| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
8. තායනසුත්‌තවණ්‌ණනා
8. Tāyanasuttavaṇṇanā
89. අට්‌ඨමෙ පුරාණතිත්‌ථකරොති පුබ්‌බෙ තිත්‌ථකරො. එත්‌ථ ච තිත්‌ථං නාම ද්‌වාසට්‌ඨි දිට්‌ඨියො, තිත්‌ථකරො නාම තාසං උප්‌පාදකො සත්‌ථා. සෙය්‍යථිදං නන්‌දො, වච්‌ඡො, කිසො, සංකිච්‌චො. පුරාණාදයො පන තිත්‌ථියා නාම. අයං පන දිට්‌ඨිං උප්‌පාදෙත්‌වා කථං සග්‌ගෙ නිබ්‌බත්‌තොති? කම්‌මවාදිතාය. එස කිර උපොසථභත්‌තාදීනි අදාසි, අනාථානං වත්‌තං පට්‌ඨපෙසි, පතිස්‌සයෙ අකාසි, පොක්‌ඛරණියො ඛණාපෙසි, අඤ්‌ඤම්‌පි බහුං කල්‍යාණං අකාසි. සො තස්‌ස නිස්‌සන්‌දෙන සග්‌ගෙ නිබ්‌බත්‌තො, සාසනස්‌ස පන නිය්‍යානිකභාවං ජානාති. සො තථාගතස්‌ස සන්‌තිකං ගන්‌ත්‌වා සාසනානුච්‌ඡවිකා වීරියප්‌පටිසංයුත්‌තා ගාථා වක්‌ඛාමීති ආගන්‌ත්‌වා ඡින්‌ද සොතන්‌තිආදිමාහ.
89. Aṭṭhame purāṇatitthakaroti pubbe titthakaro. Ettha ca titthaṃ nāma dvāsaṭṭhi diṭṭhiyo, titthakaro nāma tāsaṃ uppādako satthā. Seyyathidaṃ nando, vaccho, kiso, saṃkicco. Purāṇādayo pana titthiyā nāma. Ayaṃ pana diṭṭhiṃ uppādetvā kathaṃ sagge nibbattoti? Kammavāditāya. Esa kira uposathabhattādīni adāsi, anāthānaṃ vattaṃ paṭṭhapesi, patissaye akāsi, pokkharaṇiyo khaṇāpesi, aññampi bahuṃ kalyāṇaṃ akāsi. So tassa nissandena sagge nibbatto, sāsanassa pana niyyānikabhāvaṃ jānāti. So tathāgatassa santikaṃ gantvā sāsanānucchavikā vīriyappaṭisaṃyuttā gāthā vakkhāmīti āgantvā chinda sotantiādimāha.
තත්‌ථ ඡින්‌දාති අනියමිතආණත්‌ති. සොතන්‌ති තණ්‌හාසොතං. පරක්‌කම්‌මාති පරක්‌කමිත්‌වා වීරියං කත්‌වා. කාමෙති කිලෙසකාමෙපි වත්‌ථුකාමෙපි. පනුදාති නීහර. එකත්‌තන්‌ති ඣානං. ඉදං වුත්‌තං හොති – කාමෙ අජහිත්‌වා මුනි ඣානං න උපපජ්‌ජති, න පටිලභතීති අත්‌ථො. කයිරා චෙ කයිරාථෙනන්‌ති යදි වීරියං කරෙය්‍ය, කරෙය්‍යාථ, තං වීරියං න ඔසක්‌කෙය්‍ය. දළ්‌හමෙනං පරක්‌කමෙති දළ්‌හං එනං කරෙය්‍ය. සිථිලො හි පරිබ්‌බාජොති සිථිලගහිතා පබ්‌බජ්‌ජා. භිය්‍යො ආකිරතෙ රජන්‌ති අතිරෙකං උපරි කිලෙසරජං ආකිරති. අකතං දුක්‌කටං සෙය්‍යොති දුක්‌කටං අකතමෙව සෙය්‍යො. යං කිඤ්‌චීති න කෙවලං දුක්‌කටං කත්‌වා කතසාමඤ්‌ඤමෙව, අඤ්‌ඤම්‌පි යං කිඤ්‌චි සිථිලං කතං එවරූපමෙව හොති. සංකිලිට්‌ඨන්‌ති දුක්‌කරකාරිකවතං. ඉමස්‌මිං හි සාසනෙ පච්‌චයහෙතු සමාදින්‌නධුතඞ්‌ගවතං සංකිලිට්‌ඨමෙව. සඞ්‌කස්‌සරන්‌ති සඞ්‌කාය සරිතං, ‘‘ඉදම්‌පි ඉමිනා කතං භවිස්‌සති, ඉදම්‌පි ඉමිනා’’ති එවං ආසඞ්‌කිතපරිසඞ්‌කිතං. ආදිබ්‍රහ්‌මචරියිකාති මග්‌ගබ්‍රහ්‌මචරියස්‌ස ආදිභූතා පුබ්‌බපධානභූතා. අට්‌ඨමං.
Tattha chindāti aniyamitaāṇatti. Sotanti taṇhāsotaṃ. Parakkammāti parakkamitvā vīriyaṃ katvā. Kāmeti kilesakāmepi vatthukāmepi. Panudāti nīhara. Ekattanti jhānaṃ. Idaṃ vuttaṃ hoti – kāme ajahitvā muni jhānaṃ na upapajjati, na paṭilabhatīti attho. Kayirā ce kayirāthenanti yadi vīriyaṃ kareyya, kareyyātha, taṃ vīriyaṃ na osakkeyya. Daḷhamenaṃ parakkameti daḷhaṃ enaṃ kareyya. Sithilo hi paribbājoti sithilagahitā pabbajjā. Bhiyyo ākirate rajanti atirekaṃ upari kilesarajaṃ ākirati. Akataṃ dukkaṭaṃ seyyoti dukkaṭaṃ akatameva seyyo. Yaṃ kiñcīti na kevalaṃ dukkaṭaṃ katvā katasāmaññameva, aññampi yaṃ kiñci sithilaṃ kataṃ evarūpameva hoti. Saṃkiliṭṭhanti dukkarakārikavataṃ. Imasmiṃ hi sāsane paccayahetu samādinnadhutaṅgavataṃ saṃkiliṭṭhameva. Saṅkassaranti saṅkāya saritaṃ, ‘‘idampi iminā kataṃ bhavissati, idampi iminā’’ti evaṃ āsaṅkitaparisaṅkitaṃ. Ādibrahmacariyikāti maggabrahmacariyassa ādibhūtā pubbapadhānabhūtā. Aṭṭhamaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 8. තායනසුත්‌තං • 8. Tāyanasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 8. තායනසුත්‌තවණ්‌ණනා • 8. Tāyanasuttavaṇṇanā
