| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග • Bhikkhunīvibhaṅga |
3. තතියසික්‌ඛාපදං
3. Tatiyasikkhāpadaṃ
941. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන ථුල්‌ලනන්‌දා භික්‌ඛුනී බහුස්‌සුතා හොති භාණිකා විසාරදා පට්‌ටා ධම්‌මිං කථං කාතුං. භද්‌දාපි කාපිලානී බහුස්‌සුතා හොති භාණිකා විසාරදා පට්‌ටා ධම්‌මිං කථං කාතුං උළාරසම්‌භාවිතා. මනුස්‌සා – ‘‘අය්‍යා භද්‌දා කාපිලානී බහුස්‌සුතා භාණිකා විසාරදා පට්‌ටා ධම්‌මිං කථං කාතුං උළාරසම්‌භාවිතා’’ති භද්‌දං කාපිලානිං පඨමං පයිරුපාසිත්‌වා, පච්‌ඡා ථුල්‌ලනන්‌දං භික්‌ඛුනිං පයිරුපාසන්‌ති. ථුල්‌ලනන්‌දා භික්‌ඛුනී ඉස්‌සාපකතා – ‘‘ඉමා කිර අප්‌පිච්‌ඡා සන්‌තුට්‌ඨා පවිවිත්‌තා අසංසට්‌ඨා යා ඉමා සඤ්‌ඤත්‌තිබහුලා විඤ්‌ඤත්‌තිබහුලා විහරන්‌තී’’ති භද්‌දාය කාපිලානියා පුරතො චඞ්‌කමතිපි තිට්‌ඨතිපි නිසීදතිපි සෙය්‍යම්‌පි කප්‌පෙති උද්‌දිසතිපි උද්‌දිසාපෙතිපි සජ්‌ඣායම්‌පි කරොති. යා තා භික්‌ඛුනියො අප්‌පිච්‌ඡා…පෙ.… තා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම අය්‍යා ථුල්‌ලනන්‌දා අය්‍යාය භද්‌දාය කාපිලානියා සඤ්‌චිච්‌ච අඵාසුං කරිස්‌සතී’’ති…පෙ.… සච්‌චං කිර, භික්‌ඛවෙ, ථුල්‌ලනන්‌දා භික්‌ඛුනී භද්‌දාය කාපිලානියා සඤ්‌චිච්‌ච අඵාසුං කරොතීති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම, භික්‌ඛවෙ, ථුල්‌ලනන්‌දා භික්‌ඛුනී භද්‌දාය කාපිලානියා සඤ්‌චිච්‌ච අඵාසුං කරිස්‌සති! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
941. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī bahussutā hoti bhāṇikā visāradā paṭṭā dhammiṃ kathaṃ kātuṃ. Bhaddāpi kāpilānī bahussutā hoti bhāṇikā visāradā paṭṭā dhammiṃ kathaṃ kātuṃ uḷārasambhāvitā. Manussā – ‘‘ayyā bhaddā kāpilānī bahussutā bhāṇikā visāradā paṭṭā dhammiṃ kathaṃ kātuṃ uḷārasambhāvitā’’ti bhaddaṃ kāpilāniṃ paṭhamaṃ payirupāsitvā, pacchā thullanandaṃ bhikkhuniṃ payirupāsanti. Thullanandā bhikkhunī issāpakatā – ‘‘imā kira appicchā santuṭṭhā pavivittā asaṃsaṭṭhā yā imā saññattibahulā viññattibahulā viharantī’’ti bhaddāya kāpilāniyā purato caṅkamatipi tiṭṭhatipi nisīdatipi seyyampi kappeti uddisatipi uddisāpetipi sajjhāyampi karoti. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā ayyāya bhaddāya kāpilāniyā sañcicca aphāsuṃ karissatī’’ti…pe… saccaṃ kira, bhikkhave, thullanandā bhikkhunī bhaddāya kāpilāniyā sañcicca aphāsuṃ karotīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī bhaddāya kāpilāniyā sañcicca aphāsuṃ karissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
942. ‘‘යා පන භික්‌ඛුනී භික්‌ඛුනියා සඤ්‌චිච්‌ච අඵාසුං කරෙය්‍ය, පාචිත්‌තිය’’න්‌ති.
942.‘‘Yā pana bhikkhunī bhikkhuniyā sañcicca aphāsuṃ kareyya, pācittiya’’nti.
943. යා පනාති යා යාදිසා…පෙ.… භික්‌ඛුනීති…පෙ.… අයං ඉමස්‌මිං අත්‌ථෙ අධිප්‌පෙතා භික්‌ඛුනීති.
