Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya

    ၇. ဥပသေနအာသီဝိသသုတ္တံ

    7. Upasenaāsīvisasuttaṃ

    ၆၉. ဧကံ သမယံ အာယသ္မာ စ သာရိပုတ္တော အာယသ္မာ စ ဥပသေနော ရာဇဂဟေ ဝိဟရန္တိ သီတဝနေ သပ္ပသောဏ္ဍိကပဗ္ဘာရေ။ တေန ခော ပန သမယေန အာယသ္မတော ဥပသေနသ္သ ကာယေ အာသီဝိသော ပတိတော ဟောတိ။ အထ ခော အာယသ္မာ ဥပသေနော ဘိက္ခူ အာမန္တေသိ – ‘‘ဧထ မေ, အာဝုသော, ဣမံ ကာယံ မဉ္စကံ အာရောပေတ္ဝာ ဗဟိဒ္ဓာ နီဟရထ။ ပုရာယံ ကာယော ဣဓေဝ ဝိကိရတိ; သေယ္ယထာပိ ဘုသမုဋ္ဌီ’’တိ။

    69. Ekaṃ samayaṃ āyasmā ca sāriputto āyasmā ca upaseno rājagahe viharanti sītavane sappasoṇḍikapabbhāre. Tena kho pana samayena āyasmato upasenassa kāye āsīviso patito hoti. Atha kho āyasmā upaseno bhikkhū āmantesi – ‘‘etha me, āvuso, imaṃ kāyaṃ mañcakaṃ āropetvā bahiddhā nīharatha. Purāyaṃ kāyo idheva vikirati; seyyathāpi bhusamuṭṭhī’’ti.

    ဧဝံ ဝုတ္တေ, အာယသ္မာ သာရိပုတ္တော အာယသ္မန္တံ ဥပသေနံ ဧတဒဝောစ – ‘‘န ခော ပန မယံ ပသ္သာမ အာယသ္မတော ဥပသေနသ္သ ကာယသ္သ ဝာ အညထတ္တံ ဣန္ဒ္ရိယာနံ ဝာ ဝိပရိဏာမံ။ အထ စ ပနာယသ္မာ ဥပသေနော ဧဝမာဟ – ‘ဧထ မေ, အာဝုသော, ဣမံ ကာယံ မဉ္စကံ အာရောပေတ္ဝာ ဗဟိဒ္ဓာ နီဟရထ။ ပုရာယံ ကာယော ဣဓေဝ ဝိကိရတိ; သေယ္ယထာပိ ဘုသမုဋ္ဌီ’’’တိ။ ‘‘ယသ္သ နူန, အာဝုသော သာရိပုတ္တ, ဧဝမသ္သ – ‘အဟံ စက္ခူတိ ဝာ မမ စက္ခူတိ ဝာ။ပေ.။ အဟံ ဇိဝ္ဟာတိ ဝာ မမ ဇိဝ္ဟာတိ ဝာ။ အဟံ မနောတိ ဝာ မမ မနောတိ ဝာ’။ တသ္သ, အာဝုသော သာရိပုတ္တ, သိယာ ကာယသ္သ ဝာ အညထတ္တံ ဣန္ဒ္ရိယာနံ ဝာ ဝိပရိဏာမော။ မယ္ဟဉ္စ ခော, အာဝုသော သာရိပုတ္တ, န ဧဝံ ဟောတိ – ‘အဟံ စက္ခူတိ ဝာ မမ စက္ခူတိ ဝာ။ပေ.။ အဟံ ဇိဝ္ဟာတိ ဝာ မမ ဇိဝ္ဟာတိ ဝာ။ပေ.။ အဟံ မနောတိ ဝာ မမ မနောတိ ဝာ’။ တသ္သ မယ္ဟဉ္စ ခော, အာဝုသော သာရိပုတ္တ, ကိံ ကာယသ္သ ဝာ အညထတ္တံ ဘဝိသ္သတိ, ဣန္ဒ္ရိယာနံ ဝာ ဝိပရိဏာမော’’တိ!

    Evaṃ vutte, āyasmā sāriputto āyasmantaṃ upasenaṃ etadavoca – ‘‘na kho pana mayaṃ passāma āyasmato upasenassa kāyassa vā aññathattaṃ indriyānaṃ vā vipariṇāmaṃ. Atha ca panāyasmā upaseno evamāha – ‘etha me, āvuso, imaṃ kāyaṃ mañcakaṃ āropetvā bahiddhā nīharatha. Purāyaṃ kāyo idheva vikirati; seyyathāpi bhusamuṭṭhī’’’ti. ‘‘Yassa nūna, āvuso sāriputta, evamassa – ‘ahaṃ cakkhūti vā mama cakkhūti vā…pe… ahaṃ jivhāti vā mama jivhāti vā… ahaṃ manoti vā mama manoti vā’. Tassa, āvuso sāriputta, siyā kāyassa vā aññathattaṃ indriyānaṃ vā vipariṇāmo. Mayhañca kho, āvuso sāriputta, na evaṃ hoti – ‘ahaṃ cakkhūti vā mama cakkhūti vā…pe… ahaṃ jivhāti vā mama jivhāti vā…pe… ahaṃ manoti vā mama manoti vā’. Tassa mayhañca kho, āvuso sāriputta, kiṃ kāyassa vā aññathattaṃ bhavissati, indriyānaṃ vā vipariṇāmo’’ti!

    ‘‘တထာ ဟိ ပနာယသ္မတော ဥပသေနသ္သ ဒီဃရတ္တံ အဟင္ကာရမမင္ကာရမာနာနုသယော သုသမူဟတော။ တသ္မာ အာယသ္မတော ဥပသေနသ္သ န ဧဝံ ဟောတိ – ‘အဟံ စက္ခူတိ ဝာ မမ စက္ခူတိ ဝာ။ပေ.။ အဟံ ဇိဝ္ဟာတိ ဝာ မမ ဇိဝ္ဟာတိ ဝာ။ပေ.။ အဟံ မနောတိ ဝာ မမ မနောတိ ဝာ’’’တိ။ အထ ခော တေ ဘိက္ခူ အာယသ္မတော ဥပသေနသ္သ ကာယံ မဉ္စကံ အာရောပေတ္ဝာ ဗဟိဒ္ဓာ နီဟရိံသု။ အထ ခော အာယသ္မတော ဥပသေနသ္သ ကာယော တတ္ထေဝ ဝိကိရိ; သေယ္ယထာပိ ဘုသမုဋ္ဌီတိ။ သတ္တမံ။

    ‘‘Tathā hi panāyasmato upasenassa dīgharattaṃ ahaṅkāramamaṅkāramānānusayo susamūhato. Tasmā āyasmato upasenassa na evaṃ hoti – ‘ahaṃ cakkhūti vā mama cakkhūti vā…pe… ahaṃ jivhāti vā mama jivhāti vā…pe… ahaṃ manoti vā mama manoti vā’’’ti. Atha kho te bhikkhū āyasmato upasenassa kāyaṃ mañcakaṃ āropetvā bahiddhā nīhariṃsu. Atha kho āyasmato upasenassa kāyo tattheva vikiri; seyyathāpi bhusamuṭṭhīti. Sattamaṃ.







    Related texts:



    အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၇. ဥပသေနအာသီဝိသသုတ္တဝဏ္ဏနာ • 7. Upasenaāsīvisasuttavaṇṇanā

    ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၇. ဥပသေနအာသီဝိသသုတ္တဝဏ္ဏနာ • 7. Upasenaāsīvisasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact