| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
12. වීරියලක්‌ඛණපඤ්‌හො
12. Vīriyalakkhaṇapañho
12. රාජා ආහ ‘‘භන්‌තෙ නාගසෙන, කිංලක්‌ඛණං වීරිය’’න්‌ති? ‘‘උපත්‌ථම්‌භනලක්‌ඛණං, මහාරාජ, වීරියං, වීරියූපත්‌ථම්‌භිතා සබ්‌බෙ කුසලා ධම්‌මා න පරිහායන්‌තී’’ති.
12. Rājā āha ‘‘bhante nāgasena, kiṃlakkhaṇaṃ vīriya’’nti? ‘‘Upatthambhanalakkhaṇaṃ, mahārāja, vīriyaṃ, vīriyūpatthambhitā sabbe kusalā dhammā na parihāyantī’’ti.
‘‘ඔපම්‌මං කරොහී’’ති. ‘‘යථා, මහාරාජ, පුරිසො ගෙහෙ පතන්‌තෙ අඤ්‌ඤෙන දාරුනා උපත්‌ථම්‌භෙය්‍ය, උපත්‌ථම්‌භිතං සන්‌තං එවං තං ගෙහං න පතෙය්‍ය. එවමෙව ඛො, මහාරාජ, උපත්‌ථම්‌භනලක්‌ඛණං වීරියං, වීරියූපත්‌ථම්‌භිතා සබ්‌බෙ කුසලා ධම්‌මා න පරිහායන්‌තී’’ති.
‘‘Opammaṃ karohī’’ti. ‘‘Yathā, mahārāja, puriso gehe patante aññena dārunā upatthambheyya, upatthambhitaṃ santaṃ evaṃ taṃ gehaṃ na pateyya. Evameva kho, mahārāja, upatthambhanalakkhaṇaṃ vīriyaṃ, vīriyūpatthambhitā sabbe kusalā dhammā na parihāyantī’’ti.
‘‘භිය්‍යො ඔපම්‌මං කරොහී’’ති. ‘‘යථා, මහාරාජ, පරිත්‌තකං සෙනං මහතී සෙනා භඤ්‌ජෙය්‍ය, තතො රාජා අඤ්‌ඤමඤ්‌ඤං අනුස්‌සාරෙය්‍ය අනුපෙසෙය්‍ය අත්‌තනො පරිත්‌තකාය සෙනාය බලං අනුපදං දදෙය්‍ය, තාය සද්‌ධිං පරිත්‌තකා සෙනා මහතිං සෙනං භඤ්‌ජෙය්‍ය. එවමෙව ඛො, මහාරාජ, උපත්‌ථම්‌භනලක්‌ඛණං වීරියං, වීරියූපත්‌ථම්‌භිතා සබ්‌බෙ කුසලා ධම්‌මා න පරිහායන්‌ති. භාසිතම්‌පෙතං , මහාරාජ, භගවතා – ‘වීරියවා ඛො, භික්‌ඛවෙ, අරියසාවකො අකුසලං පජහති, කුසලං භාවෙති. සාවජ්‌ජං පජහති, අනවජ්‌ජං භාවෙති. සුද්‌ධමත්‌තානං පරිහරතී’’’ති.
‘‘Bhiyyo opammaṃ karohī’’ti. ‘‘Yathā, mahārāja, parittakaṃ senaṃ mahatī senā bhañjeyya, tato rājā aññamaññaṃ anussāreyya anupeseyya attano parittakāya senāya balaṃ anupadaṃ dadeyya, tāya saddhiṃ parittakā senā mahatiṃ senaṃ bhañjeyya. Evameva kho, mahārāja, upatthambhanalakkhaṇaṃ vīriyaṃ, vīriyūpatthambhitā sabbe kusalā dhammā na parihāyanti. Bhāsitampetaṃ , mahārāja, bhagavatā – ‘vīriyavā kho, bhikkhave, ariyasāvako akusalaṃ pajahati, kusalaṃ bhāveti. Sāvajjaṃ pajahati, anavajjaṃ bhāveti. Suddhamattānaṃ pariharatī’’’ti.
‘‘කල්‌ලොසි, භන්‌තෙ නාගසෙනා’’ති.
‘‘Kallosi, bhante nāgasenā’’ti.
වීරියලක්‌ඛණපඤ්‌හො ද්‌වාදසමො.
Vīriyalakkhaṇapañho dvādasamo.
