| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
10. අනිච්‌චසඤ්‌ඤාසුත්‌තවණ්‌ණනා
10. Aniccasaññāsuttavaṇṇanā
102. භාවෙන්‌තස්‌සාති විපස්‌සනාය මග්‌ගං භාවෙන්‌තස්‌ස උප්‌පන්‌නසඤ්‌ඤා. තෙනාහ – ‘‘සබ්‌බං කාමරාගං පරියාදියතී’’තිආදි. සන්‌තානෙත්‌වාති කසනට්‌ඨානං සබ්‌බසො විතනෙත්‌වා පත්‌ථරිත්‌වා. කිලෙසාති උපක්‌කිලෙසප්‌පභෙදා කිලෙසා. අනිච්‌චසඤ්‌ඤාඤාණෙනාති අනිච්‌චසඤ්‌ඤාසහගතෙන ඤාණෙන.
102.Bhāventassāti vipassanāya maggaṃ bhāventassa uppannasaññā. Tenāha – ‘‘sabbaṃ kāmarāgaṃ pariyādiyatī’’tiādi. Santānetvāti kasanaṭṭhānaṃ sabbaso vitanetvā pattharitvā. Kilesāti upakkilesappabhedā kilesā. Aniccasaññāñāṇenāti aniccasaññāsahagatena ñāṇena.
ලායනන්‌ති ලායනං විය නයනං විය නිච්‌ඡොටනං විය ච අනිච්‌චසඤ්‌ඤාඤාණං. ඉමිනා අත්‌ථෙනාති ඉමිනා යථාවුත්‌තෙන පාළියා අත්‌ථෙන, උපමා සංසන්‌දෙතබ්‌බාති එත්‌ථ පබ්‌බජලායකො විය යොගාවචරො. ලායනාදිනා තස්‌ස තත්‌ථ කතකිච්‌චතාය පරිතුට්‌ඨි විය ඉමස්‌ස කිලෙසෙ සබ්‌බසො ඡින්‌දිත්‌වා ඵලසමාපත්‌තිසුඛෙන කාලස්‌ස වීතිනාමනා.
Lāyananti lāyanaṃ viya nayanaṃ viya nicchoṭanaṃ viya ca aniccasaññāñāṇaṃ. Iminā atthenāti iminā yathāvuttena pāḷiyā atthena, upamā saṃsandetabbāti ettha pabbajalāyako viya yogāvacaro. Lāyanādinā tassa tattha katakiccatāya parituṭṭhi viya imassa kilese sabbaso chinditvā phalasamāpattisukhena kālassa vītināmanā.
කූටං ගච්‌ඡන්‌තීති පාරිමන්‌තෙන කූටං ගච්‌ඡන්‌ති. කූටං පවිසනභාවෙනාති කූටච්‌ඡිද්‌දං අග්‌ගෙන පවිසනවසෙන. සමොසරිත්‌වාති ඡිද්‌දෙ අනුපවිසනවසෙන ච ආහච්‌ච අවට්‌ඨානෙන ච සමොසරිත්‌වා ඨිතා. කූටං විය අනිච්‌චසඤ්‌ඤා අනිච්‌චානුපස්‌සනාවසෙන අවට්‌ඨානස්‌ස මූලභාවතො. ගොපානසියො විය චතුභූමකකුසලා ධම්‌මා අනිච්‌චසඤ්‌ඤාමූලකත්‌තා. කූටං අග්‌ගං සබ්‌බගොපානසීනං තථාඅධිට්‌ඨානස්‌ස පධානකාරණත්‌තා. අනිච්‌චසඤ්‌ඤා අග්‌ගාති එත්‌ථාපි එසෙව නයො. අනිච්‌චසඤ්‌ඤා ලොකියාති ඉදං අනිච්‌චසඤ්‌ඤානුපස්‌සනං සන්‌ධාය වුත්‌තං. අනිච්‌චානුපස්‌සනාමුඛෙන අධිගතඅරියමග්‌ගෙ උප්‌පන්‌නසඤ්‌ඤා අනිච්‌චසඤ්‌ඤාති වත්‌තබ්‌බතං ලභතීති ‘‘අනිච්‌චසඤ්‌ඤා, භික්‌ඛවෙ, භාවිතා බහුලීකතා සබ්‌බං කාමරාගං පරියාදියතී’’තිආදි