| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၅. တတိယဥပနိသသုတ္တံ
5. Tatiyaupanisasuttaṃ
၅. 1 တတ္ရ ခော အာယသ္မာ အာနန္ဒော ဘိက္ခူ အာမန္တေသိ – ‘‘ဒုသ္သီလသ္သ, အာဝုသော, သီလဝိပန္နသ္သ ဟတူပနိသော ဟောတိ အဝိပ္ပဋိသာရော; အဝိပ္ပဋိသာရေ အသတိ အဝိပ္ပဋိသာရဝိပန္နသ္သ ဟတူပနိသံ ဟောတိ ပာမောဇ္ဇံ; ပာမောဇ္ဇေ အသတိ ပာမောဇ္ဇဝိပန္နသ္သ ဟတူပနိသာ ဟောတိ ပီတိ; ပီတိယာ အသတိ ပီတိဝိပန္နသ္သ ဟတူပနိသာ ဟောတိ ပသ္သဒ္ဓိ; ပသ္သဒ္ဓိယာ အသတိ ပသ္သဒ္ဓိဝိပန္နသ္သ ဟတူပနိသံ ဟောတိ သုခံ; သုခေ အသတိ သုခဝိပန္နသ္သ ဟတူပနိသော ဟောတိ သမ္မာသမာဓိ; သမ္မာသမာဓိမ္ဟိ အသတိ သမ္မာသမာဓိဝိပန္နသ္သ ဟတူပနိသံ ဟောတိ ယထာဘူတဉာဏဒသ္သနံ; ယထာဘူတဉာဏဒသ္သနေ အသတိ ယထာဘူတဉာဏဒသ္သနဝိပန္နသ္သ ဟတူပနိသော ဟောတိ နိဗ္ဗိဒာဝိရာဂော; နိဗ္ဗိဒာဝိရာဂေ အသတိ နိဗ္ဗိဒာဝိရာဂဝိပန္နသ္သ ဟတူပနိသံ ဟောတိ ဝိမုတ္တိဉာဏဒသ္သနံ။ သေယ္ယထာပိ, အာဝုသော, ရုက္ခော သာခာပလာသဝိပန္နော။ တသ္သ ပပဋိကာပိ န ပာရိပူရိံ ဂစ္ဆတိ, တစောပိ။ ဖေဂ္ဂုပိ။ သာရောပိ န ပာရိပူရိံ ဂစ္ဆတိ။ ဧဝမေဝံ ခော, အာဝုသော, ဒုသ္သီလသ္သ သီလဝိပန္နသ္သ ဟတူပနိသော ဟောတိ အဝိပ္ပဋိသာရော; အဝိပ္ပဋိသာရေ အသတိ အဝိပ္ပဋိသာရဝိပန္နသ္သ ဟတူပနိသံ ဟောတိ။ပေ.။ ဝိမုတ္တိဉာဏဒသ္သနံ။
5.2 Tatra kho āyasmā ānando bhikkhū āmantesi – ‘‘dussīlassa, āvuso, sīlavipannassa hatūpaniso hoti avippaṭisāro; avippaṭisāre asati avippaṭisāravipannassa hatūpanisaṃ hoti pāmojjaṃ; pāmojje asati pāmojjavipannassa hatūpanisā hoti pīti; pītiyā asati pītivipannassa hatūpanisā hoti passaddhi; passaddhiyā asati passaddhivipannassa hatūpanisaṃ hoti sukhaṃ; sukhe asati sukhavipannassa hatūpaniso hoti sammāsamādhi; sammāsamādhimhi asati sammāsamādhivipannassa hatūpanisaṃ hoti yathābhūtañāṇadassanaṃ; yathābhūtañāṇadassane asati yathābhūtañāṇadassanavipannassa hatūpaniso hoti nibbidāvirāgo; nibbidāvirāge asati nibbidāvirāgavipannassa hatūpanisaṃ hoti vimuttiñāṇadassanaṃ. Seyyathāpi, āvuso, rukkho sākhāpalāsavipanno. Tassa papaṭikāpi na pāripūriṃ gacchati, tacopi… pheggupi… sāropi na pāripūriṃ gacchati. Evamevaṃ kho, āvuso, dussīlassa sīlavipannassa hatūpaniso hoti avippaṭisāro; avippaṭisāre asati avippaṭisāravipannassa hatūpanisaṃ hoti…pe… vimuttiñāṇadassanaṃ.
