ඛුං අනුවත්‌තී’’ති. දුතියම්‌පි වත්‌තබ්‌බා. තතියම්‌පි වත්‌තබ්‌බා. සචෙ පටිනිස්‌සජ්‌ජති, ඉච්‌චෙතං කුසලං; නො චෙ පටිනිස්‌සජ්‌ජති, ආපත්‌ති දුක්‌කටස්‌ස. සුත්‌වා න වදන්‌ති, ආපත්‌ති දුක්‌කටස්‌ස. සා භික්‌ඛුනී සඞ්‌ඝමජ්‌ඣම්‌පි ආකඩ්‌ඪිත්‌වා වත්‌තබ්‌බා – ‘‘එසො ඛො, අය්‍යෙ, භික්‌ඛු සමග්‌ගෙන සඞ්‌ඝෙන උක්‌ඛිත්‌තො ධම්‌මෙන විනයෙන සත්‌ථුසාසනෙන අනාදරො අප්‌පටිකාරො අකතසහායො. මාය්‍යෙ, එතං භික්‌ඛුං අනුවත්‌තී’’ති. දුතියම්‌පි වත්‌තබ්‌බා. තතියම්‌පි වත්‌තබ්‌බා. සචෙ පටිනිස්‌සජ්‌ජති, ඉච්‌චෙතං කුසලං. නො චෙ පටිනිස්‌සජ්‌ජති, ආපත්‌ති දුක්‌කටස්‌ස. සා භික්‌ඛුනී සමනුභාසිතබ්‌බා. එවඤ්‌ච පන, භික්‌ඛවෙ, සමනුභාසිතබ්‌බා. බ්‍යත්‌තාය භික්‌ඛුනියා පටිබලාය සඞ්‌ඝො ඤාපෙතබ්‌බො –
Bhikkhunīhīti aññāhi bhikkhunīhi. Yā passanti yā suṇanti tāhi vattabbā – ‘‘eso kho, ayye, bhikkhu samaggena saṅghena ukkhitto dhammena vinayena satthusāsanena anādaro appaṭikāro akatasahāyo. Māyye, etaṃ bhikkhuṃ anuvattī’’ti. Dutiyampi vattabbā. Tatiyampi vattabbā. Sace paṭinissajjati, iccetaṃ kusalaṃ; no ce paṭinissajjati, āpatti dukkaṭassa. Sutvā na vadanti, āpatti dukkaṭassa. Sā bhikkhunī saṅghamajjhampi ākaḍḍhitvā vattabbā – ‘‘eso kho, ayye, bhikkhu samaggena saṅghena ukkhitto dhammena vinayena satthusāsanena anādaro appaṭikāro akatasahāyo. Māyye, etaṃ bhikkhuṃ anuvattī’’ti. Dutiyampi vattabbā. Tatiyampi vattabbā. Sace paṭinissajjati, iccetaṃ kusalaṃ. No ce paṭinissajjati, āpatti dukkaṭassa. Sā bhikkhunī samanubhāsitabbā. Evañca pana, bhikkhave, samanubhāsitabbā. Byattāya bhikkhuniyā paṭibalāya saṅgho ñāpetabbo –
671. ‘‘සුණාතු මෙ, අය්‍යෙ, සඞ්‌ඝො. අයං ඉත්‌ථන්‌නාමා භික්‌ඛුනී සමග්‌ගෙන සඞ්‌ඝෙන උක්‌ඛිත්‌තං භික්‌ඛුං ධම්‌මෙන විනයෙන සත්‌ථුසාසනෙන අනාදරං අප්‌පටිකාරං අකතසහායං තමනුවත්‌තති, සා තං වත්‌ථුං න පටිනිස්‌සජ්‌ජති. යදි සඞ්‌ඝස්‌ස පත්‌තකල්‌ලං, සඞ්‌ඝො ඉත්‌ථන්‌නාමං භික්‌ඛුනිං සමනුභාසෙය්‍ය තස්‌ස වත්‌ථුස්‌ස පටිනිස්‌සග්‌ගාය. එසා ඤත්‌ති.
