| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၅. ဌာနသုတ္တံ
5. Ṭhānasuttaṃ
၁၁၅. ‘‘စတ္တာရိမာနိ, ဘိက္ခဝေ, ဌာနာနိ။ ကတမာနိ စတ္တာရိ? အတ္ထိ, ဘိက္ခဝေ, ဌာနံ အမနာပံ ကာတုံ; တဉ္စ ကယိရမာနံ အနတ္ထာယ သံဝတ္တတိ။ အတ္ထိ, ဘိက္ခဝေ, ဌာနံ အမနာပံ ကာတုံ; တဉ္စ ကယိရမာနံ အတ္ထာယ သံဝတ္တတိ။ အတ္ထိ, ဘိက္ခဝေ, ဌာနံ မနာပံ ကာတုံ; တဉ္စ ကယိရမာနံ အနတ္ထာယ သံဝတ္တတိ။ အတ္ထိ, ဘိက္ခဝေ, ဌာနံ မနာပံ ကာတုံ; တဉ္စ ကယိရမာနံ အတ္ထာယ သံဝတ္တတိ။
115. ‘‘Cattārimāni, bhikkhave, ṭhānāni. Katamāni cattāri? Atthi, bhikkhave, ṭhānaṃ amanāpaṃ kātuṃ; tañca kayiramānaṃ anatthāya saṃvattati. Atthi, bhikkhave, ṭhānaṃ amanāpaṃ kātuṃ; tañca kayiramānaṃ atthāya saṃvattati. Atthi, bhikkhave, ṭhānaṃ manāpaṃ kātuṃ; tañca kayiramānaṃ anatthāya saṃvattati. Atthi, bhikkhave, ṭhānaṃ manāpaṃ kātuṃ; tañca kayiramānaṃ atthāya saṃvattati.
‘‘တတ္ရ, ဘိက္ခဝေ, ယမိဒံ 1 ဌာနံ အမနာပံ ကာတုံ; တဉ္စ ကယိရမာနံ အနတ္ထာယ သံဝတ္တတိ – ဣဒံ, ဘိက္ခဝေ, ဌာနံ ဥဘယေနေဝ န ကတ္တဗ္ဗံ မညတိ 2။ ယမ္ပိဒံ 3 ဌာနံ အမနာပံ ကာတုံ; ဣမိနာပိ နံ 4 န ကတ္တဗ္ဗံ မညတိ။ ယမ္ပိဒံ ဌာနံ ကယိရမာနံ အနတ္ထာယ သံဝတ္တတိ; ဣမိနာပိ နံ 5 န ကတ္တဗ္ဗံ မညတိ။ ဣဒံ, ဘိက္ခဝေ, ဌာနံ ဥဘယေနေဝ န ကတ္တဗ္ဗံ မညတိ။
‘‘Tatra, bhikkhave, yamidaṃ 6 ṭhānaṃ amanāpaṃ kātuṃ; tañca kayiramānaṃ anatthāya saṃvattati – idaṃ, bhikkhave, ṭhānaṃ ubhayeneva na kattabbaṃ maññati 7. Yampidaṃ 8 ṭhānaṃ amanāpaṃ kātuṃ; imināpi naṃ 9 na kattabbaṃ maññati. Yampidaṃ ṭhānaṃ kayiramānaṃ anatthāya saṃvattati; imināpi naṃ 10 na kattabbaṃ maññati. Idaṃ, bhikkhave, ṭhānaṃ ubhayeneva na kattabbaṃ maññati.
‘‘တတ္ရ, ဘိက္ခဝေ, ယမိဒံ ဌာနံ အမနာပံ ကာတုံ; တဉ္စ ကယိရမာနံ အတ္ထာယ သံဝတ္တတိ – ဣမသ္မိံ, ဘိက္ခဝေ, ဌာနေ ဗာလော စ ပဏ္ဍိတော စ ဝေဒိတဗ္ဗော ပုရိသထာမေ ပုရိသဝီရိယေ ပုရိသပရက္ကမေ။ န, ဘိက္ခဝေ, ဗာလော ဣတိ ပဋိသဉ္စိက္ခတိ – ‘ကိဉ္စာပိ ခော ဣဒံ ဌာနံ အမနာပံ ကာတုံ; အထ စရဟိဒံ ဌာနံ ကယိရမာနံ အတ္ထာယ သံဝတ္တတီ’တိ။ သော တံ ဌာနံ န ကရောတိ။ တသ္သ တံ ဌာနံ အကယိရမာနံ အနတ္ထာယ သံဝတ္တတိ။ ပဏ္ဍိတော စ ခော, ဘိက္ခဝေ, ဣတိ ပဋိသဉ္စိက္ခတိ – ‘ကိဉ္စာပိ ခော ဣဒံ ဌာနံ အမနာပံ ကာတုံ; အထ စရဟိဒံ ဌာနံ ကယိရမာနံ အတ္ထာယ သံဝတ္တတီ’တိ။ သော တံ ဌာနံ ကရောတိ။ တသ္သ တံ ဌာနံ ကယိရမာနံ အတ္ထာယ သံဝတ္တတိ။
‘‘Tatra, bhikkhave, yamidaṃ ṭhānaṃ amanāpaṃ kātuṃ; tañca kayiramānaṃ atthāya saṃvattati – imasmiṃ, bhikkhave, ṭhāne bālo ca paṇḍito ca veditabbo purisathāme purisavīriye purisaparakkame. Na, bhikkhave, bālo iti paṭisañcikkhati – ‘kiñcāpi kho idaṃ ṭhānaṃ amanāpaṃ kātuṃ; atha carahidaṃ ṭhānaṃ kayiramānaṃ atthāya saṃvattatī’ti. So taṃ ṭhānaṃ na karoti. Tassa taṃ ṭhānaṃ akayiramānaṃ anatthāya saṃvattati. Paṇḍito ca kho, bhikkhave, iti paṭisañcikkhati – ‘kiñcāpi kho idaṃ ṭhānaṃ amanāpaṃ kātuṃ; atha carahidaṃ ṭhānaṃ kayiramānaṃ atthāya saṃvattatī’ti. So taṃ ṭhānaṃ karoti. Tassa taṃ ṭhānaṃ kayiramānaṃ atthāya saṃvattati.
