| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
(၁၄) ၄. ယောဓာဇီဝဝဂ္ဂော
(14) 4. Yodhājīvavaggo
၁. ယောဓာဇီဝသုတ္တဝဏ္ဏနာ
1. Yodhājīvasuttavaṇṇanā
၁၃၄. စတုတ္ထသ္သ ပဌမေ ယုဒ္ဓံ ဥပဇီဝတီတိ ယောဓာဇီဝော။ ရာဇာရဟောတိ ရညော အနုစ္ဆဝိကော။ ရာဇဘောဂ္ဂောတိ ရညော ဥပဘောဂပရိဘောဂော။ အင္ဂန္တေဝ သင္ခ္ယံ ဂစ္ဆတီတိ ဟတ္ထော ဝိယ ပာဒော ဝိယ စ အဝသ္သံ ဣစ္ဆိတဗ္ဗတ္တာ အင္ဂန္တိ သင္ခ္ယံ ဂစ္ဆတိ။ ဒူရေ ပာတီ ဟောတီတိ ဥဒကေ ဥသဘမတ္တံ , ထလေ အဋ္ဌုသဘမတ္တံ, တတော ဝာ ဥတ္တရိန္တိ ဒူရေ ကဏ္ဍံ ပာတေတိ။ ဒုဋ္ဌဂာမဏိအဘယသ္သ ဟိ ယောဓာဇီဝော နဝဥသဘမတ္တံ ကဏ္ဍံ ပာတေသိ, ပစ္ဆိမဘဝေ ဗောဓိသတ္တော ယောဇနပ္ပမာဏံ။ အက္ခဏဝေဓီတိ အဝိရာဓိတဝေဓီ, အက္ခဏံ ဝာ ဝိဇ္ဇု ဝိဇ္ဇန္တရိကာယ ဝိဇ္ဈိတုံ သမတ္ထောတိ အတ္ထော။ မဟတော ကာယသ္သ ပဒာလေတာတိ ဧကတောဗဒ္ဓံ ဖလကသတမ္ပိ မဟိံသစမ္မသတမ္ပိ အင္ဂုဋ္ဌပမာဏဗဟလံ လောဟပဋ္ဋမ္ပိ စတုရင္ဂုလဗဟလံ အသနပဒရမ္ပိ ဝိဒတ္ထိဗဟလံ ဥဒုမ္ဗရပဒရမ္ပိ ဒီဃန္တေန ဝာလိကသကဋမ္ပိ ဝိနိဝိဇ္ဈိတုံ သမတ္ထောတိ အတ္ထော။ ယံကိဉ္စိ ရူပန္တိအာဒိ ဝိသုဒ္ဓိမဂ္ဂေ ဝိတ္ထာရိတမေဝ။ နေတံ မမာတိအာဒိ တဏ္ဟာမာနဒိဋ္ဌိပဋိက္ခေပဝသေန ဝုတ္တံ။ သမ္မပ္ပညာယ ပသ္သတီတိ သမ္မာ ဟေတုနာ ကာရဏေန သဟဝိပသ္သနာယ မဂ္ဂပညာယ ပသ္သတိ။ ပဒာလေတီတိ အရဟတ္တမဂ္ဂေန ပဒာလေတိ။
134. Catutthassa paṭhame yuddhaṃ upajīvatīti yodhājīvo. Rājārahoti rañño anucchaviko. Rājabhoggoti rañño upabhogaparibhogo. Aṅganteva saṅkhyaṃ gacchatīti hattho viya pādo viya ca avassaṃ icchitabbattā aṅganti saṅkhyaṃ gacchati. Dūre pātī hotīti udake usabhamattaṃ , thale aṭṭhusabhamattaṃ, tato vā uttarinti dūre kaṇḍaṃ pāteti. Duṭṭhagāmaṇiabhayassa hi yodhājīvo navausabhamattaṃ kaṇḍaṃ pātesi, pacchimabhave bodhisatto yojanappamāṇaṃ. Akkhaṇavedhīti avirādhitavedhī, akkhaṇaṃ vā vijju vijjantarikāya vijjhituṃ samatthoti attho. Mahato kāyassa padāletāti ekatobaddhaṃ phalakasatampi mahiṃsacammasatampi aṅguṭṭhapamāṇabahalaṃ lohapaṭṭampi caturaṅgulabahalaṃ asanapadarampi vidatthibahalaṃ udumbarapadarampi dīghantena vālikasakaṭampi vinivijjhituṃ samatthoti attho. Yaṃkiñci rūpantiādi visuddhimagge vitthāritameva. Netaṃ mamātiādi taṇhāmānadiṭṭhipaṭikkhepavasena vuttaṃ. Sammappaññāya passatīti sammā hetunā kāraṇena sahavipassanāya maggapaññāya passati. Padāletīti arahattamaggena padāleti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁. ယောဓာဇီဝသုတ္တံ • 1. Yodhājīvasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁. ယောဓာဇီဝသုတ္တဝဏ္ဏနာ • 1. Yodhājīvasuttavaṇṇanā
