| Library / Tipiṭaka / තිපිටක • Tipiṭaka / ඉතිවුත්‌තකපාළි • Itivuttakapāḷi |
5. උපපරික්‌ඛසුත්‌තං
5. Upaparikkhasuttaṃ
94. වුත්‌තඤ්‌හෙතං භගවතා, වුත්‌තමරහතාති මෙ සුතං –
94. Vuttañhetaṃ bhagavatā, vuttamarahatāti me sutaṃ –
‘‘තථා තථා, භික්‌ඛවෙ, භික්‌ඛු උපපරික්‌ඛෙය්‍ය යථා යථාස්‌ස 1 උපපරික්‌ඛතො බහිද්‌ධා චස්‌ස විඤ්‌ඤාණං අවික්‌ඛිත්‌තං අවිසටං අජ්‌ඣත්‌තං අසණ්‌ඨිතං අනුපාදාය න පරිතස්‌සෙය්‍ය. බහිද්‌ධා, භික්‌ඛවෙ, විඤ්‌ඤාණෙ අවික්‌ඛිත්‌තෙ අවිසටෙ සති අජ්‌ඣත්‌තං අසණ්‌ඨිතෙ අනුපාදාය අපරිතස්‌සතො ආයතිං ජාතිජරාමරණදුක්‌ඛසමුදයසම්‌භවො න හොතී’’ති. එතමත්‌ථං භගවා අවොච. තත්‌ථෙතං ඉති වුච්‌චති –
‘‘Tathā tathā, bhikkhave, bhikkhu upaparikkheyya yathā yathāssa 2 upaparikkhato bahiddhā cassa viññāṇaṃ avikkhittaṃ avisaṭaṃ ajjhattaṃ asaṇṭhitaṃ anupādāya na paritasseyya. Bahiddhā, bhikkhave, viññāṇe avikkhitte avisaṭe sati ajjhattaṃ asaṇṭhite anupādāya aparitassato āyatiṃ jātijarāmaraṇadukkhasamudayasambhavo na hotī’’ti. Etamatthaṃ bhagavā avoca. Tatthetaṃ iti vuccati –
‘‘සත්‌තසඞ්‌ගප්‌පහීනස්‌ස, නෙත්‌තිච්‌ඡින්‌නස්‌ස භික්‌ඛුනො;
‘‘Sattasaṅgappahīnassa, netticchinnassa bhikkhuno;
වික්‌ඛීණො ජාතිසංසාරො, නත්‌ථි තස්‌ස පුනබ්‌භවො’’ති.
Vikkhīṇo jātisaṃsāro, natthi tassa punabbhavo’’ti.
අයම්‌පි අත්‌ථො වුත්‌තො භගවතා, ඉති මෙ සුතන්‌ති. පඤ්‌චමං.
Ayampi attho vutto bhagavatā, iti me sutanti. Pañcamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / ඉතිවුත්‌තක-අට්‌ඨකථා • Itivuttaka-aṭṭhakathā / 5. උපපරික්‌ඛසුත්‌තවණ්‌ණනා • 5. Upaparikkhasuttavaṇṇanā
