| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
6-7. අන්‌තෙවාසිකසුත්‌තාදිවණ්‌ණනා
6-7. Antevāsikasuttādivaṇṇanā
151-152. අන්‌ත-සද්‌දො සමීපත්‌ථෙ වත්‌තති ‘‘උදකන්‌තං වනන්‌ත’’න්‌තිආදීසු, කිලෙසො පන අතිආසන්‌නෙ වසති අබ්‌භන්‌තරවුත්‌තිතායාති ‘‘අන්‌තෙවාසික’’න්‌ති වුත්‌තො විභත්‌තිඅලොපෙන යථා ‘‘වනෙකුසලො, කූලෙරුක්‌ඛා’’ති. තෙනාහ – ‘‘අනන්‌තෙවාසිකන්‌ති අන්‌තොවසනකිලෙසවිරහිත’’න්‌ති. ආචරණකකිලෙසවිරහිතන්‌ති සමුදාචරණකිලෙසරහිතං. අන්‌තො අස්‌ස වසන්‌තීති අස්‌ස පුග්‌ගලස්‌ස අන්‌තො අබ්‌භන්‌තරෙ චිත්‌තෙ වසන්‌ති පවත්‌තන්‌ති. තෙ එතං අධිභවන්‌තීති තෙ කිලෙසා එතං පුග්‌ගලං අභිභවිත්‌වා අත්‌තනො වසෙ වත්‌තෙන්‌ති. තෙනාහ – ‘‘අජ්‌ඣොත්‌ථරන්‌ති සික්‌ඛාපෙන්‌ති වා’’ති. තෙහි ආචරියෙහීති තෙහි කිලෙසසඞ්‌ඛාතෙහි සත්‌තෙ අත්‌තනො ගතියං ඨපෙන්‌තෙහි ආචරියෙහි. සත්‌තමං හෙට්‌ඨා කථිතනයමෙවාති යස්‌මා හෙට්‌ඨා ඛන්‌ධවසෙන දෙසනා ආගතා, ඉධ ආයතනවසෙනාති අයමෙව විසෙසො.
151-152. Anta-saddo samīpatthe vattati ‘‘udakantaṃ vananta’’ntiādīsu, kileso pana atiāsanne vasati abbhantaravuttitāyāti ‘‘antevāsika’’nti vutto vibhattialopena yathā ‘‘vanekusalo, kūlerukkhā’’ti. Tenāha – ‘‘anantevāsikanti antovasanakilesavirahita’’nti. Ācaraṇakakilesavirahitanti samudācaraṇakilesarahitaṃ. Antoassa vasantīti assa puggalassa anto abbhantare citte vasanti pavattanti. Te etaṃ adhibhavantīti te kilesā etaṃ puggalaṃ abhibhavitvā attano vase vattenti. Tenāha – ‘‘ajjhottharanti sikkhāpenti vā’’ti. Tehi ācariyehīti tehi kilesasaṅkhātehi satte attano gatiyaṃ ṭhapentehi ācariyehi. Sattamaṃ heṭṭhā kathitanayamevāti yasmā heṭṭhā khandhavasena desanā āgatā, idha āyatanavasenāti ayameva viseso.
අන්‌තෙවාසිකසුත්‌තාදිවණ්‌ණනා නිට්‌ඨිතා.
Antevāsikasuttādivaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya
6. අන්‌තෙවාසිකසුත්‌තං • 6. Antevāsikasuttaṃ
7. කිමත්‌ථියබ්‍රහ්‌මචරියසුත්‌තං • 7. Kimatthiyabrahmacariyasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 6-7. අන්‌තෙවාසිකසුත්‌තාදිවණ්‌ණනා • 6-7. Antevāsikasuttādivaṇṇanā
