| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
3. තතියපණ්‌ණාසකං
3. Tatiyapaṇṇāsakaṃ
(11) 1. වලාහකවග්‌ගො
(11) 1. Valāhakavaggo
1-2. වලාහකසුත්‌තද්‌වයවණ්‌ණනා
1-2. Valāhakasuttadvayavaṇṇanā
101-2. තතියපණ්‌ණාසකස්‌ස පඨමෙ ගජ්‌ජිතාති ථනිතා. තත්‌ථ ගජ්‌ජිත්‌වා නොවස්‌සනභාවො නාම පාපකො. මනුස්‌සා හි යදා දෙවො ගජ්‌ජති, තදා ‘‘සුවුට්‌ඨිතා භවිස්‌සතී’’ති බීජානි නීහරිත්‌වා වපන්‌ති. අථ දෙවෙ අවස්‌සන්‌තෙ ඛෙත්‌තෙ බීජානි ඛෙත්‌තෙයෙව නස්‌සන්‌ති, ගෙහෙ බීජානි ගෙහෙයෙව නස්‌සන්‌තීති දුබ්‌භික්‌ඛං හොති. නොගජ්‌ජිත්‌වා වස්‌සනභාවොපි පාපකො. මනුස්‌සා හි ඉමස්‌මිං කාලෙ ‘‘දුබ්‌බුට්‌ඨිකා භවිස්‌සතී’’ති නින්‌නට්‌ඨානෙසුයෙව වප්‌පං කරොන්‌ති. අථ දෙවො වස්‌සිත්‌වා සබ්‌බබීජානි මහාසමුද්‌දං පාපෙති, දුබ්‌භික්‌ඛමෙව හොති. ගජ්‌ජිත්‌වා වස්‌සනභාවො පන භද්‌දකො. තදා හි සුභික්‌ඛං හොති. නොගජ්‌ජිත්‌වා නොවස්‌සනභාවො එකන්‌තපාපකොව. භාසිතා හොති නො කත්‌තාති ‘‘ඉදානි ගන්‌ථධුරං පූරෙස්‌සාමි, වාසධුරං පූරෙස්‌සාමී’’ති කථෙතියෙව, න උද්‌දෙසං ගණ්‌හාති, න කම්‌මට්‌ඨානං භාවෙති.
101-2. Tatiyapaṇṇāsakassa paṭhame gajjitāti thanitā. Tattha gajjitvā novassanabhāvo nāma pāpako. Manussā hi yadā devo gajjati, tadā ‘‘suvuṭṭhitā bhavissatī’’ti bījāni nīharitvā vapanti. Atha deve avassante khette bījāni khetteyeva nassanti, gehe bījāni geheyeva nassantīti dubbhikkhaṃ hoti. Nogajjitvā vassanabhāvopi pāpako. Manussā hi imasmiṃ kāle ‘‘dubbuṭṭhikā bhavissatī’’ti ninnaṭṭhānesuyeva vappaṃ karonti. Atha devo vassitvā sabbabījāni mahāsamuddaṃ pāpeti, dubbhikkhameva hoti. Gajjitvā vassanabhāvo pana bhaddako. Tadā hi subhikkhaṃ hoti. Nogajjitvā novassanabhāvo ekantapāpakova. Bhāsitā hoti no kattāti ‘‘idāni ganthadhuraṃ pūressāmi, vāsadhuraṃ pūressāmī’’ti kathetiyeva, na uddesaṃ gaṇhāti, na kammaṭṭhānaṃ bhāveti.
කත්‌තා හොති නො භාසිතාති ‘‘ගන්‌ථධුරං පූරෙස්‌සාමි, වාසධුරං වා’’ති න භාසති, සම්‌පත්‌තෙ පන කාලෙ සමත්‌තං සම්‌පාදෙති. ඉමිනා නයෙන ඉතරෙපි වෙදිතබ්‌බා. අථ වා සබ්‌බං පනෙතං පච්‌චයදායකෙහෙව කථිතං. එකො හි ‘‘අසුකදිවසෙ නාම දානං දස්‌සාමී’’ති සඞ්‌ඝං නිමන්‌තෙති, සම්‌පත්‌තෙ කාලෙ නො කරොති. අයං පුග්‌ගලො පුඤ්‌ඤෙන පරිහායති, භික්‌ඛුසඞ්‌ඝො පන ලාභෙන පරිහායති. අපරො සඞ්‌ඝං අනිමන්‌තෙත්‌වා සක්‌කාරං කත්‌වා ‘‘භික්‌ඛූ ආනෙස්‌සාමී’’ති න ලභි, සබ්‌බෙ අඤ්‌ඤත්‌ථ නිමන්‌තිතා හොන්‌ති. අයම්‌පි පුඤ්‌ඤෙන පරිහායති, සඞ්‌ඝොපි ලාභෙන පරිහායති. අපරො පඨමං සඞ්‌ඝං නිමන්‌තෙත්‌වා පච්‌ඡා සක්‌කාරං කත්‌වා දානං දෙති, අයං කිච්‌චකාරී හොති. අපරො නෙව සඞ්‌ඝං නිමන්‌තෙති, න දානං දෙති, අයං පාපපුග්‌ගලොති වෙදිතබ්‌බො. දුතියං උත්‌තානමෙව.
Kattā hoti no bhāsitāti ‘‘ganthadhuraṃ pūressāmi, vāsadhuraṃ vā’’ti na bhāsati, sampatte pana kāle samattaṃ sampādeti. Iminā nayena itarepi veditabbā. Atha vā sabbaṃ panetaṃ paccayadāyakeheva kathitaṃ. Eko hi ‘‘asukadivase nāma dānaṃ dassāmī’’ti saṅghaṃ nimanteti, sampatte kāle no karoti. Ayaṃ puggalo puññena parihāyati, bhikkhusaṅgho pana lābhena parihāyati. Aparo saṅghaṃ animantetvā sakkāraṃ katvā ‘‘bhikkhū ānessāmī’’ti na labhi, sabbe aññattha nimantitā honti. Ayampi puññena parihāyati, saṅghopi lābhena parihāyati. Aparo paṭhamaṃ saṅghaṃ nimantetvā pacchā sakkāraṃ katvā dānaṃ deti, ayaṃ kiccakārī hoti. Aparo neva saṅghaṃ nimanteti, na dānaṃ deti, ayaṃ pāpapuggaloti veditabbo. Dutiyaṃ uttānameva.
වලාහකසුත්‌තද්‌වයවණ්‌ණනා නිට්‌ඨිතා.
Valāhakasuttadvayavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya
1. පඨමවලාහකසුත්‌තං • 1. Paṭhamavalāhakasuttaṃ
2. දුතියවලාහකසුත්‌තං • 2. Dutiyavalāhakasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 1-2. වලාහකසුත්‌තද්‌වයවණ්‌ණනා • 1-2. Valāhakasuttadvayavaṇṇanā
