Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၃. ဝိရဒ္ဓသုတ္တံ
3. Viraddhasuttaṃ
၃၉၉. ‘‘ယေသံ ကေသဉ္စိ, ဘိက္ခဝေ, စတ္တာရော သတိပဋ္ဌာနာ ဝိရဒ္ဓာ, ဝိရဒ္ဓော တေသံ အရိယော မဂ္ဂော 1 သမ္မာ ဒုက္ခက္ခယဂာမီ။ ယေသံ ကေသဉ္စိ, ဘိက္ခဝေ, စတ္တာရော သတိပဋ္ဌာနာ အာရဒ္ဓာ, အာရဒ္ဓော တေသံ အရိယော မဂ္ဂော သမ္မာ ဒုက္ခက္ခယဂာမီ။
399. ‘‘Yesaṃ kesañci, bhikkhave, cattāro satipaṭṭhānā viraddhā, viraddho tesaṃ ariyo maggo 2 sammā dukkhakkhayagāmī. Yesaṃ kesañci, bhikkhave, cattāro satipaṭṭhānā āraddhā, āraddho tesaṃ ariyo maggo sammā dukkhakkhayagāmī.
‘‘ကတမေ စတ္တာရော? ဣဓ, ဘိက္ခဝေ, ဘိက္ခု ကာယေ ကာယာနုပသ္သီ ဝိဟရတိ အာတာပီ သမ္ပဇာနော သတိမာ, ဝိနေယ္ယ လောကေ အဘိဇ္ဈာဒောမနသ္သံ; ဝေဒနာသု။ပေ.။ စိတ္တေ။ပေ.။ ဓမ္မေသု ဓမ္မာနုပသ္သီ ဝိဟရတိ အာတာပီ သမ္ပဇာနော သတိမာ, ဝိနေယ္ယ လောကေ အဘိဇ္ဈာဒောမနသ္သံ။ ယေသံ ကေသဉ္စိ , ဘိက္ခဝေ, ဣမေ စတ္တာရော သတိပဋ္ဌာနာ ဝိရဒ္ဓာ, ဝိရဒ္ဓော တေသံ အရိယော မဂ္ဂော သမ္မာ ဒုက္ခက္ခယဂာမီ။ ယေသံ ကေသဉ္စိ, ဘိက္ခဝေ, ဣမေ စတ္တာရော သတိပဋ္ဌာနာ အာရဒ္ဓာ, အာရဒ္ဓော တေသံ အရိယော မဂ္ဂော သမ္မာ ဒုက္ခက္ခယဂာမီ’’တိ။ တတိယံ။
‘‘Katame cattāro? Idha, bhikkhave, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṃ; vedanāsu…pe… citte…pe… dhammesu dhammānupassī viharati ātāpī sampajāno satimā, vineyya loke abhijjhādomanassaṃ. Yesaṃ kesañci , bhikkhave, ime cattāro satipaṭṭhānā viraddhā, viraddho tesaṃ ariyo maggo sammā dukkhakkhayagāmī. Yesaṃ kesañci, bhikkhave, ime cattāro satipaṭṭhānā āraddhā, āraddho tesaṃ ariyo maggo sammā dukkhakkhayagāmī’’ti. Tatiyaṃ.
Footnotes:
Related texts:
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၄. အနနုသ္သုတဝဂ္ဂဝဏ္ဏနာ • 4. Ananussutavaggavaṇṇanā