| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၈. ဥသ္သူရဘတ္တသုတ္တံ
8. Ussūrabhattasuttaṃ
၂၂၈. ‘‘ပဉ္စိမေ , ဘိက္ခဝေ, အာဒီနဝာ ဥသ္သူရဘတ္တေ ကုလေ။ ကတမေ ပဉ္စ? ယေ တေ အတိထီ ပာဟုနာ, တေ န ကာလေန ပဋိပူဇေန္တိ; ယာ တာ ဗလိပဋိဂ္ဂာဟိကာ ဒေဝတာ, တာ န ကာလေန ပဋိပူဇေန္တိ; ယေ တေ သမဏဗ္ရာဟ္မဏာ ဧကဘတ္တိကာ ရတ္တူပရတာ ဝိရတာ ဝိကာလဘောဇနာ, တေ န ကာလေန ပဋိပူဇေန္တိ; ဒာသကမ္မကရပောရိသာ ဝိမုခာ ကမ္မံ ကရောန္တိ; တာဝတကံယေဝ အသမယေန ဘုတ္တံ အနောဇဝန္တံ ဟောတိ။ ဣမေ ခော, ဘိက္ခဝေ, ပဉ္စ အာဒီနဝာ ဥသ္သူရဘတ္တေ ကုလေ။
228. ‘‘Pañcime , bhikkhave, ādīnavā ussūrabhatte kule. Katame pañca? Ye te atithī pāhunā, te na kālena paṭipūjenti; yā tā balipaṭiggāhikā devatā, tā na kālena paṭipūjenti; ye te samaṇabrāhmaṇā ekabhattikā rattūparatā viratā vikālabhojanā, te na kālena paṭipūjenti; dāsakammakaraporisā vimukhā kammaṃ karonti; tāvatakaṃyeva asamayena bhuttaṃ anojavantaṃ hoti. Ime kho, bhikkhave, pañca ādīnavā ussūrabhatte kule.
‘‘ပဉ္စိမေ, ဘိက္ခဝေ, အာနိသံသာ သမယဘတ္တေ ကုလေ။ ကတမေ ပဉ္စ? ယေ တေ အတိထီ ပာဟုနာ, တေ ကာလေန ပဋိပူဇေန္တိ; ယာ တာ ဗလိပဋိဂ္ဂာဟိကာ ဒေဝတာ, တာ ကာလေန ပဋိပူဇေန္တိ; ယေ တေ သမဏဗ္ရာဟ္မဏာ ဧကဘတ္တိကာ ရတ္တူပရတာ ဝိရတာ ဝိကာလဘောဇနာ, တေ ကာလေန ပဋိပူဇေန္တိ; ဒာသကမ္မကရပောရိသာ အဝိမုခာ ကမ္မံ ကရောန္တိ; တာဝတကံယေဝ သမယေန ဘုတ္တံ ဩဇဝန္တံ ဟောတိ။ ဣမေ ခော, ဘိက္ခဝေ, ပဉ္စ အာနိသံသာ သမယဘတ္တေ ကုလေ’’တိ။ အဋ္ဌမံ။
‘‘Pañcime, bhikkhave, ānisaṃsā samayabhatte kule. Katame pañca? Ye te atithī pāhunā, te kālena paṭipūjenti; yā tā balipaṭiggāhikā devatā, tā kālena paṭipūjenti; ye te samaṇabrāhmaṇā ekabhattikā rattūparatā viratā vikālabhojanā, te kālena paṭipūjenti; dāsakammakaraporisā avimukhā kammaṃ karonti; tāvatakaṃyeva samayena bhuttaṃ ojavantaṃ hoti. Ime kho, bhikkhave, pañca ānisaṃsā samayabhatte kule’’ti. Aṭṭhamaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၈. ဥသ္သူရဘတ္တသုတ္တဝဏ္ဏနာ • 8. Ussūrabhattasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၁၀. ပဌမဒီဃစာရိကသုတ္တာဒိဝဏ္ဏနာ • 1-10. Paṭhamadīghacārikasuttādivaṇṇanā
