Library / Tipiṭaka / တိပိဋက • Tipiṭaka / အပဒာနပာဠိ • Apadānapāḷi |
၃၃. ဥမာပုပ္ဖိယဝဂ္ဂော
33. Umāpupphiyavaggo
၁. ဥမာပုပ္ဖိယတ္ထေရအပဒာနံ
1. Umāpupphiyattheraapadānaṃ
၁.
1.
‘‘သမာဟိတံ သမာပန္နံ၊ သိဒ္ဓတ္ထမပရာဇိတံ။
‘‘Samāhitaṃ samāpannaṃ, siddhatthamaparājitaṃ;
သမာဓိနာ ဥပဝိဋ္ဌံ၊ အဒ္ဒသာဟံ နရုတ္တမံ။
Samādhinā upaviṭṭhaṃ, addasāhaṃ naruttamaṃ.
၂.
2.
‘‘ဥမာပုပ္ဖံ ဂဟေတ္ဝာန၊ ဗုဒ္ဓသ္သ အဘိရောပယိံ။
‘‘Umāpupphaṃ gahetvāna, buddhassa abhiropayiṃ;
သဗ္ဗပုပ္ဖာ ဧကသီသာ၊ ဥဒ္ဓံဝဏ္ဋာ အဓောမုခာ။
Sabbapupphā ekasīsā, uddhaṃvaṇṭā adhomukhā.
၃.
3.
‘‘သုစိတ္တာ ဝိယ တိဋ္ဌန္တေ၊ အာကာသေ ပုပ္ဖသန္ထရာ။
‘‘Sucittā viya tiṭṭhante, ākāse pupphasantharā;
တေန စိတ္တပ္ပသာဒေန၊ တုသိတံ ဥပပဇ္ဇဟံ။
Tena cittappasādena, tusitaṃ upapajjahaṃ.
၄.
4.
‘‘စတုန္နဝုတိတော ကပ္ပေ၊ ယံ ပုပ္ဖမဘိပူဇယိံ။
‘‘Catunnavutito kappe, yaṃ pupphamabhipūjayiṃ;
ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။
Duggatiṃ nābhijānāmi, buddhapūjāyidaṃ phalaṃ.
၅.
5.
‘‘ပဉ္စပညာသိတော ကပ္ပေ၊ ဧကော အာသိံ မဟီပတိ။
‘‘Pañcapaññāsito kappe, eko āsiṃ mahīpati;
သမန္တဆဒနော နာမ၊ စက္ကဝတ္တီ မဟဗ္ဗလော။
Samantachadano nāma, cakkavattī mahabbalo.
၆.
6.
‘‘ပဋိသမ္ဘိဒာ စတသ္သော၊ ဝိမောက္ခာပိ စ အဋ္ဌိမေ။
‘‘Paṭisambhidā catasso, vimokkhāpi ca aṭṭhime;
ဆဠဘိညာ သစ္ဆိကတာ၊ ကတံ ဗုဒ္ဓသ္သ သာသနံ။
Chaḷabhiññā sacchikatā, kataṃ buddhassa sāsanaṃ.
ဣတ္ထံ သုဒံ အာယသ္မာ ဥမာပုပ္ဖိယော ထေရော ဣမာ ဂာထာယော အဘာသိတ္ထာတိ။
Itthaṃ sudaṃ āyasmā umāpupphiyo thero imā gāthāyo abhāsitthāti.
ဥမာပုပ္ဖိယတ္ထေရသ္သာပဒာနံ ပဌမံ။
Umāpupphiyattherassāpadānaṃ paṭhamaṃ.