| Library / Tipiṭaka / තිපිටක • Tipiṭaka / පටිසම්‌භිදාමග්‌ගපාළි • Paṭisambhidāmaggapāḷi |
13. විමුත්‌තිඤාණනිද්‌දෙසො
13. Vimuttiñāṇaniddeso
64. කථං ඡින්‌නවටුමානුපස්‌සනෙ පඤ්‌ඤා විමුත්‌තිඤාණං? සොතාපත්‌තිමග්‌ගෙන සක්‌කායදිට්‌ඨි, විචිකිච්‌ඡා, සීලබ්‌බතපරාමාසො, දිට්‌ඨානුසයො, විචිකිච්‌ඡානුසයො අත්‌තනො චිත්‌තස්‌ස උපක්‌කිලෙසා සම්‌මා සමුච්‌ඡින්‌නා හොන්‌ති. ඉමෙහි පඤ්‌චහි උපක්‌කිලෙසෙහි සපරියුට්‌ඨානෙහි චිත්‌තං විමුත්‌තං හොති සුවිමුත්‌තං. තංවිමුත්‌ති ඤාතට්‌ඨෙන ඤාණං, පජානනට්‌ඨෙන පඤ්‌ඤා. තෙන වුච්‌චති – ‘‘ඡින්‌නවටුමානුපස්‌සනෙ පඤ්‌ඤා විමුත්‌තිඤාණං’’.
64. Kathaṃ chinnavaṭumānupassane paññā vimuttiñāṇaṃ? Sotāpattimaggena sakkāyadiṭṭhi, vicikicchā, sīlabbataparāmāso, diṭṭhānusayo, vicikicchānusayo attano cittassa upakkilesā sammā samucchinnā honti. Imehi pañcahi upakkilesehi sapariyuṭṭhānehi cittaṃ vimuttaṃ hoti suvimuttaṃ. Taṃvimutti ñātaṭṭhena ñāṇaṃ, pajānanaṭṭhena paññā. Tena vuccati – ‘‘chinnavaṭumānupassane paññā vimuttiñāṇaṃ’’.
සකදාගාමිමග්‌ගෙන ඔළාරිකං කාමරාගසඤ්‌ඤොජනං, පටිඝසඤ්‌ඤොජනං, ඔළාරිකො කාමරාගානුසයො, පටිඝානුසයො – අත්‌තනො චිත්‌තස්‌ස උපක්‌කිලෙසා සම්‌මා සමුච්‌ඡින්‌නා හොන්‌ති. ඉමෙහි චතූහි උපක්‌කිලෙසෙහි සපරියුට්‌ඨානෙහි චිත්‌තං විමුත්‌තං හොති සුවිමුත්‌තං. තංවිමුත්‌ති ඤාතට්‌ඨෙන ඤාණං, පජානනට්‌ඨෙන පඤ්‌ඤා. තෙන වුච්‌චති – ‘‘ඡින්‌නවටුමානුපස්‌සනෙ පඤ්‌ඤා විමුත්‌තිඤාණං’’.
Sakadāgāmimaggena oḷārikaṃ kāmarāgasaññojanaṃ, paṭighasaññojanaṃ, oḷāriko kāmarāgānusayo, paṭighānusayo – attano cittassa upakkilesā sammā samucchinnā honti. Imehi catūhi upakkilesehi sapariyuṭṭhānehi cittaṃ vimuttaṃ hoti suvimuttaṃ. Taṃvimutti ñātaṭṭhena ñāṇaṃ, pajānanaṭṭhena paññā. Tena vuccati – ‘‘chinnavaṭumānupassane paññā vimuttiñāṇaṃ’’.
අනාගාමිමග්‌ගෙන අනුසහගතං කාමරාගසඤ්‌ඤොජනං, පටිඝසඤ්‌ඤොජනං, අනුසහගතො කාමරාගානුසයො, පටිඝානුසයො – අත්‌තනො චිත්‌තස්‌ස උපක්‌කිලෙසා සම්‌මා සමුච්‌ඡින්‌නා හොන්‌ති. ඉමෙහි චතූහි උපක්‌කිලෙසෙහි සපරියුට්‌ඨානෙහි චිත්‌තං විමුත්‌තං හොති සුවිමුත්‌තං. තංවිමුත්‌ති ඤාතට්‌ඨෙන ඤාණං, පජානනට්‌ඨෙන පඤ්‌ඤා. තෙන වුච්‌චති – ‘‘ඡින්‌නවටුමානුපස්‌සනෙ පඤ්‌ඤා විමුත්‌තිඤාණං’’.
Anāgāmimaggena anusahagataṃ kāmarāgasaññojanaṃ, paṭighasaññojanaṃ, anusahagato kāmarāgānusayo, paṭighānusayo – attano cittassa upakkilesā sammā samucchinnā honti. Imehi catūhi upakkilesehi sapariyuṭṭhānehi cittaṃ vimuttaṃ hoti suvimuttaṃ. Taṃvimutti ñātaṭṭhena ñāṇaṃ, pajānanaṭṭhena paññā. Tena vuccati – ‘‘chinnavaṭumānupassane paññā vimuttiñāṇaṃ’’.
අරහත්‌තමග්‌ගෙන රූපරාගො, අරූපරාගො, මානො, උද්‌ධච්‌චං, අවිජ්‌ජා, මානානුසයො, භවරාගානුසයො, අවිජ්‌ජානුසයො – අත්‌තනො චිත්‌තස්‌ස උපක්‌කිලෙසා සම්‌මා සමුච්‌ඡින්‌නා හොන්‌ති. ඉමෙහි අට්‌ඨහි උපක්‌කිලෙසෙහි සපරියුට්‌ඨානෙහි චිත්‌තං විමුත්‌තං හොති සුවිමුත්‌තං. තංවිමුත්‌ති ඤාතට්‌ඨෙන ඤාණං, පජානනට්‌ඨෙන පඤ්‌ඤා. තෙන වුච්‌චති – ‘‘ඡින්‌නවටුමානුපස්‌සනෙ පඤ්‌ඤා විමුත්‌තිඤාණං’’. තං ඤාතට්‌ඨෙන ඤාණං, පජානනට්‌ඨෙන පඤ්‌ඤා. තෙන වුච්‌චති – ‘‘ඡින්‌නවටුමානුපස්‌සනෙ පඤ්‌ඤා විමුත්‌තිඤාණං’’.
Arahattamaggena rūparāgo, arūparāgo, māno, uddhaccaṃ, avijjā, mānānusayo, bhavarāgānusayo, avijjānusayo – attano cittassa upakkilesā sammā samucchinnā honti. Imehi aṭṭhahi upakkilesehi sapariyuṭṭhānehi cittaṃ vimuttaṃ hoti suvimuttaṃ. Taṃvimutti ñātaṭṭhena ñāṇaṃ, pajānanaṭṭhena paññā. Tena vuccati – ‘‘chinnavaṭumānupassane paññā vimuttiñāṇaṃ’’. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘chinnavaṭumānupassane paññā vimuttiñāṇaṃ’’.
විමුත්‌තිඤාණනිද්‌දෙසො තෙරසමො.
Vimuttiñāṇaniddeso terasamo.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / පටිසම්‌භිදාමග්‌ග-අට්‌ඨකථා • Paṭisambhidāmagga-aṭṭhakathā / 13. විමුත්‌තිඤාණනිද්‌දෙසවණ්‌ණනා • 13. Vimuttiñāṇaniddesavaṇṇanā