671. ‘‘Suṇātu me, ayye, saṅgho. Ayaṃ itthannāmā bhikkhunī samaggena saṅghena ukkhittaṃ bhikkhuṃ dhammena vinayena satthusāsanena anādaraṃ appaṭikāraṃ akatasahāyaṃ tamanuvattati, sā taṃ vatthuṃ na paṭinissajjati. Yadi saṅghassa pattakallaṃ, saṅgho itthannāmaṃ bhikkhuniṃ samanubhāseyya tassa vatthussa paṭinissaggāya. Esā ñatti.
‘‘සුණාතු මෙ, අය්‍යෙ, සඞ්‌ඝො. අයං ඉත්‌ථන්‌නාමා භික්‌ඛුනී සමග්‌ගෙන සඞ්‌ඝෙන උක්‌ඛිත්‌තං භික්‌ඛුං ධම්‌මෙන විනයෙන සත්‌ථුසාසනෙන අනාදරං අප්‌පටිකාරං අකතසහායං තමනුවත්‌තති. සා තං වත්‌ථුං න පටිනිස්‌සජ්‌ජති. සඞ්‌ඝො ඉත්‌ථන්‌නාමං භික්‌ඛුනිං සමනුභාසති තස්‌ස වත්‌ථුස්‌ස පටිනිස්‌සග්‌ගාය. යස්‌සා අය්‍යාය ඛමති ඉත්‌ථන්‌නාමාය භික්‌ඛුනියා සමනුභාසනා තස්‌ස වත්‌ථුස්‌ස පටිනිස්‌සග්‌ගාය, සා තුණ්‌හස්‌ස; යස්‌සා නක්‌ඛමති, සා භාසෙය්‍ය.
‘‘Suṇātu me, ayye, saṅgho. Ayaṃ itthannāmā bhikkhunī samaggena saṅghena ukkhittaṃ bhikkhuṃ dhammena vinayena satthusāsanena anādaraṃ appaṭikāraṃ akatasahāyaṃ tamanuvattati. Sā taṃ vatthuṃ na paṭinissajjati. Saṅgho itthannāmaṃ bhikkhuniṃ samanubhāsati tassa vatthussa paṭinissaggāya. Yassā ayyāya khamati itthannāmāya bhikkhuniyā samanubhāsanā tassa vatthussa paṭinissaggāya, sā tuṇhassa; yassā nakkhamati, sā bhāseyya.
‘‘දුතියම්‌පි එතමත්‌ථං වදාමි…පෙ.… තතියම්‌පි එතමත්‌ථං වදාමි…පෙ.….
‘‘Dutiyampi etamatthaṃ vadāmi…pe… tatiyampi etamatthaṃ vadāmi…pe….
‘‘සමනුභට්‌ඨා සඞ්‌ඝෙන ඉත්‌ථන්‌නාමා භික්‌ඛුනී තස්‌ස වත්‌ථුස්‌ස පටිනිස්‌සග්‌ගාය. ඛමති සඞ්‌ඝස්‌ස, තස්‌මා තුණ්‌හී, එවමෙතං ධාරයාමී’’ති.
‘‘Samanubhaṭṭhā saṅghena itthannāmā bhikkhunī tassa vatthussa paṭinissaggāya. Khamati saṅghassa, tasmā tuṇhī, evametaṃ dhārayāmī’’ti.
ඤත්‌තියා දුක්‌කටං, ද්‌වීහි කම්‌මවාචාහි ථුල්‌ලච්‌චයා, කම්‌මවාචා පරියොසානෙ ආපත්‌ති පාරාජිකස්‌ස.
Ñattiyā dukkaṭaṃ, dvīhi kammavācāhi thullaccayā, kammavācā pariyosāne āpatti pārājikassa.
අයම්‌පීති පුරිමායො උපාදාය වුච්‌චති.
Ayampīti purimāyo upādāya vuccati.
