Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၇. ဥပစာလာသုတ္တံ
7. Upacālāsuttaṃ
၁၆၈. သာဝတ္ထိနိဒာနံ ။ အထ ခော ဥပစာလာ ဘိက္ခုနီ ပုဗ္ဗဏ္ဟသမယံ နိဝာသေတ္ဝာ။ပေ.။ အညတရသ္မိံ ရုက္ခမူလေ ဒိဝာဝိဟာရံ နိသီဒိ။ အထ ခော မာရော ပာပိမာ ယေန ဥပစာလာ ဘိက္ခုနီ တေနုပသင္ကမိ; ဥပသင္ကမိတ္ဝာ ဥပစာလံ ဘိက္ခုနိံ ဧတဒဝောစ – ‘‘ကတ္ထ နု တ္ဝံ, ဘိက္ခုနိ, ဥပ္ပဇ္ဇိတုကာမာ’’တိ? ‘‘န ခ္ဝာဟံ, အာဝုသော, ကတ္ထစိ ဥပ္ပဇ္ဇိတုကာမာ’’တိ။
168. Sāvatthinidānaṃ . Atha kho upacālā bhikkhunī pubbaṇhasamayaṃ nivāsetvā…pe… aññatarasmiṃ rukkhamūle divāvihāraṃ nisīdi. Atha kho māro pāpimā yena upacālā bhikkhunī tenupasaṅkami; upasaṅkamitvā upacālaṃ bhikkhuniṃ etadavoca – ‘‘kattha nu tvaṃ, bhikkhuni, uppajjitukāmā’’ti? ‘‘Na khvāhaṃ, āvuso, katthaci uppajjitukāmā’’ti.
‘‘တာဝတိံသာ စ ယာမာ စ၊ တုသိတာ စာပိ ဒေဝတာ။
‘‘Tāvatiṃsā ca yāmā ca, tusitā cāpi devatā;
နိမ္မာနရတိနော ဒေဝာ၊ ယေ ဒေဝာ ဝသဝတ္တိနော။
Nimmānaratino devā, ye devā vasavattino;
တတ္ထ စိတ္တံ ပဏိဓေဟိ၊ ရတိံ ပစ္စနုဘောသ္သသီ’’တိ။
Tattha cittaṃ paṇidhehi, ratiṃ paccanubhossasī’’ti.
‘‘တာဝတိံသာ စ ယာမာ စ၊ တုသိတာ စာပိ ဒေဝတာ။
‘‘Tāvatiṃsā ca yāmā ca, tusitā cāpi devatā;
နိမ္မာနရတိနော ဒေဝာ၊ ယေ ဒေဝာ ဝသဝတ္တိနော။
Nimmānaratino devā, ye devā vasavattino;
ကာမဗန္ဓနဗဒ္ဓာ တေ၊ ဧန္တိ မာရဝသံ ပုန။
Kāmabandhanabaddhā te, enti māravasaṃ puna.
အဂတိ ယတ္ထ မာရသ္သ၊ တတ္ထ မေ နိရတော မနော’’တိ။
Agati yattha mārassa, tattha me nirato mano’’ti.
အထ ခော မာရော ပာပိမာ ‘‘ဇာနာတိ မံ ဥပစာလာ ဘိက္ခုနီ’’တိ ဒုက္ခီ ဒုမ္မနော တတ္ထေဝန္တရဓာယီတိ။
Atha kho māro pāpimā ‘‘jānāti maṃ upacālā bhikkhunī’’ti dukkhī dummano tatthevantaradhāyīti.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၇. ဥပစာလာသုတ္တဝဏ္ဏနာ • 7. Upacālāsuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၇. ဥပစာလာသုတ္တဝဏ္ဏနာ • 7. Upacālāsuttavaṇṇanā