‘‘သီလဝတော, အာဝုသော, သီလသမ္ပန္နသ္သ ဥပနိသသမ္ပန္နော ဟောတိ အဝိပ္ပဋိသာရော; အဝိပ္ပဋိသာရေ သတိ အဝိပ္ပဋိသာရသမ္ပန္နသ္သ ဥပနိသသမ္ပန္နံ ဟောတိ ပာမောဇ္ဇံ; ပာမောဇ္ဇေ သတိ ပာမောဇ္ဇသမ္ပန္နသ္သ ဥပနိသသမ္ပန္နာ ဟောတိ ပီတိ; ပီတိယာ သတိ ပီတိသမ္ပန္နသ္သ ဥပနိသသမ္ပန္နာ ဟောတိ ပသ္သဒ္ဓိ; ပသ္သဒ္ဓိယာ သတိ ပသ္သဒ္ဓိသမ္ပန္နသ္သ ဥပနိသသမ္ပန္နံ ဟောတိ သုခံ; သုခေ သတိ သုခသမ္ပန္နသ္သ ဥပနိသသမ္ပန္နော ဟောတိ သမ္မာသမာဓိ ; သမ္မာသမာဓိမ္ဟိ သတိ သမ္မာသမာဓိသမ္ပန္နသ္သ ဥပနိသသမ္ပန္နံ ဟောတိ ယထာဘူတဉာဏဒသ္သနံ ; ယထာဘူတဉာဏဒသ္သနေ သတိ ယထာဘူတဉာဏဒသ္သနသမ္ပန္နသ္သ ဥပနိသသမ္ပန္နော ဟောတိ နိဗ္ဗိဒာဝိရာဂော; နိဗ္ဗိဒာဝိရာဂေ သတိ နိဗ္ဗိဒာဝိရာဂသမ္ပန္နသ္သ ဥပနိသသမ္ပန္နံ ဟောတိ ဝိမုတ္တိဉာဏဒသ္သနံ။ သေယ္ယထာပိ, အာဝုသော, ရုက္ခော သာခာပလာသသမ္ပန္နော ။ တသ္သ ပပဋိကာပိ ပာရိပူရိံ ဂစ္ဆတိ, တစောပိ။ ဖေဂ္ဂုပိ။ သာရောပိ ပာရိပူရိံ ဂစ္ဆတိ။ ဧဝမေဝံ ခော, အာဝုသော, သီလဝတော သီလသမ္ပန္နသ္သ ဥပနိသသမ္ပန္နော ဟောတိ အဝိပ္ပဋိသာရော; အဝိပ္ပဋိသာရေ သတိ အဝိပ္ပဋိသာရသမ္ပန္နသ္သ ဥပနိသသမ္ပန္နံ ဟောတိ။ပေ.။ ဝိမုတ္တိဉာဏဒသ္သန’’န္တိ။ ပဉ္စမံ။
‘‘Sīlavato, āvuso, sīlasampannassa upanisasampanno hoti avippaṭisāro; avippaṭisāre sati avippaṭisārasampannassa upanisasampannaṃ hoti pāmojjaṃ; pāmojje sati pāmojjasampannassa upanisasampannā hoti pīti; pītiyā sati pītisampannassa upanisasampannā hoti passaddhi; passaddhiyā sati passaddhisampannassa upanisasampannaṃ hoti sukhaṃ; sukhe sati sukhasampannassa upanisasampanno hoti sammāsamādhi ; sammāsamādhimhi sati sammāsamādhisampannassa upanisasampannaṃ hoti yathābhūtañāṇadassanaṃ ; yathābhūtañāṇadassane sati yathābhūtañāṇadassanasampannassa upanisasampanno hoti nibbidāvirāgo; nibbidāvirāge sati nibbidāvirāgasampannassa upanisasampannaṃ hoti vimuttiñāṇadassanaṃ. Seyyathāpi, āvuso, rukkho sākhāpalāsasampanno . Tassa papaṭikāpi pāripūriṃ gacchati, tacopi… pheggupi… sāropi pāripūriṃ gacchati. Evamevaṃ kho, āvuso, sīlavato sīlasampannassa upanisasampanno hoti avippaṭisāro; avippaṭisāre sati avippaṭisārasampannassa upanisasampannaṃ hoti…pe… vimuttiñāṇadassana’’nti. Pañcamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၃-၅. ဥပနိသသုတ္တတ္တယဝဏ္ဏနာ • 3-5. Upanisasuttattayavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၇. အဝိဇ္ဇာသုတ္တာဒိဝဏ္ဏနာ • 1-7. Avijjāsuttādivaṇṇanā
