| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၄. ဝာသေဋ္ဌသုတ္တံ
4. Vāseṭṭhasuttaṃ
၄၄. ဧကံ သမယံ ဘဂဝာ ဝေသာလိယံ ဝိဟရတိ မဟာဝနေ ကူဋာဂာရသာလာယံ။ အထ ခော ဝာသေဋ္ဌော ဥပာသကော ယေန ဘဂဝာ တေနုပသင္ကမိ; ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ နိသီဒိ။ ဧကမန္တံ နိသိန္နံ ခော ဝာသေဋ္ဌံ ဥပာသကံ ဘဂဝာ ဧတဒဝောစ – ‘‘အဋ္ဌင္ဂသမန္နာဂတော, ဝာသေဋ္ဌ, ဥပောသထော ဥပဝုတ္ထော မဟပ္ဖလော ဟောတိ။ပေ.။ အနိန္ဒိတာ သဂ္ဂမုပေန္တိ ဌာန’’န္တိ။
44. Ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Atha kho vāseṭṭho upāsako yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho vāseṭṭhaṃ upāsakaṃ bhagavā etadavoca – ‘‘aṭṭhaṅgasamannāgato, vāseṭṭha, uposatho upavuttho mahapphalo hoti…pe… aninditā saggamupenti ṭhāna’’nti.
ဧဝံ ဝုတ္တေ ဝာသေဋ္ဌော ဥပာသကော ဘဂဝန္တံ ဧတဒဝောစ – ‘‘ပိယာ မေ, ဘန္တေ, ဉာတိသာလောဟိတာ အဋ္ဌင္ဂသမန္နာဂတံ ဥပောသထံ ဥပဝသေယ္ယုံ, ပိယာနမ္ပိ မေ အသ္သ ဉာတိသာလောဟိတာနံ ဒီဃရတ္တံ ဟိတာယ သုခာယ။ သဗ္ဗေ စေပိ, ဘန္တေ, ခတ္တိယာ အဋ္ဌင္ဂသမန္နာဂတံ ဥပောသထံ ဥပဝသေယ္ယုံ, သဗ္ဗေသမ္ပိသ္သ ခတ္တိယာနံ ဒီဃရတ္တံ ဟိတာယ သုခာယ။ သဗ္ဗေ စေပိ, ဘန္တေ, ဗ္ရာဟ္မဏာ။ပေ.။ ဝေသ္သာ ။ သုဒ္ဒာ အဋ္ဌင္ဂသမန္နာဂတံ ဥပောသထံ ဥပဝသေယ္ယုံ, သဗ္ဗေသမ္ပိသ္သ သုဒ္ဒာနံ ဒီဃရတ္တံ ဟိတာယ သုခာယာ’’တိ။
Evaṃ vutte vāseṭṭho upāsako bhagavantaṃ etadavoca – ‘‘piyā me, bhante, ñātisālohitā aṭṭhaṅgasamannāgataṃ uposathaṃ upavaseyyuṃ, piyānampi me assa ñātisālohitānaṃ dīgharattaṃ hitāya sukhāya. Sabbe cepi, bhante, khattiyā aṭṭhaṅgasamannāgataṃ uposathaṃ upavaseyyuṃ, sabbesampissa khattiyānaṃ dīgharattaṃ hitāya sukhāya. Sabbe cepi, bhante, brāhmaṇā…pe… vessā … suddā aṭṭhaṅgasamannāgataṃ uposathaṃ upavaseyyuṃ, sabbesampissa suddānaṃ dīgharattaṃ hitāya sukhāyā’’ti.
‘‘ဧဝမေတံ, ဝာသေဋ္ဌ, ဧဝမေတံ, ဝာသေဋ္ဌ! သဗ္ဗေ စေပိ, ဝာသေဋ္ဌ, ခတ္တိယာ အဋ္ဌင္ဂသမန္နာဂတံ ဥပောသထံ ဥပဝသေယ္ယုံ, သဗ္ဗေသမ္ပိသ္သ ခတ္တိယာနံ ဒီဃရတ္တံ ဟိတာယ သုခာယ။ သဗ္ဗေ စေပိ, ဝာသေဋ္ဌ, ဗ္ရာဟ္မဏာ။ပေ.။ ဝေသ္သာ။ သုဒ္ဒာ အဋ္ဌင္ဂသမန္နာဂတံ ဥပောသထံ ဥပဝသေယ္ယုံ, သဗ္ဗေသမ္ပိသ္သ သုဒ္ဒာနံ ဒီဃရတ္တံ ဟိတာယ သုခာယ။ သဒေဝကော စေပိ, ဝာသေဋ္ဌ, လောကော သမာရကော သဗ္ရဟ္မကော သသ္သမဏဗ္ရာဟ္မဏီ ပဇာ သဒေဝမနုသ္သာ အဋ္ဌင္ဂသမန္နာဂတံ ဥပောသထံ ဥပဝသေယ္ယုံ 1, သဒေဝကသ္သပိသ္သ 2 လောကသ္သ သမာရကသ္သ သဗ္ရဟ္မကသ္သ သသ္သမဏဗ္ရာဟ္မဏိယာ ပဇာယ သဒေဝမနုသ္သာယ ဒီဃရတ္တံ ဟိတာယ သုခာယ။ ဣမေ စေပိ, ဝာသေဋ္ဌ, မဟာသာလာ အဋ္ဌင္ဂသမန္နာဂတံ ဥပောသထံ ဥပဝသေယ္ယုံ, ဣမေသမ္ပိသ္သ မဟာသာလာနံ ဒီဃရတ္တံ ဟိတာယ သုခာယ ( ) 3။ ကော ပန ဝာဒော မနုသ္သဘူတသ္သာ’’တိ! စတုတ္ထံ။
‘‘Evametaṃ, vāseṭṭha, evametaṃ, vāseṭṭha! Sabbe cepi, vāseṭṭha, khattiyā aṭṭhaṅgasamannāgataṃ uposathaṃ upavaseyyuṃ, sabbesampissa khattiyānaṃ dīgharattaṃ hitāya sukhāya. Sabbe cepi, vāseṭṭha, brāhmaṇā…pe… vessā… suddā aṭṭhaṅgasamannāgataṃ uposathaṃ upavaseyyuṃ, sabbesampissa suddānaṃ dīgharattaṃ hitāya sukhāya. Sadevako cepi, vāseṭṭha, loko samārako sabrahmako sassamaṇabrāhmaṇī pajā sadevamanussā aṭṭhaṅgasamannāgataṃ uposathaṃ upavaseyyuṃ 4, sadevakassapissa 5 lokassa samārakassa sabrahmakassa sassamaṇabrāhmaṇiyā pajāya sadevamanussāya dīgharattaṃ hitāya sukhāya. Ime cepi, vāseṭṭha, mahāsālā aṭṭhaṅgasamannāgataṃ uposathaṃ upavaseyyuṃ, imesampissa mahāsālānaṃ dīgharattaṃ hitāya sukhāya ( ) 6. Ko pana vādo manussabhūtassā’’ti! Catutthaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၄. ဝာသေဋ္ဌသုတ္တဝဏ္ဏနာ • 4. Vāseṭṭhasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၈. သံခိတ္တူပောသထသုတ္တာဒိဝဏ္ဏနာ • 1-8. Saṃkhittūposathasuttādivaṇṇanā
