Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၅. ဥဇ္ဈာနသညိသုတ္တံ
5. Ujjhānasaññisuttaṃ
၃၅. ဧကံ သမယံ ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ အထ ခော သမ္ဗဟုလာ ဥဇ္ဈာနသညိကာ ဒေဝတာယော အဘိက္ကန္တာယ ရတ္တိယာ အဘိက္ကန္တဝဏ္ဏာ ကေဝလကပ္ပံ ဇေတဝနံ ဩဘာသေတ္ဝာ ယေန ဘဂဝာ တေနုပသင္ကမိံသု; ဥပသင္ကမိတ္ဝာ ဝေဟာသံ အဋ္ဌံသု။ ဝေဟာသံ ဌိတာ ခော ဧကာ ဒေဝတာ ဘဂဝတော သန္တိကေ ဣမံ ဂာထံ အဘာသိ –
35. Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho sambahulā ujjhānasaññikā devatāyo abhikkantāya rattiyā abhikkantavaṇṇā kevalakappaṃ jetavanaṃ obhāsetvā yena bhagavā tenupasaṅkamiṃsu; upasaṅkamitvā vehāsaṃ aṭṭhaṃsu. Vehāsaṃ ṭhitā kho ekā devatā bhagavato santike imaṃ gāthaṃ abhāsi –
‘‘အညထာ သန္တမတ္တာနံ၊ အညထာ ယော ပဝေဒယေ။
‘‘Aññathā santamattānaṃ, aññathā yo pavedaye;
နိကစ္စ ကိတဝသ္သေဝ၊ ဘုတ္တံ ထေယ္ယေန တသ္သ တံ။
Nikacca kitavasseva, bhuttaṃ theyyena tassa taṃ.
‘‘ယဉ္ဟိ ကယိရာ တဉ္ဟိ ဝဒေ၊ ယံ န ကယိရာ န တံ ဝဒေ။
‘‘Yañhi kayirā tañhi vade, yaṃ na kayirā na taṃ vade;
အကရောန္တံ ဘာသမာနာနံ၊ ပရိဇာနန္တိ ပဏ္ဍိတာ’’တိ။
Akarontaṃ bhāsamānānaṃ, parijānanti paṇḍitā’’ti.
‘‘န ယိဒံ ဘာသိတမတ္တေန၊ ဧကန္တသဝနေန ဝာ။
‘‘Na yidaṃ bhāsitamattena, ekantasavanena vā;
အနုက္ကမိတဝေ သက္ကာ၊ ယာယံ ပဋိပဒာ ဒဠ္ဟာ။
Anukkamitave sakkā, yāyaṃ paṭipadā daḷhā;
ယာယ ဓီရာ ပမုစ္စန္တိ၊ ဈာယိနော မာရဗန္ဓနာ။
Yāya dhīrā pamuccanti, jhāyino mārabandhanā.
‘‘န ဝေ ဓီရာ ပကုဗ္ဗန္တိ၊ ဝိဒိတ္ဝာ လောကပရိယာယံ။
‘‘Na ve dhīrā pakubbanti, viditvā lokapariyāyaṃ;
အညာယ နိဗ္ဗုတာ ဓီရာ၊ တိဏ္ဏာ လောကေ ဝိသတ္တိက’’န္တိ။
Aññāya nibbutā dhīrā, tiṇṇā loke visattika’’nti.
အထ ခော တာ ဒေဝတာယော ပထဝိယံ ပတိဋ္ဌဟိတ္ဝာ ဘဂဝတော ပာဒေသု သိရသာ နိပတိတ္ဝာ ဘဂဝန္တံ ဧတဒဝောစုံ – ‘‘အစ္စယော နော, ဘန္တေ, အစ္စဂမာ ယထာဗာလံ ယထာမူဠ္ဟံ ယထာအကုသလံ 1, ယာ မယံ ဘဂဝန္တံ အာသာဒေတဗ္ဗံ အမညိမ္ဟာ။ တာသံ နော, ဘန္တေ, ဘဂဝာ အစ္စယံ အစ္စယတော ပဋိဂ္ဂဏ္ဟာတု အာယတိံ သံဝရာယာ’’တိ။ အထ ခော ဘဂဝာ သိတံ ပာတ္ဝာကာသိ။ အထ ခော တာ ဒေဝတာယော ဘိယ္ယောသောမတ္တာယ ဥဇ္ဈာယန္တိယော ဝေဟာသံ အဗ္ဘုဂ္ဂဉ္ဆုံ။ ဧကာ ဒေဝတာ ဘဂဝတော သန္တိကေ ဣမံ ဂာထံ အဘာသိ –
Atha kho tā devatāyo pathaviyaṃ patiṭṭhahitvā bhagavato pādesu sirasā nipatitvā bhagavantaṃ etadavocuṃ – ‘‘accayo no, bhante, accagamā yathābālaṃ yathāmūḷhaṃ yathāakusalaṃ 2, yā mayaṃ bhagavantaṃ āsādetabbaṃ amaññimhā. Tāsaṃ no, bhante, bhagavā accayaṃ accayato paṭiggaṇhātu āyatiṃ saṃvarāyā’’ti. Atha kho bhagavā sitaṃ pātvākāsi. Atha kho tā devatāyo bhiyyosomattāya ujjhāyantiyo vehāsaṃ abbhuggañchuṃ. Ekā devatā bhagavato santike imaṃ gāthaṃ abhāsi –
‘‘အစ္စယံ ဒေသယန္တီနံ၊ ယော စေ န ပဋိဂဏ္ဟတိ။
‘‘Accayaṃ desayantīnaṃ, yo ce na paṭigaṇhati;
ကောပန္တရော ဒောသဂရု၊ သ ဝေရံ ပဋိမုဉ္စတီ’’တိ။
Kopantaro dosagaru, sa veraṃ paṭimuñcatī’’ti.
‘‘ကသ္သစ္စယာ န ဝိဇ္ဇန္တိ၊ ကသ္သ နတ္ထိ အပာဂတံ။
‘‘Kassaccayā na vijjanti, kassa natthi apāgataṃ;
‘‘တထာဂတသ္သ ဗုဒ္ဓသ္သ၊ သဗ္ဗဘူတာနုကမ္ပိနော။
‘‘Tathāgatassa buddhassa, sabbabhūtānukampino;
တသ္သစ္စယာ န ဝိဇ္ဇန္တိ၊ တသ္သ နတ္ထိ အပာဂတံ။
Tassaccayā na vijjanti, tassa natthi apāgataṃ;
‘‘အစ္စယံ ဒေသယန္တီနံ၊ ယော စေ န ပဋိဂဏ္ဟတိ။
‘‘Accayaṃ desayantīnaṃ, yo ce na paṭigaṇhati;
ကောပန္တရော ဒောသဂရု၊ သ ဝေရံ ပဋိမုဉ္စတိ။
Kopantaro dosagaru, sa veraṃ paṭimuñcati;
တံ ဝေရံ နာဘိနန္ဒာမိ၊ ပဋိဂ္ဂဏ္ဟာမိ ဝောစ္စယ’’န္တိ။
Taṃ veraṃ nābhinandāmi, paṭiggaṇhāmi voccaya’’nti.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၅. ဥဇ္ဈာနသညိသုတ္တဝဏ္ဏနာ • 5. Ujjhānasaññisuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၅. ဥဇ္ဈာနသညိသုတ္တဝဏ္ဏနာ • 5. Ujjhānasaññisuttavaṇṇanā