| Library / Tipiṭaka / තිපිටක • Tipiṭaka / ඉතිවුත්‌තකපාළි • Itivuttakapāḷi |
8. අන්‌ධකරණසුත්‌තං
8. Andhakaraṇasuttaṃ
87. වුත්‌තඤ්‌හෙතං භගවතා, වුත්‌තමරහතාති මෙ සුතං –
87. Vuttañhetaṃ bhagavatā, vuttamarahatāti me sutaṃ –
‘‘තයොමෙ , භික්‌ඛවෙ, අකුසලවිතක්‌කා අන්‌ධකරණා අචක්‌ඛුකරණා අඤ්‌ඤාණකරණා පඤ්‌ඤානිරොධිකා විඝාතපක්‌ඛිකා අනිබ්‌බානසංවත්‌තනිකා . කතමෙ තයො? කාමවිතක්‌කො, භික්‌ඛවෙ, අන්‌ධකරණො අචක්‌ඛුකරණො අඤ්‌ඤාණකරණො පඤ්‌ඤානිරොධිකො විඝාතපක්‌ඛිකො අනිබ්‌බානසංවත්‌තනිකො. බ්‍යාපාදවිතක්‌කො, භික්‌ඛවෙ, අන්‌ධකරණො අචක්‌ඛුකරණො අඤ්‌ඤාණකරණො පඤ්‌ඤානිරොධිකො විඝාතපක්‌ඛිකො අනිබ්‌බානසංවත්‌තනිකො. විහිංසාවිතක්‌කො, භික්‌ඛවෙ, අන්‌ධකරණො අචක්‌ඛුකරණො අඤ්‌ඤාණකරණො පඤ්‌ඤානිරොධිකො විඝාතපක්‌ඛිකො අනිබ්‌බානසංවත්‌තනිකො. ඉමෙ ඛො, භික්‌ඛවෙ, තයො අකුසලවිතක්‌කා අන්‌ධකරණා අචක්‌ඛුකරණා අඤ්‌ඤාණකරණා පඤ්‌ඤානිරොධිකා විඝාතපක්‌ඛිකා අනිබ්‌බානසංවත්‌තනිකා.
‘‘Tayome , bhikkhave, akusalavitakkā andhakaraṇā acakkhukaraṇā aññāṇakaraṇā paññānirodhikā vighātapakkhikā anibbānasaṃvattanikā . Katame tayo? Kāmavitakko, bhikkhave, andhakaraṇo acakkhukaraṇo aññāṇakaraṇo paññānirodhiko vighātapakkhiko anibbānasaṃvattaniko. Byāpādavitakko, bhikkhave, andhakaraṇo acakkhukaraṇo aññāṇakaraṇo paññānirodhiko vighātapakkhiko anibbānasaṃvattaniko. Vihiṃsāvitakko, bhikkhave, andhakaraṇo acakkhukaraṇo aññāṇakaraṇo paññānirodhiko vighātapakkhiko anibbānasaṃvattaniko. Ime kho, bhikkhave, tayo akusalavitakkā andhakaraṇā acakkhukaraṇā aññāṇakaraṇā paññānirodhikā vighātapakkhikā anibbānasaṃvattanikā.
‘‘තයොමෙ, භික්‌ඛවෙ, කුසලවිතක්‌කා අනන්‌ධකරණා චක්‌ඛුකරණා ඤාණකරණා පඤ්‌ඤාවුද්‌ධිකා අවිඝාතපක්‌ඛිකා නිබ්‌බානසංවත්‌තනිකා. කතමෙ තයො? නෙක්‌ඛම්‌මවිතක්‌කො, භික්‌ඛවෙ, අනන්‌ධකරණො චක්‌ඛුකරණො ඤාණකරණො පඤ්‌ඤාවුද්‌ධිකො අවිඝාතපක්‌ඛිකො නිබ්‌බානසංවත්‌තනිකො. අබ්‍යාපාදවිතක්‌කො, භික්‌ඛවෙ, අනන්‌ධකරණො චක්‌ඛුකරණො ඤාණකරණො පඤ්‌ඤාවුද්‌ධිකො අවිඝාතපක්‌ඛිකො නිබ්‌බානසංවත්‌තනිකො. අවිහිංසාවිතක්‌කො, භික්‌ඛවෙ, අනන්‌ධකරණො චක්‌ඛුකරණො ඤාණකරණො පඤ්‌ඤාවුද්‌ධිකො අවිඝාතපක්‌ඛිකො නිබ්‌බානසංවත්‌තනිකො. ඉමෙ ඛො, භික්‌ඛවෙ, තයො කුසලවිතක්‌කා අනන්‌ධකරණා චක්‌ඛුකරණා ඤාණකරණා පඤ්‌ඤාවුද්‌ධිකා අවිඝාතපක්‌ඛිකා නිබ්‌බානසංවත්‌තනිකා’’ති. එතමත්‌ථං භගවා අවොච. තත්‌ථෙතං ඉති වුච්‌චති –
‘‘Tayome, bhikkhave, kusalavitakkā anandhakaraṇā cakkhukaraṇā ñāṇakaraṇā paññāvuddhikā avighātapakkhikā nibbānasaṃvattanikā. Katame tayo? Nekkhammavitakko, bhikkhave, anandhakaraṇo cakkhukaraṇo ñāṇakaraṇo paññāvuddhiko avighātapakkhiko nibbānasaṃvattaniko. Abyāpādavitakko, bhikkhave, anandhakaraṇo cakkhukaraṇo ñāṇakaraṇo paññāvuddhiko avighātapakkhiko nibbānasaṃvattaniko. Avihiṃsāvitakko, bhikkhave, anandhakaraṇo cakkhukaraṇo ñāṇakaraṇo paññāvuddhiko avighātapakkhiko nibbānasaṃvattaniko. Ime kho, bhikkhave, tayo kusalavitakkā anandhakaraṇā cakkhukaraṇā ñāṇakaraṇā paññāvuddhikā avighātapakkhikā nibbānasaṃvattanikā’’ti. Etamatthaṃ bhagavā avoca. Tatthetaṃ iti vuccati –
‘‘තයො විතක්‌කෙ කුසලෙ විතක්‌කයෙ, තයො පන අකුසලෙ නිරාකරෙ;
‘‘Tayo vitakke kusale vitakkaye, tayo pana akusale nirākare;
ස වෙ විතක්‌කානි විචාරිතානි, සමෙති වුට්‌ඨීව රජං සමූහතං;
Sa ve vitakkāni vicāritāni, sameti vuṭṭhīva rajaṃ samūhataṃ;
ස වෙ විතක්‌කූපසමෙන චෙතසා, ඉධෙව සො සන්‌තිපදං සමජ්‌ඣගා’’ති.
Sa ve vitakkūpasamena cetasā, idheva so santipadaṃ samajjhagā’’ti.
අයම්‌පි අත්‌ථො වුත්‌තො භගවතා, ඉති මෙ සුතන්‌ති. අට්‌ඨමං.
Ayampi attho vutto bhagavatā, iti me sutanti. Aṭṭhamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / ඉතිවුත්‌තක-අට්‌ඨකථා • Itivuttaka-aṭṭhakathā / 8. අන්‌ධකරණසුත්‌තවණ්‌ණනා • 8. Andhakaraṇasuttavaṇṇanā
