| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၉. ဝိဂ္ဂာဟိကကထာသုတ္တံ
9. Viggāhikakathāsuttaṃ
၁၀၇၉. ‘‘မာ , ဘိက္ခဝေ, ဝိဂ္ဂာဟိကကထံ ကထေယ္ယာထ 1 – ‘န တ္ဝံ ဣမံ ဓမ္မဝိနယံ အာဇာနာသိ, အဟံ ဣမံ ဓမ္မဝိနယံ အာဇာနာမိ။ ကိံ တ္ဝံ ဣမံ ဓမ္မဝိနယံ အာဇာနိသ္သသိ! မိစ္ဆာပဋိပန္နော တ္ဝမသိ, အဟမသ္မိ သမ္မာပဋိပန္နော။ သဟိတံ မေ, အသဟိတံ တေ။ ပုရေဝစနီယံ ပစ္ဆာ အဝစ, ပစ္ဆာဝစနီယံ ပုရေ အဝစ။ အဓိစိဏ္ဏံ 2 တေ ဝိပရာဝတ္တံ။ အာရောပိတော တေ ဝာဒော, စရ ဝာဒပ္ပမောက္ခာယ။ နိဂ္ဂဟိတောသိ, နိဗ္ဗေဌေဟိ ဝာ သစေ ပဟောသီ’တိ။ တံ ကိသ္သ ဟေတု? နေသာ, ဘိက္ခဝေ, ကထာ အတ္ထသံဟိတာ နာဒိဗ္ရဟ္မစရိယကာ န နိဗ္ဗိဒာယ န ဝိရာဂာယ န နိရောဓာယ န ဥပသမာယ န အဘိညာယ န သမ္ဗောဓာယ န နိဗ္ဗာနာယ သံဝတ္တတိ။
1079. ‘‘Mā , bhikkhave, viggāhikakathaṃ katheyyātha 3 – ‘na tvaṃ imaṃ dhammavinayaṃ ājānāsi, ahaṃ imaṃ dhammavinayaṃ ājānāmi. Kiṃ tvaṃ imaṃ dhammavinayaṃ ājānissasi! Micchāpaṭipanno tvamasi, ahamasmi sammāpaṭipanno. Sahitaṃ me, asahitaṃ te. Purevacanīyaṃ pacchā avaca, pacchāvacanīyaṃ pure avaca. Adhiciṇṇaṃ 4 te viparāvattaṃ. Āropito te vādo, cara vādappamokkhāya. Niggahitosi, nibbeṭhehi vā sace pahosī’ti. Taṃ kissa hetu? Nesā, bhikkhave, kathā atthasaṃhitā nādibrahmacariyakā na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati.
‘‘ကထေန္တာ စ ခော တုမ္ဟေ, ဘိက္ခဝေ, ‘ဣဒံ ဒုက္ခ’န္တိ ကထေယ္ယာထ , ‘အယံ ဒုက္ခသမုဒယော’တိ ကထေယ္ယာထ, ‘အယံ ဒုက္ခနိရောဓော’တိ ကထေယ္ယာထ, ‘အယံ ဒုက္ခနိရောဓဂာမိနီ ပဋိပဒာ’တိ ကထေယ္ယာထ။ပေ.။ ယောဂော ကရဏီယော’’တိ။ နဝမံ။
‘‘Kathentā ca kho tumhe, bhikkhave, ‘idaṃ dukkha’nti katheyyātha , ‘ayaṃ dukkhasamudayo’ti katheyyātha, ‘ayaṃ dukkhanirodho’ti katheyyātha, ‘ayaṃ dukkhanirodhagāminī paṭipadā’ti katheyyātha…pe… yogo karaṇīyo’’ti. Navamaṃ.
Footnotes:
