| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၂. အနိစ္စနိဗ္ဗာနသပ္ပာယသုတ္တံ
2. Aniccanibbānasappāyasuttaṃ
၁၄၇. ‘‘နိဗ္ဗာနသပ္ပာယံ ဝော, ဘိက္ခဝေ, ပဋိပဒံ ဒေသေသ္သာမိ။ တံ သုဏာထ။ပေ.။ ကတမာ စ သာ, ဘိက္ခဝေ, နိဗ္ဗာနသပ္ပာယာ ပဋိပဒာ? ဣဓ, ဘိက္ခဝေ, ဘိက္ခု စက္ခုံ အနိစ္စန္တိ ပသ္သတိ, ရူပာ အနိစ္စာတိ ပသ္သတိ, စက္ခုဝိညာဏံ အနိစ္စန္တိ ပသ္သတိ, စက္ခုသမ္ဖသ္သော အနိစ္စောတိ ပသ္သတိ။ ယမ္ပိဒံ စက္ခုသမ္ဖသ္သပစ္စယာ ဥပ္ပဇ္ဇတိ ဝေဒယိတံ သုခံ ဝာ ဒုက္ခံ ဝာ အဒုက္ခမသုခံ ဝာ တမ္ပိ အနိစ္စန္တိ ပသ္သတိ။ပေ.။ ဇိဝ္ဟာ အနိစ္စာတိ ပသ္သတိ, ရသာ အနိစ္စာတိ ပသ္သတိ, ဇိဝ္ဟာဝိညာဏံ အနိစ္စန္တိ ပသ္သတိ, ဇိဝ္ဟာသမ္ဖသ္သော အနိစ္စောတိ ပသ္သတိ , ယမ္ပိဒံ ဇိဝ္ဟာသမ္ဖသ္သပစ္စယာ ဥပ္ပဇ္ဇတိ ဝေဒယိတံ သုခံ ဝာ ဒုက္ခံ ဝာ အဒုက္ခမသုခံ ဝာ တမ္ပိ အနိစ္စန္တိ ပသ္သတိ။ပေ.။ မနော အနိစ္စောတိ ပသ္သတိ, ဓမ္မာ အနိစ္စာတိ ပသ္သတိ, မနောဝိညာဏံ အနိစ္စန္တိ ပသ္သတိ, မနောသမ္ဖသ္သော အနိစ္စောတိ ပသ္သတိ, ယမ္ပိဒံ မနောသမ္ဖသ္သပစ္စယာ ဥပ္ပဇ္ဇတိ ဝေဒယိတံ သုခံ ဝာ ဒုက္ခံ ဝာ အဒုက္ခမသုခံ ဝာ တမ္ပိ အနိစ္စန္တိ ပသ္သတိ။ အယံ ခော သာ, ဘိက္ခဝေ, နိဗ္ဗာနသပ္ပာယာ ပဋိပဒာ’’တိ။ ဒုတိယံ။
147. ‘‘Nibbānasappāyaṃ vo, bhikkhave, paṭipadaṃ desessāmi. Taṃ suṇātha…pe… katamā ca sā, bhikkhave, nibbānasappāyā paṭipadā? Idha, bhikkhave, bhikkhu cakkhuṃ aniccanti passati, rūpā aniccāti passati, cakkhuviññāṇaṃ aniccanti passati, cakkhusamphasso aniccoti passati. Yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccanti passati…pe… jivhā aniccāti passati, rasā aniccāti passati, jivhāviññāṇaṃ aniccanti passati, jivhāsamphasso aniccoti passati , yampidaṃ jivhāsamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccanti passati…pe… mano aniccoti passati, dhammā aniccāti passati, manoviññāṇaṃ aniccanti passati, manosamphasso aniccoti passati, yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccanti passati. Ayaṃ kho sā, bhikkhave, nibbānasappāyā paṭipadā’’ti. Dutiyaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၂-၅. အနိစ္စနိဗ္ဗာနသပ္ပာယသုတ္တာဒိဝဏ္ဏနာ • 2-5. Aniccanibbānasappāyasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၂-၅. အနိစ္စနိဗ္ဗာနသပ္ပာယသုတ္တာဒိဝဏ္ဏနာ • 2-5. Aniccanibbānasappāyasuttādivaṇṇanā