943.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
භික්‌ඛුනියාති අඤ්‌ඤාය භික්‌ඛුනියා.
Bhikkhuniyāti aññāya bhikkhuniyā.
සඤ්‌චිච්‌චාති ජානන්‌තී සඤ්‌ජානන්‌තී චෙච්‌ච අභිවිතරිත්‌වා වීතික්‌කමො.
Sañciccāti jānantī sañjānantī cecca abhivitaritvā vītikkamo.
අඵාසුං කරෙය්‍යාති – ‘‘ඉමිනා ඉමිස්‌සා අඵාසු භවිස්‌සතී’’ති අනාපුච්‌ඡා පුරතො චඞ්‌කමති වා තිට්‌ඨති වා නිසීදති වා සෙය්‍යං වා කප්‌පෙති උද්‌දිසති වා උද්‌දිසාපෙති වා සජ්‌ඣායං වා කරොති, ආපත්‌ති පාචිත්‌තියස්‌ස.
Aphāsuṃ kareyyāti – ‘‘iminā imissā aphāsu bhavissatī’’ti anāpucchā purato caṅkamati vā tiṭṭhati vā nisīdati vā seyyaṃ vā kappeti uddisati vā uddisāpeti vā sajjhāyaṃ vā karoti, āpatti pācittiyassa.
944. උපසම්‌පන්‌නාය උපසම්‌පන්‌නසඤ්‌ඤා සඤ්‌චිච්‌ච අඵාසුං කරොති, ආපත්‌ති පාචිත්‌තියස්‌ස. උපසම්‌පන්‌නාය වෙමතිකා සඤ්‌චිච්‌ච අඵාසුං කරොති, ආපත්‌ති පාචිත්‌තියස්‌ස. උපසම්‌පන්‌නාය අනුපසම්‌පන්‌නසඤ්‌ඤා සඤ්‌චිච්‌ච අඵාසුං කරොති, ආපත්‌ති පාචිත්‌තියස්‌ස.
944. Upasampannāya upasampannasaññā sañcicca aphāsuṃ karoti, āpatti pācittiyassa. Upasampannāya vematikā sañcicca aphāsuṃ karoti, āpatti pācittiyassa. Upasampannāya anupasampannasaññā sañcicca aphāsuṃ karoti, āpatti pācittiyassa.
අනුපසම්‌පන්‌නාය සඤ්‌චිච්‌ච අඵාසුං කරොති, ආපත්‌ති දුක්‌කටස්‌ස. අනුපසම්‌පන්‌නාය උපසම්‌පන්‌නසඤ්‌ඤා, ආපත්‌ති දුක්‌කටස්‌ස. අනුපසම්‌පන්‌නාය වෙමතිකා, ආපත්‌ති දුක්‌කටස්‌ස. අනුපසම්‌පන්‌නාය අනුපසම්‌පන්‌නසඤ්‌ඤා, ආපත්‌ති දුක්‌කටස්‌ස.
Anupasampannāya sañcicca aphāsuṃ karoti, āpatti dukkaṭassa. Anupasampannāya upasampannasaññā, āpatti dukkaṭassa. Anupasampannāya vematikā, āpatti dukkaṭassa. Anupasampannāya anupasampannasaññā, āpatti dukkaṭassa.
945. අනාපත්‌ති න අඵාසුං කත්‌තුකාමා ආපුච්‌ඡා පුරතො චඞ්‌කමති වා තිට්‌ඨති වා නිසීදති වා සෙය්‍යං වා කප්‌පෙති උද්‌දිසති වා උද්‌දිසාපෙති වා සජ්‌ඣායං වා කරොති, උම්‌මත්‌තිකාය, ආදිකම්‌මිකායාති.
945. Anāpatti na aphāsuṃ kattukāmā āpucchā purato caṅkamati vā tiṭṭhati vā nisīdati vā seyyaṃ vā kappeti uddisati vā uddisāpeti vā sajjhāyaṃ vā karoti, ummattikāya, ādikammikāyāti.
තතියසික්‌ඛාපදං නිට්‌ඨිතං.
Tatiyasikkhāpadaṃ niṭṭhitaṃ.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / 3. තතියසික්‌ඛාපදවණ්‌ණනා • 3. Tatiyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 3. තතියසික්‌ඛාපදවණ්‌ණනා • 3. Tatiyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 3. තතියසික්‌ඛාපදං • 3. Tatiyasikkhāpadaṃ
