| Library / Tipiṭaka / තිපිටක • Tipiṭaka / පඤ්‌චපකරණ-අනුටීකා • Pañcapakaraṇa-anuṭīkā |
3. තිකනිද්‌දෙසවණ්‌ණනා
3. Tikaniddesavaṇṇanā
91. සෙසසංවරභෙදෙනාති කායිකවාචසිකවීතික්‌කමතො සෙසෙන සංවරවිනාසෙන. සො පන ද්‌වාරවසෙන වුච්‌චමානො මනොද්‌වාරිකො හොතීති ආහ ‘‘මනොසංවරභෙදෙනා’’ති. ඉදානි තං පකාරභෙදෙන දස්‌සෙන්‌තො ‘‘සතිසංවරාදිභෙදෙන වා’’ති ආහ, මුට්‌ඨසච්‌චාදිප්‌පවත්‌තියාති අත්‌ථො. යං කිඤ්‌චි සභාවභූතං චරිතම්‌පි ‘‘සීල’’න්‌ති වුච්‌චතීති අකුසලස්‌සපි සීලපරියායො වුත්‌තො.
91. Sesasaṃvarabhedenāti kāyikavācasikavītikkamato sesena saṃvaravināsena. So pana dvāravasena vuccamāno manodvāriko hotīti āha ‘‘manosaṃvarabhedenā’’ti. Idāni taṃ pakārabhedena dassento ‘‘satisaṃvarādibhedena vā’’ti āha, muṭṭhasaccādippavattiyāti attho. Yaṃ kiñci sabhāvabhūtaṃ caritampi ‘‘sīla’’nti vuccatīti akusalassapi sīlapariyāyo vutto.
94. සමානවිසයානන්‌ති පඨමඵලාදිකො සමානො එවරූපො විසයො එතෙසන්‌ති සමානවිසයා, තෙසං.
94. Samānavisayānanti paṭhamaphalādiko samāno evarūpo visayo etesanti samānavisayā, tesaṃ.
107. තදත්‌ථො තප්‌පයොජනො ලොකුත්‌තරසාධකොති අත්‌ථො. තස්‌ස පරමත්‌ථසාසනස්‌ස. මූලෙකදෙසත්‌තාති මූලභාවෙන එකදෙසත්‌තා.
107. Tadattho tappayojano lokuttarasādhakoti attho. Tassa paramatthasāsanassa. Mūlekadesattāti mūlabhāvena ekadesattā.
118. උන්‌නළො උග්‌ගතතුච්‌ඡමානො.
118. Unnaḷo uggatatucchamāno.
123. සීලස්‌ස අනුග්‌ගණ්‌හනං අපරිසුද්‌ධියං සොධනං අපාරිපූරියං පූරණඤ්‌චාති ආහ ‘‘සොධෙතබ්‌බෙ ච වඩ්‌ඪෙතබ්‌බෙ චා’’ති. අධිසීලං නිස්‌සායාති අධිසීලං නිස්‌සයං කත්‌වා උප්‌පන්‌නපඤ්‌ඤාය.
123. Sīlassa anuggaṇhanaṃ aparisuddhiyaṃ sodhanaṃ apāripūriyaṃ pūraṇañcāti āha ‘‘sodhetabbe ca vaḍḍhetabbe cā’’ti. Adhisīlaṃ nissāyāti adhisīlaṃ nissayaṃ katvā uppannapaññāya.
124. ගූථසදිසත්‌තමෙව දස්‌සෙති, න ගූථකූපසදිසත්‌තන්‌ති අධිප්‌පායො. ගූථවසෙනෙව හි කූපස්‌සපි ජිගුච්‌ඡනීයතාති. අයඤ්‌ච අත්‌ථො ගූථරාසියෙව ගූථකූපොති ඉමස්‌මිං පක්‌ඛෙ නවත්‌තබ්‌බො සියා.
124. Gūthasadisattameva dasseti, na gūthakūpasadisattanti adhippāyo. Gūthavaseneva hi kūpassapi jigucchanīyatāti. Ayañca attho gūtharāsiyeva gūthakūpoti imasmiṃ pakkhe navattabbo siyā.
130. සරභඞ්‌ගසත්‌ථාරාදයො රූපභවාදිකාමාදිපරිඤ්‌ඤං කත්‌වා පඤ්‌ඤපෙන්‌තො ලොකියං පරිඤ්‌ඤං සම්‌මදෙව පඤ්‌ඤපෙන්‌තීති ආහ ‘‘යෙභුය්‍යෙන න සක්‌කොන්‌තී’’ති. අසමත්‌ථභාවං වා සන්‌ධාය නො ච පඤ්‌ඤාපෙතුං සක්‌කොන්‌තීති වුත්‌තන්‌ති යොජනා.
130. Sarabhaṅgasatthārādayo rūpabhavādikāmādipariññaṃ katvā paññapento lokiyaṃ pariññaṃ sammadeva paññapentīti āha ‘‘yebhuyyena na sakkontī’’ti. Asamatthabhāvaṃ vā sandhāya no ca paññāpetuṃ sakkontīti vuttanti yojanā.
තිකනිද්‌දෙසවණ්‌ණනා නිට්‌ඨිතා.
Tikaniddesavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / පුග්‌ගලපඤ්‌ඤත්‌තිපාළි • Puggalapaññattipāḷi / 3. තිකපුග්‌ගලපඤ්‌ඤත්‌ති • 3. Tikapuggalapaññatti
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 3. තිකනිද්‌දෙසවණ්‌ණනා • 3. Tikaniddesavaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 3. තිකනිද්‌දෙසවණ්‌ණනා • 3. Tikaniddesavaṇṇanā
