| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
10. අනිච්‌චසඤ්‌ඤාසුත්‌තවණ්‌ණනා
10. Aniccasaññāsuttavaṇṇanā
102. දසමෙ අනිච්‌චසඤ්‌ඤාති අනිච්‌චං අනිච්‌චන්‌ති භාවෙන්‌තස්‌ස උප්‌පන්‌නසඤ්‌ඤා. පරියාදියතීති ඛෙපයති. සබ්‌බං අස්‌මිමානන්‌ති නවවිධං අස්‌මිමානං. මූලසන්‌තානකානීති සන්‌තානෙත්‌වා ඨිතමූලානි. මහානඞ්‌ගලං විය හි අනිච්‌චසඤ්‌ඤා, ඛුද්‌දානුඛුද්‌දකානි මූලසන්‌තානකානි විය කිලෙසා, යථා කස්‌සකො කසන්‌තො නඞ්‌ගලෙන තානි පදාලෙති, එවං යොගී අනිච්‌චසඤ්‌ඤං භාවෙන්‌තො අනිච්‌චසඤ්‌ඤාඤාණෙන කිලෙසෙ පදාලෙතීති ඉදමෙත්‌ථ ඔපම්‌මසංසන්‌දනං.
102. Dasame aniccasaññāti aniccaṃ aniccanti bhāventassa uppannasaññā. Pariyādiyatīti khepayati. Sabbaṃ asmimānanti navavidhaṃ asmimānaṃ. Mūlasantānakānīti santānetvā ṭhitamūlāni. Mahānaṅgalaṃ viya hi aniccasaññā, khuddānukhuddakāni mūlasantānakāni viya kilesā, yathā kassako kasanto naṅgalena tāni padāleti, evaṃ yogī aniccasaññaṃ bhāvento aniccasaññāñāṇena kilese padāletīti idamettha opammasaṃsandanaṃ.
ඔධුනාතීති හෙට්‌ඨා ධුනාති. නිද්‌ධුනාතීති පප්‌ඵොටෙති. නිච්‌ඡොටෙතීති පප්‌ඵොටෙත්‌වා ඡඩ්‌ඩෙති. ඉධාපි පබ්‌බජානි විය කිලෙසා, ලායනං නිච්‌ඡොටනං විය අනිච්‌චසඤ්‌ඤාඤාණන්‌ති ඉමිනා අත්‌ථෙන උපමා සංසන්‌දෙතබ්‌බා.
Odhunātīti heṭṭhā dhunāti. Niddhunātīti papphoṭeti. Nicchoṭetīti papphoṭetvā chaḍḍeti. Idhāpi pabbajāni viya kilesā, lāyanaṃ nicchoṭanaṃ viya aniccasaññāñāṇanti iminā atthena upamā saṃsandetabbā.
වණ්‌ටච්‌ඡින්‌නායාති තිණ්‌හෙන ඛුරප්‌පෙන වණ්‌ටච්‌ඡින්‌නාය. තදන්‌වයානි භවන්‌තීති තං අම්‌බපිණ්‌ඩිං අනුගච්‌ඡන්‌ති, තස්‌සා පතමානාය අම්‌බානි භූමියං පතන්‌ති. ඉධාපි අම්‌බපිණ්‌ඩි විය කිලෙසා, තිණ්‌හඛුරප්‌පො විය අනිච්‌චසඤ්‌ඤා, යථා ඛුරප්‌පෙන ඡින්‌නාය අම්‌බපිණ්‌ඩියා සබ්‌බානි අම්‌බානි භූමියං පතන්‌ති, එවං අනිච්‌චසඤ්‌ඤාඤාණෙන කිලෙසානං මූලභූතාය අවිජ්‌ජාය ඡින්‌නාය සබ්‌බකිලෙසා සමුග්‌ඝාතං ගච්‌ඡන්‌තීති, ඉදං ඔපම්‌මසංසන්‌දනං.
Vaṇṭacchinnāyāti tiṇhena khurappena vaṇṭacchinnāya. Tadanvayāni bhavantīti taṃ ambapiṇḍiṃ anugacchanti, tassā patamānāya ambāni bhūmiyaṃ patanti. Idhāpi ambapiṇḍi viya kilesā, tiṇhakhurappo viya aniccasaññā, yathā khurappena chinnāya ambapiṇḍiyā sabbāni ambāni bhūmiyaṃ patanti, evaṃ aniccasaññāñāṇena kilesānaṃ mūlabhūtāya avijjāya chinnāya sabbakilesā samugghātaṃ gacchantīti, idaṃ opammasaṃsandanaṃ.
කූටඞ්‌ගමාති කූටං ගච්‌ඡන්‌ති. කූටනින්‌නාති කූටං පවිසනභාවෙන කූටෙ නින්‌නා. කූටසමොසරණාති කූටෙ සමොසරිත්‌වා ඨිතා. ඉධාපි කූටං විය අනිච්‌චසඤ්‌ඤා, ගොපානසියො විය චතුභූමකකුසලධම්‌මා, යථා සබ්‌බගොපානසීනං කූටං අග්‌ගං, එවං කුසලධම්‌මානං අනිච්‌චසඤ්‌ඤා අග්‌ගා. නනු ච අනිච්‌චසඤ්‌ඤා ලොකියා, සා ලොකියකුසලානං තාව අග්‌ගං හොතු, ලොකුත්‌තරානං කථං අග්‌ගන්‌ති? තෙසම්‌පි පටිලාභකරණත්‌ථෙන අග්‌ගන්‌ති වෙදිතබ්‌බා. ඉමිනා උපායෙන සබ්‌බාසු උපමාසු ඔපම්‌මසංසන්‌දනං වෙදිතබ්‌බං. පුරිමාහි පනෙත්‌ථ තීහි අනිච්‌චසඤ්‌ඤාය කිච්‌චං, පච්‌ඡිමාහි බලන්‌ති. දසමං.
Kūṭaṅgamāti kūṭaṃ gacchanti. Kūṭaninnāti kūṭaṃ pavisanabhāvena kūṭe ninnā. Kūṭasamosaraṇāti kūṭe samosaritvā ṭhitā. Idhāpi kūṭaṃ viya aniccasaññā, gopānasiyo viya catubhūmakakusaladhammā, yathā sabbagopānasīnaṃ kūṭaṃ aggaṃ, evaṃ kusaladhammānaṃ aniccasaññā aggā. Nanu ca aniccasaññā lokiyā, sā lokiyakusalānaṃ tāva aggaṃ hotu, lokuttarānaṃ kathaṃ agganti? Tesampi paṭilābhakaraṇatthena agganti veditabbā. Iminā upāyena sabbāsu upamāsu opammasaṃsandanaṃ veditabbaṃ. Purimāhi panettha tīhi aniccasaññāya kiccaṃ, pacchimāhi balanti. Dasamaṃ.
පුප්‌ඵවග්‌ගො දසමො.
Pupphavaggo dasamo.
මජ්‌ඣිමපණ්‌ණාසකො සමත්‌තො.
Majjhimapaṇṇāsako samatto.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 10. අනිච්‌චසඤ්‌ඤාසුත්‌තං • 10. Aniccasaññāsuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 10. අනිච්‌චසඤ්‌ඤාසුත්‌තවණ්‌ණනා • 10. Aniccasaññāsuttavaṇṇanā
