Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၂. ဒုတိယဝဂ္ဂော
2. Dutiyavaggo
၁. ဝတပဒသုတ္တံ
1. Vatapadasuttaṃ
၂၅၇. သာဝတ္ထိယံ ။ ‘‘သက္ကသ္သ, ဘိက္ခဝေ, ဒေဝာနမိန္ဒသ္သ ပုဗ္ဗေ မနုသ္သဘူတသ္သ သတ္တ ဝတပဒာနိ 1 သမတ္တာနိ သမာဒိန္နာနိ အဟေသုံ, ယေသံ သမာဒိန္နတ္တာ သက္ကော သက္ကတ္တံ အဇ္ဈဂာ။ ကတမာနိ သတ္တ ဝတပဒာနိ? ယာဝဇီဝံ မာတာပေတ္တိဘရော အသ္သံ, ယာဝဇီဝံ ကုလေ ဇေဋ္ဌာပစာယီ အသ္သံ, ယာဝဇီဝံ သဏ္ဟဝာစော အသ္သံ, ယာဝဇီဝံ အပိသုဏဝာစော အသ္သံ, ယာဝဇီဝံ ဝိဂတမလမစ္ဆေရေန စေတသာ အဂာရံ အဇ္ဈာဝသေယ္ယံ မုတ္တစာဂော ပယတပာဏိ ဝောသ္သဂ္ဂရတော ယာစယောဂော ဒာနသံဝိဘာဂရတော, ယာဝဇီဝံ သစ္စဝာစော အသ္သံ, ယာဝဇီဝံ အက္ကောဓနော အသ္သံ – သစေပိ မေ ကောဓော ဥပ္ပဇ္ဇေယ္ယ, ခိပ္ပမေဝ နံ ပဋိဝိနေယ္ယ’’န္တိ။ ‘‘သက္ကသ္သ, ဘိက္ခဝေ, ဒေဝာနမိန္ဒသ္သ ပုဗ္ဗေ မနုသ္သဘူတသ္သ ဣမာနိ သတ္တ ဝတပဒာနိ သမတ္တာနိ သမာဒိန္နာနိ အဟေသုံ, ယေသံ သမာဒိန္နတ္တာ သက္ကော သက္ကတ္တံ အဇ္ဈဂာ’’တိ။
257. Sāvatthiyaṃ . ‘‘Sakkassa, bhikkhave, devānamindassa pubbe manussabhūtassa satta vatapadāni 2 samattāni samādinnāni ahesuṃ, yesaṃ samādinnattā sakko sakkattaṃ ajjhagā. Katamāni satta vatapadāni? Yāvajīvaṃ mātāpettibharo assaṃ, yāvajīvaṃ kule jeṭṭhāpacāyī assaṃ, yāvajīvaṃ saṇhavāco assaṃ, yāvajīvaṃ apisuṇavāco assaṃ, yāvajīvaṃ vigatamalamaccherena cetasā agāraṃ ajjhāvaseyyaṃ muttacāgo payatapāṇi vossaggarato yācayogo dānasaṃvibhāgarato, yāvajīvaṃ saccavāco assaṃ, yāvajīvaṃ akkodhano assaṃ – sacepi me kodho uppajjeyya, khippameva naṃ paṭivineyya’’nti. ‘‘Sakkassa, bhikkhave, devānamindassa pubbe manussabhūtassa imāni satta vatapadāni samattāni samādinnāni ahesuṃ, yesaṃ samādinnattā sakko sakkattaṃ ajjhagā’’ti.
‘‘မာတာပေတ္တိဘရံ ဇန္တုံ၊ ကုလေ ဇေဋ္ဌာပစာယိနံ။
‘‘Mātāpettibharaṃ jantuṃ, kule jeṭṭhāpacāyinaṃ;
သဏ္ဟံ သခိလသမ္ဘာသံ၊ ပေသုဏေယ္ယပ္ပဟာယိနံ။
Saṇhaṃ sakhilasambhāsaṃ, pesuṇeyyappahāyinaṃ.
‘‘မစ္ဆေရဝိနယေ ယုတ္တံ၊ သစ္စံ ကောဓာဘိဘုံ နရံ။
‘‘Maccheravinaye yuttaṃ, saccaṃ kodhābhibhuṃ naraṃ;
တံ ဝေ ဒေဝာ တာဝတိံသာ၊ အာဟု သပ္ပုရိသော ဣတီ’’တိ။
Taṃ ve devā tāvatiṃsā, āhu sappuriso itī’’ti.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁. ဝတပဒသုတ္တဝဏ္ဏနာ • 1. Vatapadasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁. ဝတပဒသုတ္တဝဏ္ဏနာ • 1. Vatapadasuttavaṇṇanā