| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
7. අඩ්‌ඩකරණසුත්‌තවණ්‌ණනා
7. Aḍḍakaraṇasuttavaṇṇanā
118. සත්‌තමෙ කාමහෙතූති කාමමූලකං. කාමනිදානන්‌ති කාමපච්‌චයා. කාමාධිකරණන්‌ති කාමකාරණා. සබ්‌බානි හෙතානි අඤ්‌ඤමඤ්‌ඤවෙවචනානෙව. භද්‍රමුඛොති සුන්‌දරමුඛො. එකදිවසං කිර රාජා අඩ්‌ඩකරණෙ නිසීදි. තත්‌ථ පඨමතරං ලඤ්‌ජං ගහෙත්‌වා නිසින්‌නා අමච්‌චා අස්‌සාමිකෙපි සාමිකෙ කරිංසු. රාජා තං ඤත්‌වා – ‘‘මය්‌හං තාව පථවිස්‌සරස්‌ස සම්‌මුඛාපෙතෙ එවං කරොන්‌ති, පරම්‌මුඛා කිං නාම න කරිස්‌සන්‌ති? පඤ්‌ඤායිස්‌සති දානි විටටූභො සෙනාපති සකෙන රජ්‌ජෙන, කිං මය්‌හං එවරූපෙහි ලඤ්‌ජඛාදකෙහි මුසාවාදීහි සද්‌ධිං එකට්‌ඨානෙ නිසජ්‌ජායා’’ති චින්‌තෙසි. තස්‌මා එවමාහ. ඛිප්‌පංව ඔඩ්‌ඩිතන්‌ති කුමිනං විය ඔඩ්‌ඩිතං. යථා මච්‌ඡා ඔඩ්‌ඩිතං කුමිනං පවිසන්‌තා න ජානන්‌ති, එවං සත්‌තා කිලෙසකාමෙන වත්‌ථුකාමං වීතික්‌කමන්‌තා න ජානන්‌තීති අත්‌ථො. සත්‌තමං.
118. Sattame kāmahetūti kāmamūlakaṃ. Kāmanidānanti kāmapaccayā. Kāmādhikaraṇanti kāmakāraṇā. Sabbāni hetāni aññamaññavevacanāneva. Bhadramukhoti sundaramukho. Ekadivasaṃ kira rājā aḍḍakaraṇe nisīdi. Tattha paṭhamataraṃ lañjaṃ gahetvā nisinnā amaccā assāmikepi sāmike kariṃsu. Rājā taṃ ñatvā – ‘‘mayhaṃ tāva pathavissarassa sammukhāpete evaṃ karonti, parammukhā kiṃ nāma na karissanti? Paññāyissati dāni viṭaṭūbho senāpati sakena rajjena, kiṃ mayhaṃ evarūpehi lañjakhādakehi musāvādīhi saddhiṃ ekaṭṭhāne nisajjāyā’’ti cintesi. Tasmā evamāha. Khippaṃva oḍḍitanti kuminaṃ viya oḍḍitaṃ. Yathā macchā oḍḍitaṃ kuminaṃ pavisantā na jānanti, evaṃ sattā kilesakāmena vatthukāmaṃ vītikkamantā na jānantīti attho. Sattamaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 7. අඩ්‌ඩකරණසුත්‌තං • 7. Aḍḍakaraṇasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 7. අඩ්‌ඩකරණසුත්‌තවණ්‌ණනා • 7. Aḍḍakaraṇasuttavaṇṇanā