‘‘တတ္ရ, ဘိက္ခဝေ, ယမိဒံ 11 ဌာနံ မနာပံ ကာတုံ; တဉ္စ ကယိရမာနံ အနတ္ထာယ သံဝတ္တတိ – ဣမသ္မိမ္ပိ, ဘိက္ခဝေ, ဌာနေ ဗာလော စ ပဏ္ဍိတော စ ဝေဒိတဗ္ဗော ပုရိသထာမေ ပုရိသဝီရိယေ ပုရိသပရက္ကမေ။ န, ဘိက္ခဝေ, ဗာလော ဣတိ ပဋိသဉ္စိက္ခတိ – ‘ကိဉ္စာပိ ခော ဣဒံ ဌာနံ မနာပံ ကာတုံ; အထ စရဟိဒံ ဌာနံ ကယိရမာနံ အနတ္ထာယ သံဝတ္တတီ’တိ။ သော တံ ဌာနံ ကရောတိ။ တသ္သ တံ ဌာနံ ကယိရမာနံ အနတ္ထာယ သံဝတ္တတိ။ ပဏ္ဍိတော စ ခော, ဘိက္ခဝေ, ဣတိ ပဋိသဉ္စိက္ခတိ – ‘ကိဉ္စာပိ ခော ဣဒံ ဌာနံ မနာပံ ကာတုံ; အထ စရဟိဒံ ဌာနံ ကယိရမာနံ အနတ္ထာယ သံဝတ္တတီ’တိ။ သော တံ ဌာနံ န ကရောတိ။ တသ္သ တံ ဌာနံ အကယိရမာနံ အတ္ထာယ သံဝတ္တတိ။
‘‘Tatra, bhikkhave, yamidaṃ 12 ṭhānaṃ manāpaṃ kātuṃ; tañca kayiramānaṃ anatthāya saṃvattati – imasmimpi, bhikkhave, ṭhāne bālo ca paṇḍito ca veditabbo purisathāme purisavīriye purisaparakkame. Na, bhikkhave, bālo iti paṭisañcikkhati – ‘kiñcāpi kho idaṃ ṭhānaṃ manāpaṃ kātuṃ; atha carahidaṃ ṭhānaṃ kayiramānaṃ anatthāya saṃvattatī’ti. So taṃ ṭhānaṃ karoti. Tassa taṃ ṭhānaṃ kayiramānaṃ anatthāya saṃvattati. Paṇḍito ca kho, bhikkhave, iti paṭisañcikkhati – ‘kiñcāpi kho idaṃ ṭhānaṃ manāpaṃ kātuṃ; atha carahidaṃ ṭhānaṃ kayiramānaṃ anatthāya saṃvattatī’ti. So taṃ ṭhānaṃ na karoti. Tassa taṃ ṭhānaṃ akayiramānaṃ atthāya saṃvattati.
‘‘တတ္ရ, ဘိက္ခဝေ, ယမိဒံ ဌာနံ မနာပံ ကာတုံ, တဉ္စ ကယိရမာနံ အတ္ထာယ သံဝတ္တတိ – ဣဒံ, ဘိက္ခဝေ, ဌာနံ ဥဘယေနေဝ ကတ္တဗ္ဗံ မညတိ။ ယမ္ပိဒံ ဌာနံ မနာပံ ကာတုံ, ဣမိနာပိ နံ ကတ္တဗ္ဗံ မညတိ; ယမ္ပိဒံ ဌာနံ ကယိရမာနံ အတ္ထာယ သံဝတ္တတိ, ဣမိနာပိ နံ ကတ္တဗ္ဗံ မညတိ။ ဣဒံ, ဘိက္ခဝေ, ဌာနံ ဥဘယေနေဝ ကတ္တဗ္ဗံ မညတိ။ ဣမာနိ ခော, ဘိက္ခဝေ, စတ္တာရိ ဌာနာနီ’’တိ။ ပဉ္စမံ။
‘‘Tatra, bhikkhave, yamidaṃ ṭhānaṃ manāpaṃ kātuṃ, tañca kayiramānaṃ atthāya saṃvattati – idaṃ, bhikkhave, ṭhānaṃ ubhayeneva kattabbaṃ maññati. Yampidaṃ ṭhānaṃ manāpaṃ kātuṃ, imināpi naṃ kattabbaṃ maññati; yampidaṃ ṭhānaṃ kayiramānaṃ atthāya saṃvattati, imināpi naṃ kattabbaṃ maññati. Idaṃ, bhikkhave, ṭhānaṃ ubhayeneva kattabbaṃ maññati. Imāni kho, bhikkhave, cattāri ṭhānānī’’ti. Pañcamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၅. ဌာနသုတ္တဝဏ္ဏနာ • 5. Ṭhānasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၇. ကေသိသုတ္တာဒိဝဏ္ဏနာ • 1-7. Kesisuttādivaṇṇanā