පාරාජිකා හොතීති සෙය්‍යථාපි නාම පුථුසිලා ද්‌වෙධා භින්‌නා අප්‌පටිසන්‌ධිකා හොති, එවමෙව භික්‌ඛුනී යාවතතියං සමනුභාසනාය න පටිනිස්‌සජ්‌ජන්‌තී අස්‌සමණී හොති අසක්‍යධීතා. තෙන වුච්‌චති පාරාජිකා හොතීති.
Pārājikā hotīti seyyathāpi nāma puthusilā dvedhā bhinnā appaṭisandhikā hoti, evameva bhikkhunī yāvatatiyaṃ samanubhāsanāya na paṭinissajjantī assamaṇī hoti asakyadhītā. Tena vuccati pārājikā hotīti.
අසංවාසාති සංවාසො නාම එකකම්‌මං එකුද්‌දෙසො සමසික්‌ඛතා. එසො සංවාසො නාම. සො තාය සද්‌ධිං නත්‌ථි. තෙන වුච්‌චති අසංවාසාති.
Asaṃvāsāti saṃvāso nāma ekakammaṃ ekuddeso samasikkhatā. Eso saṃvāso nāma. So tāya saddhiṃ natthi. Tena vuccati asaṃvāsāti.
672. ධම්‌මකම්‌මෙ ධම්‌මකම්‌මසඤ්‌ඤා න පටිනිස්‌සජ්‌ජති, ආපත්‌ති පාරාජිකස්‌ස. ධම්‌මකම්‌මෙ වෙමතිකා න පටිනිස්‌සජ්‌ජති, ආපත්‌ති පාරාජිකස්‌ස. ධම්‌මකම්‌මෙ අධම්‌මකම්‌මසඤ්‌ඤා න පටිනිස්‌සජ්‌ජති, ආපත්‌ති පාරාජිකස්‌ස.
672. Dhammakamme dhammakammasaññā na paṭinissajjati, āpatti pārājikassa. Dhammakamme vematikā na paṭinissajjati, āpatti pārājikassa. Dhammakamme adhammakammasaññā na paṭinissajjati, āpatti pārājikassa.
අධම්‌මකම්‌මෙ ධම්‌මකම්‌මසඤ්‌ඤා, ආපත්‌ති දුක්‌කටස්‌ස. අධම්‌මකම්‌මෙ වෙමතිකා, ආපත්‌ති දුක්‌කටස්‌ස. අධම්‌මකම්‌මෙ අධම්‌මකම්‌මසඤ්‌ඤා, ආපත්‌ති දුක්‌කටස්‌ස.
Adhammakamme dhammakammasaññā, āpatti dukkaṭassa. Adhammakamme vematikā, āpatti dukkaṭassa. Adhammakamme adhammakammasaññā, āpatti dukkaṭassa.
673. අනාපත්‌ති අසමනුභාසන්‌තියා, පටිනිස්‌සජ්‌ජන්‌තියා, උම්‌මත්‌තිකාය…පෙ.… ආදිකම්‌මිකායාති.
673. Anāpatti asamanubhāsantiyā, paṭinissajjantiyā, ummattikāya…pe… ādikammikāyāti.
තතියපාරාජිකං සමත්‌තං.
Tatiyapārājikaṃ samattaṃ.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / 3. තතියපාරාජිකසික්‌ඛාපදවණ්‌ණනා • 3. Tatiyapārājikasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 2. දුතියපාරාජිකසික්‌ඛාපදවණ්‌ණනා • 2. Dutiyapārājikasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 3. තතියපාරාජිකසික්‌ඛාපදවණ්‌ණනා • 3. Tatiyapārājikasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 2. වජ්‌ජපටිච්‌ඡාදිකසික්‌ඛාපදවණ්‌ණනා • 2. Vajjapaṭicchādikasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 3. තතියපාරාජිකසික්‌ඛාපදං • 3. Tatiyapārājikasikkhāpadaṃ