වුත්‌තං. තථා හි ධම්‌මසඞ්‌ගහෙ (ධ. ස. 357, 360) ‘‘යස්‌මිං සමයෙ ලොකුත්‌තරං සඤ්‌ඤං භාවෙතී’’තිආදිනා සඤ්‌ඤාපි උද්‌ධටා. සබ්‌බාසු උපමාසූති මූලසන්‌තානඋපමාදීසු පඤ්‌චසු උපමාසු. පුරිමාහීති කස්‌සකපබ්‌බජලායනඅම්‌බපිණ්‌ඩිඋපමාහි අනිච්‌චසඤ්‌ඤාය කිච්‌චං වුත්‌තං මූලසන්‌තානකපදාලනපබ්‌බජලායනවණ්‌ටච්‌ඡෙදනපදෙසෙන අනිච්‌චසඤ්‌ඤාය පටිපක්‌ඛපච්‌ඡෙදනස්‌ස දස්‌සිතත්‌තා. පච්‌ඡිමාහි බලං දස්‌සිතං පටිපක්‌ඛාතිභාවස්‌ස ජොතිතත්‌තා.
Kūṭaṃ gacchantīti pārimantena kūṭaṃ gacchanti. Kūṭaṃ pavisanabhāvenāti kūṭacchiddaṃ aggena pavisanavasena. Samosaritvāti chidde anupavisanavasena ca āhacca avaṭṭhānena ca samosaritvā ṭhitā. Kūṭaṃ viya aniccasaññā aniccānupassanāvasena avaṭṭhānassa mūlabhāvato. Gopānasiyo viya catubhūmakakusalā dhammā aniccasaññāmūlakattā. Kūṭaṃ aggaṃ sabbagopānasīnaṃ tathāadhiṭṭhānassa padhānakāraṇattā. Aniccasaññā aggāti etthāpi eseva nayo. Aniccasaññā lokiyāti idaṃ aniccasaññānupassanaṃ sandhāya vuttaṃ. Aniccānupassanāmukhena adhigataariyamagge uppannasaññā aniccasaññāti vattabbataṃ labhatīti ‘‘aniccasaññā, bhikkhave, bhāvitā bahulīkatā sabbaṃ kāmarāgaṃ pariyādiyatī’’tiādi vuttaṃ. Tathā hi dhammasaṅgahe (dha. sa. 357, 360) ‘‘yasmiṃ samaye lokuttaraṃ saññaṃ bhāvetī’’tiādinā saññāpi uddhaṭā. Sabbāsu upamāsūti mūlasantānaupamādīsu pañcasu upamāsu. Purimāhīti kassakapabbajalāyanaambapiṇḍiupamāhi aniccasaññāya kiccaṃ vuttaṃ mūlasantānakapadālanapabbajalāyanavaṇṭacchedanapadesena aniccasaññāya paṭipakkhapacchedanassa dassitattā. Pacchimāhi balaṃ dassitaṃ paṭipakkhātibhāvassa jotitattā.
අනිච්‌චසඤ්‌ඤාසුත්‌තවණ්‌ණනා නිට්‌ඨිතා.
Aniccasaññāsuttavaṇṇanā niṭṭhitā.
පුප්‌ඵවග්‌ගවණ්‌ණනා නිට්‌ඨිතා.
Pupphavaggavaṇṇanā niṭṭhitā.
මජ්‌ඣිමපණ්‌ණාසකො සමත්‌තො.
Majjhimapaṇṇāsako samatto.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 10. අනිච්‌චසඤ්‌ඤාසුත්‌තං • 10. Aniccasaññāsuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 10. අනිච්‌චසඤ්‌ඤාසුත්‌තවණ්‌ණනා • 10. Aniccasaññāsuttavaṇṇanā
