| Library / Tipiṭaka / තිපිටක • Tipiṭaka / ඉතිවුත්‌තකපාළි • Itivuttakapāḷi |
11. ආපායිකසුත්‌තං
11. Āpāyikasuttaṃ
48. වුත්‌තඤ්‌හෙතං භගවතා, වුත්‌තමරහතාති මෙ සුතං –
48. Vuttañhetaṃ bhagavatā, vuttamarahatāti me sutaṃ –
‘‘ද්‌වෙමෙ, භික්‌ඛවෙ, ආපායිකා නෙරයිකා ඉදමප්‌පහාය. කතමෙ ද්‌වෙ? යො ච අබ්‍රහ්‌මචාරී බ්‍රහ්‌මචාරිපටිඤ්‌ඤො, යො ච පරිපුණ්‌ණං පරිසුද්‌ධං බ්‍රහ්‌මචරියං චරන්‌තං අමූලකෙන අබ්‍රහ්‌මචරියෙන අනුද්‌ධංසෙති. ඉමෙ ඛො, භික්‌ඛවෙ, ද්‌වෙ ආපායිකා නෙරයිකා ඉදමප්‌පහායා’’ති. එතමත්‌ථං භගවා අවොච. තත්‌ථෙතං ඉති වුච්‌චති –
‘‘Dveme, bhikkhave, āpāyikā nerayikā idamappahāya. Katame dve? Yo ca abrahmacārī brahmacāripaṭiñño, yo ca paripuṇṇaṃ parisuddhaṃ brahmacariyaṃ carantaṃ amūlakena abrahmacariyena anuddhaṃseti. Ime kho, bhikkhave, dve āpāyikā nerayikā idamappahāyā’’ti. Etamatthaṃ bhagavā avoca. Tatthetaṃ iti vuccati –
‘‘අභූතවාදී නිරයං උපෙති, යො වාපි කත්‌වා න කරොමි චාහ;
‘‘Abhūtavādī nirayaṃ upeti, yo vāpi katvā na karomi cāha;
උභොපි තෙ පෙච්‌ච සමා භවන්‌ති, නිහීනකම්‌මා මනුජා පරත්‌ථ.
Ubhopi te pecca samā bhavanti, nihīnakammā manujā parattha.
‘‘කාසාවකණ්‌ඨා බහවො, පාපධම්‌මා අසඤ්‌ඤතා;
‘‘Kāsāvakaṇṭhā bahavo, pāpadhammā asaññatā;
පාපා පාපෙහි කම්‌මෙහි, නිරයං තෙ උපපජ්‌ජරෙ.
Pāpā pāpehi kammehi, nirayaṃ te upapajjare.
‘‘සෙය්‍යො අයොගුළො භුත්‌තො, තත්‌තො අග්‌ගිසිඛූපමො;
‘‘Seyyo ayoguḷo bhutto, tatto aggisikhūpamo;
යඤ්‌චෙ භුඤ්‌ජෙය්‍ය දුස්‌සීලො, රට්‌ඨපිණ්‌ඩමසඤ්‌ඤතො’’ති.
Yañce bhuñjeyya dussīlo, raṭṭhapiṇḍamasaññato’’ti.
අයම්‌පි අත්‌ථො වුත්‌තො භගවතා, ඉති මෙ සුතන්‌ති. එකාදසමං.
Ayampi attho vutto bhagavatā, iti me sutanti. Ekādasamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / ඉතිවුත්‌තක-අට්‌ඨකථා • Itivuttaka-aṭṭhakathā / 11. ආපායිකසුත්‌තවණ්‌ණනා • 11. Āpāyikasuttavaṇṇanā
